Fifa World Cup 2022 : ವಿಶ್ವಕಪ್ ವಿಜೇತ ಅರ್ಜೆಂಟೀನಾ ; ಪೆನಾಲ್ಟಿ ಶೂಟೌಟ್ ನಲ್ಲಿ ರೋಚಕ ಜಯ…
ಕತಾರ್ ನಲ್ಲಿ ನಡೆದ ಫಿಫಾ ವಿಶ್ವಕಪ್ ನ ಫೈನಲ್ ನಲ್ಲಿ 36 ವರ್ಷಗಳ ಬಳಿಕ ಅರ್ಜೆಂಟೀನಾ ಜಯಭೇರಿ ಬಾರಿಸಿದೆ. ಭಾನುವಾರ ರಾತ್ರಿ ಫ್ರಾನ್ಸ್ ವಿರುದ್ಧ ನಡೆದ ರೋಚಕ ಹಣಾಹಣಿಯಲ್ಲಿ ಪುಟ್ಬಾಲ್ ದಂತಕಥೆ ಲಿಯೋನಲ್ ಮೆಸ್ಸಿ ಗೆ ಅರ್ಜೆಂಟೀನಾ ಗೌರವದ ಮತ್ತು ಜೀವಮಾನದಲ್ಲಿ ನೆನಪಿಡಬಹುದಾದಂತಹ ವಿದಾಯ ಹೇಳಿದೆ.
ಪೆನಾಲ್ಟಿ ಶೂಟೌಟ್ಗೆ ಕಾರಣವಾದ ಈ ಪಂದ್ಯದಲ್ಲಿ ಅರ್ಜೆಂಟೀನಾ 4-2 ಗೋಲುಗಳಿಂದ ಫ್ರಾನ್ಸ್ ವಿರುದ್ಧ ಗೆದ್ದು ಬೀಗಿದೆ. ಪಂದ್ಯದ ಉದ್ದಕ್ಕೂ ಕುತೂಹಲ ಮೂಡಿಸಿದ್ದ ಈ ಪಂದ್ಯದಲ್ಲಿ ಉಭಯ ತಂಡಗಳ ಜಿದ್ದಾಜಿದ್ದಿನ ಹೋರಾಟ ನಡೆಸಿದವು. ಕೊನೆಯ ಕ್ಷಣದವರೆಗೂ ಹೋರಾಟ ರೋಚಕವಾಗಿ ಸಾಗಿತ್ತು. ಪಂದ್ಯದ ಮೊದಲಾರ್ಧದಲ್ಲಿ ಅರ್ಜೆಂಟೀನಾ ಪ್ರಾಬಲ್ಯ ಮುಂದುವರಿಸಿತು. ಏಕಕಾಲದಲ್ಲಿ ಎರಡು ಗೋಲುಗಳನ್ನು ಗಳಿಸಿ ತಂಡವನ್ನ ಕಟಟಿ ಹಾಕಿತ್ತು. ಅರ್ಜೆಂಟೀನಾದ ಸ್ಟಾರ್ ಆಟಗಾರ ಮೆಸ್ಸಿ ಮೊದಲ ಗೋಲು ಬಾರಿಸಿ ಅರ್ಜೆಂಟೀನಾ ಅಭಿಮಾನಿಗಳ ಹರ್ಷೋದ್ಘಾರಕ್ಕೆ ಕಾರಣವಾದರು. ಅರ್ಜೆಂಟೀನಾದ ಆಟಗಾರ ಡಿ-ಮಾರಿಯಾ ಮೊದಲಾರ್ಧದಲ್ಲಿ ಎರಡನೇ ಗೋಲು ಗಳಿಸಿ ಫ್ರಾನ್ಸ್ ಮೇಲೆ ಸಂಪೂರ್ಣ ಪ್ರಾಬಲ್ಯ ಸಾಧಿಸಿದರು.
ಮೊದಲಾರ್ಧದಲ್ಲಿ ಅರ್ಜೆಂಟೀನಾ 2-0 ಮುನ್ನಡೆ ಸಾಧಿಸಿದ್ದರಿಂದ ಮೆಸ್ಸಿ ಬಳಗಕ್ಕೆ ಸುಲಭ ಗೆಲುವಾಗಲಿದೆ ಎಂದೇ ಎಲ್ಲರು ಭಾವಿಸಿದ್ದರು. ದ್ವಿತೀಯಾರ್ಧದಲ್ಲಿ ಫ್ರಾನ್ಸ್ ಧೂಳು ಕೊಡವಿಕೊಂಡು ಮೇಲೆದ್ದಿತು. ಫ್ರಾನ್ಸ್ ತಂಡದ ಸ್ಟಾರ್ ಆಟಗಾರ ಎಂಬಪ್ಪೆ ಸತತ ಎರಡು ಗೋಲು ಗಳಿಸುವ ಮೂಲಕ ಅಷ್ಟು ಸುಲಭವಾಗಿ ಸೋಲೊಪ್ಪಿಕೊಲ್ಳುವುದಿಲ್ಲ ಎಂದು ಸವಾಲೊಡ್ಡಿದರು. ಹೀಗಾಗಿ ದ್ವಿತಿಯಾರ್ಧದ ನಿಗದಿತ ಸಮಯದ ಅಂತ್ಯಕ್ಕೆ ಫ್ರಾನ್ಸ್ ಕೂಡ ಎರಡು ಗೋಲು ಗಳಿಸಿ, ಸಮಯವನ್ನು 8 ನಿಮಿಷ ವಿಸ್ತರಿಸಿತು.
ಆದಾಗ್ಯೂ, ಪಾಯಿಂಟ್ ಗಳು ಸಮಬಲವಾಗಿದ್ದರಿಂದ ಮತ್ತೆ 30 ನಿಮಿಷಗಳ ಹೆಚ್ಚುವರಿ ಸಮಯವನ್ನು ನಿಗದಿಪಡಿಸಲಾಯಿತು. ಈ ಬಾರಿಯೂ ಪಂದ್ಯ 3-3ರಲ್ಲಿ ಸಮಬಲಗೊಂಡು ಪೆನಾಲ್ಟಿ ಶೂಟೌಟ್ಗೆ ಸಾಗಿತು. ಪೆನಾಲ್ಟಿ ಶೂಟೌಟ್ನಲ್ಲಿ ಮೆಸ್ಸಿ ತಂಡ ನಾಲ್ಕು ಗೋಲು ಗಳಿಸಿದರೆ, ಫ್ರಾನ್ಸ್ ಎರಡನೇ ಗೋಲು ಗಳಿಸಲು ಮಾತ್ರ ಯಶಸ್ವಿಯಾಯಿತು. ಇದರೊಂದಿಗೆ ಅರ್ಜೆಂಟೀನಾ ವಿಜಯಿಯಾಯಿತು.
Fifa World Cup 2022: World Cup winner Argentina; Thrilling win in penalty shootout…
