ಪ್ಲಂಬರ್ ನ ಸಮಯ ಪ್ರಜ್ಞೆಯಿಂದ ತಪ್ಪಿದ ದೊಡ್ಡ ರೈಲು ಅಪಘಾತ
ಮೊರಾದಾಬಾದ್, ಅಗಸ್ಟ್31: ಪ್ಲಂಬರ್ ನ ಸಮಯ ಪ್ರಜ್ಞೆಯಿಂದ ಪಾರ್ಸೆಲ್ ಎಕ್ಸ್ಪ್ರೆಸ್ ರೈಲಿನ ಅಪಘಾತ ತಪ್ಪಿದೆ. ಮೊರಾದಾಬಾದ್ನ ದೆಹಲಿ ಲಕ್ನೋ ಡೌನ್ ರೈಲು ಹಾದು ಹೋಗುವ ಹಳಿಯು ಶನಿವಾರ ಬೆಳಿಗ್ಗೆ 6 ಗಂಟೆಗೆ ಬಿರುಕು ಬಿಟ್ಟಿತ್ತು. ಅಮೃತಸರದಿಂದ ಹೌರಾಕ್ಕೆ ಹೋಗುವ 24 ಬೋಗಿಗಳ ಪಾರ್ಸೆಲ್ ಎಕ್ಸ್ಪ್ರೆಸ್ ರೈಲು ಅದೇ ಮುರಿದ ಟ್ರ್ಯಾಕ್ ಮೂಲಕ ಹಾದು ಹೋಗಲು ಕೆಲವೇ ಕ್ಷಣಗಳು ಬಾಕಿ ಇದ್ದವು.
ಆಗ ಟ್ರ್ಯಾಕ್ ಬಳಿ ಪ್ರಾಣಿಗಳನ್ನು ಮೇಯಿಸುತ್ತಿದ್ದ ಪ್ಲಂಬರ್ ಚಂದ್ರಸೇನ್ ಸೈನಿ ತಾನು ಧರಿಸಿದ್ದ ತನ್ನ ಕೆಂಪು ಬಣ್ಣದ ಕ್ಯಾಪ್ರಿ ಅನ್ನು ಚಾಲಕನಿಗೆ ತೋರಿಸಿದ್ದು, ಚಾಲಕ ತುರ್ತು ಬ್ರೇಕ್ ಅನ್ವಯಿಸಿ ರೈಲು ನಿಲ್ಲಿಸಿದರು.
ನಂತರ, ಚಾಲಕ ರೈಲ್ವೆ ನಿಯಂತ್ರಣ ಕೊಠಡಿಯಲ್ಲಿ ಇದರ ಬಗ್ಗೆ ಮಾಹಿತಿ ನೀಡಿದರು. ಕೂಡಲೇ ರೈಲ್ವೆ ಇಲಾಖೆಯ ಹಿರಿಯ ಅಧಿಕಾರಿಗಳ ತಂಡವೂ ಅಲ್ಲಿಗೆ ಆಗಮಿಸಿ, ಪರಿಶೀಲನೆ ನಡೆಸಿತು. ಟ್ರ್ಯಾಕ್ ರಿಪೇರಿ ಮಾಡಿದ ನಂತರ ಬೆಳಿಗ್ಗೆ 8:55 ಕ್ಕೆ ರೈಲು ಹೊರಟಿತು.
ಕೊರೋನಾದ ಹಿನ್ನೆಲೆಯಲ್ಲಿ, ಕೆಲವು ಪ್ಯಾಸೆಂಜರ್ ರೈಲುಗಳು, ಹೆಚ್ಚಾಗಿ ಸರಕು ಮತ್ತು ಪಾರ್ಸೆಲ್ ಎಕ್ಸ್ಪ್ರೆಸ್ ರೈಲುಗಳನ್ನು ಈ ದಿನಗಳಲ್ಲಿ ನಡೆಸಲಾಗುತ್ತಿದೆ. ಶನಿವಾರ ಬೆಳಿಗ್ಗೆ ಇಪ್ಪತ್ನಾಲ್ಕು ಕೋಚ್ ಪಾರ್ಸೆಲ್ ಎಕ್ಸ್ಪ್ರೆಸ್ ರೈಲು ಅಮೃತಸರದಿಂದ ಹೌರಾಕ್ಕೆ ಹೋಗಬೇಕಿತ್ತು.
ಬೆಳಿಗ್ಗೆ 6:05 ಕ್ಕೆ ದೆಹಲಿ ಲಕ್ನೋ ಡೌನ್ ಲೈನ್ನ ಕಟ್ಘರ್ ಪ್ರದೇಶದ ಭೈನ್ಸಿಯಾ ಗ್ರಾಮದ ನಿವಾಸಿ ಚಂದ್ರಸೇನ್ ಸೈನಿ ರೈಲ್ವೆ ಮಾರ್ಗದಲ್ಲಿ ಜಾನುವಾರುಗಳನ್ನು ಮೇಯಿಸುತ್ತಿದ್ದ ವೇಳೆ ಒಂದು ರೈಲು ಅದೇ ಮಾರ್ಗದಲ್ಲಿ ಹಾದು ಹೋಯಿತು. ಅದಾದ ಬಳಿಕ ಹಳಿಯಲ್ಲಿ ಒಂದು ಕಡೆ ಕಿಡಿ ಹಾರುತ್ತಿರುವುದನ್ನು ಚಂದ್ರಸೇನ್ ಗಮನಿಸಿದರು. ಹತ್ತಿರ ಹೋಗಿ ನೋಡಿದಾಗ ರೈಲು ಟ್ರ್ಯಾಕ್ ಬಿರುಕು ಬಿಟ್ಟಿತ್ತು ಮತ್ತು ಅಂತರ ಕೂಡ ಹೆಚ್ಚಾಗಿತ್ತು.
ಅಷ್ಟರಲ್ಲಿ ಇನ್ನೊಂದು ರೈಲು ಅದೇ ಟ್ರ್ಯಾಕ್ ನಲ್ಲಿ ಆಗಮಿಸುತ್ತಿರುವ ಶಬ್ದ ಕೇಳಿಸಿತು. ತನ್ನ ಬಳಿ ಮೊಬೈಲ್ ಅಥವಾ ಯಾವುದೇ ಕೆಂಪು ಬಣ್ಣದ ಬಟ್ಟೆಯಿಲ್ಲ ಎಂದು ಅರಿವಾದ ಚಂದ್ರಸೇನ್ ನಂತರ ತನ್ನ ಕೆಂಪು ಕ್ಯಾಪ್ರಿ ತೆಗೆದು ಡ್ರೈವರ್ ಗೆ ಗುರಿ ಮಾಡಿ ಒಂದೇ ಸಮ ಹಾರಿಸಲು ಶುರು ಮಾಡಿದರು. ಚಾಲಕ ತಕ್ಷಣ ತುರ್ತು ಬ್ರೇಕ್ಗಳನ್ನು ಅನ್ವಯಿಸಿ ರೈಲನ್ನು ನಿಲ್ಲಿಸಿದರು.
ಟ್ರ್ಯಾಕ್ ಅನ್ನು ಸರಿಪಡಿಸಿದ ನಂತರ, ರೈಲು ಬೆಳಿಗ್ಗೆ 8:55 ಕ್ಕೆ ನಿಧಾನಗತಿಯಲ್ಲಿ ಹಾದುಹೋಯಿತು. ದುರಸ್ತಿ ಕಾರ್ಯ ಮಧ್ಯಾಹ್ನ ಮೂರು ಗಂಟೆಯವರೆಗೆ ನಡೆಯಿತು.
ಮಾಹಿತಿ ಪಡೆದ ಮೇಲೆ ಅಧಿಕಾರಿಗಳು ಮತ್ತು ನೌಕರರು ಸ್ಥಳಕ್ಕೆ ತಲುಪಿದ್ದಾರೆ ಎಂದು ಮೊರಾದಾಬಾದ್ ರೈಲ್ವೆ ವಿಭಾಗದ ಡಿಆರ್ಎಂ ತರುಣ್ ಪ್ರಕಾಶ್ ತಿಳಿಸಿದ್ದು, ಈ ಬಗ್ಗೆ ತನಿಖೆ ನಡೆಸಲು ಆದೇಶ ನೀಡಲಾಗಿದೆ ಎಂದು ವರದಿಗಳು ತಿಳಿಸಿವೆ. ರೈಲು ಹಳಿ ದುರಸ್ತಿ ಕಾರ್ಯದ ಬಳಿಕ ರೈಲುಗಳು ಸುಗಮವಾಗಿ ಸಂಚರಿಸುತ್ತಿವೆ ಎನ್ನಲಾಗಿದೆ.
