ಯಾರೀಕೆ ಮೋಸ್ಟ್ ವಾಂಟೆಡ್ ಭಯೋತ್ಪಾದಕ ದಾವೂದ್ ಇಬ್ರಾಹಿಂನ ಪ್ರೇಯಸಿ ಮೆಹ್ವಿಶ್ ಹಯಾತ್?
ಹೊಸದಿಲ್ಲಿ, ಅಗಸ್ಟ್25: ಭಾರತದ ಮೋಸ್ಟ್ ವಾಂಟೆಡ್ ಭಯೋತ್ಪಾದಕ ದಾವೂದ್ ಇಬ್ರಾಹಿಂ ಕರಾಚಿಯ ಐಷಾರಾಮಿ ಪ್ರದೇಶದಲ್ಲಿನ ಬಂಗಲೆಯಲ್ಲಿ ಇದ್ದಾನೆ ಎಂಬ ವರದಿಗಳ ಬಳಿಕ ಪಾಕಿಸ್ತಾನದ ನಟಿ ಮೆಹ್ವಿಶ್ ಹಯಾತ್ ನೊಂದಿಗಿನ ಸಂಬಂಧದಲ್ಲಿದ್ದಾನೆ ಎಂದು ವರದಿಯಾಗಿದೆ.
ವಿಶೇಷವೆಂದರೆ, ಕಳೆದ ವರ್ಷ ಪಾಕಿಸ್ತಾನದ ಅತ್ಯುನ್ನತ ನಾಗರಿಕ ಗೌರವವಾದ ‘ತಾಮ್ಗಾ-ಎ-ಇಮ್ತಿಯಾಜ್’ ನೀಡಿ ಮೆಹ್ವಿಶ್ ಹಯಾತ್ ನನ್ನು ಸನ್ಮಾನಿಸಲಾಗಿತ್ತು. ಅಧ್ಯಕ್ಷ ಆರಿಫ್ ಅಲ್ವಿ ಅವರು ಇಸ್ಲಾಮಾಬಾದ್ನಲ್ಲಿ ನಡೆದ ಸಮಾರಂಭದಲ್ಲಿ ನಟಿಗೆ ಪ್ರಶಸ್ತಿ ಪ್ರದಾನ ಮಾಡಿದ ನಂತರ ಪಾಕಿಸ್ತಾನ ಸರ್ಕಾರದ ಮೇಲೆ ಹಲವಾರು ಪ್ರಶ್ನೆಗಳು ಕೇಳಿಬಂದವು. ಪಾಕಿಸ್ತಾನದ ಚಿತ್ರೋದ್ಯಮ ಕೂಡ ಸರ್ಕಾರದ ನಿರ್ಧಾರದಿಂದ ಆಘಾತಕ್ಕೊಳಗಾಗಿತ್ತು.
ದೊಡ್ಡ ಹೆಸರು ಮಾಡದ, ಸಣ್ಣ, ಪುಟ್ಟ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಪಾಕ್ ನಟಿಗೆ ದೇಶದ ಅತ್ಯುನ್ನತ ಪ್ರಶಸ್ತಿ ಕೊಟ್ಟು ಗೌರವಿಸಿದ ಪಾಕಿಸ್ತಾನ ಸರ್ಕಾರದ ನಿರ್ಧಾರಕ್ಕೆ ಹಲವು ಜನರು ಆಕ್ರೋಶ ವ್ಯಕ್ತಪಡಿಸಿದ್ದರು. ದಾವೂದ್ ಪ್ರೇಯಸಿಯಾದ ಹಿನ್ನೆಲೆಯಲ್ಲಿ ಪಾಕಿಸ್ತಾನ ಸರ್ಕಾರ ಆಕೆಗೆ ಅತ್ಯುನ್ನತ ಗೌರವವಾದ ‘ತಾಮ್ಗಾ-ಎ-ಇಮ್ತಿಯಾಜ್’ ನೀಡಿ ಗೌರವಿಸಿದೆ ಎಂದು ವರದಿ ತಿಳಿಸಿದೆ. ದಾವೂದ್ ಪ್ರೇಯಸಿ ಎಂಬ ಕಾರಣಕ್ಕೆ ದೊಡ್ಡ ದೊಡ್ಡ ಪ್ರಾಜೆಕ್ಟ್ ಗಳಲ್ಲಿ ನಟಿಸಲು ಈ ನಟಿಗೆ ಅವಕಾಶ ಸಿಕ್ಕಿದೆ ಎಂದು ಹೇಳಲಾಗುತ್ತಿದೆ.
ಐಟಂ ಸಂಖ್ಯೆಯೊಂದಿಗೆ ವೃತ್ತಿಜೀವನವನ್ನು ಪ್ರಾರಂಭಿಸಿದ 37 ವರ್ಷದ ಮೆಹ್ವಿಶ್ , ಬಾಲಿವುಡ್ ಪಾಕಿಸ್ತಾನದ ಹಾಡುಗಳನ್ನು ಕದಿಯುತ್ತಿದೆ ಎಂದು ಆರೋಪಿಸಿದ್ದರು. ‘ವೈಟಲ್ ಸಿಗ್ನ್ಸ್’ ಆಲ್ಬಂನ ಪಾಕಿಸ್ತಾನದ ಹಾಡು ‘ಗೋರ್ ರಂಗ್ ಕಾ ಜಮಾನಾ’ದೊಂದಿಗೆ ಕೆಲವು ಹೋಲಿಕೆಗಳನ್ನು ಹೊಂದಿರುವ ಆಲಿಯಾ ಭಟ್ ಅವರ ಪಂಜಾಬಿ ವಿಡಿಯೋ ಸಾಂಗ್’ ಪ್ರಾಡಾ ಹಿನ್ನೆಲೆಯಲ್ಲಿ ಅವರು ಹಿಂದಿ ಚಲನಚಿತ್ರೋದ್ಯಮವನ್ನು ಟೀಕಿಸಿದ್ದರು. ಬಾಲಿವುಡ್ ಸೂಪರ್ಸ್ಟಾರ್ ಶಾರುಖ್ ಖಾನ್ ಅವರ ನೆಟ್ಫ್ಲಿಕ್ಸ್ ನಿರ್ಮಾಣ ‘ಬಾರ್ಡ್ ಆಫ್ ಬ್ಲಡ್’ ಮೇಲೆಯೂ ನಟಿ ವಾಗ್ದಾಳಿ ನಡೆಸಿದ್ದರು.
ದಾವೂದ್ ನ ದೊಡ್ಡ ವೀಕ್ ನೆಸ್ ಎಂದರೆ ಮೆಹ್ವಿಶ್ ಎನ್ನುವ ಪಾಕಿಸ್ತಾನಿ ನಟಿ ಎಂದು ವರದಿ ತಿಳಿಸಿದ್ದು, ದಾವೂದ್ ಆಕೆಯೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದಾನೆ ಎಂದು ಮೂಲಗಳು ಬಹಿರಂಗಪಡಿಸಿವೆ.
