ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷದ ಕಿಚ್ಚನ್ನು ಆರಿಸಲು ಪಾಕಿಸ್ತಾನ ಮಧ್ಯಸ್ಥಿಕೆ ವಹಿಸುತ್ತಿರುವುದರ ಬಗ್ಗೆ ಕಾಂಗ್ರೆಸ್ ಸಂಸದ ಮತ್ತು ಮಾಜಿ ರಾಜತಾಂತ್ರಿಕ ಅಧಿಕಾರಿ ಶಶಿ ತರೂರ್ ತೀವ್ರವಾಗಿ ವ್ಯಂಗ್ಯವಾಡಿದ್ದಾರೆ. ಪಾಕಿಸ್ತಾನ ಮತ್ತು ಅಮೆರಿಕ ನಡುವಿನ ಸಂಬಂಧವು ಎಂತಹದ್ದು ಎಂಬುದನ್ನು ಅವರು ಮಾರ್ಮಿಕವಾಗಿ ಟೀಕಿಸಿದ್ದು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ನಡೆ ಮತ್ತು ಪಾಕಿಸ್ತಾನದ ಅನಿವಾರ್ಯತೆಗಳ ಬಗ್ಗೆ ಸವಿಸ್ತಾರವಾಗಿ ಮಾತನಾಡಿದ್ದಾರೆ.
ವಾಷಿಂಗ್ಟನ್ ಬರೆದ ಕರಡನ್ನೇ ಬಳಸಿದ್ರಾ ಪಾಕ್ ಪ್ರಧಾನಿ
ಇರಾನ್ ವಿಷಯವಾಗಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪೋಸ್ಟ್ ಮತ್ತು ಪಾಕಿಸ್ತಾನದ ಪ್ರಧಾನಿಯವರ ಸೋಷಿಯಲ್ ಮೀಡಿಯಾ ಪೋಸ್ಟ್ ನಡುವಿನ ಸಾಮ್ಯತೆಯನ್ನು ಗಮನಿಸಿದ ಶಶಿ ತರೂರ್, ಪಾಕಿಸ್ತಾನದ ನಡೆಯನ್ನು ಲೇವಡಿ ಮಾಡಿದ್ದಾರೆ. ವಾಷಿಂಗ್ಟನ್ ಆ ಟ್ವೀಟ್ ಅನ್ನು ಪಾಕಿಸ್ತಾನದ ಪ್ರಧಾನಿಗಾಗಿಯೇ ಸಿದ್ಧಪಡಿಸಿಕೊಟ್ಟಿರುವಂತಿದೆ. ನಾವು ಭಾರತದ ಪ್ರಧಾನಿಗಾಗಿ ಏನನ್ನಾದರೂ ಬರೆಯುವುದಾದರೆ ಅದರ ಮೇಲೆ ಭಾರತದ ಪ್ರಧಾನಿಗಾಗಿ ಕರಡು ಎಂದು ಬರೆಯುತ್ತೇವೆಯೇ ಎಂದು ಪ್ರಶ್ನಿಸುವ ಮೂಲಕ ಪಾಕಿಸ್ತಾನ ಅಮೆರಿಕದ ಆಜ್ಞಾಧಾರಕನಂತೆ ವರ್ತಿಸುತ್ತಿದೆ ಎಂದು ಟೀಕಿಸಿದ್ದಾರೆ. ಅಮೆರಿಕದೊಂದಿಗೆ ಇಂತಹ ಸಂಬಂಧ ಹೊಂದಲು ಪಾಕಿಸ್ತಾನಕ್ಕೆ ಮಾತ್ರ ಸಾಧ್ಯ, ಬೇರೆ ಯಾರಿಗೂ ಅಲ್ಲ ಎಂದು ಅವರು ಹೇಳಿದ್ದಾರೆ.
ಪಾಕಿಸ್ತಾನಕ್ಕೆ ಯುದ್ಧ ನಿಲ್ಲಿಸುವುದು ಯಾಕೆ ಅನಿವಾರ್ಯ
ಪಾಕಿಸ್ತಾನದ ಈ ಮಧ್ಯಸ್ಥಿಕೆಯ ಹಿಂದೆ ಕೇವಲ ಶಾಂತಿ ಸ್ಥಾಪನೆಯ ಉದ್ದೇಶವಿಲ್ಲ, ಬದಲಾಗಿ ಅಲ್ಲಿನ ಭೌಗೋಳಿಕ ಅನಿವಾರ್ಯತೆಗಳಿವೆ ಎಂದು ತರೂರ್ ವಿವರಿಸಿದ್ದಾರೆ. ಪಾಕಿಸ್ತಾನವು ಇರಾನ್ನೊಂದಿಗೆ ಸುಮಾರು 900 ಕಿಲೋ ಮೀಟರ್ ಉದ್ದದ ಗಡಿಯನ್ನು ಹಂಚಿಕೊಂಡಿದೆ. ಅಲ್ಲದೆ ಪಾಕಿಸ್ತಾನದಲ್ಲಿ ಗಣನೀಯ ಪ್ರಮಾಣದ ಶಿಯಾ ಮುಸ್ಲಿಂ ಜನಸಂಖ್ಯೆಯಿದೆ. ಒಂದು ವೇಳೆ ಇರಾನ್ ಮೇಲೆ ಯುದ್ಧವಾದರೆ ಅಲ್ಲಿಂದ ಹೊರಬರುವ ನಿರಾಶ್ರಿತರ ಮೊದಲ ಅಲೆ ಪಾಕಿಸ್ತಾನವನ್ನೇ ತಲುಪುತ್ತದೆ. ಹೀಗಾಗಿ ಈ ಬಿಕ್ಕಟ್ಟಿನಲ್ಲಿ ಪಾಕಿಸ್ತಾನಕ್ಕೆ ತನ್ನದೇ ಆದ ಹಿತಾಸಕ್ತಿಗಳಿವೆಯೇ ಹೊರತು ಅದು ಕೇವಲ ಶಾಂತಿಗಾಗಿ ಮಾಡುತ್ತಿರುವ ಕೆಲಸವಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಮಧ್ಯಸ್ಥಿಕೆ ಯಾರೇ ಮಾಡಲಿ ಲಾಭ ಮಾತ್ರ ಭಾರತಕ್ಕೆ
ಭಾರತವು ಈ ಸಂಘರ್ಷದಲ್ಲಿ ಮೌನವಾಗಿರುವುದನ್ನು ಸಮರ್ಥಿಸಿಕೊಂಡ ತರೂರ್, ಭಾರತಕ್ಕೆ ಫಲಿತಾಂಶ ಮುಖ್ಯವೇ ಹೊರತು ಮಧ್ಯಸ್ಥಿಕೆ ವಹಿಸುವ ಕ್ರಿಯೆಯಲ್ಲ ಎಂದು ಹೇಳಿದ್ದಾರೆ. ಗಲ್ಫ್ ರಾಷ್ಟ್ರಗಳಲ್ಲಿ ಒಂದು ಕೋಟಿಗಿಂತಲೂ ಹೆಚ್ಚು ಭಾರತೀಯರು ವಾಸಿಸುತ್ತಿದ್ದಾರೆ. ಯುದ್ಧ ಸಂಭವಿಸಿದರೆ ಅವರ ಸುರಕ್ಷತೆ ಮತ್ತು ಇಂಧನ ಪೂರೈಕೆಯ ಮೇಲೆ ಭಾರಿ ಹೊಡೆತ ಬೀಳುತ್ತದೆ. ಆದ್ದರಿಂದ ಯುದ್ಧ ನಿಲ್ಲುವುದು ಭಾರತದ ಪಾಲಿಗೆ ಅತ್ಯಂತ ಅವಶ್ಯಕ. ಮಧ್ಯಸ್ಥಿಕೆಯನ್ನು ಪಾಕಿಸ್ತಾನ ಮಾಡಲಿ ಅಥವಾ ಮತ್ಯಾರೇ ಮಾಡಲಿ, ಶಾಂತಿ ಸ್ಥಾಪನೆಯಾದರೆ ಅದರಿಂದ ಭಾರತಕ್ಕೆ ದೊಡ್ಡ ಲಾಭವಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ರಾಜತಾಂತ್ರಿಕ ಮೌನವೂ ಒಂದು ದೊಡ್ಡ ಕೊಡುಗೆ
ಭಾರತವು ಈ ವಿಷಯದಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳದೆ ಮೌನವಾಗಿರುವುದನ್ನು ವಿದೇಶಾಂಗ ನೀತಿಯ ಹಿನ್ನಡೆ ಎಂದು ಕರೆಯುವುದನ್ನು ತರೂರ್ ಒಪ್ಪಲಿಲ್ಲ. ರಾಜತಾಂತ್ರಿಕತೆಯಲ್ಲಿ ಕೆಲವೊಮ್ಮೆ ಮೌನವಾಗಿರುವುದೇ ಅತಿದೊಡ್ಡ ಕೊಡುಗೆಯಾಗಿರುತ್ತದೆ. ಭಾರತವು ಜವಾಬ್ದಾರಿಯುತ ಪಾಲುದಾರನಾಗಿ ಪರಿಸ್ಥಿತಿಯನ್ನು ಗಮನಿಸುತ್ತಿದೆ. ಈ ಸಂಘರ್ಷದ ಅಂತ್ಯವು ಭಾರತದ ಹಿತಾಸಕ್ತಿಯ ಪರವಾಗಿದೆ. ಭಾರತ ಯಾವ ಪಾತ್ರವನ್ನು ವಹಿಸಬೇಕು ಎಂಬುದನ್ನು ನಿರ್ಧರಿಸುವ ಹಕ್ಕು ಭಾರತಕ್ಕಿದೆ ಎಂದು ಅವರು ತಿಳಿಸಿದ್ದಾರೆ. ಒಂದು ವೇಳೆ ಈ ಶೂನ್ಯವನ್ನು ಬೇರೆಯವರು ತುಂಬಿದರೆ ಅದು ನಮಗೆ ಅಪಾಯಕಾರಿಯಾಗಬಹುದು ಎಂಬ ಎಚ್ಚರಿಕೆಯನ್ನೂ ನೀಡುತ್ತಾ, ಪ್ರಾದೇಶಿಕ ಸಮತೋಲನ ಕಾಯ್ದುಕೊಳ್ಳುವಲ್ಲಿ ಭಾರತದ ಜಾಗರೂಕ ನಡೆಯನ್ನು ಅವರು ಸಮರ್ಥಿಸಿಕೊಂಡಿದ್ದಾರೆ.
