ಶ್ರೀಲಂಕಾದಲ್ಲಿ ಜುಲೈ 19ರಿಂದ ಮಹಿಳಾ ಏಷ್ಯಾಕಪ್ ಟಿ20 ಟೂರ್ನಿ ಆರಂಭವಾಗಲಿದೆ. ಮೊದಲ ದಿನವೇ ಭಾರತೀಯ ವನಿತೆಯರು ವೈರಿ ತಂಡ ಪಾಕ್ ನ್ನು ಎದುರಿಸಲಿದ್ದಾರೆ.
ಟೂರ್ನಿಯ ಉದ್ಘಾಟನಾ ಪಂದ್ಯದಲ್ಲಿ ಯುಎಇ ಹಾಗೂ ನೇಪಾಳ ತಂಡಗಳು ಪೈಪೋಟಿ ನಡೆಸಲಿವೆ. ಎರಡನೇ ಪಂದ್ಯದಲ್ಲಿ ಭಾರತ ತಂಡ ಪಾಕಿಸ್ತಾನ್ ವಿರುದ್ಧ ಸೆಣಸಾಟ ನಡೆಸಲಿದೆ. ಟಿ20 ಕ್ರಿಕೆಟ್ ನಲ್ಲಿ ಭಾರತ ಹಾಗೂ ಪಾಕಿಸ್ತಾನ್ ತಂಡಗಳು ಇಲ್ಲಿಯವರೆಗೆ 11 ಬಾರಿ ಮುಖಾಮುಖಿಯಾಗಿದ್ದು, ಭಾರತ ತಂಡ ಹೆಚ್ಚು ಬಾರಿ ಗೆಲುವು ಸಾಧಿಸಿದೆ. ನಾಳೆ ಕೂಡ ಭಾರತ ತಂಡವೇ ಗೆಲುವು ಸಾಧಿಸಲಿದೆ ಎಂದು ಹಲವರು ಭವಿಷ್ಯ ನುಡಿದಿದ್ದಾರೆ. ಕಪ್ ಗೆಲ್ಲುವ ಫೆವರೀಟ್ ತಂಡ ಕೂಡ ಭಾರತ ಎನಿಸಿಕೊಂಡಿದೆ.
ಪಂದ್ಯವು ಬಾರತೀಯ ಕಾಲಮಾನ ರಾತ್ರಿ 7 ಗಂಟೆಗೆ ಆರಂಭವಾಗಲಿದೆ. ಭಾರತ ತಂಡದಲ್ಲಿ ಹರ್ಮನ್ಪ್ರೀತ್ ಕೌರ್ (ನಾಯಕಿ), ರಿಚಾ ಘೋಷ್ (ವಿಕೆಟ್ ಕೀಪರ್), ಉಮಾ ಚೆಟ್ರಿ (ವಿಕೆಟ್ ಕೀಪರ್), ಸ್ಮೃತಿ ಮಂಧಾನ (ಉಪನಾಯಕಿ), ಶಫಾಲಿ ವರ್ಮಾ, ದೀಪ್ತಿ ಶರ್ಮಾ, ಪೂಜಾ ವಸ್ತ್ರಾಕರ್, ಅರುಂಧತಿ ರೆಡ್ಡಿ, ಜೆಮಿಮಾ ರೊಡ್ರಿಗಸ್, ರೇಣುಕಾ ಠಾಕೂರ್, ದಯಾಲನ್ ಹೇಮಲತಾ, ಆಶಾ ಶೋಭಾನಾ, ರಾಧಾ ಯಾದವ್, ಶ್ರೇಯಾಂಕಾ ಪಾಟೀಲ್, ಸಜನಾ ಸಜೀವನ್ ಇದ್ದಾರೆ.
ಭಾರತ ವನಿತೆಯರ ತಂಡವು ಟೂರ್ನಿಯ ಗುಂಪು 1ರಲ್ಲಿದ್ದು, ನೇಪಾಳ, ಪಾಕಿಸ್ತಾನ್ ಮತ್ತು ಯುಎಇ ಕೂಡ ಸ್ಥಾನ ಪಡೆದಿವೆ. ಪಾಕ್ ವಿರುದ್ಧ ಪಂದ್ಯ ಮುಗಿಯುತ್ತಿದ್ದಂತೆ ಜುಲೈ 21ರಂದು ಭಾರತ ತಂಡವು ಯುಎಇ ಜೊತೆ ಸೆಣಸಾಟ ನಡೆಸಲಿದೆ. ನಂತರ ಜುಲೈ 23ರಂದು ನೇಪಾಳ ವಿರುದ್ಧ ಆಡಲಿದೆ.