ಪೋಲೆಂಡ್, ಮೇ 30: 1945 ರಲ್ಲಿ ಜರ್ಮನಿಯ ಸರ್ವಾಧಿಕಾರಿಯಾಗಿದ್ದ ಅಡಾಲ್ಪ್ ಹಿಟ್ಲರ್ನ ನಾಜಿ ಸೇನೆ ಅರಮನೆಯ ಮುಂಭಾಗದ ಬಾವಿಯಲ್ಲಿ28 ಟನ್ ಚಿನ್ನ ಹೂತಿಟ್ಟಿದೆ ಎಂಬುದು ಬಹಿರಂಗವಾಗಿದ್ದು, ಇಂದಿನ ಮಾರುಕಟ್ಟೆ ಮೌಲ್ಯದ ಪ್ರಕಾರ ಆ ಚಿನ್ನದ ಮೌಲ್ಯ 11,600 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ.
ಹಿಟ್ಲರ್ನ ನಾಜಿ ಸೇನೆ ಪೋಲೆಂಡ್, ಸೋವಿಯತ್ ಒಕ್ಕೂಟ, ಫ್ರಾನ್ಸ್, ಬೆಲ್ಜಿಯಂನಂತಹ ದೇಶಗಳ ಮೇಲೆ ದಾಳಿ ಮಾಡಿ ಚಿನ್ನ ಸೇರಿದಂತೆ ಅಮೂಲ್ಯ ವಸ್ತುಗಳನ್ನು ದೋಚಿತ್ತು. 1945 ರಲ್ಲಿ ನಡೆದ ಎರಡನೇ ವಿಶ್ವ ಯುದ್ಧದ ಸಂದರ್ಭದಲ್ಲಿ ಸೋವಿಯತ್ ಒಕ್ಕೂಟ ಜರ್ಮನಿ ಮೇಲೆ ದಾಳಿ ಮಾಡಿದಾಗ ಈ ಅಮೂಲ್ಯ ವಸ್ತುಗಳನ್ನು ನಾಜಿ ಸೇನೆ 11 ಸ್ಥಳಗಳಲ್ಲಿ ಬಚ್ಚಿಟ್ಟಿತ್ತು. ಜೊತೆಗೆ ಅಂದಿನ ಜರ್ಮನಿಯ ಶ್ರೀಮಂತರು ಕೂಡ ತಮ್ಮಲ್ಲಿದ್ದ ಅಮೂಲ್ಯ ವಸ್ತುಗಳನ್ನು ನಾಜಿ ಸೇನೆಯ ಬಳಿ ರಕ್ಷಿಸಲು ನೀಡಿದ್ದರು. ಈ ಎಲ್ಲಾ 11 ಸ್ಥಳಗಳಲ್ಲಿನ ವಿವರಗಳು 75 ವರ್ಷಗಳ ಹಿಂದೆ ನಾಜಿಯ ಸೇನಾಧಿಕಾರಿಯೊಬ್ಬರು ಬರೆದಿರುವ ಡೈರಿಯಲ್ಲಿ ಉಲ್ಲೇಖಿಸಲಾಗಿದೆ ಎಂದು ಹೇಳಲಾಗುತ್ತಿದೆ.
ನಾಚಿ ಸೈನ್ಯ ಬಚ್ಚಿಟ್ಟ 11 ಸ್ಥಳಗಳಲ್ಲಿ ಈಗ ಪೋಲೆಂಡ್ನಲ್ಲಿರುವ ಹೋಚ್ ಬರ್ಗ್ ಅರಮನೆಯ ಮುಂಭಾಗದ ಮುಚ್ಚಲ್ಪಟ್ಟಿರುವ ಬಾವಿಯೂ ಒಂದಾಗಿದೆ ಎಂದು ಡೈರಿಯಲ್ಲಿ ಉಲ್ಲೇಖವಿದ್ದು, ಅದರಲ್ಲಿ 28 ಟನ್ ಚಿನ್ನ ಸಂಗ್ರಹವಿದೆ ಎಂದು ಹೇಳಲಾಗುತ್ತಿದೆ.
ನಾಚಿ ಸೇನಾಧಿಕಾರಿ ಬರೆದಿರುವ ಆ ಡೈರಿ ಕಳೆದ ವರ್ಷ ಸಿಲೆಸಿಯನ್ ಬ್ರಿಜ್ ಫೌಂಡೇಷನ್ ಎಂಬ ಸಂಸ್ಥೆಗೆ ಸಿಕ್ಕಿದ್ದು, ಕಳೆದ ವರ್ಷವೇ ಅದನ್ನು ಪೋಲೆಂಡ್ನ ಸಂಸ್ಕೃತಿ ಸಚಿವಾಲಯಕ್ಕೆ ಹಸ್ತಾಂತರಿಸಿ ಪರಿಶೀಲಿಸಲು ಮನವಿ ಮಾಡಿತ್ತು. ಆದರೆ ಪೋಲೆಂಡ್ ಸರ್ಕಾರ ಯಾವುದೇ ಕ್ರಮ ಕೈಗೊಳ್ಳದ ಹಿನ್ನಲೆಯಲ್ಲಿ ತನಿಖೆಗೆ ಒತ್ತಾಯಿಸಿ ಸಿಲೆಸಿಯನ್ ಬ್ರಿಜ್ ಫೌಂಡೇಷನ್ ಸಂಸ್ಥೆಯ ಮುಖ್ಯಸ್ಥ ಆ ಡೈರಿಯಲ್ಲಿ ಬರೆದಿರುವ ಅಂಶಗಳನ್ನು ಇದೀಗ ಬಹಿರಂಗ ಪಡಿಸಿದ್ದಾರೆ.
ಈಗಾಗಲೇ ಹೋಚ್ ಬರ್ಗ್ ಅರಮನೆಯ ಹಾಲಿ ಮಾಲೀಕರು ಬಾವಿ ತೋಡುವುದಕ್ಕೆ ಅನುಮತಿ ನೀಡಿದ್ದು, ಮುಚ್ಚಲ್ಪಟ್ಟಿರುವ ಬಾವಿಯನ್ನು ತೋಡಲು ಪೋಲೆಂಡ್ ಸರ್ಕಾರದ ಅನುಮತಿಯೂ ಅಗತ್ಯವಾಗಿದೆ.
ಆದರೆ ಬಚ್ಚಿಟ್ಟಿರುವ ನಿಧಿಯ ರಹಸ್ಯ ಬಹಿರಂಗವಾದ ಹಿನ್ನಲೆಯಲ್ಲಿ ನಿಧಿ ಕಳ್ಳರ ಕಾಟದಿಂದ ರಕ್ಷಿಸಲು ಸಿಸಿಟಿವಿ ಕ್ಯಾಮೆರಾ ಮತ್ತು ಬೇಲಿಗಳನ್ನು ಅಳವಡಿಸಲಾಗಿದೆ ಎಂದು ಸಿಲೆಸಿಯನ್ ಬ್ರಿಜ್ ಫೌಂಡೇಷನ್ ತಿಳಿಸಿದೆ
