ನಟಿ ರಮ್ಯಾ ಮತ್ತು ಡಿಸಿಎಂ ಡಿಕೆ ಶಿವಕುಮಾರ್ ಅವರ ಪುತ್ರಿ ಐಶ್ವರ್ಯಾ ಡಿಕೆಎಸ್ ಹೆಗಡೆ ಅವರ ಸ್ನೇಹದ ಬಗ್ಗೆ ಬಹಳಷ್ಟು ಜನರಿಗೆ ಗೊತ್ತಿಲ್ಲ. ಆದರೆ, ಈಗ ಈ ಇಬ್ಬರ ಬಾಂಧವ್ಯ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ರಮ್ಯಾ ಅವರು ಐಶ್ವರ್ಯಾ ಡಿಕೆಎಸ್ ಹೆಗಡೆ ಅವರೊಂದಿಗೆ ವೇದಿಕೆ ಹಂಚಿಕೊಂಡ ಕ್ಷಣಗಳನ್ನು ಹಂಚಿಕೊಂಡಿದ್ದಾರೆ.
ಗ್ಲೋಬಲ್ ಅಕಾಡೆಮಿಯಲ್ಲಿ ವಿಶೇಷ ಸಂವಾದ
ವಿಟಿಯು ಯೂತ್ ಫೆಸ್ಟ್‌ನ ‘ಬಡ್ಡಿ ಬೆಂಚ್ ಕಾನ್ವರ್ಷೇಷನ್’ ನಾಲ್ಕನೇ ಎಪಿಸೋಡ್‌ ನಲ್ಲಿ ಐಶ್ವರ್ಯಾ ಡಿಕೆಎಸ್ ಹೆಗಡೆ ಆತಿಥ್ಯ ಸ್ವೀಕರಿಸಿ, ನಟಿ ರಮ್ಯಾ ವಿಶೇಷ ಅತಿಥಿಯಾಗಿ ಆಗಮಿಸಿದ್ದರು. ವಿದ್ಯಾರ್ಥಿಗಳೊಂದಿಗೆ ನಡೆದ ಸಂವಾದ ಕಾರ್ಯಕ್ರಮದಲ್ಲಿ ರಮ್ಯಾ ಹಲವಾರು ವಿಚಾರಗಳನ್ನು ಹಂಚಿಕೊಂಡರು. ಈ ಸಂದರ್ಭ, ಐಶ್ವರ್ಯಾ ಅವರೊಂದಿಗೆ ವೇದಿಕೆ ಹಂಚಿಕೊಳ್ಳುವ ಅಪರೂಪದ ಅನುಭವ ರಮ್ಯಾ ಅವರಿಗೆ ತುಂಬಾ ಸಂತೋಷವನ್ನು ತಂದಿತ್ತು.
ನೀನು ಸ್ಫೂರ್ತಿದಾಯಿನಿ ಐಶು! – ರಮ್ಯಾ
ಕಾರ್ಯಕ್ರಮದ ನಂತರ, ರಮ್ಯಾ ಸೋಶಿಯಲ್ ಮೀಡಿಯಾದಲ್ಲಿ ತಮ್ಮ ನೆನಪುಗಳನ್ನು ಹಂಚಿಕೊಂಡರು. ನನ್ನ ಮುದ್ದು, ಕರುಣೆಯ ಮೂರ್ತಿಯಾಗಿರುವ ಐಶು! ನೀನು ಅದ್ಭುತ ಮಹಿಳೆಯಾಗಿ ರೂಪುಗೊಂಡಿದ್ದಕ್ಕೆ ನನಗೆ ಬಹಳ ಹೆಮ್ಮೆ. ನಿನಗೆ ಈಜುವುದನ್ನು ಕಲಿಸಿದ್ದು, ಒಟ್ಟಿಗೆ ಶಾಪಿಂಗ್ ಮಾಡಿದ್ದು, ನನ್ನ ಸಿನಿಮಾಗಳ ವೇಳೆ ಥಿಯೇಟರ್‌ನಲ್ಲಿ ಕೂಗಿದ್ದು—ಇವೆಲ್ಲವೂ ನೆನಪಿದೆ! ಈಗ ನಿನ್ನೊಂದಿಗೆ ವೇದಿಕೆ ಹಂಚಿಕೊಂಡಿರುವುದು ನನ್ನ ಪಾಲಿಗೆ ಒಂದು ಪೂರ್ಣ ಸರ್ಕಲ್ ಮೂವ್‌ಮೆಂಟ್ ಆಗಿದೆ. ನೀನು ಇಂದಿನ ಅನೇಕ ಯುವತಿಯರಿಗೆ ಸ್ಫೂರ್ತಿ ನೀಡುತ್ತಿರುವುದನ್ನು ನೋಡುವುದು ನನಗೆ ಹೆಮ್ಮೆ ಎಂದು ರಮ್ಯಾ ಭಾವುಕ ಪೋಸ್ಟ್ ಮಾಡಿದರು.
ಈ ಭಾವುಕ ಸಂದೇಶಕ್ಕೆ ಐಶ್ವರ್ಯಾ ಕೂಡ ಪ್ರತಿಕ್ರಿಯೆ ನೀಡಿ, ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ. ತುಂಬಾ ಧನ್ಯವಾದ. ನಿಜವಾಗಿಯೂ ಇದು ನನಗೆ ಹೆಚ್ಚಿನ ಅರ್ಥ ನೀಡುತ್ತದೆ. ಇಷ್ಟು ವರ್ಷಗಳಲ್ಲಿ ನಾವು ಹೆಚ್ಚು ಮಾತುಕತೆ ನಡೆಸಿಲ್ಲ ಅನ್ನಿಸಿತು. ಆದರೆ ಇಂದಿನ ಈ ಸಂವಾದ, ನಮ್ಮ ನಡುವೆ ಉಂಟಾಗಿದ್ದ ಅಂತರವನ್ನು ದೂರ ಮಾಡಿದೆ ಎಂದು ಅವರು ಬರೆದಿದ್ದಾರೆ.
