ಬೆಂಗಳೂರು: ಕರ್ನಾಟಕದ ನೆಲದಲ್ಲಿ ನಿಂತು ಕನ್ನಡಿಗರಿಗೇ ಕನ್ನಡ ಮಾತನಾಡಬೇಡಿ ಎಂದು ದಾರ್ಷ್ಟ್ಯ ಮೆರೆದಿದ್ದ ಬೆಂಗಳೂರಿನ ಪ್ರತಿಷ್ಠಿತ ಕಾಲೇಜಿನ ವಾರ್ಡನ್ಗೆ ಕನ್ನಡಿಗರು ತಕ್ಕ ಪಾಠ ಕಲಿಸಿದ್ದಾರೆ. ಕನ್ನಡ ಮಾತನಾಡಿದ ವಿದ್ಯಾರ್ಥಿಗೆ ಅವಾಜ್ ಹಾಕಿ, ಬೆದರಿಕೆ ಹಾಕಿದ್ದ ಹಿಂದಿ ಭಾಷಿಕ ವಾರ್ಡನ್ನನ್ನು ಕೇವಲ ಕೆಲಸದಿಂದ ವಜಾಗೊಳಿಸಿದ್ದು ಮಾತ್ರವಲ್ಲದೇ, ಆತನ ವಿರುದ್ಧ ಎಫ್ಐಆರ್ ದಾಖಲಿಸಿ ಜೈಲಿಗೆ ಕಳುಹಿಸುವ ಮೂಲಕ ಕನ್ನಡದ ಶಕ್ತಿಯನ್ನು ಇಡೀ ರಾಜ್ಯಕ್ಕೆ ತೋರಿಸಿಕೊಡಲಾಗಿದೆ.
ಘಟನೆಯ ವಿವರ: ವಾರ್ಡನ್ ಉದ್ಧಟತನ
ಬನ್ನೇರುಘಟ್ಟ ರಸ್ತೆಯಲ್ಲಿರುವ ಎಎಂಸಿ (AMC) ಇಂಜಿನಿಯರಿಂಗ್ ಕಾಲೇಜಿನ ಹಾಸ್ಟೆಲ್ನಲ್ಲಿ ಈ ಅಹಿತಕರ ಘಟನೆ ನಡೆದಿತ್ತು. ಹಾಸ್ಟೆಲ್ನಲ್ಲಿದ್ದ ಕನ್ನಡದ ವಿದ್ಯಾರ್ಥಿಯೊಬ್ಬ ಕನ್ನಡದಲ್ಲಿ ಮಾತನಾಡುತ್ತಿದ್ದನ್ನು ಸಹಿಸದ ಹಿಂದಿ ವಾರ್ಡನ್, ವಿದ್ಯಾರ್ಥಿಯ ಮೇಲೆರಗಿದ್ದ. ಕನ್ನಡ ನಿನ್ನ ಮನೆಯಲ್ಲಿ ಮಾತನಾಡಿಕೋ, ಇಲ್ಲಿ ನೀನು ಕನ್ನಡ ಮಾತನಾಡಬೇಕೋ ಬೇಡವೋ ಅನ್ನೋದನ್ನ ನಾನು ನಿರ್ಧಾರ ಮಾಡ್ತೀನಿ. ಇದು ಕಾಲೇಜು, ನಿನ್ನ ಮನೆಯಲ್ಲ. ಇಲ್ಲಿ ಹಿಂದಿಯೇ ನಡೆಯುವುದು ಎಂಬಂತೆ ಅಹಂಕಾರದ ಮಾತುಗಳನ್ನಾಡಿದ್ದ.
ವಿದ್ಯಾರ್ಥಿ ಕನ್ನಡ ಮಾತನಾಡುವುದು ನಮ್ಮ ಹಕ್ಕು ಎಂದು ಪ್ರಶ್ನಿಸಿದಾಗಲೂ, ಆತ ತನ್ನ ಸೊಕ್ಕಿನ ಮಾತುಗಳನ್ನು ಮುಂದುವರೆಸಿ, ಕನ್ನಡ ಮಾತನಾಡುವುದಾದ್ರೆ ನಿನ್ನ ಮನೆಯಲ್ಲೇ ಇರು, ಇಲ್ಲಿ ಬೇಕಾಗಿಲ್ಲ ಎಂದು ಬೆದರಿಕೆ ಹಾಕಿದ್ದ. ಈ ದೃಶ್ಯವನ್ನು ವಿದ್ಯಾರ್ಥಿಗಳು ಮೊಬೈಲ್ನಲ್ಲಿ ಸೆರೆಹಿಡಿದಿದ್ದರು.
ಕಿಚ್ಚು ಹೊತ್ತಿಸಿದ ವೈರಲ್ ವಿಡಿಯೋ
ವಾರ್ಡನ್ನ ಈ ಅಹಂಕಾರದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆಯೇ, ಇಡೀ ರಾಜ್ಯದ ಕನ್ನಡಿಗರು ರೊಚ್ಚಿಗೆದ್ದರು. ಕರ್ನಾಟಕದಲ್ಲಿ ಕನ್ನಡಿಗರಿಗೇ ಇಂತಹ ಸ್ಥಿತಿಯೇ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಕಾಲೇಜಿನ ವಿದ್ಯಾರ್ಥಿಗಳು ಒಗ್ಗೂಡಿ ವಾರ್ಡನ್ ಕಚೇರಿಗೆ ಮುತ್ತಿಗೆ ಹಾಕಿ ಕ್ಷಮೆ ಕೇಳುವಂತೆ ಒತ್ತಾಯಿಸಿದರು.
ಕಾಲೇಜಿಗೆ ಮುತ್ತಿಗೆ – ಕನ್ನಡಿಗರ ಶಕ್ತಿ ಪ್ರದರ್ಶನ
ಘಟನೆಯ ಗಂಭೀರತೆಯನ್ನು ಅರಿತ ಕನ್ನಡಪರ ಹೋರಾಟಗಾರ ರೂಪೇಶ್ ರಾಜಣ್ಣ ಹಾಗೂ ಅವರ ತಂಡ, ತಕ್ಷಣವೇ ಕಾಲೇಜಿನ ಎದುರು ಜಮಾಯಿಸಿತು. ನೂರಾರು ಸಂಖ್ಯೆಯಲ್ಲಿ ಸೇರಿದ ಕನ್ನಡಪರ ಹೋರಾಟಗಾರರು ಕಾಲೇಜಿಗೆ ಮುತ್ತಿಗೆ ಹಾಕಿ ಆಕ್ರೋಶ ವ್ಯಕ್ತಪಡಿಸಿದರು. ಕನ್ನಡಕ್ಕೆ ಅವಮಾನ ಮಾಡಿದ ವ್ಯಕ್ತಿಯನ್ನು ಕೇವಲ ಕ್ಷಮೆ ಕೇಳಿಸಿ ಬಿಡುವುದಿಲ್ಲ, ಆತನನ್ನು ಕೆಲಸದಿಂದ ವಜಾ ಮಾಡಬೇಕು ಹಾಗೂ ಕಾನೂನು ಕ್ರಮ ಜರುಗಿಸಬೇಕು ಎಂದು ಪಟ್ಟು ಹಿಡಿದರು.
ವಜಾ ಮತ್ತು ಎಫ್ಐಆರ್
ಕನ್ನಡಿಗರ ಸಂಘಟಿತ ಹೋರಾಟದ ಫಲವಾಗಿ ಕಾಲೇಜು ಆಡಳಿತ ಮಂಡಳಿ ಮಣಿಯಲೇಬೇಕಾಯಿತು.
1. ಕೆಲಸದಿಂದ ವಜಾ: ಕನ್ನಡ ದ್ರೋಹಿ ವಾರ್ಡನ್ನನ್ನು ತಕ್ಷಣವೇ ಜಾರಿಗೆ ಬರುವಂತೆ ಕೆಲಸದಿಂದ ವಜಾಗೊಳಿಸಲಾಗಿದೆ ಎಂದು ಆಡಳಿತ ಮಂಡಳಿ ಆದೇಶ ಹೊರಡಿಸಿತು.
2. ಎಫ್ಐಆರ್ ದಾಖಲು: ಕೇವಲ ವಜಾ ಮಾಡಿದ್ದಲ್ಲದೇ, ಬನ್ನೇರುಘಟ್ಟ ಪೊಲೀಸ್ ಠಾಣೆಯಲ್ಲಿ ಆತನ ವಿರುದ್ಧ ದೂರು ದಾಖಲಿಸಲಾಯಿತು. ಪೊಲೀಸರು ದೂರು ಸ್ವೀಕರಿಸಿ ಎಫ್ಐಆರ್ ದಾಖಲಿಸಿಕೊಂಡು, ಆರೋಪಿ ವಾರ್ಡನ್ನನ್ನು ವಶಕ್ಕೆ ಪಡೆದಿದ್ದಾರೆ.
3. ಕನ್ನಡಿಗನ ನೇಮಕ: ಇನ್ನು ಮುಂದೆ ಆ ವಾರ್ಡನ್ ಹುದ್ದೆಗೆ ಕನ್ನಡಿಗನನ್ನೇ ನೇಮಕ ಮಾಡಲಾಗುವುದು ಎಂದು ಕಾಲೇಜು ಆಡಳಿತ ಮಂಡಳಿ ಲಿಖಿತ ಭರವಸೆ ನೀಡಿದೆ.
ಇದು ಕನ್ನಡಿಗರ ಸ್ವಾಭಿಮಾನದ ಗೆಲುವು
ಈ ಬಗ್ಗೆ ಮಾತನಾಡಿದ ರೂಪೇಶ್ ರಾಜಣ್ಣ, ಇದು ಕೇವಲ ಒಬ್ಬ ವಾರ್ಡನ್ ವಿರುದ್ಧದ ಹೋರಾಟವಲ್ಲ, ಇದು ಕನ್ನಡದ ಸ್ವಾಭಿಮಾನದ ಪ್ರಶ್ನೆ. ಕನ್ನಡದ ನೆಲದಲ್ಲಿ ಕನ್ನಡಿಗನೇ ಸಾರ್ವಭೌಮ. ಯಾರೇ ಆಗಲಿ ನಮ್ಮ ಭಾಷೆಯ ಮೇಲೆ ಸವಾರಿ ಮಾಡಲು ಬಂದರೆ ಕನ್ನಡಿಗರು ಸುಮ್ಮನಿರುವುದಿಲ್ಲ ಎಂಬುದಕ್ಕೆ ಇದೇ ಸಾಕ್ಷಿ. ಈ ಹೋರಾಟಕ್ಕೆ ಸ್ಪಂದಿಸಿದ ಪೊಲೀಸ್ ಇಲಾಖೆ ಹಾಗೂ ಭಾಗವಹಿಸಿದ ಎಲ್ಲಾ ಕನ್ನಡದ ಮನಸ್ಸುಗಳಿಗೆ ಧನ್ಯವಾದಗಳು ಎಂದು ತಿಳಿಸಿದ್ದಾರೆ.
ರಾಜಧಾನಿಯಲ್ಲಿ ಕುಳಿತು ಕನ್ನಡವನ್ನೇ ಹತ್ತಿಕ್ಕಲು ನೋಡಿದ ಪರಭಾಷಿಗನಿಗೆ ಕಾನೂನಿನ ಮತ್ತು ಕನ್ನಡಿಗರ ಒಗ್ಗಟ್ಟಿನ ರುಚಿ ಸಿಕ್ಕಂತಾಗಿದೆ.
