ನವದೆಹಲಿ: ಭಾರತದ ಪ್ರಮುಖ ಸ್ವದೇಶಿ ವಿಡಿಯೋ ಸ್ಟ್ರೀಮಿಂಗ್ ಪ್ಲಾಟ್ಫಾರ್ಮ್ ‘ಜೀ5’ (Zee5) ತನ್ನ ಬಳಕೆದಾರರಿಗೆ ಕಂಟೆಂಟ್ ಹುಡುಕಾಟ ಮತ್ತು ವೀಕ್ಷಣೆಯ ಅನುಭವವನ್ನು ಸಂಪೂರ್ಣವಾಗಿ ಹೊಸ ಎತ್ತರಕ್ಕೆ ಕೊಂಡೊಯ್ಯಲು ನವೀನ ರೂಪದಲ್ಲಿ ಮರುಪ್ರವೇಶ ಪಡೆದಿದೆ. ಮೊಬೈಲ್ ಹಾಗೂ ಕನೆಕ್ಟೆಡ್ ಟಿವಿಗಳಲ್ಲಿ ಕ್ರಾಂತಿಕಾರಿ ಬದಲಾವಣೆಗಳನ್ನು ತಂದಿರುವ ಜೀ5, ಸ್ಮಾರ್ಟ್ ಪೆರ್ಸನಲೈಸಷನ್, ಕೃತಕ ಬುದ್ಧಿಮತ್ತೆ (AI) ಆಧಾರಿತ ಸರ್ಚಿಂಗ್ ವ್ಯವಸ್ಥೆ, ಆಕರ್ಷಕ ದೃಶ್ಯ ನ್ಯಾವಿಗೇಷನ್ ಮತ್ತು ಯಾವುದೇ ಸ್ಕ್ರೀನ್ನಲ್ಲೂ ಸರಾಗವಾಗಿ ವೀಕ್ಷಿಸಬಹುದಾದ ತಂತ್ರಜ್ಞಾನದೊಂದಿಗೆ ಸಜ್ಜಾಗಿದೆ. ಪ್ರೇಕ್ಷಕರ ಬದಲಾಗುತ್ತಿರುವ ವೀಕ್ಷಣಾ ಶೈಲಿಗೆ ತಕ್ಕಂತೆ ನೂತನ ಜೀ5 ವೇದಿಕೆಯನ್ನು ಪ್ರೀಮಿಯಂ ಎಂಟರ್ಟೈನ್ಮೆಂಟ್, ಫ್ರೀ 5, ಕಿಡ್ಝ್ (KidZ), ಟಿವಿ ಮತ್ತು ಸ್ಪೋರ್ಟ್ಸ್ ಎಂಬ ಐದು ವಿಶಿಷ್ಟ ವಿಭಾಗಗಳನ್ನಾಗಿ ವಿನ್ಯಾಸಗೊಳಿಸಲಾಗಿದೆ.
ಬಳಕೆದಾರರ ಆಸಕ್ತಿಗೆ ತಕ್ಕಂತಹ ಕಂಟೆಂಟ್ ಅನ್ನು ಸುಲಭವಾಗಿ ಪತ್ತೆಹಚ್ಚುವ ವೈಯಕ್ತೀಕರಣ ವ್ಯವಸ್ಥೆಯೇ ಈ ನೂತನ ಬದಲಾವಣೆಯ ಕೇಂದ್ರಬಿಂದುವಾಗಿದೆ. ಸಣ್ಣ ಪರದೆಯ ಮೊಬೈಲ್ನಿಂದ ಹಿಡಿದು ದೊಡ್ಡ ಪರದೆಯ ಕನೆಕ್ಟೆಡ್ ಟಿವಿವರೆಗೆ ವೀಕ್ಷಕರು ಯಾವುದೇ ಅಡೆತಡೆ ಇಲ್ಲದೆ ಸರಾಗವಾಗಿ ವೀಕ್ಷಣೆ ಬದಲಾಯಿಸುವಂತೆ ಇದನ್ನು ರೂಪಿಸಲಾಗಿದೆ. ಇದರ ಜೊತೆಗೆ, ಚಂದಾದಾರಿಕೆ, ಪ್ಲೇಬ್ಯಾಕ್, ಲಾಗಿನ್, ಕಂಟೆಂಟ್ ಹಾಗೂ ಡಿವೈಸ್ಗಳಿಗೆ ಸಂಬಂಧಿಸಿದ ಸಮಸ್ಯೆಗಳನ್ನು ಕ್ಷಣಾರ್ಧದಲ್ಲಿ ಬಗೆಹರಿಸಲು ಸುಧಾರಿತ AI ಆಧಾರಿತ ಕಸ್ಟಮರ್ ಸಪೋರ್ಟ್ ಸಹಾಯಕವನ್ನು ಪರಿಚಯಿಸಲಾಗಿದೆ. ಬಳಕೆದಾರರ ಡೇಟಾ ಗೌಪ್ಯತೆ ಮತ್ತು ಭದ್ರತೆಯನ್ನು ಇನ್ನಷ್ಟು ಬಲಪಡಿಸಲು ಅತ್ಯಾಧುನಿಕ ತಂತ್ರಜ್ಞಾನ ಕ್ರಮಗಳನ್ನು ಅಳವಡಿಸಿಕೊಳ್ಳಲಾಗಿದ್ದು, ಗ್ರಾಹಕರ ಮಾರುಕಟ್ಟೆ ಸಂಶೋಧನೆ ಹಾಗೂ ಪ್ರತಿಕ್ರಿಯೆಗಳನ್ನು ಆಧರಿಸಿ ಪ್ರಾಡಕ್ಟ್ ಮತ್ತು ಎಂಜಿನಿಯರಿಂಗ್ ತಜ್ಞರ ತಂಡಗಳು ನಿರಂತರ ಪರೀಕ್ಷೆಗಳ ನಂತರ ಈ ವೇದಿಕೆಯನ್ನು ನಿಖರವಾಗಿ ಸಿದ್ಧಪಡಿಸಿವೆ.
ತನ್ನ ಕಂಟೆಂಟ್ ಭಂಡಾರವನ್ನು ಗಣನೀಯವಾಗಿ ವಿಸ್ತರಿಸಿರುವ Zee5, ಕ್ರೀಡಾಪ್ರಿಯರಿಗಾಗಿ ಜಾಗತಿಕ ಕ್ರೀಡಾಕೂಟವಾದ ‘ಫಿಫಾ ವಿಶ್ವಕಪ್ 2026 ಮತ್ತು 2030’ರ ಡಿಜಿಟಲ್ ಪ್ರಸಾರ ಹಕ್ಕುಗಳನ್ನು ಪಡೆದುಕೊಂಡಿದ್ದಲ್ಲದೆ, ಬುಂಡೆಸ್ಲಿಗಾ, ಸೀರಿ ಎ (Serie A) ಹಾಗೂ ಕೊಪ್ಪಾ ಇಟಾಲಿಯಾದಂತಹ ಪ್ರಮುಖ ಕ್ರೀಡೆಗಳ ನೇರ ಪ್ರಸಾರ ಒದಗಿಸುತ್ತಿದೆ. ಇದರ ಬೆನ್ನಲ್ಲೇ ಇದೀಗ ಪಿವಿಆರ್ ಐನಾಕ್ಸ್ ಪಿಕ್ಚರ್ಸ್ ಮತ್ತು ಲಯನ್ಸ್ಗೇಟ್ ಪ್ಲೇ ಜೊತೆಗಿನ ಪಾಲುದಾರಿಕೆಯ ಮೂಲಕ ವಿಶ್ವದರ್ಜೆಯ ಪ್ರೀಮಿಯಂ ಇಂಗ್ಲಿಷ್ ಎಂಟರ್ಟೈನ್ಮೆಂಟ್ ವಿಭಾಗವನ್ನು ಪ್ರಕಟಿಸಿದೆ.
ಇದರ ಅಡಿಯಲ್ಲಿ ಬಾಬ್ ಒಡೆನ್ಕರ್ಕ್ ಮತ್ತು ಲೆನಾ ಹೆಡೆ ನಟನೆಯ ‘ನಾರ್ಮಲ್’, ಸೇಥ್ ರೋಗನ್ ಮತ್ತು ಪೆನೆಲೋಪ್ ಕ್ರೂಜ್ ಅಭಿನಯದ ‘ದಿ ಇನ್ವೈಟ್’, ಏಂಜೆಲಿನಾ ಜೋಲಿ ನಟನೆಯ ‘ಆಂಕ್ಸಿಯಸ್ ಪೀಪಲ್’ ಮತ್ತು ‘ಬೇಬೀಸ್’, ಜೂಡ್ ಲಾ ಅವರ ‘ದಿ ವಿಝಾರ್ಡ್ ಆಫ್ ದಿ ಕ್ರೆಮ್ಲಿನ್’, ಗ್ಲೆನ್ ಪೊವೆಲ್ ಅವರ ‘ಹೌ ಟು ಮೇಕ್ ಎ ಕಿಲ್ಲಿಂಗ್’, ಡೊಮಿನಿಕ್ ಸೆಸ್ಸಾ ಅವರ ‘ಟೋನಿ’ ಹಾಗೂ ಸ್ಕಾರ್ಲೆಟ್ ಜೋಹಾನ್ಸನ್ ಮತ್ತು ಆಡಮ್ ಡ್ರೈವರ್ ನಟನೆಯ ‘ಪೇಪರ್ ಟೈಗರ್’ ಸೇರಿದಂತೆ ಹಲವು ಪ್ರಮುಖ ಹಾಲಿವುಡ್ ಚಿತ್ರಗಳು ಡಿಜಿಟಲ್ ಪ್ರೀಮಿಯರ್ ಆಗಲಿವೆ.
ಇನ್ನೊಂದೆಡೆ, ಯಾವುದೇ ಚಂದಾದಾರಿಕೆ ಶುಲ್ಕವಿಲ್ಲದೆಯೇ ಸಂಪೂರ್ಣ ಉಚಿತವಾಗಿ ವೀಕ್ಷಿಸಬಹುದಾದ ‘ಫ್ರೀ 5’ (Free 5) ವಿಭಾಗವನ್ನು ಕೂಡ ಆಕರ್ಷಕ ರೂಪದಲ್ಲಿ ಪರಿಚಯಿಸಲಾಗಿದೆ. ಈ ವಿಭಾಗದಲ್ಲಿ ಜನಪ್ರಿಯ ಸರಣಿಗಳು, ಚಲನಚಿತ್ರಗಳು, ಕೊರಿಯನ್ ಮತ್ತು ಚೈನೀಸ್ ಡ್ರಾಮಾಗಳು, ಅನಿಮೆ, ಲೈವ್ ನ್ಯೂಸ್, ಮೈಕ್ರೋ ಡ್ರಾಮಾ ಹಾಗೂ ಡಿಜಿಟಲ್ ಕ್ರಿಯೇಟರ್ಗಳ ಕಂಟೆಂಟ್ಗಳು ಲಭ್ಯವಿರಲಿವೆ. ಯಾವುದೇ ಶುಲ್ಕವಿಲ್ಲದೆ ಅಪಾರ ಪ್ರಮಾಣದ ಮನರಂಜನೆಯನ್ನು ಒದಗಿಸುವ ಈ ವಿಸ್ತೃತ ವೇದಿಕೆಯು ಜಾಹೀರಾತುದಾರರಿಗೂ ವಿಶಾಲ ಶ್ರೇಣಿಯ ಗ್ರಾಹಕರನ್ನು ತಲುಪಲು ಹೊಸ ಮಾರುಕಟ್ಟೆ ಅವಕಾಶಗಳನ್ನು ತೆರೆದಿಟ್ಟಿದೆ.
ಈ ನೂತನ ಹೆಜ್ಜೆಯ ಕುರಿತು ಮಾತನಾಡಿದ ಜೀ5 ಇಂಡಿಯಾ ಮತ್ತು AI & ಇನ್ನೋವೇಶನ್ ಬ್ಯುಸಿನೆಸ್ ಹೆಡ್ ತೇಜ್ಕರಣ್ ಸಿಂಗ್ ಬಜಾಜ್, “ಮನರಂಜನೆಯನ್ನು ಹೆಚ್ಚು ಪ್ರಸ್ತುತವಾಗಿ ಹಾಗೂ ಸುಲಭವಾಗಿ ಹುಡುಕುವಂತೆ ಮಾಡುವುದೇ ನಮ್ಮ ಮುಖ್ಯ ಉದ್ದೇಶ. AI ಹಾಗೂ ಸ್ಮಾರ್ಟ್ ವೈಯಕ್ತೀಕರಣದ ಮೂಲಕ ಮೊಬೈಲ್ ಮತ್ತು ಟಿವಿಗಳಲ್ಲಿ ಬಳಕೆದಾರರ ಅನುಭವವನ್ನು ಮರುರೂಪಿಸಿದ್ದೇವೆ. ಏಳು ಭಾಷೆಗಳ ಪ್ರೀಮಿಯಂ ಕಂಟೆಂಟ್, ಜಾಗತಿಕ ಸಿನಿಮಾಗಳು ಹಾಗೂ ನವೀಕೃತ ‘ಫ್ರೀ 5’ ಮೂಲಕ ಪ್ರೇಕ್ಷಕರಿಗೆ ಹೆಚ್ಚಿನ ಆಯ್ಕೆ ನೀಡುತ್ತಿದ್ದೇವೆ” ಎಂದರು.
ಜೀ ಎಂಟರ್ಟೈನ್ಮೆಂಟ್ ಎಂಟರ್ಪ್ರೈಸಸ್ ಲಿಮಿಟೆಡ್ನ ಮುಖ್ಯ ತಂತ್ರಜ್ಞಾನ ಅಧಿಕಾರಿ (CTO) ಪ್ರಮೋದ್ ಪ್ರಕಾಶ್ ಮಾತನಾಡಿ, “ಕುಟುಂಬದ ಪ್ರತಿಯೊಂದು ತಲೆಮಾರಿನವರಿಗೂ ಅತ್ಯಂತ ಸರಳವಾಗಿ ಅರ್ಥವಾಗುವಂತೆ ಆ್ಯಪ್ ವಿನ್ಯಾಸಗೊಳಿಸಲಾಗಿದ್ದು, ತಂತ್ರಜ್ಞಾನವು ತೆರೆಮರೆಯಲ್ಲಿ ಸರಾಗವಾಗಿ ಕೆಲಸ ಮಾಡಿ ವೀಕ್ಷಕರಿಗೆ ನಿರಂತರ ಮನರಂಜನೆ ನೀಡಲಿದೆ” ಎಂದು ತಿಳಿಸಿದರು. 190ಕ್ಕೂ ಹೆಚ್ಚು ದೇಶಗಳಲ್ಲಿ ಪ್ರೇಕ್ಷಕರನ್ನು ಹೊಂದಿರುವ ಜೀ5, ಕನ್ನಡ ಸೇರಿದಂತೆ ಏಳು ಪ್ರಮುಖ ಭಾಷೆಗಳಲ್ಲಿ ಭಾರತೀಯ ಪ್ರೇಕ್ಷಕರಿಗೆ ನೆಚ್ಚಿನ ಸ್ಟ್ರೀಮಿಂಗ್ ತಾಣವಾಗಿ ಮುಂದುವರಿದಿದೆ
