ಔಷಧಿಗಳ ಪಿತಾಮಹ ಅಳಲೆಕಾಯಿ ಎಂಬ ದಿವ್ಯ ಸಂಜೀವಿನಿಯ ಬಹು ವಿಧದ ಉಪಯೋಗಗಳೇನು ಗೊತ್ತಾ?
ಅಳಲೆಕಾಯಿಯನ್ನು ಟಿಬೆಟ್ನಲ್ಲಿ ಔಷಧಿಗಳ ರಾಜ ಎಂದು ಕರೆಯುತ್ತಾರೆ. ನಮ್ಮ ದೇಶದ ಆಯುರ್ವೇದ ವೈದ್ಯಪದ್ಧತಿಯಲ್ಲೂ ಅಳಲೆಕಾಯಿಯ ಔಷಧೀಯ ಗುಣಗಳಿಗೆ ವಿಶೇಷ ಮಹತ್ವವಿದೆ. ಈಗಲೂ ನಾಟಿ ವೈದ್ಯ, ಗಿಡಮೂಲಿಕೆಗಳ ಕಷಾಯ ಕೊಡುವವರಿಗೆ ಅಳಲೆಕಾಯಿ ಪಂಡಿತ ಎಂದು ಗುರುತಿಸುವ ವಾಡಿಕೆ ನಮ್ಮ ಗ್ರಾಮೀಣ ಪ್ರದೇಶಗಳಲ್ಲಿದೆ. ದಕ್ಷಿಣ ಏಷ್ಯಾ ಇದರ ತವರು. ಇದನ್ನು ಸಸ್ಯಶಾಸ್ತ್ರೀಯ ಭಾಷೆಯಲ್ಲಿ ಟರ್ಮಿನಲಿಯ ಚೆಬುಲಾ (Terminalia chebula) ಎಂದು ಕರೆಯಲಾಗುತ್ತದೆ, ಇದು ‘ಕಾಂಬ್ರೆಟೇಸಿ’ (Combretaceae) ಎನ್ನುವ ಕುಟುಂಬಕ್ಕೆ ಸೇರಿದ ಸಸ್ಯ. ಅಜ್ಜಿಯ ಔಷದಿ ಎಂದೂ ಗುರುತಿಸಲಾಗುವ ಅಳಲೇಕಾಯಿಯನ್ನು ಸಂಸ್ಕೃತದಲ್ಲು ಹರೀತಕಿ ಎನ್ನುತ್ತಾರೆ. ಭಾರತೀಯ ಪ್ರಾಚೀನ ವೈದ್ಯ ಪದ್ಧತಿಯಲ್ಲೂ ರಾಜಗೌರವ ಹೊಂದಿರುವ ಅಳಲೆಕಾಯಿಯನ್ನು ಶತಶತಮಾನಗಳಿಂದ ನಮ್ಮ ಆಯುರ್ವೇದ, ಮೂಲಿಕಾ ಔಷದ ಮತ್ತು ಸಿದ್ಧೌಷದ ಪದ್ಧತಿಯಲ್ಲಿ ಬಳಸಿಕೊಂಡು ಬರಲಾಗಿದೆ.
ಆಯುರ್ವೇದದಲ್ಲಿ ಅಳಲೆಕಾಯಿಯನ್ನು ಸರ್ವರೋಗ ನಿವಾರಿಣಿ ಎಂದು ಕರೆಯಲಾಗಿದೆ. ದೇಹದಲ್ಲಿನ ನಂಜನ್ನು ಹೊರಹಾಕಲು ಇದು ಬಹುಮುಖ್ಯವಾದ ಔಷಧಿ ಎಂದು ಹೇಳಲಾಗುತ್ತದೆ. ದೇಹದಲ್ಲಿನ ಅಂಗಾಂಶಗಳ ಬೆಳವಣಿಗೆ ಮತ್ತು ಉತ್ತಮ ಆರೋಗ್ಯ ನಿರ್ವಹಣೆಗೆ ಇದು ಸಹಕಾರಿ. ಆಧುನಿಕ ವೈದ್ಯಕೀಯ ಪ್ರಯೋಗಗಳು ಅಳಲೆಕಾಯಿಯಲ್ಲಿ ಹೆಚ್ ಎಸ್ ವಿ ಎಂದು ಕರೆಯಲಾಗುವ ವೈರಸ್ನ ಪರಿಣಾಮಗಳನ್ನು ತಡೆಯಬಲ್ಲ ಪರಿಣಾಮಕಾರಿ ಅಂಶಗಳಿವೆ ಎಂದು ಹೇಳಿವೆ. ಬ್ಯಾಕ್ಟೀರಿಯಾ ಚಟುವಟಿಕೆಗಳನ್ನು ನಿಗ್ರಹಿಸುವ ಮತ್ತು ಹೃದಯಕ್ಕೆ ಅನುಕೂಲಕರವಾದ ಅಂಶಗಳನ್ನು ಹೊಂದಿರುವ ಅತ್ಯುತ್ತಮ ಔಷಧಿ ಎಂದು ಹೇಳಿವೆ.
ಜೀರ್ಣಾಂಗ ವ್ಯವಸ್ಥೆಯಲ್ಲಿರುವ ದೋಷಗಳನ್ನೂ ಈ ಅಳಲೆಕಾಯಿ ಸರಿಪಡಿಸುತ್ತದೆ. ಮಲಬದ್ಧತೆ, ವಾತದೋಷಕ್ಕೂ ಇದು ಪರಿಹಾರ. ಆಯುರ್ವೇದದ ಪ್ರಮುಖ ಚೂರ್ಣಗಳಲ್ಲಿ ಒಂದಾದ ತ್ರಿಫಲಾ ಚೂರ್ಣದಲ್ಲಿ ಅಳಲೆಯೂ ಒಂದು ಹಾಗೂ ಪ್ರಮುಖ. ರಾತ್ರಿಯಿಡೀ ಅಳಲೆಕಾಯಿಗಳನ್ನು ನೆನೆಸಿಟ್ಟ ನೀರಿನಲ್ಲಿ ಬೆಳಗ್ಗೆ ಎದ್ದ ತಕ್ಷಣ ಕಣ್ಣುಗಳನ್ನು ಸ್ವಚ್ಛಗೊಳಿಸಿಕೊಂಡರೆ ಕಣ್ಣುಗಳು ತಂಪಾಗುತ್ತವೆ.
ಮಲಬದ್ಧತೆಯಿಂದ ಬಳಲುತ್ತಿದ್ದರೆ ಅಳಲೆಕಾಯಿಯನ್ನು ಹಸುವಿನ ತುಪ್ಪದಲ್ಲಿ ಹುರಿದು ನಂತರ ಉಪ್ಪಿನ ಜೊತೆ ಸೇರಿಸಿ ಪುಡಿ ಮಾಡಿ ಪ್ರತಿದಿನ ರಾತ್ರಿ ಮಲಗುವ ಮುನ್ನ ಚಿಟಿಕೆ ಪುಡಿಯನ್ನು ಬಿಸಿ ನೀರಿನಲ್ಲಿ ಕಲಸಿ ಕುಡಿದರೆ ಸರಾಗವಾಗಿ ಮಲವಿಸರ್ಜನೆಯಾಗುತ್ತದೆ. ಚರ್ಮದ ಅಲರ್ಜಿಗೂ ಅಳಲೆ ಔಷಧವಾಗಿದೆ, ಅಳಲೆಕಾಯಿಯನ್ನು ಬಿಸಿನೀರಿನಲ್ಲಿ ತೇದು ಚರ್ಮಕ್ಕೆ ಹಚ್ಚಿದರೆ ಸಮಸ್ಯೆ ಪರಿಹಾರವಾಗುತ್ತದೆ. ಅಳಲೆಕಾಯಿ ಪುಡಿಗೆ ಶುಂಠಿಪುಡಿಯನ್ನು ಸೇರಿಸಿ ಅದನ್ನು ಬೆಲ್ಲದ ಜೊತೆ ತಿಂದರೆ ಅಜೀರ್ಣ ಮಾಯವಾಗುತ್ತದೆ.
ಕೂದಲು ಉದುರುತ್ತಿದ್ದರೆ, ತಲೆಯಲ್ಲಿ ಹೊಟ್ಟು, ಹೇನು ಇದ್ದರೆ ಒಂದು ಕಪ್ ಕೊಬ್ಬರಿ ಎಣ್ಣೆಗೆ 3 ರಿಂದ 5 ಅಳಲೆಕಾಯಿ ಹಾಕಿ ಒಡೆಯುವ ತನಕ ಚೆನ್ನಾಗಿ ಕುದಿಸಿ ತಣ್ಣಗಾದ ಮೇಲೆ ಡಬ್ಬಿಗೆ ಹಾಕಿಟ್ಟು ಪ್ರತಿದಿನ ಬಳಸುವುದರಿಂದ ಸರಿಯಾಗುತ್ತದೆ. ಇನ್ನು ತೂಕ ಕಡಿಮೆ ಮಾಡಿಕೊಳ್ಳಲೂ ಸಹ ಅಳಲೆಕಾಯಿ ಒಳ್ಳೆಯ ಮದ್ದು. ಅಳಲೆಕಾಯಿ ಕಷಾಯಕ್ಕೆ ಜೇನುತುಪ್ಪ ಸೇರಿಸಿ ಬೆಳಗ್ಗೆ ಖಾಲಿ ಹೊಟ್ಟೆಗೆ ಕುಡಿದರೆ ದೇಹದ ತೂಕ ಬೇಗ ಕಡಿಮೆಯಾಗುತ್ತದೆ.
ಮಾಹಿತಿ ಮತ್ತು ಲೇಖನ :- ಅಂಬಿಕಾ ಸೀತೂರು
