ಅಭಿಮಾನಿಗಳೇ ನಮ್ಮ ದೇವರು ಎನ್ನುವ ದೊಡ್ಮನೆ ಹುಡ್ಗ ಪುನೀತ್ ರಾಜ್ ಕುಮಾರ್ ಇಂದು ವಿದೇಶದ ವಿಶೇಷಚೇತನ ಪುಟ್ಟ ಅಭಿಮಾನಿ ಜೊತೆ ವಿಡಿಯೋ ಕಾಲ್ ಮೂಲಕ ಮಾತನಾಡಿದ್ದಾರೆ. ಫಿಲಡೆಲ್ಫಿಯಾದಲ್ಲಿ ನೆಲೆಸಿರೋ ಭಾರತೀಯ ಮೂಲದ ಕುಟುಂಬದ 15 ವರ್ಷದ ನಾಗಾರ್ಜುನ ಅನ್ನೋ ಹುಡುಗ ಅಪ್ಪಟ ಅಪ್ಪು ಅಭಿಮಾನಿ. ನಾಗಾರ್ಜುನ್ ಹುಟ್ಟಿನಿಂದ ವಿಶೇಷ ಚೇತನರಾಗಿದ್ದು, ಈ ಪುಟ್ಟ ಅಭಿಮಾನಿ ಜೊತೆಗೆ ಇಂದು ಪುನೀತ್ ವಿಡಿಯೋ ಕಾಲ್ ಮುಖಾಂತರ ಮಾತನಾಡಿದ್ದಾರೆ
ಈ ವೇಳೆ ರಾಜಕುಮಾರ ಸಿನಿಮಾದ ಡ್ಯಾನ್ಸ್ ವಿತ್ ಅಪ್ಪು ಹಾಗೂ ಬೊಂಬೆ ಹೇಳುತೈತೆ ಹಾಡು ನನಗಿಷ್ಟ ಎಂದು ನಾಗಾರ್ಜುನ್ ಹೇಳಿಕೊಂಡಿದ್ದಾನೆ. ಅಲ್ಲದೇ ಪವರ್ ಸ್ಟಾರ್ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾನೆ. ವಿಶೇಷ ಅಂದ್ರೆ ಮನೆಯಲ್ಲಿ ನಾಗಾರ್ಜುನನನ್ನು ಅಪ್ಪು ಅಂತಲೇ ಕರೆಯಲಾಗುತ್ತಂತೆ. ಇದನ್ನು ಆತನ ಕುಟುಂಬದವರೇ ಹಂಚಿಕೊಂಡಿದ್ದಾರೆ. ಇನ್ನು, ಪುಟ್ಟ ಅಭಿಮಾನಿ ಜೊತೆಗೆ ಮಾತನಾಡಿದ್ದಕ್ಕೆ ಪುನೀತ್ ರಾಜ್ ಕುಮಾರ್ ಕೂಡ ಖುಷಿ ವ್ಯಕ್ತಪಡಿಸಿದ್ದಾರೆ. ಅಲ್ಲದೇ ನಾಗಾರ್ಜುನನ ಕುಟುಂಬವೂ ಕೂಡ ಪವರ್ ಸ್ಟಾರ್ ಸರಳತೆಗೆ ಧನ್ಯವಾದ ತಿಳಿಸಿದೆ.
