2 ವರ್ಷಗಳ ಬಳಿಕ ಭಾರತೀಯ ಹಜ್ ಯಾತ್ರಿಕರಿಗೆ ಅವಕಾಶ ನೀಡಿದ ಸೌದಿ ಸರ್ಕಾರ
ಎರಡು ವರ್ಷಗಳ ಬಳಿಕ ಸೌದಿ ಅರೇಬಿಯಾ ಭಾರತದ ಹಜ್ ಯಾತ್ರಿಕರಿಗೆ ಹಸಿರು ನಿಶಾನೆ ತೋರಿಸಿದೆ. ಇದಕ್ಕಾಗಿ ಸೌದಿ ಸರ್ಕಾರ ಹೊಸ ಮಾರ್ಗಸೂಚಿಯನ್ನು ಹೊರಡಿಸಿದೆ. ಕೋವಿಡ್ಗೆ ನಿಯಮಗಳಿಂದಾಗಿ ಈ ಬಾರಿ 79,237 ಭಾರತೀಯ ಹಜ್ ಯಾತ್ರಾರ್ಥಿಗಳಿಗೆ ಮಾತ್ರ ಕೋಟಾವನ್ನು ನಿಗದಿಪಡಿಸಲಾಗಿದೆ ಎಂದು ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.
ಮಾಹಿತಿಯ ಪ್ರಕಾರ, 79,237 ಹಜ್ ಯಾತ್ರಾರ್ಥಿಗಳಲ್ಲಿ, 56,601 ಜನರು ಹಜ್ ಸಮಿತಿ ಆಫ್ ಇಂಡಿಯಾ ಮತ್ತು 22,636 ಜನರು ಹಜ್ ಗುಂಪು ಸಂಘಟಕರ ಮೂಲಕ ಯಾತ್ರೆಗೆ ಹೋಗುತ್ತಾರೆ. ಆದರೆ, ಹಜ್ ಯಾತ್ರೆ ಕೈಗೊಳ್ಳುವ ಹಿರಿಯರ ಆಶಯಕ್ಕೆ ಹಿನ್ನಡೆಯಾಗಿದೆ. ಸೌದಿ ಸರ್ಕಾರವು 65 ವರ್ಷಕ್ಕಿಂತ ಮೇಲ್ಪಟ್ಟ ಹಜ್ ಯಾತ್ರಿಕರಿಗೆ ನಿಷೇಧ ಹೇರಿದೆ.
ಹಜ್ 2022 ರ ಯಾತ್ರೆಗೆ ಎಲ್ಲಾ ಸಿದ್ಧತೆಗಳನ್ನು ಪೂರ್ಣಗೊಳಿಸಲಾಗಿದೆ ಎಂದು ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವ ಮುಖ್ತಾರ್ ಅಬ್ಬಾಸ್ ನಖ್ವಿ ಶುಕ್ರವಾರ ಹೇಳಿದ್ದಾರೆ.
ಆರ್ಟಿ-ಪಿಸಿಆರ್ ಮತ್ತು ಲಸಿಕೆ ಅಗತ್ಯ
ಹೊಸ ಮಾರ್ಗಸೂಚಿಯ ಪ್ರಕಾರ, ಈ ಬಾರಿ ಹಜ್ಗೆ ಹೋಗುವ ಯಾತ್ರಿಕರು 72 ಗಂಟೆಗಳ ಮುಂಚಿತವಾಗಿ ಆರ್ಟಿ-ಪಿಸಿಆರ್ ಪರೀಕ್ಷೆಗೆ ಒಳಗಾಗಬೇಕಾಗುತ್ತದೆ. ಆರ್ಟಿ-ಪಿಸಿಆರ್ ವರದಿಯು ನಕಾರಾತ್ಮಕವಾಗಿದ್ದರೆ ಮಾತ್ರ ಅವರು ಹಜ್ ಯಾತ್ರೆಗೆ ಹೋಗಲು ಸಾಧ್ಯವಾಗುತ್ತದೆ. ಲಸಿಕೆಯ ಎರಡೂ ಡೋಸ್ಗಳನ್ನು ತೆಗೆದುಕೊಳ್ಳುವುದು ಸಹ ಅಗತ್ಯವಾಗಿದೆ. ಕೊರೊನಾ ಸೋಂಕಿನ ನಂತರ ಭಾರತೀಯ ಹಜ್ ಯಾತ್ರಿಕರು ಸೌದಿ ಅರೇಬಿಯಾಕ್ಕೆ ಮೊದಲ ಬಾರಿಗೆ ತೆರಳುತ್ತಿದ್ದಾರೆ.
ಕರೋನಾ ಸಾಂಕ್ರಾಮಿಕ ರೋಗದಿಂದಾಗಿ 2020 ಮತ್ತು 2021 ವರ್ಷಗಳಲ್ಲಿ ಸೌದಿ ಸರ್ಕಾರವು ಯಾರಿಗೂ ಹಜ್ ಮಾಡಲು ಅವಕಾಶ ನೀಡಿರಲಿಲ್ಲ.
