ಕ್ರಿಕೆಟ್ ಜಗತ್ತಿನ ಮೆಗಾ ಈವೆಂಟ್ IPL ವೇಳಾಪಟ್ಟಿ ಬಿಡುಗಡೆ; ಮಾರ್ಚ್ 31 ರಂದು ಮೊದಲ ಪಂದ್ಯ…
ಕ್ರಿಕೆಟ್ ಜಗತ್ತಿನ ಮೆಗಾ ಈವೆಂಟ್ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 16 ನೇ ಋತುವಿನ ವೇಳಾಪಟ್ಟಿಯನ್ನ ಶುಕ್ರವಾರ ಬಿಡುಗಡೆ ಮಾಡಲಾಗಿದೆ. ಟೂರ್ನಿಯ ಮೊದಲ ಪಂದ್ಯ ಮಾರ್ಚ್ 31 ರಂದು ಹಾಲಿ ಚಾಂಪಿಯನ್ ಗುಜರಾತ್ ಟೈಟಾನ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ನಡುವೆ ನಡೆಯಲಿದೆ. ಅಹಮದಾಬಾದ್‌ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಈ ಪಂದ್ಯ ನಡೆಯಲಿದೆ. ಮೇ 28 ರಂದು ಫೈನಲ್ ಪಂದ್ಯ ನಡೆಯಲಿದೆ.
18 ಡಬಲ್ ಹೆಡರ್‌ ಪಂದ್ಯಗಳು
ಟೂರ್ನಿಯಲ್ಲಿ 18 ಡಬಲ್ ಹೆಡರ್‌ಗಳು ಅಂದರೆ ಒಂದು ದಿನದಲ್ಲಿ 2 ಪಂದ್ಯಗಳು 18 ಬಾರಿ ನಡೆಯಲಿವೆ. ಈ ವೇಳೆ ಮೊದಲ ಪಂದ್ಯ ಮಧ್ಯಾಹ್ನ 3:30ಕ್ಕೆ ಆರಂಭವಾಗಲಿದ್ದು, ಎರಡನೇ ಪಂದ್ಯ ಸಂಜೆ 7:30ಕ್ಕೆ ಆರಂಭವಾಗಲಿದೆ.
58 ದಿನಗಳಲ್ಲಿ 74 ಪಂದ್ಯಗಳು
58 ದಿನಗಳ ಈ ಟೂರ್ನಿಯಲ್ಲಿ 10 ತಂಡಗಳ ನಡುವೆ ಒಟ್ಟು 74 ಪಂದ್ಯಗಳು ನಡೆಯಲಿವೆ. ಪ್ರತಿ ತಂಡ 14 ಪಂದ್ಯಗಳನ್ನು ಆಡುತ್ತದೆ, 7 ತವರಿನಲ್ಲಿ ಮತ್ತು 7 ಎದುರಾಳಿ ತಂಡ ನೆಲದಲ್ಲಿ ಆಡಲಿವೆ. 10 ತಂಡಗಳ ನಡುವೆ 70 ಲೀಗ್ ಹಂತದ ಪಂದ್ಯಗಳು ನಡೆಯಲಿವೆ. ಲೀಗ್ ಹಂತದ ನಂತರ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರ-4 ತಂಡಗಳು ಪ್ಲೇ ಆಫ್‌ಗೆ ಅರ್ಹತೆ ಪಡೆಯುತ್ತವೆ.
ಪ್ಲೇಆಫ್ ಪಂದ್ಯಗಳ ದಿನಾಂಕ ನಿಗದಿಯಾಗಿಲ್ಲ.
ಲೀಗ್ ಹಂತದ ಪಂದ್ಯಗಳ ನಂತರ, ಪ್ಲೇ ಆಫ್‌ನ 4 ಪಂದ್ಯಗಳು ನಡೆಯಲಿವೆ. ಪಾಯಿಂಟ್ ಪಟ್ಟಿಯಲ್ಲಿ ಅಗ್ರ-4 ತಂಡಗಳು ಪ್ಲೇ ಆಫ್‌ಗೆ ತಲುಪುತ್ತವೆ. ಐಪಿಎಲ್‌ನ 70 ಲೀಗ್ ಹಂತದ ಪಂದ್ಯಗಳ ವೇಳಾಪಟ್ಟಿ ಬಿಡುಗಡೆಯಾಗಿದೆ. ಪ್ಲೇಆಫ್ ವೇಳಾಪಟ್ಟಿಯನ್ನು ಬಿಡುಗಡೆ ಮಾಡಲಾಗಿಲ್ಲ. ಆದರೆ ಕ್ವಾಲಿಫೈಯರ್-1 ಮೇ 23 ರಂದು ಆಡುವ ನಿರೀಕ್ಷೆಯಿದೆ. ಮೇ 24 ರಂದು ಎಲಿಮಿನೇಟರ್ ಮತ್ತು ಮೇ 26 ರಂದು ಕ್ವಾಲಿಫೈಯರ್-2 ಇರಬಹುದು. ಮೇ 28 ರಂದು ಫೈನಲ್ ದಿನಾಂಕವನ್ನು ನಿಗದಿಪಡಿಸಲಾಗಿದೆ.
ಕ್ವಾಲಿಫೈಯರ್-1 ಪಾಯಿಂಟ್ಸ್ ಪಟ್ಟಿಯಲ್ಲಿ ಅಗ್ರ-2 ತಂಡಗಳ ನಡುವೆ ಇರುತ್ತದೆ. ಇದರಲ್ಲಿ ಗೆದ್ದ ತಂಡ ಫೈನಲ್ ಗೆ ನೇರವಾಗಿ ತಲುಪಲಿದೆ. ಎಲಿಮಿನೇಟರ್‌ನಲ್ಲಿ ಪಾಯಿಂಟ್‌ಗಳ ಪಟ್ಟಿಯಲ್ಲಿ ಮೂರನೇ ಮತ್ತು ನಾಲ್ಕನೇ ಕ್ರಮಾಂಕದ ತಂಡಗಳು ಮುಖಾಮುಖಿಯಾಗಲಿವೆ. ಇದರಲ್ಲಿ ಗೆದ್ದ ತಂಡ ಕ್ವಾಲಿಫೈಯರ್-2 ತಲುಪಲಿದೆ. ಎಲಿಮಿನೇಟರ್ ವಿಜೇತರು ಮತ್ತು ಕ್ವಾಲಿಫೈಯರ್ 1 ರಲ್ಲಿ ಸೋತವರು ಕ್ವಾಲಿಫೈಯರ್ 2 ಅನ್ನು ಆಡುತ್ತಾರೆ. ಕ್ವಾಲಿಫೈಯರ್-2ರಲ್ಲಿ ಗೆಲುವು ಸಾಧಿಸುವ ತಂಡ ಮೇ 28ರಂದು ಕ್ವಾಲಿಫೈಯರ್-1ರ ವಿಜೇತರ ವಿರುದ್ಧ ಅಂತಿಮ ಪಂದ್ಯವನ್ನು ಆಡಲಿದೆ.
12 ನಗರಗಳಲ್ಲಿ ನಡೆಯಲಿವೆ ಪಂದ್ಯ
ಟೂರ್ನಿಯ 74 ಪಂದ್ಯಗಳು 12 ವಿವಿಧ ನಗರಗಳಲ್ಲಿ ನಡೆಯಲಿದೆ. ಐಪಿಎಲ್ ತಂಡಗಳ 10 ನಗರಗಳಲ್ಲದೆ, ಗುವಾಹಟಿ ಮತ್ತು ಧರ್ಮಶಾಲಾದಲ್ಲಿಯೂ ಪಂದ್ಯಗಳು ನಡೆಯಲಿವೆ. ಐಪಿಎಲ್ ತಂಡಗಳ 10 ನಗರಗಳು ಮುಂಬೈ, ಚೆನ್ನೈ, ಅಹಮದಾಬಾದ್, ಜೈಪುರ, ಬೆಂಗಳೂರು, ಲಕ್ನೋ, ಹೈದರಾಬಾದ್, ದೆಹಲಿ, ಮೊಹಾಲಿ ಮತ್ತು ಕೋಲ್ಕತ್ತಾಗಳಲ್ಲಿ ನಡೆಯಲಿದೆ.
ಗುಜರಾತ್ ಟೈಟಾನ್ಸ್ ಹಿಂದಿನ ಚಾಂಪಿಯನ್
ಹಾರ್ದಿಕ್ ಪಾಂಡ್ಯ ಸಾರಥ್ಯದ ಹೊಸ ತಂಡ ಗುಜರಾತ್ ಕಳೆದ ಭಾರಿ ಫೈನಲ್ ತಲುಪಿತ್ತು. ಫೈನಲ್‌ನಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡವನ್ನ 7 ವಿಕೆಟ್‌ಗಳಿಂದ ಸೋಲಿಸುವ ಮೂಲಕ ತಂಡ ಪ್ರಶಸ್ತಿಯನ್ನ ಗೆದ್ದುಕೊಂಡಿತು ಮತ್ತು ಚೊಚ್ಚಲ ಋತುವಿನಲ್ಲಿಯೇ ಪ್ರಶಸ್ತಿಯನ್ನು ಗೆದ್ದ ಎರಡನೇ ತಂಡವಾಗಿತ್ತು. ಇದಕ್ಕೂ ಮುನ್ನ 2008 ರಲ್ಲಿ ಪದಾರ್ಪಣೆ ಮಾಡಿದ್ದ ರಾಜಸ್ಥಾನ ತಂಡ ಚಾಂಪಿಯನ್ ಆಗಿತ್ತು.
IPL 2023 : Mega Event of Cricket World IPL Schedule Released; First match on March 31…
