ಪಾಕಿಸ್ತಾನದ ವಿರುದ್ಧ ನಡೆಸಿದ ಆಪರೇಷನ್ ಸಿಂಧೂರ ಕ್ರಮಕ್ಕೆ ಸಂಪೂರ್ಣ ಬೆಂಬಲ ನೀಡಿದ ಕರ್ನಾಟಕ ಸರ್ಕಾರ ಈಗ ಕೇಂದ್ರ ಸರ್ಕಾರದ ನಿರ್ಧಾರಗಳ ಬಗ್ಗೆ ಗಂಭೀರ ಪ್ರಶ್ನೆ ಎತ್ತಿದೆ. ರಾಜ್ಯದ ಕೃಷಿ ಸಚಿವ ಕೃಷ್ಣ ಬೈರೇಗೌಡ ಅವರು ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಮೇಲೆ ಸರಣಿ ಪ್ರಶ್ನೆಗಳ ಮೂಲಕ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
ವಿಜಯಪುರದಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಕೃಷ್ಣ ಬೈರೇಗೌಡ ಅವರು, ಪ್ರಧಾನಿ ಮೋದಿಯವರು ಏನೇನು ಭಾಷಣ ಮಾಡಿದರೂ ಸಾಕಾಗಲ್ಲ. ದೇಶದ ಭದ್ರತೆ, ಸೈನ್ಯದ ಸಾಹಸ ಮತ್ತು ಸಾರ್ವಜನಿಕ ಭಾವನೆಗಳ ಹಿನ್ನೆಲೆಯಲ್ಲಿ, ಕದನ ವಿರಾಮ ಘೋಷಣೆಯ ಹಿಂದೆ ಇರುವ ಉದ್ದೇಶವನ್ನು ಜನತೆಗೂ ತಿಳಿಯಬೇಕು ಎಂದು ಸ್ಪಷ್ಟವಾಗಿ ಹೇಳಿದರು.
ಪಾಕಿಸ್ತಾನಕ್ಕೆ ಪಾಠ ಕಲಿಸಲು ನಾವು ಆಪರೇಷನ್ ಸಿಂಧೂರಗೆ ಬೆಂಬಲ ನೀಡಿದ್ದೆವು. ಅದು ಸರಿಯಾದ ಹೆಜ್ಜೆ ಎಂಬ ನಂಬಿಕೆ ನಮಗೆ ಇತ್ತು. ಆದರೆ ಈಗ ಸರಕಾರ ಕದನ ವಿರಾಮವನ್ನು ಘೋಷಿಸಿದೆ. ಆಗ ಪ್ರಶ್ನೆ ಏನೆಂದರೆ – ನಾವು ಯಾವ ಗುರಿ ಇಟ್ಟುಕೊಂಡು ಆ ಕದನ ಪ್ರಾರಂಭಿಸಿದ್ದೆವು? ಆ ಗುರಿ ಈಡೇರಿದೆಯಾ? ನಿಜಕ್ಕೂ ಪಾಕಿಸ್ತಾನಕ್ಕೆ ಪಾಠವಾಗಿದೆ ಎಂದು ಭರವಸೆ ಇದೆವೇ? ಎಂದು ಅವರು ಪ್ರಶ್ನಿಸಿದರು.
ಈ ನಿರ್ಧಾರ ಹಿನ್ನಲೆಯಲ್ಲಿ ಸಾರ್ವಜನಿಕರಲ್ಲಿಯೂ ಗೊಂದಲ ಮತ್ತು ಅನುಮಾನಗಳು ಹುಟ್ಟಿವೆ. ದೇಶದ ಭದ್ರತೆಗೆ ಸಂಬಂಧಪಟ್ಟ ಈ ವಿಷಯದಲ್ಲಿ, ರಾಜಕೀಯ ಭಾಷಣಗಳಿಗೆ ಮೀರಿ ಸ್ಪಷ್ಟವಾದ, ಸಮರ್ಥನೀಯ ಉತ್ತರ ನೀಡುವ ಹೊಣೆ ಪ್ರಧಾನಿಯವರದ್ದೆ ಎಂದು ಬೈರೇಗೌಡರು ತಿಳಿಸಿದರು.
ಈ ಸಂದರ್ಭದಲ್ಲಿಯೇ ಅವರು ಮತ್ತೊಂದು ಮಹತ್ವದ ವಿಚಾರ ಎತ್ತಿದರು – ಯುದ್ಧ ಅಥವಾ ಕದನ ವಿರಾಮವೆಂಬ ತೀರ್ಮಾನಗಳು ರಾಜಕೀಯ ಪ್ರದರ್ಶನಕ್ಕೆ ವಿಷಯವಾಗಬಾರದು. ಇದು ರಾಷ್ಟ್ರದ ಭದ್ರತೆಗೆ ಸಂಬಂಧಪಟ್ಟದ್ದು. ದೇಶದ ಜನರ ಭದ್ರತೆ ಮತ್ತು ಸೈನಿಕರ ಬಲಿದಾನಗಳ ಬಗ್ಗೆ ಕೇಂದ್ರ ಸರ್ಕಾರವು ಸ್ಪಷ್ಟ ಹಾಗೂ ಜವಾಬ್ದಾರಿಯುತ ನಿಲುವು ತೋರಬೇಕು, ಎಂದರು.
ಪಾಕ್ನ ನಿಲುವು ಏನು?
ಇತ್ತೀಚೆಗೆ ಪಾಕಿಸ್ತಾನದ ವಿರುದ್ಧದ ಹೋರಾಟದ ಬಗ್ಗೆಯೂ ಕೃಷ್ಣ ಬೈರೇಗೌಡ ಮಾತನಾಡಿದರು. ನಾವು ಹಲವಾರು ಬಾರಿ ಪಾಕಿಸ್ತಾನದಿಂದ ನಡೆದ ಉಗ್ರರ ದಾಳಿಗಳನ್ನು ನೋಡಿದ್ದೇವೆ. ಈ ಹಿನ್ನೆಲೆಯಲ್ಲಿ ಭಾರತ ಯುದ್ಧಕ್ಕೆ ಇಳಿದಾಗ, ಅದನ್ನು ಪುನಃ ಮಧ್ಯದಲ್ಲಿ ನಿಲ್ಲಿಸುವುದು ಅರ್ಥಹೀನವೆನಿಸುತ್ತದೆ. ಇದರಿಂದ ಉಗ್ರಶಕ್ತಿಗಳಿಗೆ ತಪ್ಪು ಸಂದೇಶ ಹೋಗುವ ಸಾಧ್ಯತೆ ಇದೆ ಎಂದು ಆತಂಕ ವ್ಯಕ್ತಪಡಿಸಿದರು.
ಮೋದಿ ಸರ್ಕಾರ ಸ್ಪಷ್ಟನೆ ನೀಡಬೇಕೆಂಬ ಒತ್ತಾಯ
ಈ ಎಲ್ಲದರಿಂದಾಗಿ, ಪ್ರಧಾನಿ ಮೋದಿ ಅವರೇ ಸ್ವತಃ ಈ ನಿರ್ಧಾರಗಳ ಹಿಂದಿರುವ ಕಾರಣಗಳನ್ನು ದೇಶದ ಜನತೆಗೆ ವಿವರವಾಗಿ ತಿಳಿಸಬೇಕು ಎಂದು ಸಚಿವ ಬೈರೇಗೌಡ ಒತ್ತಾಯಿಸಿದರು. ಜನರು ಕೇಳುತ್ತಿರುವ ಪ್ರಶ್ನೆಗಳಿಗೆ ಸ್ಪಷ್ಟ ಉತ್ತರ ಸಿಗಬೇಕು. ದೇಶಭಕ್ತಿಯ ಮಾತುಗಳನ್ನು ಕೇವಲ ರ್ಯಾಲಿಗಳಲ್ಲಿ ನೀಡುವ ಬದಲು, ನೈಜ ಪ್ರಶ್ನೆಗಳಿಗೆ ಸ್ಪಷ್ಟನೆ ನೀಡುವುದು ಮುಖ್ಯ ಎಂದು ಅವರು ಹೇಳಿದರು.
