ಹೌಸ್ವೈಫ್, ವೇಶ್ಯೆ ಪದಕ್ಕೆ ನಿರ್ಬಂಧ: ಸುಪ್ರೀಂ ಕೋರ್ಟ್
Ban on term housewife, prostitute: Supreme Court
ನಾವು ದಿನನಿತ್ಯ ಅದೆಷ್ಟೋ ಪದಗಳನ್ನು ಬಳಸುತ್ತೇವೆ. ಅವು ಅಶ್ಲೀಲವಾಗಿದ್ದರೂ ನಮಗೆ ಆ ಪದಗಳು ಬಳಸದೆ ಒಬ್ಬ ವ್ಯಕ್ತಿಯನ್ನು ಗುರುತಿಸಲು ಸಾಧ್ಯವಾಗುವುದಿಲ್ಲ ಎಂದು ತಿಳಿದಿದ್ದೇವೆ. ಅದೇರೀತಿಯಾಗಿ ಕೆಲವೊಂದು ಸಾರಿ ನ್ಯಾಯಾಲಯದ ತೀರ್ಪುಗಳಲ್ಲೂ ಈ ಪದಗಳನ್ನು ಕೇಳಿದ್ದುಂಟು. ಆದರೆ ಈಗ ಈ ಪದಗಳಿಗೆ ತಿಲಾಂಜಲಿ ಇಡಲಾಗಿದೆ.
ಹೌದು ಸುಪ್ರೀಂಕೋರ್ಟ್ ಬುಧವಾರ ಲಿಂಗಾಧಾರಿತ ಅಸಮಾನತೆಯನ್ನು ಬದಲಾಯಿಸುವ ಗುರಿ ಹೊಂದಿರುವ ಹೊಸ ಕೈಪಿಡಿಯನ್ನು ಬಿಡುಗಡೆ ಮಾಡಿತು. ಈ ಕೈಪಿಡಿ ಪ್ರಕಾರ ಇನ್ಮುಮುಂದೆ ಕೋರ್ಟ್ ತೀರ್ಪಲ್ಲಿ ಹೌಸ್ವೈಫ್, ಹಾದರಗಿತ್ತಿ, ವೇಶ್ಯೆ ಮುಂತಾದ ಪದಗಳನ್ನು ತೀರ್ಪು ಹಾಗೂ ಆದೇಶ ಪ್ರಕಟಣೆಗಳಲ್ಲಿ ಬಳಸುವುದಕ್ಕೆ ನಿರ್ಬಂಧ ಹೇರಲಾಗಿದೆ.
ಇದರ ಬದಲಾಗಿ ಕೆಲವು ಗೌರವ ಸೂಚಕ ಪದಗಳನ್ನು ಪ್ರಕಟಿಸಲಾಗಿದೆ. ‘ಮಹಿಳೆಯ ಚಾರಿತ್ರ್ಯ, ಆಕೆಯ ಉಡುಗೆ-ತೊಡುಗೆ, ಜೀವನ ಶೈಲಿ ಆಧರಿಸಿ ಕೆಲವು ಪದಗಳನ್ನು ಬಳಸಲಾಗುತ್ತಿದೆ. ಅವು ಸೂಕ್ತ ಎನ್ನಿಸುವುದಿಲ್ಲ. ಹೀಗಾಗಿ ಅಂಥ ಪದ ತೆಗೆದುಹಾಕಿ ಗೌರವಸೂಚಕ ಪದ ಪ್ರಕಟಿಸಲಾಗಿದೆ’ ಎಂದು ಕೋರ್ಟ್ ಹೇಳಿದೆ.
ಇದೇ ವೇಳೆ ‘ಹಳೆಯ ತೀರ್ಪು ಆದೇಶಗಳಲ್ಲಿ ಕೆಲವು ಮಹಿಳೆಯರ ಬಗ್ಗೆ ರೂಢಿಗತ ಅಥವಾ ಊಹಾತ್ಮಕ ಪದಗಳಿದ್ದವು. ಇಂಥವು ಇನ್ನು ಇರುವುದಿಲ್ಲ’ ಎಂದಿದೆ.
30 ಪುಟಗಳ ಹೊಸ ಕೈಪಿಡಿಯ ಅನ್ವಯ, ‘ವೇಶ್ಯೆ’ ಎಂಬ ಪದದ ಬದಲು ಇನ್ನು ‘ಲೈಂಗಿಕ ಕಾರ್ಯಕರ್ತೆಯರು’ ಎಂದು ಕರೆಯಲಾಗುವುದು.
ಹಾದರಗಿತ್ತಿ ಬದಲು ಮಹಿಳೆ’ ಎಂದು ಬಳಸಲಾಗುವುದು. ‘ಕೀಪ್’ ಎಂಬ ಪದದ ಬದಲಾಗಿ, ‘ವ್ಯಕ್ತಿಯೊಬ್ಬ ತನ್ನ ವೈವಾಹಿಕ ಜೀವನದ ಹೊರತಾಗಿ ಮಹಿಳೆಯೊಂದಿಗೆ ಹೊಂದಿರುವ ಪ್ರೀತಿ ಅಥವಾ ಲೈಂಗಿಕ ಸಂಬಂಧ’ ಎಂದು ಬಳಸಲಾಗುವುದು. ‘ಚುಡಾಯಿಸುವುದು’ ಎನ್ನುವ ಪದದ ಬದಲಾಗಿ ಇನ್ನು ‘ಬೀದಿ ಲೈಂಗಿಕ ಕಿರುಕುಳ’ ಎಂದು ಬಳಸಲಾಗುವುದು.
‘ಫ್ಯಾಗಟ್’ ಎಂಬ ಪದದ ಬದಲಾಗಿ ವ್ಯಕ್ತಿಯ ಲೈಂಗಿಕ ಆಸಕ್ತಿಯ ಕುರಿತಾದ ನಿರ್ದಿಷ್ಟ ಪದ ಬಳಸಲಾಗುವುದು. ‘ಹೌಸ್ ವೈಫ್’ ಎಂಬ ಪದದ ಬದಲಾಗಿ ‘ಹೌಸ್ಮೇಕರ್’ (ಮನೆ ಮುನ್ನಡೆಸುವವಳು) ಎಂದು ಬಳಸಲಾಗುವುದು.
‘ಮಿಸ್ಟೆಸ್’ ಎಂಬ ಪದವನ್ನು ಇನ್ನು ‘ಪುರುಷನೊಬ್ಬನ ಜತೆ ಆತನ ವೈವಾಹಿಕ ಸಂಬಂಧಕ್ಕೆ ಹೊರತಾಗಿ ಮಹಿಳೆಯೊಬ್ಬಳು ಹೊಂದಿರುವ ಪ್ರೀತಿ ಅಥವಾ ಲೈಂಗಿಕ ಸಂಬಂಧ’ ಎಂದು ಬಳಸಲಾಗುವುದು. ‘ಬಾಸ್ಟರ್ಡ್’ ಎಂಬ ಪದದ ಬದಲಾಗಿ ‘ವೈವಾಹಿಕ ಸಂಬಂಧಕ್ಕೆ ಹೊರತಾಗಿ ಜನಿಸಿದ ಮಗು ಅಥವಾ ಮಗುವಿನ ಪೋಷಕರು ಮದುವೆಯಾಗಿಲ್ಲ’ ಎಂದು ಬಳಸಲಾಗುವುದು ಎಂದು ತಿಳಿಸಲಾಗಿದೆ.
