ಬೆಂಗಳೂರು ಅಥವಾ ಇತರ ನಗರಗಳಲ್ಲಿ ಪರಿಚಯವಿಲ್ಲದ ಮಹಿಳೆಯರನ್ನು ಅಥವಾ ಸಹೋದ್ಯೋಗಿಗಳನ್ನು ಆಂಟಿ ಎಂದು ಕರೆಯುವುದು ಹಲವರಿಗೆ ಅಭ್ಯಾಸವಾಗಿಬಿಟ್ಟಿದೆ. ಕೆಲವರು ಗೌರವದಿಂದ ಕರೆದರೆ, ಇನ್ನು ಕೆಲವರು ಗೇಲಿ ಮಾಡಲು ಅಥವಾ ತಾವು ಸಣ್ಣವರು ಎಂದು ತೋರಿಸಿಕೊಳ್ಳಲು ಈ ಪದವನ್ನು ಅಸ್ತ್ರವಾಗಿ ಬಳಸುತ್ತಾರೆ. ಆದರೆ ಹೀಗೆ ಬೇಕಾಬಿಟ್ಟಿ ಆಂಟಿ ಎಂದು ಕರೆಯುವುದು ಇದೀಗ ಕಾನೂನು ಸಂಕಷ್ಟಕ್ಕೆ ದಾರಿ ಮಾಡಿಕೊಟ್ಟಿದೆ ಮತ್ತು ಲಕ್ಷಾಂತರ ರೂಪಾಯಿ ದಂಡ ತೆರುವಂತೆ ಮಾಡಿದೆ.
ಘಟನೆಯ ಹಿನ್ನೆಲೆ
ಈ ಆಸಕ್ತಿದಾಯಕ ಮತ್ತು ಎಚ್ಚರಿಕೆ ನೀಡುವ ಘಟನೆ ನಡೆದಿರುವುದು ಲಂಡನ್ ನಲ್ಲಿ. ಇಲ್ಲಿನ ರಾಷ್ಟ್ರೀಯ ಆರೋಗ್ಯ ಸೇವೆಯಲ್ಲಿ (NHS) ಆರೋಗ್ಯ ಸಹಾಯಕಿಯಾಗಿ ಕೆಲಸ ಮಾಡುತ್ತಿರುವ ಭಾರತೀಯ ಮೂಲದ 61 ವರ್ಷದ ಎಸ್ಟೀವ್ಸ್ ಎಂಬ ಮಹಿಳೆಗೆ ಅಲ್ಲಿನ ನರ್ಸ್ ಒಬ್ಬ ಪದೇ ಪದೇ ಆಂಟಿ ಎಂದು ಕರೆಯುತ್ತಿದ್ದ. ತನಗೆ ಈ ರೀತಿ ಕರೆಯುವುದು ಇಷ್ಟವಿಲ್ಲ, ಇದು ತನ್ನ ಘನತೆಗೆ ಧಕ್ಕೆ ತರುತ್ತದೆ ಎಂದು ಮಹಿಳೆ ಈ ಮೊದಲೇ ಆಕ್ಷೇಪ ವ್ಯಕ್ತಪಡಿಸಿದ್ದರು. ಆದರೂ ಆ ನರ್ಸ್ ತನ್ನ ಚಾಳಿಯನ್ನು ಮುಂದುವರಿಸಿದ್ದರಿಂದ ಬೇಸತ್ತ ಮಹಿಳೆ ನೇರವಾಗಿ ನ್ಯಾಯಾಲಯದ ಮೆಟ್ಟಿಲೇರಿದ್ದರು.
ವೃತ್ತಿಪರ ಸ್ಥಳದಲ್ಲಿ ಆಂಟಿ ಎನ್ನುವುದು ಕಿರುಕುಳಕ್ಕೆ ಸಮಾನ
ಲಂಡನ್ ನ ವ್ಯಾಟ್ಫೋರ್ಡ್ ಉದ್ಯೋಗ ನ್ಯಾಯಮಂಡಳಿಯಲ್ಲಿ ಈ ಪ್ರಕರಣದ ವಿಚಾರಣೆ ನಡೆಯಿತು. ನ್ಯಾಯಾಧೀಶರಾದ ಜಾರ್ಜ್ ಅಲಿಯಟ್ ಅವರ ನೇತೃತ್ವದ ಪೀಠವು ಈ ಪ್ರಕರಣವನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿತು. ಕೆಲಸದ ಸ್ಥಳದಲ್ಲಿ ಒಬ್ಬ ಮಹಿಳೆಯನ್ನು ಅವರ ಇಚ್ಛೆಗೆ ವಿರುದ್ಧವಾಗಿ ಆಂಟಿ ಎಂದು ಸಂಬೋಧಿಸುವುದು ವಯಸ್ಸು ಮತ್ತು ಲಿಂಗದ ಆಧಾರದ ಮೇಲೆ ನಡೆಯುವ ಕಿರುಕುಳ ಎಂದು ನ್ಯಾಯಮಂಡಳಿ ಅಭಿಪ್ರಾಯಪಟ್ಟಿದೆ. ಮಹಿಳೆಯ ಭಾವನೆಗಳಿಗೆ ದಕ್ಕೆಯುಂಟು ಮಾಡಿದ್ದಕ್ಕಾಗಿ ಸುಮಾರು 2 ಲಕ್ಷ ರೂಪಾಯಿಗಳಷ್ಟು (1,425 ಪೌಂಡ್) ಪರಿಹಾರವನ್ನು ನೀಡುವಂತೆ ವೆಸ್ಟ್ ಲಂಡನ್ ಎನ್ ಹೆಚ್ ಎಸ್ ಟ್ರಸ್ಟ್ ಗೆ ಆದೇಶ ನೀಡಿದೆ.
ಸಂಸ್ಕೃತಿಯ ಸಬೂಬು ಒಪ್ಪದ ನ್ಯಾಯಾಲಯ
ವಿಚಾರಣೆಯ ವೇಳೆ ಆಂಟಿ ಎಂದು ಕರೆದ ನರ್ಸ್ ಚಾರ್ಲ್ಸ್ ಒಪ್ಪೋಂಗ್ ವಿಚಿತ್ರ ಸಮರ್ಥನೆ ನೀಡಿದ್ದ. ತಾನು ಘಾನಾ ಮೂಲದವನಾಗಿದ್ದು, ತನ್ನ ಸಂಸ್ಕೃತಿಯಲ್ಲಿ ಹಿರಿಯರನ್ನು ಗೌರವದಿಂದ ಆಂಟಿ ಎಂದು ಕರೆಯಲಾಗುತ್ತದೆ ಎಂದು ಹೇಳಿದ್ದ. ಆದರೆ ಕೋರ್ಟ್ ಈ ವಾದವನ್ನು ತಳ್ಳಿಹಾಕಿತು. ವೃತ್ತಿಪರ ವಾತಾವರಣದಲ್ಲಿ ಸಹೋದ್ಯೋಗಿಯು ತನ್ನನ್ನು ಹಾಗೆ ಕರೆಯಬೇಡಿ ಎಂದು ವಿನಂತಿಸಿದ ಮೇಲೆಯೂ ಅದೇ ಪದ ಬಳಸುವುದು ಹಾಸ್ಯದ ಹೆಸರಿನಲ್ಲಿ ಮಾಡುವ ಆಕ್ರಮಣಕಾರಿ ವರ್ತನೆಯಾಗಿದೆ ಎಂದು ನ್ಯಾಯಾಧೀಶರು ತೀರ್ಪಿನಲ್ಲಿ ಉಲ್ಲೇಖಿಸಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ
ಈ ತೀರ್ಪು ಹೊರಬರುತ್ತಿದ್ದಂತೆ ಸೋಷಿಯಲ್ ಮೀಡಿಯಾದಲ್ಲಿ ದೊಡ್ಡ ಮಟ್ಟದ ಚರ್ಚೆ ಶುರುವಾಗಿದೆ. ಭಾರತದಲ್ಲೂ ಕೂಡ ವಯಸ್ಸಾದ ಪುರುಷರು ತಮಗಿಂತ ವಯಸ್ಸಿನಲ್ಲಿ ಚಿಕ್ಕವರಾದ ಮಹಿಳೆಯರನ್ನು ಆಂಟಿ ಎಂದು ಕರೆಯುವ ಪ್ರವೃತ್ತಿ ಇದೆ. ಇದು ಹಲವು ಮಹಿಳೆಯರಿಗೆ ಮುಜುಗರ ಮತ್ತು ಕೋಪ ತರಿಸುತ್ತದೆ. ಈ ಲಂಡನ್ ಕೋರ್ಟ್ ತೀರ್ಪು ಅಂತಹವರಿಗೆ ಒಂದು ಎಚ್ಚರಿಕೆಯ ಗಂಟೆಯಾಗಿದೆ. ಗೌರವ ಎಂಬುದು ಕೇವಲ ಪದಗಳಲ್ಲಲ್ಲ, ಎದುರಿಗಿರುವ ವ್ಯಕ್ತಿಯ ಇಷ್ಟ-ಕಷ್ಟಗಳನ್ನು ಗೌರವಿಸುವುದರಲ್ಲಿದೆ ಎಂಬುದು ಈ ಪ್ರಕರಣದಿಂದ ಸಾಬೀತಾಗಿದೆ.
ಹೀಗಾಗಿ ಇನ್ಮುಂದೆ ಯಾರನ್ನಾದರೂ ಆಂಟಿ ಎಂದು ಕರೆಯುವ ಮುನ್ನ ಅವರು ಅದಕ್ಕೆ ಸಮ್ಮತಿಸುತ್ತಾರೆಯೇ ಎಂಬುದನ್ನು ಗಮನಿಸುವುದು ಒಳಿತು, ಇಲ್ಲದಿದ್ದರೆ ಇಂತಹ ಕಾನೂನು ಸಂಕಷ್ಟಗಳು ಎದುರಾಗುವ ಸಾಧ್ಯತೆ ಇರುತ್ತದೆ.
