ಬಾಲಿವುಡ್ ನಟಿ ಸೋನಂ ಕಪೂರ್ ಅತ್ತೆ ಮನೆಯಲ್ಲಿ ಭಾರಿ ಕಳ್ಳತನ
ಬಾಲಿವುಡ್ ನಟಿ ಸೋನಂ ಕಪೂರ್ ಅವರ ನವದೆಹಲಿಯಲ್ಲಿರುವ ಮನೆ ಕಳ್ಳತನವಾಗಿದೆ. ಮಾಧ್ಯಮ ವರದಿಗಳ ಪ್ರಕಾರ, ಸುಮಾರು 1.41 ಕೋಟಿ ರೂಪಾಯಿ ಮೌಲ್ಯದ ಚಿನ್ನಾಭರಣ ಮತ್ತು ನಗದನ್ನ ಕಳ್ಳರು ದೋಚಿದ್ದಾರೆ. ಸೋನಂ ಅವರ ಅತ್ತೆ ಮತ್ತು ಆಕೆಯ ಮ್ಯಾನೇಜರ್ ರಿತೇಶ್ ಗೌರಾ ತುಘಲಕ್ ರಸ್ತೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಹೈ ಪ್ರೊಫೈಲ್ ಕೇಸ್ ನಿಂದಾಗಿ ಪೊಲೀಸರ ಮೇಲೆ ಒತ್ತಡ ಹೇರಲಾಗಿದೆ, ಇದೇ ವೇಳೆ ಪೊಲೀಸರು ವಿಶೇಷ ತನಿಖಾ ತಂಡವನ್ನು ರಚಿಸಿದ್ದಾರೆ.
ಫೆಬ್ರವರಿ 23 ರಂದು ದೂರು
ಸೋನಂ ಅವರ ಅತ್ತೆ ಸರಳಾ ಅಹುಜಾ ತನ್ನ ಮಗ ಹರೀಶ್ ಅಹುಜಾ ಮತ್ತು ಸೊಸೆ ಪ್ರಿಯಾ ಅಹುಜಾ ಜೊತೆ ದೆಹಲಿಯ ಅಮೃತ್ ಶೇರ್ಗಿಲ್ ಮಾರ್ಗದ ನಿವಾಸಿಯಾಗಿದ್ದಾರೆ. ಫೆಬ್ರವರಿ 23 ರಂದು ಸರಳಾ ಅವರು ತುಘಲಕ್ ರಸ್ತೆ ಪೊಲೀಸ್ ಠಾಣೆಗೆ ಬಂದು ಮನೆಯಲ್ಲಿ 1.41 ಕೋಟಿ ಮೌಲ್ಯದ ನಗದು ಮತ್ತು ಚಿನ್ನಾಭರಣ ಕಳ್ಳತನವಾಗಿರುವ ಬಗ್ಗೆ ದೂರು ನೀಡಿದ್ದಾರೆ.
ಮನೆಯಲ್ಲಿ ಸುಮಾರು 25 ಕೆಲಸದಾಳುಗಳು ಮತ್ತು 9 ಜನ ಕೇರ್ಟೇಕರ್ಗಳಿದ್ದಾರೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಎಲ್ಲರನ್ನೂ ಪ್ರಶ್ನಿಸುತ್ತಿದ್ದೇವೆ ಎಂದಿದ್ದಾರೆ. ಆದರೆ, ಪೊಲೀಸರು ಇನ್ನೂ ಆರೋಪಿಯನ್ನು ಬಂಧಿಸಿಲ್ಲ. ಇದೇ ವೇಳೆ ಫೊರೆನ್ಸಿಕ್ ತಂಡದ ನೆರವು ಪಡೆಯಲು ಪೊಲೀಸರು ಚಿಂತನೆ ನಡೆಸಿದ್ದಾರೆ. ಕಳೆದ ವರ್ಷದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಸೋನಂ ಕಪೂರ್ ಅವರ ಪತಿ ಆನಂದ್ ಅಹುಜಾ ಅವರು ತಮ್ಮ ಚಿಕ್ಕಪ್ಪ ಸುನಿಲ್ ಅವರೊಂದಿಗೆ ಕ್ಯಾಲಿಫೋರ್ನಿಯಾದಲ್ಲಿ ವಾಸಿಸುತ್ತಿದ್ದಾರೆ. ಆನಂದ್ ಅವರ ಕುಟುಂಬವು ಸಾಯಿ ಎಕ್ಸ್ಪೋರ್ಟ್ಸ್ ಎಂಬ ಗಾರ್ಮೆಂಟ್ ಕಂಪನಿಯನ್ನು ಹೊಂದಿದೆ.
