Tamilnadu : ಅಕ್ರಮ ವಿದ್ಯುತ್ ಬೇಲಿ ತಗುಲಿ ಮೂರು ಆನೆಗಳ ಸಾವು…
ಹೊಲದಲ್ಲಿ ಅಳವಡಿಸಿದ್ದ ಅಕ್ರಮ ವಿದ್ಯುತ್ ಬೇಲಿ ತಗುಲು ಮೂರು ಆನೆಗಳು ಸಾವನ್ನಪ್ಪಿರುವ ಘಟನೆ ಮಂಗಳವಾರ ತಮಿಳುನಾಡಿನ ಧರ್ಮಪುರಿ ಜಿಲ್ಲೆಯಲ್ಲಿ ನಡೆದಿದೆ. ಧರ್ಮಪುರಿಯ ಮಾರಂಡಹಳ್ಳಿಯ ಕಾಳಿ ಕೌಂದರ್ ಕೊಟ್ಟೈ ಗ್ರಾಮದಲ್ಲಿ ಈ ಘಟನೆ ನಡೆದಿದೆ.
ಕಾಡಾನೆಗಳಿಂದ ಬೆಳೆ ಉಳಿಸಿಕೊಳ್ಳಲು ರೈತರೊಬ್ಬರು ಅಕ್ರಮವಾಗಿ ಬೇಲಿ ಹಾಕಿದ್ದರು. ಮಂಗಳವಾರದಂದು ಮೂರು ಆನೆಗಳು ಬೇಲಿ ದಾಟಲು ಪ್ರಯತ್ನಿಸಿದಾಗ ವಿದ್ಯುತ್ ಸ್ಪರ್ಶಿಸಿ ಸಾವನ್ನಪ್ಪಿವೆ. ಘಟನೆಯಲ್ಲಿ ಎರಡು ಮರಿ ಆನೆಗಳು ಬದುಕುಳಿದಿವೆ. ಮೀಸಲು ಅರಣ್ಯ ಪ್ರದೇಶದ ಬಳಿ ಘಟನೆ ನಡೆದಿದ್ದು ಮರಗಳ್ಳತನ ನಿಗ್ರಹ ದಳ ಸಂಚರಿಸುವಾಗ ಘಟನೆ ಬೆಳಕಿಗೆ ಬಂದಿದೆ.
ಮೂರು ಆನೆಗಳು ಹೊಲದಲ್ಲಿ ಸಾವನ್ನಪ್ಪಿರುವುದನ್ನ ಕಂಡು ಕೂಡಲೇ ಅರಣ್ಯಧಿಕಾರಿಗಳು ವಿದ್ಯುತ್ ಇಲಾಖೆಯನ್ನ ಸಂಪರ್ಕಿಸಿ ವಿದ್ಯುತ್ ಕಡಿತಗೊಳಿಸಿದ್ದಾರೆ. ಇದರಿಂದಾಗಿ ಎರಡು ಮರಿ ಆನೆಗಳು ಬದುಕುಳಿದಿವೆ. ಘಟನೆಗೆ ಸಂಬಂಧಿಸಿದಂತೆ ಹೊಲದ ಮಾಲಿಕ 67 ವರ್ಷದ ಮುರುಗೇಶ್ ಅವರನ್ನ ಬಂಧಿಸಲಾಗಿದೆ.
Tamilnadu : 3 elephants killed by illegal electric fence…
