IPL 2022: ಮುಂದುವರಿದ ಆರ್ಸಿಬಿ ಗೆಲುವಿನ ಓಟ; 4ನೇ ಪಂದ್ಯದಲ್ಲೂ ಮುಂಬೈ ಇಂಡಿಯನ್ಸ್ ಪರದಾಟ
ಕೈಕೊಟ್ಟ ಬ್ಯಾಟಿಂಗ್ ವಿಭಾಗ, ಫಲ ನೀಡದ ತಂತ್ರಗಾರಿಕೆ, ವರ್ಕೌಟ್ ಆಗದ ಪ್ಲೇಯಿಂಗ್ ಇಲೆವೆನ್ ಬದಲಾವಣೆ… ಹೀಗೆ ಪಂದ್ಯದ ಎಲ್ಲಾ ವಿಭಾಗದಲ್ಲೂ ನಿರೀಕ್ಷಿತ ಯಶಸ್ಸು ಕಾಣದ ಮುಂಬೈ ಇಂಡಿಯನ್ಸ್, 2022ರ ಐಪಿಎಲ್ನಲ್ಲಿ ಸತತ 4ನೇ ಸೋಲಿನ ಆಘಾತ ಕಂಡಿದೆ.
ಪುಣೆಯ ಮಹಾರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್(ಎಂಸಿಎ) ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಮುಂಬೈ ಇಂಡಿಯನ್ಸ್, 20 ಓವರ್ಗಳಲ್ಲಿ 151/6 ರನ್ಗಳಿಸಿತು. ಈ ಟಾರ್ಗೆಟ್ ಬೆನ್ನತ್ತಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, 18.3 ಓವರ್ನಲ್ಲಿ 3 ವಿಕೆಟ್ಗೆ 152 ರನ್ಗಳಿಸುವ ಮೂಲಕ 7 ವಿಕೆಟ್ಗಳ ಭರ್ಜರಿ ಗೆಲುವು ಸಾಧಿಸಿತು. ಆ ಮೂಲಕ ಟೂರ್ನಿಯ ಮೂರನೇ ಗೆಲುವು ಸಾಧಿಸಿದ ಆರ್ಸಿಬಿ, ಪಾಯಿಂಟ್ಸ್ ಟೇಬಲ್ನಲ್ಲಿ 3ನೇ ಸ್ಥಾನಕ್ಕೇರಿದೆ.
ರಾವತ್-ಕೊಹ್ಲಿ ಜೊತೆಯಾಟ
ಮುಂಬೈ ನೀಡಿದ 152 ರನ್ಗಳ ಸವಾಲು ಎದುರಿಸಿದ ಆರ್ಸಿಬಿಗೆ ನಾಯಕ ಫಾಫ್ ಡುಪ್ಲೆಸ್ಸಿ16 ರನ್(24 ಬಾಲ್, 1 ಬೌಂಡರಿ) ಹಾಗೂ ಅನುಜ್ ರಾವತ್ 66 ರನ್(47 ಬಾಲ್, 2 ಬೌಂಡರಿ, 6 ಸಿಕ್ಸ್) ಮೊದಲ ವಿಕೆಟ್ಗೆ 50 ರನ್ಗಳಿಸಿ ಉತ್ತಮ ಆರಂಭ ನೀಡಿದರು. ನಂತರ ಕಣಕ್ಕಿಳಿದ ವಿರಾಟ್ ಕೊಹ್ಲಿ 48 ರನ್ (36 ಬಾಲ್, 5 ಬೌಂಡರಿ) ಜವಾಬ್ದಾರಿಯ ಆಟವಾಡಿದರು. ಬಲಿಷ್ಠ ಬ್ಯಾಟಿಂಗ್ ಮೂಲಕ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿದ ಈ ಜೋಡಿ, 2ನೇ ವಿಕೆಟ್ಗೆ 80 ರನ್ಗಳ ಜೊತೆಯಾಟದಿಂದ ಗೆಲುವಿನ ಹಾದಿಯನ್ನು ಸುಗಮಗೊಳಿಸಿದರು. ನಂತರ ಬಂದ ದಿನೇಶ್ ಕಾರ್ತಿಕ್ 7* ಹಾಗೂ ಮ್ಯಾಕ್ಸ್ವೆಲ್ 8* ತಂಡವನ್ನ ಗೆಲುವಿನ ದಡಸೇರಿಸಿದರು.
ಮುಂಬೈ ಕೈಹಿಡಿದ ಸೂರ್ಯ
ಮೊದಲು ಬ್ಯಾಟಿಂಗ್ ಮಾಡಿದ ಮುಂಬೈಗೆ ನಾಯಕ ರೋಹಿತ್ ಶರ್ಮ(26) ಹಾಗೂ ಇಶಾನ್ ಕಿಶನ್(26) ಮೊದಲ ವಿಕೆಟ್ಗೆ 50 ರನ್ಗಳ ಜೊತೆಯಾಟದ ಆರಂಭ ನೀಡಿದರು. ನಂತರದಲ್ಲಿ ಆರ್ಸಿಬಿ ಬೌಲರ್ಗಳ ಎದುರು ತತ್ತರಿಸಿದ ಮುಂಬೈ ನಾಟಕೀಯ ಕುಸಿತ ಕಂಡಿತು. ಡೆವಾಲ್ಡ್ ಬ್ರೆವಿಸ್(8), ತಿಲಕ್ ವರ್ಮ(0), ಕೈರನ್ ಪೊಲಾರ್ಡ್(0) ಹಾಗೂ ರಮಣದೀಪ್ ಸಿಂಗ್(6) ಇಬ್ಬರ ಹಿಂದೆ ಒಬ್ಬರು ಪೆವಿಲಿಯನ್ ಸೇರಿಕೊಂಡರು. ಆರ್ಸಿಬಿ ಬೌಲರ್ಗಳ ಪ್ರಾಬಲ್ಯದ ನಡುವೆಯೂ ಸೂರ್ಯಕುಮಾರ್ ಯಾದವ್ 68 ರನ್(37 ಬಾಲ್, 5 ಬೌಂಡರಿ, 6 ಸಿಕ್ಸ್) ಜವಾಬ್ದಾರಿಯ ಆಟವಾಡಿದರು. 7ನೇ ವಿಕೆಟ್ಗೆ ಉನಾದ್ಕಟ್(13*) ಜೊತೆಗೂಡಿ ಅಜೇಯ 72 ರನ್ಗಳಿಸಿ ತಂಡಕ್ಕೆ ಆಸರೆಯಾದರು.
ಆರ್ಸಿಬಿ ಪರ ವನಿಂದು ಹಸರಂಗ(2/28), ಹರ್ಷಲ್ ಪಟೇಲ್(2/23), ಆಕಾಶ್ ದೀಪ್(1/20) ಉತ್ತಮ ಬೌಲಿಂಗ್ ಪ್ರದರ್ಶಿಸಿದರು.
