ಹೊಸದಿಲ್ಲಿ: ಭಾರತದ 52ನೇ ಮುಖ್ಯ ನ್ಯಾಯಾಧೀಶರಾಗಿ (ಸಿಜೆಐ) ತಮ್ಮ ಆರು ತಿಂಗಳ ಮಹತ್ವದ ಅಧಿಕಾರಾವಧಿಯನ್ನು ಪೂರೈಸಿ ನಿವೃತ್ತರಾದ ನ್ಯಾ. ಬಿ.ಆರ್. ಗವಾಯಿ ಅವರು, ತಮ್ಮ ಸೇವಾವಧಿಯ ಅತ್ಯಂತ ಕಹಿ ಘಟನೆಯೊಂದರ ಬಗ್ಗೆ ಕೊನೆಗೂ ಮೌನ ಮುರಿದಿದ್ದಾರೆ. ಭಾನುವಾರ ತಮ್ಮ ಅಧಿಕೃತ ನಿವಾಸದಲ್ಲಿ ಪತ್ರಕರ್ತರೊಂದಿಗೆ ನಡೆದ ಅನೌಪಚಾರಿಕ ಸಂವಾದದ ವೇಳೆ, ನ್ಯಾಯಾಲಯದ ಆವರಣದಲ್ಲೇ ತಮ್ಮ ಮೇಲೆ ಶೂ ಎಸೆಯಲು ಮುಂದಾಗಿದ್ದ ಹಿರಿಯ ವಕೀಲರನ್ನು ತಾವು ಏಕೆ ಕ್ಷಮಿಸಿದೆ ಮತ್ತು ಆ ಕ್ಷಣದಲ್ಲಿ ತಾವು ಶಾಂತರಾಗಿರಲು ಕಾರಣವೇನು ಎಂಬ ಕುತೂಹಲಕಾರಿ ಸಂಗತಿಯನ್ನು ಬಿಚ್ಚಿಟ್ಟಿದ್ದಾರೆ.
ತಮ್ಮ ಮೇಲಿನ ಹಲ್ಲೆ ಯತ್ನವನ್ನು ಅತ್ಯಂತ ನಿರ್ಲಿಪ್ತವಾಗಿ ಸ್ವೀಕರಿಸಿದ್ದ ನ್ಯಾ. ಗವಾಯಿ, ಇದು ನನ್ನ ಬಾಲ್ಯದ ಸಂಸ್ಕಾರ ಮತ್ತು ಬೆಳೆದು ಬಂದ ಹಾದಿಯ ಪ್ರತಿಫಲ ಎಂದು ಬಣ್ಣಿಸಿದ್ದಾರೆ.
ಕ್ಷಮೆ ಎಂಬುದೇ ದೊಡ್ಡ ಶಿಕ್ಷೆ
ತಮ್ಮ ಮೇಲೆ ದಾಳಿಗೆ ಮುಂದಾದ ವಕೀಲರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವ ಅಧಿಕಾರವಿದ್ದರೂ, ನ್ಯಾ. ಗವಾಯಿ ಅವರು ಮೌನಕ್ಕೆ ಶರಣಾಗಿದ್ದರು. ಈ ಬಗ್ಗೆ ಮಾತನಾಡಿದ ಅವರು, ಅದು ನಾನು ಸಹಜವಾಗಿಯೇ ತೆಗೆದುಕೊಂಡ ನಿರ್ಧಾರವಾಗಿತ್ತು. ಬಹುಶಃ ನನ್ನ ಬಾಲ್ಯದಲ್ಲಿ ಬೆಳೆಸಿಕೊಂಡಿದ್ದ ಚಿಂತನಾ ಪ್ರಕ್ರಿಯೆ ಹಾಗೂ ಸಂಸ್ಕಾರದಿಂದ ಅದು ರೂಪುಗೊಂಡಿದ್ದಿರಬಹುದು. ಆ ಕ್ಷಣದಲ್ಲಿ ಉದ್ವಿಗ್ನನಾಗುವ ಬದಲು, ಆ ಘಟನೆಯನ್ನು ಮತ್ತು ವ್ಯಕ್ತಿಯನ್ನು ಸುಮ್ಮನೆ ನಿರ್ಲಕ್ಷಿಸುವುದೇ ಸರಿಯಾದ ಕೆಲಸ ಎಂದು ನಾನು ಭಾವಿಸಿದ್ದೆ. ಕೆಲವೊಮ್ಮೆ ಮೌನ ಮತ್ತು ಕ್ಷಮೆಗಿಂತ ದೊಡ್ಡ ಶಿಕ್ಷೆ ಮತ್ತೊಂದಿಲ್ಲ ಎಂದು ಅವರು ಮಾರ್ಮಿಕವಾಗಿ ನುಡಿದರು.
ಏನಾಗಿತ್ತು ಅಕ್ಟೋಬರ್ 5ರಂದು
ದೇಶದ ಸರ್ವೋಚ್ಚ ನ್ಯಾಯಾಲಯವು ಅಕ್ಟೋಬರ್ 5ರಂದು ನಾಟಕೀಯ ಹಾಗೂ ಆಘಾತಕಾರಿ ದೃಶ್ಯವೊಂದಕ್ಕೆ ಸಾಕ್ಷಿಯಾಗಿತ್ತು. 71 ವರ್ಷದ ಹಿರಿಯ ವಕೀಲ ರಾಕೇಶ್ ಕಿಶೋರ್ ಎಂಬುವರು ಏಕಾಏಕಿ ನ್ಯಾ. ಗವಾಯಿ ಅವರತ್ತ ಶೂ ಎಸೆಯಲು ಪ್ರಯತ್ನಿಸಿದ್ದರು. ತಕ್ಷಣವೇ ಎಚ್ಚೆತ್ತ ಭದ್ರತಾ ಸಿಬ್ಬಂದಿಗಳು ಕಿಶೋರ್ ಅವರನ್ನು ವಶಕ್ಕೆ ಪಡೆದು ನ್ಯಾಯಾಲಯದ ಕೊಠಡಿಯಿಂದ ಹೊರಕ್ಕೆ ಕರೆದೊಯ್ಯುವಾಗ, ಸನಾತನ ಧರ್ಮದ ಅವಮಾನವನ್ನು ಭಾರತವು ಸಹಿಸುವುದಿಲ್ಲ ಎಂದು ವಕೀಲರು ಆಕ್ರೋಶದಿಂದ ಕೂಗಿದ್ದರು.
ವಿವಾದದ ಕಿಡಿ ಹೊತ್ತಿಸಿದ್ದ ವಿಷ್ಣುವಿನ ಹೇಳಿಕೆ
ಈ ಆಘಾತಕಾರಿ ಘಟನೆಗೆ ಮೂಲ ಕಾರಣವಾಗಿದ್ದು ಕೆಲವು ವಾರಗಳ ಹಿಂದೆ ಮಧ್ಯಪ್ರದೇಶದ ಪ್ರಕರಣವೊಂದರ ವಿಚಾರಣೆ. ಅಲ್ಲಿ ಹಾನಿಗೀಡಾಗಿರುವ ವಿಷ್ಣುವಿನ ವಿಗ್ರಹದ ಮರುಸ್ಥಾಪನೆಯನ್ನು ಕೋರಿ ಅರ್ಜಿಯೊಂದನ್ನು ಸಲ್ಲಿಸಲಾಗಿತ್ತು. ಈ ವೇಳೆ ವಿಚಾರಣೆ ನಡೆಸಿದ್ದ ನ್ಯಾ. ಗವಾಯಿ ಅವರು, ಹೋಗಿ ದೇವರನ್ನೇ ಕೇಳಿ ಎಂಬ ಹೇಳಿಕೆ ನೀಡಿದ್ದರು ಎನ್ನಲಾಗಿದೆ. ಈ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತು ಧಾರ್ಮಿಕ ವಲಯದಲ್ಲಿ ವ್ಯಾಪಕ ಟೀಕೆಗೆ ಗುರಿಯಾಗಿತ್ತು. ಈ ಹಿನ್ನೆಲೆಯಲ್ಲಿಯೇ ವಕೀಲ ರಾಕೇಶ್ ಕಿಶೋರ್ ಹಲ್ಲೆಗೆ ಯತ್ನಿಸಿದ್ದರು ಎಂದು ತಿಳಿದುಬಂದಿದೆ.
ಈ ವರ್ಷದ ಮೇ ತಿಂಗಳಿನಿಂದ ನವೆಂಬರ್ವರೆಗೆ ಆರು ತಿಂಗಳ ಅಲ್ಪಾವಧಿಗೆ ಸಿಜೆಐ ಆಗಿ ಸೇವೆ ಸಲ್ಲಿಸಿದ ನ್ಯಾ. ಗವಾಯಿ ಅವರ ಅಧಿಕಾರಾವಧಿ ಐತಿಹಾಸಿಕ ಮಹತ್ವವನ್ನು ಪಡೆದಿತ್ತು. ಭಾರತದ ಮುಖ್ಯ ನ್ಯಾಯಾಧೀಶರ ಹುದ್ದೆಗೇರಿದ ಮೊದಲ ಬೌದ್ಧ ಧರ್ಮೀಯ ಮತ್ತು ಎರಡನೇ ದಲಿತ ಸಮುದಾಯದ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದರು. ತಮ್ಮ ತೀರ್ಪುಗಳು ಮತ್ತು ಸರಳ ವ್ಯಕ್ತಿತ್ವದ ಮೂಲಕ ಅವರು ನ್ಯಾಯಾಂಗ ವ್ಯವಸ್ಥೆಯಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ.
ನೂತನ ಸಿಜೆಐ ಆಗಿ ನ್ಯಾ. ಸೂರ್ಯಕಾಂತ್
ನ್ಯಾ. ಗವಾಯಿ ಅವರ ನಿವೃತ್ತಿಯ ಬಳಿಕ, ಭಾರತದ ನೂತನ ಮುಖ್ಯ ನ್ಯಾಯಾಧೀಶರಾಗಿ ನ್ಯಾ. ಸೂರ್ಯಕಾಂತ್ ಅವರು ಸೋಮವಾರ ಪ್ರಮಾಣ ವಚನ ಸ್ವೀಕರಿಸಿದ್ದು, ದೇಶದ ನ್ಯಾಯಾಂಗ ವ್ಯವಸ್ಥೆಯ ಚುಕ್ಕಾಣಿ ಹಿಡಿದಿದ್ದಾರೆ.
