ನ್ಯೂಜಿಲೆಂಡ್ ವಿರುದ್ಧವೂ ಸೋತ ಟೀಮ್ ಇಂಡಿಯಾ – ಸೆಮಿಫೈನಲ್ ಆಸೆ ಬಹುತೇಕ ಖತಂ
ದುಬೈ ಮೈದಾನದಲ್ಲಿ ಟೀಮ್ ಇಂಡಿಯಾ ಮತ್ತೆ ಮುಗ್ಗರಿಸಿತು. ಸತತ 2ನೇ ಪಂದ್ಯದಲ್ಲೂ ವಿರಾಟ್ ಬಳಗ ಅಂದುಕೊಂಡಿದ್ದು ಏನೂ ನಡೆಯಲಿಲ್ಲ. ಬ್ಯಾಟಿಂಗ್ ಮತ್ತೊಮ್ಮೆ ಕೈ ಕೊಟ್ಟರೆ, ಬೌಲಿಂಗ್ನಲ್ಲೂ ಮಿಂಚಿನ ಆಟ ಬರಲಿಲ್ಲ. ನ್ಯೂಜಿಲೆಂಡ್ ವಿರುದ್ಧ 8 ವಿಕೆಟ್ಗಳ ಸೋಲುಂಡ ಟೀಮ್ ಇಂಡಿಯಾ ಈಗ ಸೆಮಿಫೈನಲ್ ಆಸೆಯನ್ನು ಬಹುತೇಕವಾಗಿ ಕೈ ಬಿಟ್ಟಿದೆ.
ನ್ಯೂಜಿಲೆಂಡ್ ವಿರುದ್ಧದ ಪಂದ್ಯದಲ್ಲೂ ಟಾಸ್ ಟೀಮ್ ಇಂಡಿಯಾದ ಕೈ ಹಿಡಿಯಲಿಲ್ಲ. ಟಾಸ್ ಗೆದ್ದ ಕಿವೀಸ್ ಟೀಮ್ ಇಂಡಿಯಾವನ್ನು ಬ್ಯಾಟಿಂಗ್ಗೆ ಇಳಿಸಿತು. ರಾಹುಲ್ ಜೊತೆ ಇನ್ನಿಂಗ್ಸ್ ಆರಂಭಿಸಿದ ಇಶನ್ ಕಿಶನ್ ಗಳಿಕೆ ಕೇವಲ 4 ರನ್. ರಾಹುಲ್ ಗಳಿಸಿದ್ದು 14 ರನ್. ರೋಹಿತ್ ಶರ್ಮಾ ಕೊಡುಗೆ 14 ರನ್. ಕ್ಯಾಪ್ಟನ್ ವಿರಾಟ್ ಕೊಹ್ಲಿಯ ಬ್ಯಾಟ್ ಕೂಡ ಸದ್ದು ಮಾಡದೆ 9 ರನ್ಗಳಿಗೆ ಸುಸ್ತಾಗಿತ್ತು. ರನ್ಗಳಿಸಲು ಪರದಾಡಿದ್ದ ರಿಷಬ್ ಪಂತ್ ಕೊಡುಗೆಯಾಗಿ ನೀಡಿದ್ದು 12 ರನ್ ಮಾತ್ರ, ಸಂಕಷ್ಟದಲ್ಲಿದ್ದ ಟೀಮ್ ಇಂಡಿಯಾದ ಮರ್ಯಾದೆ ಉಳಿಸಿದ್ದು ಹಾರ್ದಿಕ್ ಪಾಂಡ್ಯಾ ಮತ್ತು ರವೀಂದ್ರ ಜಡೇಜಾ. ಪಾಂಡ್ಯ 24 ಎಸೆತಗಳಲ್ಲಿ 23 ರನ್ಗಳಿಸಿ ಔಟಾದರು. ಶಾದೂಲ್ ಶೂನ್ಯ ಸುತ್ತಿದರು. ಆದರೆ ಜಡೇಜಾ 19 ಎಸೆತಗಳಲ್ಲಿ ಅಜೇಯ 26 ರನ್ ಸಿಡಿಸಿದ್ದು ತಂಡವನ್ನು ನೂರರ ಗಡಿ ದಾಟುವಂತೆ ಮಾಡಿತು. 20 ಓವರುಗಳಲ್ಲಿ ಟೀಮ್ ಇಂಡಿಯಾ 7 ವಿಕೆಟ್ ಕಳೆದುಕೊಂಡು 110 ರನ್ಗಳಿಸಿತ್ತು. ಟ್ರೆಂಟ್ ಬೋಲ್ಟ್ 3 ವಿಕೆಟ್ ಪಡೆದು ಕಿವೀಸ್ ಬೌಲಿಂಗ್ನ ಬೆಸ್ಟ್ ಫರ್ಫಾಮರ್ ಆಗಿ ಕಾಣಿಸಿಕೊಂಡರು.
ಈಸೀ ಟಾರ್ಗೆಟ್ ಅನ್ನು ಬೆನ್ನು ಹತ್ತುಲು ಶುರುಮಾಡಿದ ಕಿವೀಸ್ ಉತ್ತಮ ಆರಂಭ ಪಡೆಯಿತು. ಮಾರ್ಟಿನ್ ಗಪ್ಟಿಲ್ ಮತ್ತು ಡೆರಿಲ್ ಮಿಚೆಲ್ ಟೀಮ್ ಇಂಡಿಯಾ ಬೌಲರ್ಗಳ ಮೇಲೆ ಒತ್ತಡ ಹೇರಿದ್ರು. ಗಪ್ಟಿಲ್ 20 ರನ್ಗಳಿಸಿ ಬುಮ್ರಾಗೆ ವಿಕೆಟ್ ಒಪ್ಪಿಸಿದರು. ಡೆರಿಲ್ ಮಿಚೆಲ್ ಮತ್ತು ನಾಯಕ ಕೇನ್ ವಿಲಿಯಮ್ಸನ್ ಎಲ್ಲಾ ಲೆಕ್ಕಾಚಾರ ಬದಲಿಸಿದರು. ಮಿಚೆಲ್ ಸ್ಪೋಟಕ ಆಟ ಆಡಿ 3 ಸಿಕ್ಸರ್ ಮತ್ತು 4 ಫೋರ್ಗಳ ನೆರವಿನಿಂದ 49 ರನ್ಗಳಿಸಿ ಔಟಾದರು.
ಕೇನ್ ವಿಲಿಯಮ್ಸನ್ ಮತ್ತು ಡೆವೊನ್ ಕಾನ್ವೆ ನ್ಯೂಜಿಲೆಂಡ್ ಗೆಲುವಿಗೆ ಬೇಕಾದ ಕೆಲಸ ಮುಗಿಸಿದರು. ಕಿವೀಸ್ 14.3 ಓವರುಗಳಲ್ಲಿ ಗುರಿ ತಲುಪಿ 8 ವಿಕೆಟ್ಗಳ ಭರ್ಜರಿ ಜಯ ದಾಖಲಿಸಿತು. ವಿಲಿಯಮ್ಸನ್ ಅಜೇಯ 33 ರನ್ಗಳಿಸಿದರು. ಈ ಭರ್ಜರಿ ಗೆಲುವಿನ ಜೊತೆ ಕಿವೀಸ್ ರನ್ ರೇಟ್ ಅನ್ನು ಕೂಡ ಹೆಚ್ಚಿಸಿಕೊಂಡಿತು.
