IND vs BNG : ಇಶಾನ್ ಕಿಶನ್ ದ್ವಿಶತಕದ ಅಬ್ಬರ , ಭಾರತಕ್ಕೆ 227 ರನ್ಗಳ ಭರ್ಜರಿ ಗೆಲವು
ಆರಂಭಿಕ ಬ್ಯಾಟರ್ ಇಶಾನ್ ಕಿಶನ್ ಅವರ ದಾಖಲೆಯ ದ್ವಿಶತಕ ಹಾಗೂ ವಿರಾಟ್ ಕೊಹ್ಲಿ ಅವರ ಶತಕದ ನೆರವಿನಿಂದ ಟೀಮ್ ಇಂಡಿಯಾ ಆತಿಥೇಯ ಬಾಂಗ್ಲಾದೇಶ ವಿರುದ್ಧ 227 ರನ್ಗಳ ಭರ್ಜರಿ ಗೆಲವು ದಾಖಲಿಸಿದೆ. ಭರ್ಜರಿ ಬ್ಯಾಟಿಂಗ್ ಮಾಡುವ ಮೂಲಕ ಅಂತಿಮ ಕದನದಲ್ಲಿ ಕ್ಲೀನ್ ಸ್ವೀಪ್ ನಿಂದ ಭಾರತ ಪಾರಾಯಿತು.
ಚಿತ್ತಗಾಂಗ್ ನ ಜಾಹುರ್ ಮೈದಾನದಲ್ಲಿ ನಡೆದ ಮೂರನೆ ಹಾಗೂ ಅಂತಿಮ ಏಕದಿನ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ ನಿಗದಿತ 50 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 409 ರನ್ ಕಲೆ ಹಾಕಿತು. ಬಾಂಗ್ಲಾದೇಶ 34 ಓವರ್ಗಳಲ್ಲಿ 182 ರನ್ಗಳಿಗೆ ಆಲೌಟ್ ಆಯಿತು.
ಭಾರತ ಪರ ಆರಂಭಿಕ ಬ್ಯಾಟರ್ ಶಿಖರ್ ಧವನ್ 3 ರನ್ಗಳಿಸಿ ಎಲ್ಬಿ ಬಲಗೆ ಬಿದ್ದು ಹಸನ್ ಮೀರಾಜ್ಗೆ ವಿಕೆಟ್ ಒಪ್ಪಿಸಿದರು. ಇಶಾನ್ ಕಿಶನ್ ಜೊತೆಗೂಡಿದ ವಿರಾಟ್ ಕೊಹ್ಲಿ ಬಾಂಗ್ಲಾ ಬೌಳರ್ಗಳ ಬೆಂಡೆತ್ತಿ ಭರ್ಜರಿ ಬ್ಯಾಟಿಂಗ್ ಮಾಡಿದರು. ಇಶಾನ್ ಕಿಶನ 49 ಎಸೆತದಲ್ಲಿ ಅರ್ಧ ಶತಕ, ವಿರಾಟ್ ಕೊಹ್ಲಿ 54 ಎಸೆತದಲ್ಲಿ ಅರ್ಧ ಶತಕ ಪೂರೈಸಿದರು.ಬೌಂಡರಿ ಸಿಕ್ಸರ್ಗಳ ಸುರಿಮಳೆಗೈದ ಇಶಾನ್ ಕಿಶನ್ 85 ಎಸೆತದಲ್ಲಿ ಶತಕ ಪೂರೈಸಿ ಮಿಂಚಿದರು. ಇದರೊಂದಿಗೆ ಏಕದಿನ ಕ್ರಿಕೆಟ್ನಲ್ಲಿ ಚೊಚ್ಚಲ ಶತಕ ಸಿಡಿಸಿದ ಸಾಧನೆ ಮಾಡಿದರು.
ನಂತರವೂ ಸ್ಟ್ರೈಕ್ ಪಡೆದು ಸಿಡಿಲಬ್ಬರದ ಬ್ಯಾಟಿಂಗ್ ಮುಂದುವರೆಸಿದ ಇಶಾನ್ ಕಿಶನ್ 103 ಎಸೆತದಲ್ಲಿ 150 ರನ್ ಪೂರೈಸಿದರು. ನಂತರ 126ನೇ ಎಸೆತದಲ್ಲಿ ವೇಗದ ದ್ವಿಶತಕ ಸಿಡಿಸಿದರು.36ನೇ ಓವರ್ನ ಕೊನೆಯ ಎಸೆತದಲ್ಲಿ ಇಶಾನ್ ಕಿಶನ್ ತಸ್ಕಿನ್ ಅಹ್ಮದ್ ಎಸೆತದಲ್ಲಿ ಲಿಟ್ಟನ್ ದಾಸ್ಗೆ ಕ್ಯಾಚ್ ನೀಡಿ ಹೊರ ನಡೆದರು. ಇಶಾನ್ ಕಿಶನ್ ಒಟ್ಟು 131 ಎಸೆತದಲ್ಲಿ 24 ಬೌಂಡರಿ, 10 ಸಿಕ್ಸರ್ ಸಿಡಿಸಿದರು.
ವಿರಾಟ್ ಕೊಹ್ಲಿ 85 ಎಸೆತದಲ್ಲಿ ಶತಕ ಸಿಡಿಸಿ ಸಂಭ್ರಮಿಸಿದರು. 113 ರನ್ಗಳಾಗಿದ್ದಾಗ ವಿರಾಟ್ ಸ್ಪಿನ್ನರ್ ಶಕೀಬ್ ಅಲ್ ಹಸನ್ಗೆ ವಿಕೆಟ್ ಒಪ್ಪಿಸಿದರು. ನಂತರ ಬಂದ ಶ್ರೇಯಸ್ ಅಯ್ಯರ್ 3, ಕೆ.ಎಲ್.ರಾಹುಲ್ 8, ವಾಷಿಂಗ್ಟನ್ ಸುಂದರ್ 37, ಅಕ್ಸರ್ ಪಟೇಲ್ 20, ಶಾರ್ದೂಲ್ 3, ಕುಲದೀಪ್ ಯಾದವ್ 3 ರನ್ ಹೊಡೆದರು.
ಬಾಂಗ್ಲಾ ಪರ ತಸ್ಕಿನ್ ಅಹಮದ್ 89ಕ್ಕೆ 2, ಎಬೊಡೊತ್ ಹೊಸೇನ್ 80ಕ್ಕೆ 2, ಶಕೀಬ್ ಅಲ್ ಹಸನ್ 68ಕ್ಕೆ 2 ವಿಕೆಟ್, ಮುಸ್ತಾಫಿಜುರ್ ರೆಹಮಾನ್, ಮೆಹದಿ ಹಸನ್ ತಲಾ 1 ವಿಕೆಟ್ ಪಡೆದರು. ಭಾರತ ಏಕದಿನ ಕ್ರಿಕೆಟ್ನಲ್ಲಿ ನಾಲ್ಕನೆ ಗರಿಷ್ಠ ಮೊತ್ತ ದಾಖಲಿಸಿದ ಸಾಧನೆ ಮಾಡಿತು.
410 ರನ್ ಗುರಿ ಬೆನ್ನತ್ತಿದ ಬಾಂಗ್ಲಾದೇಶ ತಂಡ ಭಾರತದ ವೇಗಿಗಳ ದಾಳಿಗೆ ತತರಿಸಿ ಹೋಯಿತು. ಅನಮುಲ್ ಹಕ್ 8,ನಾಯಕ ಲಿಟನ್ ದಾಸ್ 29, ಶಕೀಬ್ ಅಲ್ ಹಸನ್ 43 , ಯಸೀರ್ ಅಲಿ, 25, ಮೊಹ್ಮದ್ಹುಲ್ಲಾ 20 ರನ್, ಉಳಿದ ಬ್ಯಾಟರ್ಗಳು ಒಂದಂಕಿ ರನ್ ಹೊಡೆದರು. ಭಾರತದ ಪರ ಶಾರ್ದೂಲ್ ಠಾಕೂರ್ 30ಕ್ಕೆ 3 ವಿಕೆಟ್, ಅಕ್ಸರ್ ಪಟೇಲ್, ಉಮ್ರಾನ್ ಮಲ್ಲಿಕ್ ತಲಾ 2 ವಿಕೆಟ್, ಮೊಹ್ಮದ್ ಸೀರಾಜ್, ಕುಲದೀಪ್ ಯಾದವ್ ಹಾಗೂ ವಾಷಿಂಗ್ಟನ್ ಸುಂದರ್ ತಲಾ 1 ವಿಕೆಟ್ ಪಡೆದರು. ಬಾಂಗ್ಲಾದ ಮೆಹದಿ ಹಸನ್ ಮೀರಜ್ ಸರಣಿ ಶ್ರೇಷ್ಠ ಗೌರವ ಪಡೆದರು.
