ಮಾನವ ಕಂಪ್ಯೂಟರ್ ಶಕುಂತಲಾ ದೇವಿಯವರ ದಾಖಲೆ ಮುರಿದು ಭಾರತಕ್ಕೆ ಮೊದಲ ಚಿನ್ನ ಗೆದ್ದು ತಂದ ನೀಲಕಂಠ ಭಾನು ಪ್ರಕಾಶ್
ಹೈದರಾಬಾದ್, ಅಗಸ್ಟ್26: ಈ ತಿಂಗಳ ಆರಂಭದಲ್ಲಿ ಲಂಡನ್ನ ಮೈಂಡ್ ಸ್ಪೋರ್ಟ್ಸ್ ಒಲಿಂಪಿಯಾಡ್ನಲ್ಲಿ ನಡೆದ ವಿಶ್ವದ ಅತಿ ವೇಗದ ಮಾನವ ಕ್ಯಾಲ್ಕುಲೇಟರ್ ಚಾಂಪಿಯನ್ಶಿಪ್ನಲ್ಲಿ ದೆಹಲಿಯ ಸೇಂಟ್ ಸ್ಟೀಫನ್ ಕಾಲೇಜಿನಿಂದ ಗಣಿತದಲ್ಲಿ ಪದವೀಧರರಾಗಿರುವ ಹೈದರಾಬಾದ್ನ ನೀಲಕಂಠ ಭಾನು ಪ್ರಕಾಶ್ ಅವರು ಮೊದಲ ಸ್ಥಾನ ಪಡೆದಿದ್ದಾರೆ. ಮಾನವ ಕಂಪ್ಯೂಟರ್ ಶಕುಂತಲಾ ದೇವಿಯವರ ದಾಖಲೆಯನ್ನು ಮುರಿದಿರುವ ನೀಲಕಂಠ ಭಾನು ಪ್ರಕಾಶ್ ಭಾರತಕ್ಕೆ ಮೊದಲ ಚಿನ್ನವನ್ನು ಗೆದ್ದು ತಂದಿದ್ದಾರೆ.
ಯುಕೆ, ಜರ್ಮನಿ, ಯುಎಇ, ಫ್ರಾನ್ಸ್, ಗ್ರೀಸ್, ಲೆಬನಾನ್, ಸೇರಿದಂತೆ 13 ದೇಶಗಳ 30 ಮಂದಿ ಮಾನಸಿಕ ಲೆಕ್ಕಾಚಾರ ವಿಶ್ವ ಚಾಂಪಿಯನ್ಶಿಪ್ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು ಮತ್ತು ತಮ್ಮ ಮೊದಲ ಪ್ರಯತ್ನದಲ್ಲಿ ನೀಲಕಂಠ ಭಾನು ಪ್ರಕಾಶ್ ಪ್ರಥಮ ಸ್ಥಾನ ಪಡೆದರು.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ನೀಲಕಂಠ ಭಾನು ಪ್ರಕಾಶ್ ಅವರು ಯಾವುದು ಅಸಾಧ್ಯವೋ ಅದನ್ನು ಮಾಡಿದಾಗ ನಮಗೆ ಸಂಭ್ರಮವಾಗುತ್ತದೆ. ಅದೇ ರೀತಿ ನನ್ನ ಮೆದುಳು ಕಾಲ್ಯುಲೇಟರ್ ಗಿಂತಲೂ ವೇಗವಾಗಿ ಲೆಕ್ಕಾಚಾರ ಮಾಡುತ್ತದೆ. ಸಂಖ್ಯೆಗಳ ಮೇಲಿನ ಪ್ರೀತಿಯ ಜೊತೆಗೆ ಗಣಿತವನ್ನು ಕ್ರೀಡೆಯಾಗಿ ಉತ್ತೇಜಿಸಬೇಕು ಎಂದು ಹೇಳಿದರು.
ಗಣಿತಶಾಸ್ತ್ರದಲ್ಲಿ ಭಾರತದ ಹಿಂದಿನ ವೈಭವವನ್ನು ಮರಳಿ ತರಲು ಬಯಸುತ್ತೇನೆ ಎಂದ ಅವರು ನಾನು ಮಾನವ ಕಂಪ್ಯೂಟರ್ ಶಕುಂತಲಾ ದೇವಿ ಮತ್ತು ಸ್ಕಾಟ್ ಫ್ಲಾನ್ಸ್ಬರ್ಗ್ರವರು ಹೊಂದಿದ್ದ ವೇಗದ ಮಾನವ ಕ್ಯಾಲ್ಕುಲೇಟರ್ ದಾಖಲೆಯನ್ನು ಮುರಿದಿದ್ದೇನೆ ಎಂದು ಹೇಳಿದರು.
ಬಾಲ್ಯದಿಂದಲೂ ಗಣಿತದಲ್ಲಿ ಆಸಕ್ತಿ ಹೊಂದಿದ್ದ ಅವರು ತಮ್ಮ 5ನೇ ವರ್ಷಕ್ಕೆ ಎಸ್ಐಪಿ ಅಬ್ಯಾಕಸ್ ತರಗತಿಗೆ ಸೇರಿಕೊಂಡಿದ್ದು ಹಲವಾರು ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ. ಅನೇಕ ದಾಖಲೆಗಳನ್ನು ಮುರಿದಿದ್ದಾರೆ ಮತ್ತು ಜೀವನದಲ್ಲಿ ಹೆಚ್ಚು ಸವಾಲಿನ ವಿಷಯಗಳತ್ತ ದೃಷ್ಟಿ ಹಾಯಿಸಿದ್ದಾರೆ. ಅವರು 4 ವಿಶ್ವ ದಾಖಲೆಗಳನ್ನು ಮತ್ತು 50 ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ ಅನ್ನು ಹೊಂದಿದ್ದಾರೆ.
ಎಸ್ಐಪಿ ಅಕಾಡೆಮಿ ನೀಡುವ ಗ್ರ್ಯಾಂಡ್ಮಾಸ್ಟರ್ ಕಾರ್ಯಕ್ರಮವಾದ ಅಬ್ಯಾಕಸ್ನ 9 ಹಂತಗಳನ್ನು ಅವರು ಪೂರ್ಣಗೊಳಿಸಿದ್ದಾರೆ. ಅವರು ಅಂತರರಾಷ್ಟ್ರೀಯ ಅಬ್ಯಾಕಸ್ ಚಾಂಪಿಯನ್ ’13 ಮತ್ತು ರಾಷ್ಟ್ರೀಯ ಅಬ್ಯಾಕಸ್ ಚಾಂಪಿಯನ್ ’11 & ’12, ಮತ್ತು 2015 ರಲ್ಲಿ ಗಣಿತ ಜೀನಿಯಸ್ ಪ್ರಶಸ್ತಿಯನ್ನೂ ಗೆದ್ದಿದ್ದಾರೆ.
ಇದಲ್ಲದೆ, ಅವರು ತೆಲಂಗಾಣ ಸರ್ಕಾರದೊಂದಿಗೆ ಕೆಲಸ ಮಾಡುತ್ತಿರುವ ‘ಎಕ್ಸ್ಪ್ಲೋರಿಂಗ್ ಇನ್ಫಿನಿಟೀಸ್ (ಇಐ)’ ಎಂಬ ಸ್ಟಾರ್ಟ್ ಅಪ್ ಅನ್ನು ಹೊಂದಿದ್ದಾರೆ ಮತ್ತು ಅದರ ಮೂಲಕ ಕಳೆದ ವರ್ಷಗಳಲ್ಲಿ 10,000 ವಿದ್ಯಾರ್ಥಿಗಳನ್ನು ತೊಡಗಿಸಿಕೊಂಡಿದ್ದಾರೆ.
