ಓವಲ್ ಟೆಸ್ಟ್ನ ಹೀರೋ ಆಗಿ ಹೊರಹೊಮ್ಮಿದ ಭಾರತದ ವೇಗಿ ಮೊಹಮ್ಮದ್ ಸಿರಾಜ್, ಟೀಕಾಕಾರರ ಬಾಯಿ ಮುಚ್ಚಿಸಿದ್ದಾರೆ. ಎರಡನೇ ಇನ್ನಿಂಗ್ಸ್ನಲ್ಲಿ ಐದು ಮತ್ತು ಮೊದಲ ಇನ್ನಿಂಗ್ಸ್ನಲ್ಲಿ ನಾಲ್ಕು ವಿಕೆಟ್ ಪಡೆದ ಸಿರಾಜ್, ಪಂದ್ಯದ ಕೊನೆಯ ದಿನ ಭಾರತ ತಂಡವನ್ನು ಜಯದತ್ತ ಕೊಂಡೊಯ್ದರು. ಈ ಅಮೋಘ ಪ್ರದರ್ಶನಕ್ಕಾಗಿ ಅವರಿಗೆ ‘ಪಂದ್ಯಶ್ರೇಷ್ಠ’ ಪ್ರಶಸ್ತಿ ಲಭಿಸಿತು. ಸರಣಿಯ ಎಲ್ಲಾ ಐದು ಟೆಸ್ಟ್ಗಳಲ್ಲೂ ಅದ್ಭುತ ಪ್ರದರ್ಶನ ನೀಡಿದ ಸಿರಾಜ್, ಎರಡು ಬಾರಿ ಐದು ವಿಕೆಟ್ ಪಡೆದ ಸಾಧನೆ ಮಾಡಿದರು.
ಕ್ಯಾಚ್ ಕೈಚೆಲ್ಲಿದರೂ ಹೋರಾಟ ಬಿಡಲಿಲ್ಲ!
ಓವಲ್ ಟೆಸ್ಟ್ನ ನಾಲ್ಕನೇ ದಿನ, ಸಿರಾಜ್ ಬೌಂಡರಿ ಲೈನ್ನಲ್ಲಿ ಹ್ಯಾರಿ ಬ್ರೂಕ್ ಅವರ ನಿರ್ಣಾಯಕ ಕ್ಯಾಚ್ ಕೈಚೆಲ್ಲಿದ್ದರು. ಇದರಿಂದಾಗಿ ಸಿಡಿಲಬ್ಬರದ ಶತಕ ಸಿಡಿಸಿದ ಬ್ರೂಕ್, ಭಾರತದ ಗೆಲುವಿನ ಆಸೆಯನ್ನು ಮಂಕಾಗಿಸಿದ್ದರು. ಈ ಘಟನೆಯಿಂದ ಸಿರಾಜ್ ತೀವ್ರ ಟೀಕೆಗೆ ಗುರಿಯಾಗಿದ್ದರು. ಆದರೆ, ಕೊನೆಯ ದಿನದಂದು ಸಿರಾಜ್ ಹೋರಾಟದ ಮನೋಭಾವ ಪ್ರದರ್ಶಿಸಿ, ಟೀಂ ಇಂಡಿಯಾವನ್ನು ಜಯದತ್ತ ಕೊಂಡೊಯ್ದರು.
ಕೊನೆಯ ದಿನದ ಹೀರೋ ಸಿರಾಜ್
ಕೊನೆಯ ದಿನ ಇಂಗ್ಲೆಂಡ್ಗೆ ಗೆಲ್ಲಲು ಕೇವಲ 35 ರನ್ಗಳ ಅಗತ್ಯವಿತ್ತು, ಆದರೆ ಸಿರಾಜ್ ಅದನ್ನು ಸುಲಭವಾಗಲು ಬಿಡಲಿಲ್ಲ. ಜೇಮಿ ಸ್ಮಿತ್, ಜೇಮಿ ಓವರ್ಟನ್ ಮತ್ತು ಜೋಶ್ ಟಂಗ್ ಅವರಂತಹ ಪ್ರಮುಖ ವಿಕೆಟ್ಗಳನ್ನು ಕಬಳಿಸಿ, ಇಂಗ್ಲೆಂಡ್ಗೆ ಒತ್ತಡ ಹೇರಿದರು. ಅಂತಿಮವಾಗಿ, ಸುಂದರವಾದ ಯಾರ್ಕರ್ ಎಸೆತದಿಂದ ಗಸ್ ಅಟ್ಕಿನ್ಸನ್ ವಿಕೆಟ್ ಪಡೆದು ಭಾರತಕ್ಕೆ 6 ರನ್ಗಳ ರೋಚಕ ಜಯ ತಂದುಕೊಟ್ಟರು. ಜಸ್ಪ್ರೀತ್ ಬುಮ್ರಾ ಅನುಪಸ್ಥಿತಿಯಲ್ಲಿ ಮಿಂಚಿದ ಸಿರಾಜ್, ಒಟ್ಟು 9 ವಿಕೆಟ್ಗಳ ಸಾಧನೆ ಮಾಡುವ ಮೂಲಕ ಓವಲ್ ಟೆಸ್ಟ್ನ ಗೆಲುವಿನ ರೂವಾರಿಯಾದರು.
ಸರಣಿಶ್ರೇಷ್ಠ ಪ್ರಶಸ್ತಿ ಗಿಲ್ ಮತ್ತು ಬ್ರೂಕ್ಗೆ
ಐದು ಟೆಸ್ಟ್ಗಳ ಸರಣಿಯಲ್ಲಿ, ಭಾರತದ ನಾಯಕ ಶುಭಮನ್ ಗಿಲ್ ಮತ್ತು ಇಂಗ್ಲೆಂಡ್ನ ಹ್ಯಾರಿ ಬ್ರೂಕ್ ‘ಸರಣಿಶ್ರೇಷ್ಠ ಆಟಗಾರ’ ಪ್ರಶಸ್ತಿ ಹಂಚಿಕೊಂಡರು. ಗಿಲ್ 754 ರನ್ಗಳನ್ನು ಗಳಿಸಿದರೆ, ಬ್ರೂಕ್ 481 ರನ್ ಗಳಿಸಿದರು. ಸರಣಿಯಲ್ಲಿ ಸಿರಾಜ್ 185.3 ಓವರ್ಗಳನ್ನು ಬೌಲ್ ಮಾಡಿ, ಒಟ್ಟು 23 ವಿಕೆಟ್ಗಳನ್ನು ಪಡೆದು ವಿಕೆಟ್ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದರು.
