ವಿಜಯಪುರ: ಉತ್ತರ ಕರ್ನಾಟಕದ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರ ಹಾಗೂ ಪವಾಡದ ಭೂಮಿ ಎಂದೇ ಖ್ಯಾತವಾಗಿರುವ ವಿಜಯಪುರ ಜಿಲ್ಲೆಯ ಬೆಂಕಿ ಬಬಲಾದಿ ಸದಾಶಿವ ಮುತ್ಯಾನಮಠದಲ್ಲಿ ಶ್ರೀ ಸದಾಶಿವ ಮುತ್ಯಾ ಅವರು ಈ ಬಾರಿಯ ಸ್ಫೋಟಕ ಕಾಲಜ್ಞಾನ ಭವಿಷ್ಯವನ್ನು ನುಡಿದಿದ್ದಾರೆ. 1948ರ ಪ್ರಭವ ನಾಮ ಸಂವತ್ಸರದ (2026) ಪಂಚಾಂಗದ ಆಧಾರದ ಮೇಲೆ ನುಡಿದಿರುವ ಈ ಭವಿಷ್ಯವಾಣಿಯು ರಾಜ್ಯ ರಾಜಕೀಯ, ಪ್ರಕೃತಿ ವಿಕೋಪ ಹಾಗೂ ಆರ್ಥಿಕ ಸ್ಥಿತಿಗತಿಗಳ ಬಗ್ಗೆ ಮಹತ್ವದ ಮುನ್ಸೂಚನೆಗಳನ್ನು ನೀಡಿದೆ.
ರಾಜ್ಯ ರಾಜಕೀಯದಲ್ಲಿ ಹೊಸ ತಿರುವು
ಬಬಲಾದಿ ಮುತ್ಯಾ ನುಡಿದಿರುವ ಕಾಲಜ್ಞಾನದಲ್ಲಿ ಎಲ್ಲರ ಹುಬ್ಬೇರಿಸುವಂತಹ ವಿಷಯವೆಂದರೆ ಅದು ರಾಜ್ಯ ರಾಜಕೀಯದ್ದು. ರಾಜ್ಯದ ರಾಜಕೀಯದಲ್ಲಿ ಅನಿರೀಕ್ಷಿತ ಮತ್ತು ಹೊಸ ತಿರುವುಗಳು ಕಂಡುಬರಲಿವೆ ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ. ಪ್ರಸ್ತುತ ನಡೆಯುತ್ತಿರುವ ರಾಜಕೀಯ ವಿದ್ಯಮಾನಗಳ ನಡುವೆ ಈ ಭವಿಷ್ಯವಾಣಿಯು ಆಡಳಿತ ಮತ್ತು ವಿರೋಧ ಪಕ್ಷಗಳಲ್ಲಿ ಸಂಚಲನ ಮೂಡಿಸಿದ್ದು, ಮುಂದಿನ ದಿನಗಳಲ್ಲಿ ದೊಡ್ಡ ಮಟ್ಟದ ಬದಲಾವಣೆಗಳು ಅಥವಾ ಧ್ರುವೀಕರಣಗಳು ಆಗುವ ಸಾಧ್ಯತೆಯನ್ನು ಇದು ಬಲಪಡಿಸಿದೆ.
ಮಕ್ಕಳ ಆರೋಗ್ಯದಲ್ಲಿ ಏರುಪೇರು ಮತ್ತು ಪ್ರಕೃತಿ ವಿಕೋಪ
ಈ ವರ್ಷ ಸಮಾಜಕ್ಕೆ ಕೆಲವೊಂದು ಕಠಿಣ ಸವಾಲುಗಳು ಎದುರಾಗಲಿವೆ ಎಂದು ಕಾಲಜ್ಞಾನ ಎಚ್ಚರಿಸಿದೆ. ಮುಖ್ಯವಾಗಿ ಚಿಕ್ಕ ಮಕ್ಕಳಿಗೆ ರೋಗಬಾಧೆ ಹೆಚ್ಚಾಗಲಿದ್ದು ಪಾಲಕರು ಎಚ್ಚರಿಕೆ ವಹಿಸಬೇಕಿದೆ. ಇನ್ನು ಪ್ರಕೃತಿಯ ಮುನಿಸು ಕೂಡ ಜೋರಾಗಿರಲಿದ್ದು, ವಿಶ್ವದ ಹಲವು ಕಡೆ ಭೂಕುಸಿತ ಉಂಟಾಗುವ ಸಾಧ್ಯತೆ ಇದೆ. ಉತ್ತರ ಭಾರತದಲ್ಲಿ ಅತಿವೃಷ್ಟಿಯಾಗಿ ಪ್ರವಾಹ ಪರಿಸ್ಥಿತಿ ನಿರ್ಮಾಣವಾಗಬಹುದು ಎಂದು ಭವಿಷ್ಯ ನುಡಿಯಲಾಗಿದೆ. ಅಲ್ಲದೆ ಅಗ್ನಿ ಅನಾಹುತಗಳು ಹೆಚ್ಚಾಗಲಿದ್ದು, ಕಾಡು ಪ್ರಾಣಿಗಳಿಗೂ ಕಷ್ಟದ ದಿನಗಳು ಎದುರಾಗಲಿವೆ.
ಯುದ್ಧದ ಕಾರ್ಮೋಡ ಮತ್ತು ಕಲಹ
ದೇಶದ ಗಡಿ ಭಾಗದಲ್ಲಿ ಯುದ್ಧದ ಕಾರ್ಮೋಡ ಕವಿಯುವ ಆತಂಕಕಾರಿ ವಿಷಯವನ್ನು ಕಾಲಜ್ಞಾನದಲ್ಲಿ ಪ್ರಸ್ತಾಪಿಸಲಾಗಿದೆ. ಪ್ರಜೆಗಳ ನಡುವೆ ಪರಸ್ಪರ ಕಲಹಗಳು ಹೆಚ್ಚಾಗಲಿದ್ದು, ಸಮಾಜದಲ್ಲಿ ಅಶಾಂತಿ ಉಂಟಾಗುವ ಸಾಧ್ಯತೆಯಿದೆ. ಒಂದು ದೊಡ್ಡ ದುಃಖದ ಸುದ್ದಿ ಬರುವ ಮುನ್ಸೂಚನೆಯಿದ್ದು, ಪಾಪದ ಕೆಲಸಗಳು ಹೆಚ್ಚಾಗಲಿವೆ ಎಂದು ಮುತ್ಯಾ ನುಡಿದಿದ್ದಾರೆ.
ರೈತರಿಗೆ ಶುಭ ಸುದ್ದಿ ಮತ್ತು ಆರ್ಥಿಕ ಕ್ರಾಂತಿ
ಹಲವು ಕಹಿ ಸುದ್ದಿಗಳ ನಡುವೆಯೂ ನಾಡಿನ ಜನತೆಗೆ ಮತ್ತು ರೈತರಿಗೆ ಸಿಹಿ ಸುದ್ದಿಯನ್ನೂ ಬಬಲಾದಿ ಮುತ್ಯಾ ನೀಡಿದ್ದಾರೆ. ಈ ಬಾರಿ ರೈತರಿಗೆ ಒಳಿತಾಗಲಿದ್ದು, ಉತ್ತಮ ಮಳೆಯಿಂದ ಬೆಳೆಗಳು ಸಮೃದ್ಧವಾಗಲಿವೆ. ದೇಶದಲ್ಲಿ ಉದ್ಯೋಗಾವಕಾಶಗಳು ಹೆಚ್ಚಲಿದ್ದು, ಆರ್ಥಿಕ ಸ್ಥಿತಿಯಲ್ಲಿ ಭಾರೀ ಸುಧಾರಣೆ ಕಂಡುಬರಲಿದೆ. ಆರ್ಥಿಕ ಕ್ರಾಂತಿಯೇ ನಡೆಯಲಿದ್ದು, ಶ್ರೀಮಂತ ಮತ್ತು ಬಡವರ ನಡುವಿನ ಅಂತರ ಕಡಿಮೆಯಾಗಲಿದೆ ಎಂಬುದು ಸಮಾಧಾನಕರ ಸಂಗತಿಯಾಗಿದೆ. ಜನರ ಆರೋಗ್ಯದಲ್ಲಿಯೂ ಕ್ರಮೇಣ ಚೇತರಿಕೆ ಕಂಡುಬರಲಿದೆ.
ಒಟ್ಟಾರೆಯಾಗಿ ಬಬಲಾದಿ ಸದಾಶಿವ ಮುತ್ಯಾನಮಠದ ಈ ಕಾಲಜ್ಞಾನವು ಮುಂಬರುವ ದಿನಗಳಲ್ಲಿ ರಾಜ್ಯ ಮತ್ತು ದೇಶದಲ್ಲಿ ನಡೆಯಲಿರುವ ಮಹತ್ತರ ಬದಲಾವಣೆಗಳ ದಿಕ್ಸೂಚಿಯಂತಿದ್ದು, ಭಕ್ತವೃಂದದಲ್ಲಿ ಕುತೂಹಲ ಹಾಗೂ ಭಕ್ತಿಯನ್ನು ಹೆಚ್ಚಿಸಿದೆ.
