ಐಸಿಸಿ ಪುರುಷರ ಟಿ20 ವಿಶ್ವಕಪ್ಗೆ ಕ್ಷಣಗಣನೆ ಆರಂಭವಾಗಿದೆ. ಕ್ರಿಕೆಟ್ ಜಗತ್ತೇ ಎದುರು ನೋಡುತ್ತಿರುವ ಈ ಮೆಗಾ ಟೂರ್ನಿಯು ಭಾರತ ಮತ್ತು ಶ್ರೀಲಂಕಾ ಜಂಟಿ ಆತಿಥ್ಯದಲ್ಲಿ ಫೆಬ್ರವರಿ 7 ರಿಂದ ಅದ್ದೂರಿಯಾಗಿ ಆರಂಭವಾಗಲಿದೆ. ಆದರೆ ಟೂರ್ನಿ ಶುರುವಾಗುವ ಹೊತ್ತಿನಲ್ಲೇ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ತನ್ನ ಹಳೆಯ ಚಾಳಿಯನ್ನು ಮುಂದುವರಿಸಿದ್ದು, ಹೊಸದೊಂದು ವಿವಾದವನ್ನು ಮೈಮೇಲೆ ಎಳೆದುಕೊಂಡಿದೆ.
ವಿಶ್ವಕಪ್ ಆಡಲು ತಮ್ಮ ತಂಡಕ್ಕೆ ಅನುಮತಿ ನೀಡಿದ ಪಾಕ್ ಸರ್ಕಾರ, ಫೆಬ್ರವರಿ 15 ರಂದು ನಡೆಯಲಿರುವ ಭಾರತದ ವಿರುದ್ಧದ ಪ್ರತಿಷ್ಠಿತ ಪಂದ್ಯವನ್ನು ಆಡಬಾರದು ಎಂದು ಷರತ್ತು ವಿಧಿಸಿದೆ. ಈ ನಿರ್ಧಾರದ ಮೂಲಕ ಪಾಕಿಸ್ತಾನ ತನ್ನ ಕಾಲ ಮೇಲೆ ತಾನೇ ಕಲ್ಲು ಹಾಕಿಕೊಂಡಂತಾಗಿದೆ.
ಪಾಕಿಸ್ತಾನಕ್ಕೆ ಕಾದಿದೆ ಬರೋಬ್ಬರಿ 316 ಕೋಟಿ ರೂಪಾಯಿ ನಷ್ಟ
ಕ್ರಿಕೆಟ್ ಜಗತ್ತಿನಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯವೆಂದರೆ ಅದು ಕೇವಲ ಆಟವಲ್ಲ, ಅದೊಂದು ಆರ್ಥಿಕ ಶಕ್ತಿಯಿದ್ದಂತೆ. ಈ ಪಂದ್ಯ ನಡೆಯದಿದ್ದರೆ ಐಸಿಸಿಗೆ ಬರುವ ಆದಾಯದಲ್ಲಿ ಭಾರೀ ಇಳಿಕೆಯಾಗುತ್ತದೆ. ನಿಯಮಗಳ ಪ್ರಕಾರ, ವೇಳಾಪಟ್ಟಿಯಂತೆ ಪಂದ್ಯ ಆಡದಿದ್ದರೆ ಐಸಿಸಿಯು ಪಾಕಿಸ್ತಾನಕ್ಕೆ ನೀಡಬೇಕಾದ ವಾರ್ಷಿಕ ಆದಾಯದ ಪಾಲನ್ನು ತಡೆಹಿಡಿಯಬಹುದು. ಇದರಿಂದ ಪಾಕಿಸ್ತಾನಕ್ಕೆ ಅಂದಾಜು 34.5 ಮಿಲಿಯನ್ ಯುಎಸ್ ಡಾಲರ್ ಅಂದರೆ ಸುಮಾರು 316 ಕೋಟಿ ರೂಪಾಯಿ ನಷ್ಟವಾಗಲಿದೆ. ಈಗಾಗಲೇ ಆರ್ಥಿಕ ಸಂಕಷ್ಟದಲ್ಲಿರುವ ಪಿಸಿಬಿಗೆ ಈ ಮೊತ್ತ ಕೈತಪ್ಪಿದರೆ ಚೇತರಿಸಿಕೊಳ್ಳಲಾಗದ ಮಟ್ಟಕ್ಕೆ ಕುಸಿಯಲಿದೆ.
ಪ್ರಸಾರಕರ ಕೆಂಗಣ್ಣು ಮತ್ತು ಜಾಹೀರಾತು ಆದಾಯಕ್ಕೆ ಕತ್ತರಿ
ಈ ಬಾರಿಯ ಟಿ20 ವಿಶ್ವಕಪ್ ಪ್ರಸಾರದ ಹಕ್ಕನ್ನು ಜಿಯೋ ಸ್ಟಾರ್ ಸಂಸ್ಥೆ ಸಾವಿರಾರು ಕೋಟಿ ರೂಪಾಯಿ ನೀಡಿ ಖರೀದಿಸಿದೆ. ಇಂಡೋ ಪಾಕ್ ಪಂದ್ಯದ ವೇಳೆ 10 ಸೆಕೆಂಡಿನ ಜಾಹೀರಾತಿಗೆ ಬರೋಬ್ಬರಿ 40 ಲಕ್ಷ ರೂಪಾಯಿ ದರ ನಿಗದಿಪಡಿಸಲಾಗಿದೆ ಎಂದು ಅಂದಾಜಿಸಲಾಗಿದೆ. ಈ ಒಂದೇ ಪಂದ್ಯದಿಂದ ಸುಮಾರು 200 ರಿಂದ 250 ಕೋಟಿ ರೂಪಾಯಿ ಜಾಹೀರಾತು ಆದಾಯ ನಿರೀಕ್ಷಿಸಲಾಗಿದೆ. ಒಂದು ವೇಳೆ ಪಾಕ್ ತಂಡ ಮೈದಾನಕ್ಕೆ ಇಳಿಯದಿದ್ದರೆ, ಈ ನಷ್ಟವನ್ನು ಪಿಸಿಬಿಯಿಂದಲೇ ಭರಿಸುವಂತೆ ಐಸಿಸಿ ಆದೇಶಿಸುವ ಸಾಧ್ಯತೆ ದಟ್ಟವಾಗಿದೆ. ಇದು ಪಾಕ್ ಪಾಲಿಗೆ ಮರಣಶಾಸನವಾಗಬಲ್ಲದು.
ಪಿಎಸ್ಎಲ್ ಭವಿಷ್ಯಕ್ಕೂ ಕೊಡಲಿ ಏಟು
ಪಾಕಿಸ್ತಾನದ ಪ್ರತಿಷ್ಠಿತ ಪಾಕಿಸ್ತಾನ್ ಸೂಪರ್ ಲೀಗ್ (ಪಿಎಸ್ಎಲ್) ಸಂಪೂರ್ಣವಾಗಿ ವಿದೇಶಿ ಆಟಗಾರರ ಮೇಲೆ ಅವಲಂಬಿತವಾಗಿದೆ. ಐಸಿಸಿ ನಿಯಮಗಳನ್ನು ಉಲ್ಲಂಘಿಸಿದರೆ, ಇಂಗ್ಲೆಂಡ್, ಆಸ್ಟ್ರೇಲಿಯಾದಂತಹ ಪ್ರಮುಖ ಕ್ರಿಕೆಟ್ ಮಂಡಳಿಗಳು ತಮ್ಮ ಆಟಗಾರರಿಗೆ ಪಿಎಸ್ಎಲ್ ಆಡಲು ನಿರಾಕ್ಷೇಪಣಾ ಪತ್ರ (ಎನ್ಒಸಿ) ನೀಡುವುದನ್ನು ನಿಲ್ಲಿಸಬಹುದು. ವಿದೇಶಿ ಆಟಗಾರರಿಲ್ಲದ ಪಿಎಸ್ಎಲ್ ತನ್ನ ವರ್ಚಸ್ಸು ಕಳೆದುಕೊಂಡು ನೆಲಕಚ್ಚುವುದು ಖಂಡಿತ.
ದ್ವಿಪಕ್ಷೀಯ ಸರಣಿ ಮತ್ತು ರ್ಯಾಂಕಿಂಗ್ ಮೇಲೆ ಪರಿಣಾಮ
ವಿಶ್ವಕಪ್ನಂತಹ ಪ್ರಮುಖ ಟೂರ್ನಿಯಲ್ಲಿ ರಾಜಕೀಯ ಬೆರೆಸಿ ಆಟಕ್ಕೆ ಅಡ್ಡಿಪಡಿಸಿದರೆ ಐಸಿಸಿ ಸುಮ್ಮನೆ ಕೂರುವುದಿಲ್ಲ. ಪಾಕಿಸ್ತಾನದ ಮೇಲೆ ದ್ವಿಪಕ್ಷೀಯ ಸರಣಿ ಆಡದಂತೆ ನಿಷೇಧ ಹೇರಬಹುದು. ಇದರಿಂದ ಪಾಕಿಸ್ತಾನದ ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಅಂಕಗಳು ಕಡಿತಗೊಳ್ಳಲಿದ್ದು, ಐಸಿಸಿ ರ್ಯಾಂಕಿಂಗ್ ಪಟ್ಟಿಯಲ್ಲಿ ಪಾತಾಳಕ್ಕೆ ಕುಸಿಯುವ ಭೀತಿ ಎದುರಾಗಿದೆ. ಅಷ್ಟೇ ಅಲ್ಲದೆ, ಕ್ರಿಕೆಟ್ ಜಗತ್ತಿನಲ್ಲಿ ಪಾಕಿಸ್ತಾನ ಏಕಾಂಗಿಯಾಗುವ ಸಾಧ್ಯತೆಯಿದೆ.
ಭಾರತಕ್ಕೆ ವಾಕ್ ಓವರ್ ಲಾಭ ಪಾಕ್ ಔಟ್
ಒಂದು ವೇಳೆ ಫೆಬ್ರವರಿ 15ರ ಪಂದ್ಯಕ್ಕೆ ಪಾಕಿಸ್ತಾನ ಗೈರಾದರೆ, ಐಸಿಸಿ ನಿಯಮಗಳ ಪ್ರಕಾರ ಭಾರತಕ್ಕೆ ವಾಕ್ ಓವರ್ ಮೂಲಕ ಸುಲಭವಾಗಿ 2 ಅಂಕಗಳು ಲಭಿಸಲಿವೆ. ಪಾಕಿಸ್ತಾನಕ್ಕೆ ಶೂನ್ಯ ಸಂಪಾದನೆಯಾಗಲಿದೆ. ಗ್ರೂಪ್ ಹಂತದಲ್ಲಿ ಒಂದು ಪಂದ್ಯ ಸೋತರೂ (ಅಥವಾ ಆಡದಿದ್ದರೆ) ಮುಂದಿನ ಹಂತಕ್ಕೇರುವುದು ಕಷ್ಟ. ಹೀಗಾಗಿ ಭಾರತದ ವಿರುದ್ಧ ಆಡದಿದ್ದರೆ ಪಾಕಿಸ್ತಾನದ ವಿಶ್ವಕಪ್ ಕನಸು ಲೀಗ್ ಹಂತದಲ್ಲೇ ಭಗ್ನಗೊಳ್ಳಲಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ಭಾರತದ ವಿರುದ್ಧ ಆಡುವುದಿಲ್ಲ ಎಂಬ ಹಠಮಾರಿತನವು ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯನ್ನು ಆರ್ಥಿಕವಾಗಿ ಹಾಗೂ ಕ್ರೀಡಾತ್ಮಕವಾಗಿ ಸಂಪೂರ್ಣವಾಗಿ ನಾಶಮಾಡಲಿದ್ದು, ಕ್ರೀಡಾ ಜಗತ್ತಿನ ಎದುರು ತೀವ್ರ ಮುಖಭಂಗ ಅನುಭವಿಸಬೇಕಾಗುತ್ತದೆ.
