ಕೇರಳ ಸಿಎಂ ಮಗಳನ್ನು ವಿವಾಹವಾಗಲಿರುವ ಡಿವೈಎಫ್ಐ ಅಧ್ಯಕ್ಷ ಮೊಹಮ್ಮದ್ ರಿಯಾಸ್
ತಿರುವನಂತಪುರ, ಜೂನ್ 10: ಕೇರಳದ ಮುಖ್ಯಮಂತ್ರಿ ಪಿಣರಾಯಿ ಮತ್ತು ಕಮಲಾ ವಿಜಯನ್ ದಂಪತಿಗಳ ಮಗಳು ವೀಣಾ ಅವರು ಡಿವೈಎಫ್ಐ ರಾಷ್ಟ್ರೀಯ ಅಧ್ಯಕ್ಷ ಮೊಹಮ್ಮದ್ ರಿಯಾಸ್ ಮದುವೆಯಾಗಲಿದ್ದಾರೆ. ಇವರ ವಿವಾಹ ಜೂನ್ 15 ರಂದು ತಿರುವನಂತಪುರದಲ್ಲಿ ನಡೆಯಲಿದೆ.
ಒರಾಕಲ್ , ಆರ್.ಪಿ ಟೆಕ್ ಸಾಪ್ಟ್ ಎಂಬ ಐಟಿ ಕಂಪನಿಗಳಲ್ಲಿ ಕೆಲಸ ಮಾಡಿದ್ದ ಕೇರಳದ ಮುಖ್ಯಮಂತ್ರಿ ಪಿಣರಾಯಿ ಮಗಳು ವೀಣಾ ಬೆಂಗಳೂರಿನಲ್ಲಿ ನೆಲೆಸಿದ್ದು, 6 ವರ್ಷಗಳ ಹಿಂದೆ ಎಕ್ಸ್ ಲಾಜಿಕ್ ಎಂಬ ಐಟಿ ಸಂಸ್ಥೆಯೊಂದನ್ನು ಹುಟ್ಟು ಹಾಕಿ ಅದನ್ನು ಮುನ್ನಡೆಸಿಕೊಂಡು ಬರುತ್ತಿದ್ದಾರೆ.
ಶಾಲೆ ಮತ್ತು ಕಾಲೇಜು ದಿನಗಳಲ್ಲಿ ರಾಜಕೀಯ ಪ್ರವೇಶಿಸಿದ ಮುಹಮ್ಮದ್ ರಿಯಾಸ್ ಈ ಹಿಂದೆ ಡಿವೈಎಫ್ಐನ ರಾಷ್ಟ್ರೀಯ ಜಂಟಿ ಕಾರ್ಯದರ್ಶಿಯಾಗಿದ್ದರು. ಫೆಬ್ರವರಿ 2017 ರಲ್ಲಿ ಅವರನ್ನು ಡಿವೈಎಫ್ಐ ಅಧ್ಯಕ್ಷರನ್ನಾಗಿ ನೇಮಿಸಲಾಯಿತು. ದೂರದರ್ಶನ ಸುದ್ದಿ ಚರ್ಚೆಗಳಲ್ಲಿ ರಿಯಾಸ್ ಆಗಾಗ್ಗೆ ಕಾಣಿಸಿಕೊಳ್ಳುವುದರೊಂದಿಗೆ ಕೇರಳದಲ್ಲಿ ಚಿರಪರಿಚಿತರಾಗಿದ್ದಾರೆ . ಮೇ 2017 ರಲ್ಲಿ, ಗೋ ಮಾಂಸ ನಿಷೇಧ ಜಾರಿಗೊಳಿಸಿದ ಕೇಂದ್ರದ ನಿರ್ಧಾರದ ವಿರುದ್ಧ ‘ಗೋಮಾಂಸ ಅಡುಗೆ’ ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದರು. 2009 ರ ಲೋಕಸಭಾ ಚುನಾವಣೆಯಲ್ಲಿ ರಿಯಾಸ್ ಸಿಪಿಐ (ಎಂ) ಅಭ್ಯರ್ಥಿಯಾಗಿ ಕೋಝಿಕೋಡ್ ಕ್ಷೇತ್ರದಿಂದ ಸ್ಪರ್ಧಿಸಿ ಯುಡಿಎಫ್ನ ಎಂ.ಕೆ.ರಾಘವನ್ ವಿರುದ್ಧ ಸುಮಾರು 800 ಮತಗಳ ಅಂತರದಿಂದ ಸೋಲನುಭವಿಸಿದ್ದರು.
ವರದಿಗಳ ಪ್ರಕಾರ, ಜೂನ್ 15 ರಂದು ತಿರುವನಂತಪುರದಲ್ಲಿ ಇವರ ವಿವಾಹವು ಆಪ್ತ ಸ್ನೇಹಿತರು ಮತ್ತು ಕುಟುಂಬಸ್ಥರ ಸಮ್ಮುಖದಲ್ಲಿ ಸಣ್ಣ ಸಮಾರಂಭದಲ್ಲಿ ನಡೆಯಲಿದೆ. ಮೊಹಮ್ಮದ್ ರಿಯಾಸ್ ಮತ್ತು ವೀಣಾ ಇಬ್ಬರಿಗೂ ಇದು ಎರಡನೆಯ ಮದುವೆಯಾಗಿದೆ.
