ಕನ್ನಡ ಚಿತ್ರರಂಗದ ಇತಿಹಾಸದಲ್ಲಿ ಮೈಲಿಗಲ್ಲಾಗಿ ಉಳಿದಿರುವ, ಸಾಹಸ ಸಿಂಹ ಡಾ. ವಿಷ್ಣುವರ್ಧನ್ ಅವರ ಅಭಿನಯದ ಅಪ್ರತಿಮ ಚಲನಚಿತ್ರ ಕೋಟಿಗೊಬ್ಬ ಬಿಡುಗಡೆಯಾಗಿ ಬರೋಬ್ಬರಿ 25 ವಸಂತಗಳು ಪೂರೈಸಿವೆ. ಈ ಸುವರ್ಣ ಘಳಿಗೆಯನ್ನು ಸಂಭ್ರಮಿಸಲು ನಿರ್ಮಾಪಕ ಸೂರಪ್ಪ ಬಾಬು ಅವರು ಬೆಂಗಳೂರಿನ ಟೌನ್ ಹಾಲ್ ನಲ್ಲಿ ಅದ್ದೂರಿ ಕಾರ್ಯಕ್ರಮವನ್ನು ಆಯೋಜಿಸುವ ಮೂಲಕ ದಾದಾ ಅಭಿಮಾನಿಗಳಿಗೆ ದೊಡ್ಡ ಉಡುಗೊರೆಯನ್ನೇ ನೀಡಿದ್ದಾರೆ.
ಈ ಐತಿಹಾಸಿಕ ಕಾರ್ಯಕ್ರಮವನ್ನು ಹಿರಿಯ ನಟಿ ಭಾರತಿ ವಿಷ್ಣುವರ್ಧನ್ ಅವರು ಉದ್ಘಾಟಿಸಿ ಶುಭಕೋರಿದರು. ನಿವೃತ್ತ ನ್ಯಾಯಮೂರ್ತಿ ಸಂತೋಷ್ ಹೆಗ್ಡೆ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಸಮಾರಂಭದಲ್ಲಿ ಪ್ರತಾಪ್ ಸಿಂಹ ಅತಿಥಿಯಾಗಿ ಪಾಲ್ಗೊಂಡಿದ್ದರು. ಸ್ಯಾಂಡಲ್ ವುಡ್ ನ ದಿಗ್ಗಜರಾದ ರಿಯಲ್ ಸ್ಟಾರ್ ಉಪೇಂದ್ರ, ಪ್ರಿಯಾಂಕಾ ಉಪೇಂದ್ರ, ಡೈನಾಮಿಕ್ ಹೀರೋ ದೇವರಾಜ್, ಗೋಲ್ಡನ್ ಸ್ಟಾರ್ ಗಣೇಶ್ ಸೇರಿದಂತೆ ಚಿತ್ರತಂಡದ ಅನೇಕ ತಂತ್ರಜ್ಞರು ಈ ವೇದಿಕೆಯಲ್ಲಿ ಒಂದಾಗಿ ಹಳೆಯ ನೆನಪುಗಳನ್ನು ಮೆಲುಕು ಹಾಕಿದರು.
ದೇವರಾಜ್ ಅವರ ಭಾವುಕ ನುಡಿಗಳು
ಕಾರ್ಯಕ್ರಮದಲ್ಲಿ ಮಾತನಾಡಿದ ಹಿರಿಯ ನಟ ದೇವರಾಜ್ ಅವರು ಕೋಟಿಗೊಬ್ಬ ಚಿತ್ರದ ಚಿತ್ರೀಕರಣದ ದಿನಗಳನ್ನು ನೆನೆದು ಭಾವುಕರಾದರು. ವಿಷ್ಣುವರ್ಧನ್ ಅವರೊಂದಿಗಿನ ಒಡನಾಟ ಹಾಗೂ ವಿಶೇಷವಾಗಿ ಸೆಟ್ ನಲ್ಲಿ ಭಾರತಿಯಮ್ಮನವರು ಪ್ರೀತಿಯಿಂದ ತಂದು ಕೊಡುತ್ತಿದ್ದ ಕೈತುತ್ತಿನ ಊಟವನ್ನು ಅವರು ಸ್ಮರಿಸಿದರು. ಆ ದಿನಗಳನ್ನು ಮತ್ತು ಆ ಪ್ರೀತಿಯನ್ನು ಜೀವನದಲ್ಲಿ ಎಂದಿಗೂ ಮರೆಯಲು ಸಾಧ್ಯವಿಲ್ಲ ಎಂದು ಹೇಳುವ ಮೂಲಕ ನೆರೆದಿದ್ದವರ ಕಣ್ಣಂಚನ್ನು ಒದ್ದೆಯಾಗಿಸಿದರು.
ನಿರ್ದೇಶಕ ನಾಗಣ್ಣನಿಗೆ ಗಣೇಶ್ ಮೆಚ್ಚುಗೆ
ಗೋಲ್ಡನ್ ಸ್ಟಾರ್ ಗಣೇಶ್ ಅವರು ವೇದಿಕೆ ಏರಿ ನಿರ್ದೇಶಕ ನಾಗಣ್ಣ ಅವರ ಕಾರ್ಯವೈಖರಿಯನ್ನು ಹಾಡಿ ಹೊಗಳಿದರು. ನಾಗಣ್ಣ ಅವರು ಕೇವಲ ಒಬ್ಬ ಅದ್ಭುತ ನಿರ್ದೇಶಕ ಮಾತ್ರವಲ್ಲ, ಅತ್ಯಂತ ಸರಳ ಹಾಗೂ ಒಳ್ಳೆಯ ವ್ಯಕ್ತಿತ್ವ ಹೊಂದಿರುವ ಮನುಷ್ಯ ಎಂದು ಬಣ್ಣಿಸಿದರು.
ಭಾರ್ಗವ ಚಿತ್ರದ ಭರ್ಜರಿ ಘೋಷಣೆ
ಕೋಟಿಗೊಬ್ಬ ಸಂಭ್ರಮದ ವೇದಿಕೆಯು ಮತ್ತೊಂದು ಬೃಹತ್ ಘೋಷಣೆಗೆ ಸಾಕ್ಷಿಯಾಯಿತು. ನಿರ್ದೇಶಕ ನಾಗಣ್ಣ ಮತ್ತು ನಿರ್ಮಾಪಕ ಸೂರಪ್ಪ ಬಾಬು ಅವರ ಕಾಂಬಿನೇಷನ್ ನಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ನಾಯಕರಾಗಿ ನಟಿಸಲಿರುವ ಹೊಸ ಚಿತ್ರ ಭಾರ್ಗವ ದ ಬಗ್ಗೆ ಅಧಿಕೃತವಾಗಿ ತಿಳಿಸಲಾಯಿತು. ಈ ಮೂಲಕ ಕೋಟಿಗೊಬ್ಬ ಸಂಭ್ರಮವು ಕೇವಲ ಗತಕಾಲದ ನೆನಪುಗಳಲ್ಲದೇ ಭವಿಷ್ಯದ ಬೃಹತ್ ನಿರೀಕ್ಷೆಗೂ ಮುನ್ನುಡಿ ಬರೆದಿದೆ.
