ಕೋವಿಡ್-19 ರೋಗಲಕ್ಷಣ ಪತ್ತೆಹಚ್ಚುವ ರಿಸ್ಟ್ ಟ್ರ್ಯಾಕರ್ ಮುಂದಿನ ತಿಂಗಳು ಮಾರುಕಟ್ಟೆಯಲ್ಲಿ ಲಭ್ಯ
ಹೊಸದಿಲ್ಲಿ, ಜುಲೈ 26: ಆರಂಭಿಕ ಹಂತದ ಕೋವಿಡ್-19 ರೋಗಲಕ್ಷಣಗಳನ್ನು ಪತ್ತೆಹಚ್ಚಲು ಧರಿಸಬಹುದಾದ ರಿಸ್ಟ್ ಟ್ರ್ಯಾಕರ್ ಮುಂದಿನ ತಿಂಗಳು ಮಾರುಕಟ್ಟೆಗೆ ಬರಲಿದೆ.
ಐಐಟಿ ಮದ್ರಾಸ್ ನ ಇನ್ಕ್ಯುಬೇಟೆಡ್ ಸ್ಟಾರ್ಟ್ ಅಪ್‌ ಇದನ್ನು ಡೆವಲಪ್ ಮಾಡಲಾಗಿದ್ದು ಈ ಉದ್ದೇಶಕ್ಕಾಗಿ 22 ಕೋಟಿ ರೂ. ಸಂಗ್ರಹಿಸಿದೆ. ಎನ್‌ಐಟಿ ವಾರಂಗಲ್ ಹಳೆಯ ವಿದ್ಯಾರ್ಥಿಗಳ ತಂಡದ ಜೊತೆಗೆ ಐಐಟಿ ಮದ್ರಾಸ್ ಹಳೆಯ ವಿದ್ಯಾರ್ಥಿಗಳ ಗುಂಪು ಪ್ರಾರಂಭಿಸಿದ ಮ್ಯೂಸ್ ವೇರ್‌ಬೇಲ್ಸ್, ರಿಸ್ಟ್ ಟ್ರ್ಯಾಕರ್ ಅನ್ನು 70 ದೇಶಗಳಲ್ಲಿ ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಯೋಜಿಸುತ್ತಿದೆ.
ರಿಸ್ಟ್ (ಮಣಿಕಟ್ಟು) ಆಧಾರಿತ ಟ್ರ್ಯಾಕರ್ ಚರ್ಮದ ಉಷ್ಣತೆ, ಹೃದಯ ಬಡಿತ ಮತ್ತು SpO2 (ರಕ್ತ ಆಮ್ಲಜನಕ ಶುದ್ಧತ್ವ) ಗಾಗಿ ಸಂವೇದಕಗಳನ್ನು ಹೊಂದಿದ್ದು, ಕೋವಿಡ್-19 ರೋಗಲಕ್ಷಣಗಳ ಆರಂಭಿಕ ರೋಗನಿರ್ಣಯಕ್ಕೆ ಸಹಾಯ ವಾಗುವಂತೆ ರೂಪಿಸಲಾಗಿದ್ದು, ದೂರದಿಂದಲೇ ಟ್ರ್ಯಾಕ್ ಮಾಡಬಹುದು.
ಟ್ರ್ಯಾಕರ್ ನಲ್ಲಿ ಬ್ಲೂಟೂತ್ ಇರಲಿದ್ದು, ಮ್ಯೂಸ್ ಹೆಲ್ತ್ ಅಪ್ಲಿಕೇಶನ್ ಮೂಲಕ ಮೊಬೈಲ್ ಫೋನ್‌ಗೆ ಸಂಪರ್ಕಿಸಬಹುದು. ಬಳಕೆದಾರರ ಜೀವಕೋಶಗಳು ಮತ್ತು ಚಟುವಟಿಕೆಯ ಡೇಟಾವನ್ನು ಫೋನ್‌ನಲ್ಲಿ ಮತ್ತು ರಿಮೋಟ್ ಸರ್ವರ್‌ನಲ್ಲಿ ಸಂಗ್ರಹಿಸಲಾಗುತ್ತದೆ.
ಟ್ರ್ಯಾಕರ್ ಆರೋಗ್ಯ ಸೇತು ಆಯಪ್ನಿಂದ ಅಧಿಸೂಚನೆಗಳನ್ನು ಪಡೆಯಬಹುದು ಮತ್ತು ಆ ವ್ಯಕ್ತಿ ಕೋವಿಡ್ ಕಂಟೇನ್ಮೆಂಟ್ ವಲಯಕ್ಕೆ ಪ್ರವೇಶಿಸಿದಾಗ ಬಳಕೆದಾರರನ್ನು ಇದು ಎಚ್ಚರಿಸುತ್ತದೆ. ಬಳಕೆದಾರರಿಗೆ ಯಾವುದೇ ತೊಂದರೆಯಲ್ಲಿದ್ದಾಗ ತುರ್ತು ಎಚ್ಚರಿಕೆ (ಎಸ್‌ಒಎಸ್) ಅನ್ನು ತಿಳಿಸುತ್ತದೆ. ದೇಹದ ಉಷ್ಣತೆಯು ಮಿತಿಗಿಂತ ಹೆಚ್ಚಾದಾಗ ಎಚ್ಚರಿಕೆ ವಹಿಸಲು ಸಹಾಯವಾಗುತ್ತದೆ. SpO2 ಮಟ್ಟ ತೀರಾ ಕಡಿಮೆ ಇರುವಾಗ ಅಥವಾ ಬಳಕೆದಾರರು ಕೋವಿಡ್ ಕಂಟೇನ್ಮೆಂಟ್ ಜೋನ್ ಪ್ರವೇಶಿಸುವಾಗ ಅಪ್ಲಿಕೇಶನ್ ಜನರನ್ನು ಎಚ್ಚರಿಸುತ್ತದೆ.
‘ಈ ವರ್ಷ ಎರಡು ಲಕ್ಷ ಉತ್ಪನ್ನ ಮಾರಾಟದ ಗುರಿ ಇದೆ, ಜಗತ್ತಿನಾದ್ಯಂತ 2022 ರ ವೇಳೆಗೆ 10 ಲಕ್ಷ ಉತ್ಪನ್ನ ಮಾರಾಟವನ್ನು ಸಾಧಿಸುವ ಯೋಜನೆ ಇದೆ. ಹೂಡಿಕೆದಾರರು ನಮ್ಮ ಆವಿಷ್ಕಾರದ ಮೇಲೆ ವಿಶ್ವಾಸ ಹೊಂದಿದ್ದು, ಗ್ರಾಹಕ ತಂತ್ರಜ್ಞಾನ ವಲಯದಲ್ಲಿ ಭಾರಿ ವ್ಯತ್ಯಾಸವನ್ನು ಸೃಷ್ಟಿಸುವ ನಂಬಿಕೆ ನಮಗಿದೆ. ಇದರಿಂದಾಗಿಯೇ 22 ಕೋಟಿ ರೂ.ಸಂಗ್ರಹಿಸಲು ನಮಗೆ ಸಾಧ್ಯವಾಗಿದೆ ‘ಎಂದು ಐಐಟಿ ಮದ್ರಾಸ್ ಹಳೆಯ ವಿದ್ಯಾರ್ಥಿ ಕೆಎಲ್‌ಎನ್ ಸಾಯಿ ಪ್ರಸಾಂತ್ ಹೇಳಿದ್ದಾರೆ.
ಅಂದಾಜು 3500 ರೂ. ಬೆಲೆಯ ಈ ಹೊಸ ಉತ್ಪನ್ನವು ಆಗಸ್ಟ್ ವೇಳೆಗೆ 70 ದೇಶಗಳಲ್ಲಿ ಗ್ರಾಹಕರಿಗೆ ಮಾರುಕಟ್ಟೆಯಲ್ಲಿ ಲಭ್ಯವಾಗಲಿದೆ. ‘ಈ ಟ್ರ್ಯಾಕರ್ ಉತ್ಪಾದಿಸುವ ನಮ್ಮ ಮುಖ್ಯ ಉದ್ದೇಶವೆಂದರೆ ಕೋವಿಡ್, ನ್ಯುಮೋನಿಯಾ ರೋಗಿಗಳಲ್ಲಿ ಶೀಘ್ರವೇ ರೋಗ ನಿರ್ಣಯವಾಗುವಂತೆ ಅನುಕೂಲ ಕಲ್ಪಿಸುವುದು. ಅವರಿಗೆ ಇದರಿಂದ ಹೆಚ್ಚು ಪರಿಣಾಮಕಾರಿಯಾಗಿ ಚಿಕಿತ್ಸೆ ನೀಡಬಹುದು ಎಂದು ವಾರಂಗಲ್ ಎನ್‌ಐಟಿ ಪದವೀಧರ ಕೆ.ಪ್ರತ್ಯುಷಾ ತಿಳಿಸಿದ್ದಾರೆ. ಚರ್ಮ ಮತ್ತು ಅದರ ಸುತ್ತಲಿನ ತಾಪಮಾನ, ಹೃದಯ ಬಡಿತ ಮತ್ತು ಚಲನೆಯ ಸಂವೇದನೆಯಿಂದ ದೇಹದ ಉಷ್ಣತೆಯನ್ನು ಅಂದಾಜು ಮಾಡಲು ನಾವು ಅಲ್ಗರಿದಮ್ಗಳನ್ನು ಅಭಿವೃದ್ಧಿಪಡಿಸಿದ್ದೇವೆ. ನಿರಂತರ ತಾಪಮಾನ ಮತ್ತು SpO2 ನಿರ್ವಹಣೆಯೊಂದಿಗೆ, ಆರಂಭಿಕ ಹಂತದಲ್ಲಿ ನಾವು ತೀಕ್ಷ್ಣ ಹೈಪೋಕ್ಸಿಯಾವನ್ನು (ಲಕ್ಷಣರಹಿತ ರೋಗಿಗಳಲ್ಲಿಯೂ ಸಹ ಕೊರೊನಾವೈರಸ್ ಸೋಂಕಿನ ಆರಂಭಿಕ ಲಕ್ಷಣ) ಪತ್ತೆ ಮಾಡಲು ಸಾಧ್ಯವಾಗುತ್ತದೆ. ದೈಹಿಕ ಸದೃಢತೆ ಮತ್ತು ನಿದ್ರೆಯ ಮಟ್ಟದ ಜತೆಗೆ ಪೂರ್ವಭಾವಿಯಾಗಿ ಆರೋಗ್ಯ ಮೇಲ್ವಿಚಾರಣೆ ಮಾಡಲು ಇದು ಜನಸಾಮಾನ್ಯರಿಗೂ ಕೂಡ ಸಹಾಯ ಮಾಡುತ್ತದೆ ಎಂದು ಅವರು ಹೇಳಿದರು.
