ಬೆಂಗಳೂರು: ಕರ್ನಾಟಕದಲ್ಲಿ ಪರಭಾಷಾ ಚಿತ್ರಗಳ ಆರ್ಭಟಕ್ಕೆ ಕನ್ನಡದ ಸಿನಿಮಾಗಳು ನಲುಗುತ್ತಿರುವ ವಿಚಾರ ಹೊಸದೇನಲ್ಲ. ಆದರೆ ಇದೀಗ ಕನ್ನಡ ಚಿತ್ರಗಳಿಗೆ ಪ್ರೇಕ್ಷಕರಿಂದ ಸಿಗುತ್ತಿರುವ ನೀರಸ ಪ್ರತಿಕ್ರಿಯೆ ಮತ್ತು ಪರಭಾಷಾ ಚಿತ್ರಗಳ ಮೇಲಿನ ಅತಿಯಾದ ವ್ಯಾಮೋಹವನ್ನು ಕಂಡು ಹಿರಿಯ ನಟ, ಸಂಗೀತ ನಿರ್ದೇಶಕ ಸಾಧು ಕೋಕಿಲ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ನಮ್ಮ ಪ್ರೇಕ್ಷಕರಿಗೆ ಕನಿಷ್ಠ ಸೌಜನ್ಯವೂ ಇಲ್ಲ, ಇದೇ ಪರಿಸ್ಥಿತಿ ಮುಂದುವರಿದರೆ ಕನ್ನಡ ಚಿತ್ರರಂಗವನ್ನೇ ಶಾಶ್ವತವಾಗಿ ಮುಚ್ಚಬೇಕಾಗುತ್ತದೆ ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ.
ಉದಾರತೆ ಎನ್ನುವುದು ಕನ್ನಡಿಗರ ಪಾಲಿಗೆ ಮುಳುವಾಯಿತೇ?
ಕರ್ನಾಟಕವು ಕಲೆ ಮತ್ತು ಕಲಾವಿದರನ್ನು ಗೌರವಿಸುವ ರಾಜ್ಯ. ಇಲ್ಲಿ ಭಾಷೆಯ ಹಂಗಿಲ್ಲದೆ ಎಲ್ಲ ಸಿನಿಮಾಗಳನ್ನು ಸ್ವಾಗತಿಸಲಾಗುತ್ತದೆ. ಬೆಂಗಳೂರು, ಮೈಸೂರು, ಹುಬ್ಬಳ್ಳಿ, ಮಂಗಳೂರಿನಂತಹ ಪ್ರಮುಖ ನಗರಗಳಲ್ಲಿ ಪರಭಾಷಾ ಚಿತ್ರಗಳು ಬಿಡುಗಡೆಯ ದಿನವೇ ಹಬ್ಬದ ವಾತಾವರಣ ನಿರ್ಮಾಣವಾಗುತ್ತದೆ. ಇತ್ತೀಚೆಗೆ ಹಳೆಯ ಪರಭಾಷಾ ಚಿತ್ರಗಳು ಮರುಬಿಡುಗಡೆಯಾದರೂ ಹೌಸ್ಫುಲ್ ಪ್ರದರ್ಶನ ಕಾಣುತ್ತಿವೆ. ಆದರೆ, ವಿಪರ್ಯಾಸವೆಂದರೆ ಸ್ವಂತ ನೆಲದ ಕನ್ನಡ ಚಿತ್ರಗಳಿಗೆ ಮಾತ್ರ ಇಂತಹ ಅದ್ದೂರಿ ಸ್ವಾಗತ ಸಿಗುತ್ತಿಲ್ಲ. ಪರಭಾಷಾ ಚಿತ್ರಗಳು ಕನ್ನಡಕ್ಕೆ ಡಬ್ ಆಗಿ ಬಂದರೂ, ಕನ್ನಡಿಗರು ಮೂಲ ಭಾಷೆಯಲ್ಲೇ ಸಿನಿಮಾ ನೋಡಲು ಮುಗಿಬೀಳುತ್ತಿರುವುದು ಕನ್ನಡ ಚಿತ್ರರಂಗದ ಪಾಲಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಇತ್ತೀಚೆಗೆ ತೆರೆಕಂಡ ಫ್ಲರ್ಟ್ ಎಂಬ ಕನ್ನಡ ಸಿನಿಮಾದ ಬಗ್ಗೆ ಮಾತನಾಡಿದ ಸಾಧು ಕೋಕಿಲ, ಪ್ರೇಕ್ಷಕರ ಮನಸ್ಥಿತಿಯ ಬಗ್ಗೆ ಬೇಸರ ಹೊರಹಾಕಿದ್ದಾರೆ. ನಿರ್ಮಾಪಕರು ಕೋಟ್ಯಂತರ ರೂಪಾಯಿ ಸುರಿದು ಹೊರಾಂಗಣ ಪ್ರಚಾರ ಮಾಡಲು ಸಾಧ್ಯವಾಗದಿದ್ದರೂ, ಸಾಮಾಜಿಕ ಜಾಲತಾಣಗಳ ಮೂಲಕ ತಲುಪಲು ಪ್ರಯತ್ನಿಸಿರುತ್ತಾರೆ. ಕಷ್ಟಪಟ್ಟು ಕಂಟೆಂಟ್ ಆಧಾರಿತ ಸಿನಿಮಾ ಮಾಡಿರುತ್ತಾರೆ. ಆದರೆ, ಪ್ರೇಕ್ಷಕರು ಚಿತ್ರಮಂದಿರದ ಕಡೆ ತಿರುಗಿಯೂ ನೋಡುತ್ತಿಲ್ಲ. ಸಿನಿಮಾ ಹೇಗಿದೆ ಎಂದು ವಿಚಾರಿಸುವ ಅಥವಾ ಒಂದು ಬಾರಿ ಚಿತ್ರಮಂದಿರಕ್ಕೆ ಬಂದು ನೋಡುವ ಕನಿಷ್ಠ ಸೌಜನ್ಯವೂ ಕನ್ನಡ ಪ್ರೇಕ್ಷಕರಿಗೆ ಇಲ್ಲದಂತಾಗಿದೆ ಎಂದು ಅವರು ಕಿಡಿಕಾರಿದ್ದಾರೆ.
ತಮಿಳು, ಮಲಯಾಳಂ ಶ್ರೇಷ್ಠ.. ಕನ್ನಡ ಮಾತ್ರ ಕನಿಷ್ಠ?
ನಮ್ಮ ಪ್ರೇಕ್ಷಕರು ತಮಿಳು ಸಿನಿಮಾಗಳನ್ನು ಹೈಲೈಟ್ ಮಾಡುತ್ತಾರೆ, ಮಲಯಾಳಂ ಚಿತ್ರಗಳನ್ನು ಅದ್ಭುತ ಎಂದು ಕೊಂಡಾಡುತ್ತಾರೆ, ತೆಲುಗು ಸಿನಿಮಾಗಳಿಗೆ ಜೈ ಎನ್ನುತ್ತಾರೆ. ಆದರೆ ಕನ್ನಡದ ವಿಷಯಕ್ಕೆ ಬಂದರೆ ಮೌನವಾಗುತ್ತಾರೆ. ಪರಭಾಷೆಯವರನ್ನು ಬೆಳೆಸುವ ಭರದಲ್ಲಿ ನಮ್ಮತನವನ್ನೇ ಮರೆಯುತ್ತಿದ್ದೇವೆ. ಈ ಮಟ್ಟಕ್ಕೆ ನಮ್ಮ ಪ್ರೇಕ್ಷಕರು ಅನ್ಯಭಾಷೆಗೆ ಜೋತು ಬಿದ್ದಿರುವುದನ್ನು ನೋಡಿದರೆ, ಸ್ಯಾಂಡಲ್ ವುಡ್ ಇಂಡಸ್ಟ್ರಿಯನ್ನು ಮುಚ್ಚಿಬಿಡುವುದೇ ಲೇಸು ಅಥವಾ ಇಂಡಸ್ಟ್ರಿನೇ ಇರಬಾರದೇನೋ ಎನಿಸುತ್ತಿದೆ ಎಂದು ಸಾಧು ಕೋಕಿಲ ನೊಂದು ನುಡಿದಿದ್ದಾರೆ.
ಸಿನಿಮಾ ನೋಡಿ ಆಮೇಲೆ ಬೈಯಿರಿ
ಫ್ಲರ್ಟ್ ಸಿನಿಮಾ ಬಗ್ಗೆ ಪ್ರಸ್ತಾಪಿಸಿದ ಅವರು, ತುಮಕೂರಿನಲ್ಲಿ ಕಾಲೇಜು ಹುಡುಗರು ಈ ಚಿತ್ರವನ್ನು ನೋಡಿ ಸಂಭ್ರಮಿಸಿದ್ದಾರೆ. ಅಷ್ಟು ಒಳ್ಳೆಯ ಕಂಟೆಂಟ್ ಈ ಚಿತ್ರದಲ್ಲಿದೆ. ನಾನು ಕನ್ನಡ ಚಿತ್ರರಂಗವನ್ನು ಉಳಿಸಿ ಎಂದು ಭಿಕ್ಷೆ ಬೇಡುತ್ತಿಲ್ಲ, ಬದಲಾಗಿ ಒಂದು ಒಳ್ಳೆಯ ಸಿನಿಮಾವನ್ನು ಉಳಿಸಿ ಎಂದು ಕೇಳಿಕೊಳ್ಳುತ್ತಿದ್ದೇನೆ. ಚಿತ್ರಮಂದಿರಕ್ಕೆ ಬಂದು ಸಿನಿಮಾ ನೋಡಿ, ಒಂದು ವೇಳೆ ಚೆನ್ನಾಗಿಲ್ಲದಿದ್ದರೆ ಆಗ ಬೈಯಿರಿ, ನಾವು ತಲೆಬಾಗುತ್ತೇವೆ. ಆದರೆ ನೋಡದೆಯೇ ಕಡೆಗಣಿಸಬೇಡಿ. ಚಿತ್ರಮಂದಿರಕ್ಕೆ ಬಂದರೆ ಖಂಡಿತ ನಿಮಗೆ ಮೋಸವಾಗುವುದಿಲ್ಲ ಎಂದು ಸಾಧು ಕೋಕಿಲ ಮನವಿ ಮಾಡಿದ್ದಾರೆ.
ಒಟ್ಟಿನಲ್ಲಿ, ಸಾಧು ಕೋಕಿಲ ಅವರ ಈ ಆಕ್ರೋಶದ ಮಾತುಗಳು ಕೇವಲ ಒಬ್ಬ ಕಲಾವಿದನ ನೋವಲ್ಲ, ಇದು ಇಡೀ ಕನ್ನಡ ಚಿತ್ರರಂಗದ ಪ್ರಸ್ತುತ ಸ್ಥಿತಿಗೆ ಹಿಡಿದ ಕನ್ನಡಿಯಾಗಿದೆ. ಪ್ರೇಕ್ಷಕರು ಈಗಲಾದರೂ ಎಚ್ಚೆತ್ತುಕೊಳ್ಳದಿದ್ದರೆ ಗಾಂಧಿನಗರದ ಭವಿಷ್ಯ ಕತ್ತಲೆಯಲ್ಲಿ ಮುಳುಗುವುದಂತೂ ಸತ್ಯ.
