ನಿಜ.. ಇದು ಗೊತ್ತಿರುವ ವಿಚಾರವೇ. ಇಂಡಿಯನ್ ಪ್ರೀಮಿಯರ್ ಲೀಗ್ ಅಂದ್ರೆ ನೋಡುವುದಕ್ಕೆ ಮಾತ್ರ ಕ್ರಿಕೆಟ್ ಆಟ. ಆದ್ರೆ ಚೆಲ್ಲಾಟವಾಡುತ್ತಿರುವುದು ಬರೀ ದುಡ್ಡು… ದುಡ್ಡು..ದುಡ್ಡು..!
ಮೈದಾನ ಕ್ಲೀನ್ ಮಾಡುವ ಕಾರ್ಮಿಕನಿಂದ ಹಿಡಿದು ಐಪಿಎಲ್ ಫ್ರಾಂಚೈಸಿ ಮಾಲೀಕರ ತನಕ ಪ್ರತಿ ಹಂತದಲ್ಲೂ ಹರಿಯುತ್ತಿರುವುದು ಕುರುಡು ಕಾಂಚಾಣ. ಬೌಲರ್ಗಳ ಮಾರಣ ಹೋಮ.. ಬ್ಯಾಟರ್ಗಳ ಸಿಡಿಲಬ್ಬರÀ, ಅಭಿಮಾನಿಗಳ ಝೆಂಕಾರದ ನಡುವೆ ನಡೆಯುತ್ತಿರುವುದು ಸಾವಿರಾರು ಕೋಟಿಗಳ ವಹಿವಾಟು.
ಆಟಗಾರರಿಗೆ ಅವಕಾಶ, ಅಭಿಮಾನಿಗಳಿಗೆ ಜಾತ್ರೆ, ಜಾಹೀರಾತು ಲೋಕದಲ್ಲಿ ಪೈಪೋಟಿ, ಫ್ರಾಂಚೈಸಿ ಮಾಲೀಕರಿಗೆ ಗೌರವ, ಬಿಸಿಸಿಐಗೆ ಪ್ರತಿಷ್ಠೆಯ ಕಣವಾಗಿದೆ ಇಂಡಿಯನ್ ಪ್ರೀಮಿಯರ್ ಲೀಗ್.
ಕಳೆದ 19 ಆವೃತ್ತಿಯ ಐಪಿಎಲ್ ಟೂರ್ನಿಗಳಲ್ಲಿ ಒಟ್ಟು 1252 ಪಂದ್ಯಗಳನ್ನು ಆಡಲಾಗಿದೆ. ಒಟ್ಟು ದಾಖಲಾದ ರನ್ಗಳು ನಾಲ್ಕು ಲಕ್ಷಕ್ಕಿಂತಲೂ ಅಧಿಕ. ಸಿಡಿದ ಬೌಂಡರಿಗಳ ಸಂಖ್ಯೆ ಅಂದಾಜು 31,000. ಕುಣಿದು ಕುಪ್ಪಳಿಸುವಂತೆ ಮಾಡಿರುವ ಸಿಕ್ಸರ್ಗಳು 14,000ಕ್ಕೂ ಹೆಚ್ಚು. ಬಿದ್ದಿರುವ ವಿಕೆಟ್ಗಳು 13,000ಕ್ಕೂ ಜಾಸ್ತಿ. (ಇದು ಅಂದಾಜು ಲೆಕ್ಕ)
ಪ್ರತಿ ರನ್, ಪ್ರತಿ ಎಸೆತ, ಪ್ರತಿ ಬೌಂಡರಿ, ಪ್ರತಿ ಸಿಕ್ಸರ್, ಪ್ರತಿ ವಿಕೆಟ್ ಹೀಗೆ ಮೂರುವರೆ ಗಂಟೆಗಳ ಮಾಯಲೋಕದ ಕ್ರಿಕೆಟ್ ಪಂದ್ಯವನ್ನು ನೋಡುತ್ತಿದ್ದಾಗ ನಮಗೆ ಗೊತ್ತಿಲ್ಲದೆ ನಮ್ಮ ಜೇಬಿನ ಹಣ ಸೀದಾ ಹೋಗಿ ಬೀಳುವುದು ಐಪಿಎಲ್ ಎಂಬ ಹುಂಡಿಗೆ. ಆದ್ರೆ ಇದೇ ಐಪಿಎಲ್ ಟೂರ್ನಿ ಸಾವಿರಾರು ಜನರ ಬದುಕನ್ನು ಕಟ್ಟಿಕೊಡುತ್ತಿದೆ ಎಂಬುದು ಕೂಡ ಅಷ್ಟೇ ಸತ್ಯ.
ಹೌದು, ಐಪಿಎಲ್ ಟೂರ್ನಿ ಭಾರತೀಯ ಕ್ರಿಕೆಟ್ ಅನ್ನು ಉತ್ತುಂಗಕ್ಕೇರಿಸಿದೆ. ಅಲ್ಲದೆ ಕ್ರಿಕೆಟ್ ಜಗತ್ತನ್ನೇ ತನ್ನ ಹಿಡಿತದಲ್ಲಿಟ್ಟುಕೊಳ್ಳುವಂತೆ ಕೂಡ ಮಾಡಿಕೊಂಡಿದೆ. ಅಷ್ಟೇ ಅಲ್ಲ, ಯುವ ಆಟಗಾರರ ಪ್ರತಿಭೆಯನ್ನು ವಿಶ್ವ ಕ್ರಿಕೆಟ್ಗೆ ಪರಿಚಯಿಸಿದೆ. ಬಡತನದ ಬೇಗೆಯಲ್ಲಿದ್ದ ಅದೆಷ್ಟೋ ಯುವ ಕ್ರಿಕೆಟಿಗರ ಪಾಲಿಗೆ ಸಂಜೀವಿನಿಯೂ ಆಗಿದೆ. ಹಾಗೇ ಫ್ರಾಂಚೈಸಿ ಮಾಲೀಕರು ಹಾಕಿರುವ ದುಡ್ಡು ಕೂಡ ದುಪ್ಪಟ್ಟು ಆಗಿದೆ. (ಕೆಲವೊಂದು ಫ್ರಾಂಚೈಸಿ ಬಿಟ್ಟು)
ಇದೀಗ 2026ನೇ ಸಾಲಿನ ಐಪಿಎಲ್ ಫ್ರಾಂಚೈಸಿಗಳ ಮೌಲ್ಯ ಮಾಪನ ಹೊರಬಿದ್ದಿದೆ. ಫ್ಯಾನಾಟಿಕ್ ಸ್ಫೋಟ್ರ್ಸ್ ಹುರುನ್ ಇಂಡಿಯಾ ಮೋಸ್ಟ್ ವ್ಯಾಲ್ಯೂಯಬಲ್ ಸ್ಪೋಟ್ಸ್ ಟೀಮ್ಸ್ನ ವರದಿಯ ಪ್ರಕಾರ, ಶಾರೂಕ್ ಖಾನ್ ಒಡೆತದನ ಕೊಲ್ಕತ್ತಾ ನೈಟ್ ರೈಡರ್ಸ್ ಅಗ್ರಸ್ಥಾನ ಪಡೆದುಕೊಂಡಿದೆ. ಇದಕ್ಕೆ ಕಾರಣ ಜಾಗತಿಕ ಬಂಡವಾಳ ವಿಸ್ತರಣೆ ಮತ್ತು ವಿದೇಶಿ ಮಾರುಕಟ್ಟೆಯಲ್ಲಿ ಬಲವಾದ ಉಪಸ್ಥಿತಿ. ಕೆಕೆಆರ್ ತಂಡದ ಒಟ್ಟು ಮೌಲ್ಯ 19,200 – 22,500 ಕೋಟಿ.
ಇನ್ನು 2ನೇ ಸ್ಥಾನದಲ್ಲಿದೆ ಮುಂಬೈ ಇಂಡಿಯನ್ಸ್. ಐದು ಬಾರಿ ಚಾಂಪಿಯನ್ ಎಂಬ ಹೆಮ್ಮೆಯ ಜೊತೆಗೆ ರಿಲಯನ್ಸ್ ಸಂಸ್ಥೆಯ ಬ್ರ್ಯಾಂಡ್ನಿಂದಾಗಿ 18,400-21,700 ಕೋಟಿ ಮೌಲ್ಯವನ್ನು ಹೊಂದಿದೆ. ಹಾಗೇ ಚೆನ್ನೈ ಸೂಪರ್ ಕಿಂಗ್ಸ್ ಮೂರನೇ ಸ್ಥಾನ ಪಡೆದುಕೊಂಡಿದೆ. ಎಂ.ಎಸ್. ಧೋನಿ ಮತ್ತು ಬ್ರ್ಯಾಂಡ್ ನಿಷ್ಠೆಯ ಪರಿಣಾಮ ಸಿಎಸ್ಕೆ 18,400 – 20,700 ಕೋಟಿ ವ್ಯಾಲ್ಯೂ ಅನ್ನು ಹೊಂದಿದೆ. ಸನ್ ರೈಸರ್ಸ್ ಹೈದ್ರಬಾದ್ ತಂಡ 17,500-18,400 ಕೋಟಿಯ ಮೌಲ್ಯವನ್ನು ಹೊಂದಿದ್ದು ನಾಲ್ಕನೇ ಸ್ಥಾನದಲ್ಲಿದೆ.
ಆದ್ರೆ ಸತತ ಎರಡು ಬಾರಿ ಚಾಂಪಿಯನ್ ಪಟ್ಟಕ್ಕೇರಿರುವ ಆರ್ಸಿಬಿ ಐದನೇ ಸ್ಥಾನದಲ್ಲಿದೆ. ಸರಿಸಾಟಿ ಇಲ್ಲದ ಜಾಗತಿಕ ಬ್ರ್ಯಾಂಡ್ ಮತ್ತು ವಿರಾಟ್ ಕೊಹ್ಲಿಯ ಪವರ್ನಿಂದ ಆರ್ಸಿಬಿ 16,700 ಕೋಟಿ ಮೌಲ್ಯವನ್ನು ಹೊಂದಿದೆ. ದೆಹಲಿ ಕ್ಯಾಪಿಟಲ್ಸ್ ತಂಡ 16,600 -17,700 ಕೋಟಿ ಮೌಲ್ಯ ಹೊಂದಿದ್ರೆ, ರಾಜಸ್ತಾನ ರಾಯಲ್ಸ್ 15,700 ಕೋಟಿ, ಗುಜರಾತ್ ಟೈಟಾನ್ಸ್ 14,00 -15,800 ಕೋಟಿ, ಲಕ್ನೋ ಸೂಪರ್ ಜೈಂಟ್ಸ್ ತಂಡ 14,00-15,600 ಕೋಟಿ, ಪಂಜಾಬ್ ಕಿಂಗ್ಸ್ 12,700=15,400 ಕೋಟಿ ಮೌಲ್ಯವನ್ನು ಹೊಂದಿದೆ.
ಇನ್ನು ಆಟಗಾರನಾಗಿ ವಿರಾಟ್ ಕೊಹ್ಲಿ ಕಳೆದ 19 ಆವೃತ್ತಿಯ ಐಪಿಎಲ್ಗಳಿಂದ ಒಟ್ಟು 230 ಕೋಟಿ ಸಂಪಾದಿಸಿದ್ದಾರೆ. ಹಾಗೇ ರೋಹಿತ್ ಶರ್ಮಾ 227.2 ಕೋಟಿ ಹಾಗೂ ಮಹೇಂದ್ರ ಸಿಂಗ್ ಧೋನಿ 200 ಕೋಟಿ ಗಳಿಸಿದ್ದಾರೆ.
ಒಟ್ಟಾರೆ ಐಪಿಎಲ್ನಿಂದ ಬಿಸಿಸಿಐ ಮಾತ್ರ ಶ್ರೀಮಂತವಾಗಿಲ್ಲ. ಫ್ರಾಂಚೈಸಿ ಮಾಲೀಕರ ಜೇಬನ್ನು ತುಂಬಿಸಿದೆ. ಅದೇ ರೀತಿ ಆಟಗಾರರ ಬ್ಯಾಂಕ್ ಬ್ಯಾಲೆನ್ಸ್ ಅನ್ನು ಹೆಚ್ಚಿಸಿದೆ.
ಇದೆಲ್ಲಾ ಏನೇ ಇರಲಿ, ಒಂದಂತೂ ಸತ್ಯ. ಅತಿರೇಕದ ಕ್ರಿಕೆಟ್, ಕೇವಲ ಹಣದ ಅಬ್ಬರದಲ್ಲಿ ಅಸಲಿ ಆಟವನ್ನೇ ಕಳೆದುಕೊಳ್ಳುತ್ತಿದೆ. ಯಾಕಂದ್ರೆ ಟಿ-20 ಕ್ರಿಕೆಟ್ ಅನ್ನೋದು ಆಟದ ಬದಲು ಮನರಂಜನಾ ಪ್ರಾಡಕ್ಟ್ ಆಗಿದೆ.
ಸನತ್ ರೈ
