ಸಿಆರ್ & ಎಲ್‍ಎಂ..!
Related posts
ವಿಶ್ವ ಫುಟ್‍ಬಾಲ್ ಅಂಗಣದಲ್ಲಿ ಮಿಂಚಿನಂತೆ ಚಲಿಸುವ ಎರಡು ಅತ್ಯದ್ಭುತವಾದ ಮಾನವ ಯಂತ್ರಗಳು.
ಹೌದು, 1985 ಮಾಡೆಲ್, ಪೋರ್ಚ್‍ಗಲ್ ಬ್ರ್ಯಾಂಡ್, ಚಾಸಿಸ್ ನಂಬರ್ ಸಿಆರ್-07 ಇಂಜಿನ್. ಫುಟ್‍ಬಾಲ್ ಮೈದಾನದಲ್ಲಿ ಧೂಳೆಬ್ಬಿಸುತ್ತಿರುವುದನ್ನು ನೋಡಿದಾಗ, ರೇಸಿಂಗ್ ಟ್ರ್ಯಾಕ್‍ನಲ್ಲಿ ಚಿಮ್ಮುವ ಫೆರಾರಿ ಕಾರು ನೆನಪಿಗೆ ಬರುತ್ತದೆ. ಹಾಗೇ ಎಲ್‍ಎಂ ಇಂಜಿನ್ ಕೂಡ. 1987 ಮಾಡೆಲ್. ಅರ್ಜೆಂಟಿನಾ ಬ್ರ್ಯಾಂಡ್. ಚಾಸಿಸ್ ನಂಬರ್ ಎಲ್‍ಎಂ-10 ಇಂಜಿನ್. ಮೈದಾನದಲ್ಲಿ ಲವಲವಿಕೆಯಿಂದ ನವಿರಾಗಿ ಸಂಚರಿಸುವುದನ್ನು ನೋಡಿದಾಗ, ರಾಜಗಾಂಭೀರ್ಯದಿಂದ ರಸ್ತೆಯಲ್ಲಿ ಚಲಿಸುವ ರೋಲ್ಸ್ ರಾಯ್ಸ್ ಕಾರು ಕಣ್ಣೇದುರು ಬರುತ್ತದೆ. ಇದೊಂದು ಜಸ್ಟ್ ಕಲ್ಪನೆಯ ಹೋಲಿಕೆಯಷ್ಟೇ..!
ಆದ್ರೆ, ಕಳೆದ ಎರಡು ದಶಕಗಳಿಂದ ಫುಟ್‍ಬಾಲ್ ಮೈದಾನದಲ್ಲಿ ಸಿಆರ್ -7 ಮತ್ತು ಎಲ್‍ಎಂ-10 ಮಾಡಿರುವ ಸಂಚಲನ ನಿಜಕ್ಕೂ ಬೆರಗುಮೂಡಿಸುತ್ತದೆ. ಶಕ್ತಿ, ವೇಗ, ಆಕ್ರಮಣಕಾರಿ ಪ್ರವೃತ್ತಿಯೇ ಸಿಆರ್-7 ವೈಶಿಷ್ಟ್ಯ. ಯುಕ್ತಿ..ತಾಳ್ಮೆ, ನಿಖರತೆಯ ಕಲಾತ್ಮಕತೆಯ ನಡೆಯೇ ಎಲ್‍ಎಂ-10 ಆಕರ್ಷಣೆ.
ಅದೇನೇ ಕಲ್ಪನೆಯೇ ಇರಲಿ, ಒಂದಂತೂ ಸತ್ಯ. ಕ್ರಿಸ್ಟಿಯಾನೋ ರೋನಾಲ್ಡೊ ಮತ್ತು ಲಿಯೋನಲ್ ಮೆಸ್ಸಿ, ಆಧುನಿಕ ಫುಟ್‍ಬಾಲ್ ಜಗತ್ತಿನ ಎರಡು ಕಣ್ಣುಗಳಿದ್ದಂತೆ. ಅಷ್ಟೇ ಅಲ್ಲ, ಆಲ್ ಟೈಮ್ ಗ್ರೆಟೆಸ್ಟ್ ಪ್ಲೇಯರ್ ಅಂತ ಯಾರನ್ನು ಕರೆಯುವುದು ಅನ್ನೋದೇ ದೊಡ್ಡ ಕನ್‍ಫ್ಯೂಷನ್. ಮೆಸ್ಸಿ ಅಭಿಮಾನಿಗಳಿಗೆ ಮೆಸ್ಸಿಯೇ ಗ್ರೇಟ್.. ಕ್ರಿಸ್ಟಿ ಅಭಿಮಾನಿಗಳಿಗೆ ಕ್ರಿಸ್ಟಿಯೇ ಗ್ರೇಟ್. ಆದ್ರೆ ನಿಜವಾಗಿಯೂ ಯಾರು ಗ್ರೇಟ್ ಎಂಬುದಕ್ಕೆ ನಿಖರವಾದ ಉತ್ತರವಿಲ್ಲ. ಯಾಕಂದ್ರೆ ಇಬ್ಬರೂ ಕೂಡ ಎವರ್‍ಗ್ರೀನ್ ಪ್ಲೇಯರ್ಸ್. ಹಾಗಾಗಿ ಯಾರು ಗ್ರೇಟ್ ಎಂಬುದು ಅವರವರ ಭಾವಕ್ಕೆ ಬಿಟ್ಟಿರುವ ವಿಚಾರ.
ಫುಟ್‍ಬಾಲ್ ಆಟವನ್ನು ಮನಸಾರೆ ಪ್ರೀತಿಸುತ್ತಿರುವ ಮೆಸ್ಸಿ ಮತ್ತು ಕ್ರಿಸ್ಟಿಗೆ ಪ್ರಪಂಚದಲ್ಲಿ ಕೋಟ್ಯಾಂತರ ಅಭಿಮಾನಿಗಳಿದ್ದಾರೆ. ಅಭಿಮಾನಿಗಳ ನಡುವೆ ಸಂಘರ್ಷಗಳು ನಡೆದ್ರೂ ಮೆಸ್ಸಿ ಮತ್ತು ಕ್ರಿಸ್ಟಿ ಯಾವತ್ತೂ ಜಗಳ ಮಾಡಿಕೊಂಡವರಲ್ಲ. ಇಬ್ಬರ ನಡುವೆಯೂ ಪರಸ್ಪರ ಗೌರವ, ಸ್ನೇಹದ ಬಾಂಧವ್ಯವಿದೆ. ಮೈದಾನದಲ್ಲಿ ದಾಖಲೆ ಬರೆದ್ರೂ, ಪರಸ್ಪರ ವಿರುದ್ದವಾಗಿ ಆಡಿದ್ರೂ ಟೀಕೆ – ಟಿಪ್ಪಣಿ ಮಾಡಿದವರಲ್ಲ. ಮೆಸ್ಸಿಗೆ ಫುಟ್‍ಬಾಲ್ ಆಟ ಅಂದ್ರೆ ದೈವದತ್ತವಾಗಿ ಬಂದಿರುವ ಕಲೆ. ಆದ್ರೆ ಕ್ರಿಸ್ಟಿಯಾನೋ ರೋನಾಲ್ಡೊ ಕಠಿಣ ಪರಿಶ್ರಮದಿಂದ ಫುಟ್‍ಬಾಲ್ ಆಟವನ್ನು ಸಿದ್ಧಿಸಿಕೊಂಡಿರುವುದು. ಬಾಲ್ಯದಲ್ಲೇ ಇಬ್ಬರು ಅನಾರೋಗ್ಯಕ್ಕೊಳಗಾಗಿದ್ದರು. ಕ್ರಿಸ್ಟಿಯಾನೋಗೆ 15ರ ಹರೆಯದಲ್ಲಿ ಹೃದಯದ ಸಮಸ್ಯೆ ಕಾಡಿತ್ತು. ಹಾಗೇ ಮೆಸ್ಸಿ ತನ್ನ 11ರ ಹರೆಯದಲ್ಲಿ ಹಾರ್ಮೊನ್ ಸಮಸ್ಯೆಯಿಂದ ಬಳಲುತ್ತಿದ್ದ. ಇಬ್ಬರು ಕೂಡ ಆರೋಗ್ಯ ಸಮಸ್ಯೆ ಎದುರಿಸಿದ್ರೂ ಫುಟ್‍ಬಾಲ್ ಆಟ ಅವರಿಗೆ ಮರುಜನ್ಮವನ್ನೇ ನೀಡಿದೆ.
ನಿಜ, ಭೋರ್ಗರೆಯುವ ಕಡಲಿನ ಅಬ್ಬರದಂತೆ ಆಡುವ ಕ್ರಿಸ್ಟಿಯಾನೋ ಆಟ ಎಷ್ಟು ರೋಮಾಂಚನಗೊಳಿಸುತ್ತದೆಯೋ ಅದೇ ರೀತಿ, ಶಾಂತವಾಗಿ ವೈಯಾರದಿಂದ ದಡ ಸೇರುವ ಅಲೆಗಳಂತೆ ಮೆಸ್ಸಿ ಆಟವೂ ಕಣ್ಮನ ಸೆಳೆಯುತ್ತದೆ. ಮೆಸ್ಸಿ ಆಟದಲ್ಲಿ ತಾಳ್ಮೆ ಮತ್ತು ನೈಪುಣ್ಯತೆಯಿಂದ ಪಂದ್ಯ ಗೆಲ್ಲುವ ತಂತ್ರವಿದೆ. ಆದ್ರೆ ಕ್ರಿಸ್ಟಿಯಾನೋ ರೋನಾಲ್ಡೊ ಆಟದಲ್ಲಿ ಹಾಗಿಲ್ಲ. ವೇಗ ಮತ್ತು ಆಕ್ರಮಣಕಾರಿ ಪ್ರವೃತ್ತಿಯಿಂದ ಪಂದ್ಯ ಗೆಲ್ಲುವ ತಾಕತ್ತಿದೆ. ಮೆಸ್ಸಿ ಕಾಲ್ಚಳಕದಿಂದ ಎದುರಾಳಿ ಆಟಗಾರರನ್ನು ತಬ್ಬಿಬ್ಬುಗೊಳಿಸುತ್ತಾನೆ. ಹಾಗೇ ಅದ್ಭುತವಾದ ಪ್ಲೇಮೇಕರ್ ಕೂಡ ಹೌದು. ಆದ್ರೆ ಕ್ರಿಸ್ಟಿಯಾನೋ ಒಂಟಿ ಸಲಗ. ಮುನ್ನುಗ್ಗಿ ಎದುರಾಳಿ ಆಟಗಾರರನ್ನು ಬೆಚ್ಚಿಬೀಳಿಸಿ ಗೋಲು ಗಳಿಸುವ ರಣಬೇಟೆಗಾರ.
ಅಂದ ಹಾಗೇ, ಲಿಯೋನಾಲ್ ಮೆಸ್ಸಿ ಆಟದಲ್ಲಿ ಸಂಗೀತದ ನವರಸಗಳನ್ನು ಕಾಣಬಹುದು.. ಆದ್ರೆ ಕ್ರಿಸ್ಟಿಯಾನೋ ಆಟದಲ್ಲಿ ಯಕ್ಷಗಾನ ಕಲೆಯ ಏರುಪದಗಳ ರೌದ್ರರಸಗಳನ್ನು ನೋಡಬಹುದು. ಮೆಸ್ಸಿಯ ಆಟ ಅಂದ್ರೆ ಸುಲಲಿತವಾದ ಕಲೆಯ ದರ್ಶನ. ಆದ್ರೆ ಕ್ರಿಸ್ಟಿಯ ಆಟ ಅಂದ್ರೆ ಮೈದಾನದಲ್ಲಿ ಶಕ್ತಿಯ ಪ್ರದರ್ಶನ. ಮೆಸ್ಸಿ ಮೈದಾನದಲ್ಲಿ ಜಾಸ್ತಿ ಓಡಾಡಲ್ಲ. ಆದ್ರೆ ಕ್ರಿಸ್ಟಿ ಹಾಗಲ್ಲ. ಅಂಗಣದಲ್ಲಿ ಮಿಂಚಿನ ಸಂಚಾರವಿರುತ್ತದೆ. ಮೆಸ್ಸಿಯ ಕಾಲಿನ ಸ್ಪರ್ಶಕ್ಕೆ ಕಾಲ್ಚೆಂಡು ಕೂಡ ನಾಚಿ ನೀರಾಗುತ್ತದೆ. ಆದ್ರೆ ಕ್ರಿಸ್ಟಿಯ ಕಾಲಿಂದ ಒದೆ ತಿನ್ನುವ ಚೆಂಡು ಗಲಿಬಿಲಿಗೊಂಡು ಗೋಲು ಬಲೆಯ ದಾರಿ ಹುಡುಕುತ್ತಿರುತ್ತದೆ. ಮೆಸ್ಸಿ ಚೆಂಡಿನ ಜೊತೆಗೆ ಪ್ರೀತಿಯ ಸಂಭಾಷಣೆ ನಡೆಸಿದ್ರೆ, ಕ್ರಿಸ್ಟಿ ಚೆಂಡಿಗೆ ಆಜ್ಞೆ ಮಾಡುತ್ತಾನೆ. ಮೆಸ್ಸಿಯ ಆಟದಲ್ಲಿ ಸೊಬಗಿನ ಕಲಾತ್ಮಕತೆ ಇದ್ರೆ, ಕ್ರಿಸ್ಟಿಯಾನೋ ರೋನಾಲ್ಡೊ ಆಟದಲ್ಲಿ ಸಾಮಥ್ರ್ಯದ ಪರಾಕ್ರಮವಿದೆ.
ಫುಟ್‍ಬಾಲ್ ಲೀಗ್‍ನಲ್ಲಿ ಅಪ್ರತಿಮ ಸಾಹಸ ಮೆರೆದಿರುವ ಮೆಸ್ಸಿ ಮತ್ತು ಕ್ರಿಸ್ಟಿಯಾನೊ ಇದೀಗ ಫಿಫಾ ವಿಶ್ವಕಪ್‍ನಲ್ಲೂ ಅದ್ಭುತವಾದ ಪ್ರದರ್ಶನ ನೀಡುತ್ತಿದ್ದಾರೆ. ಇಬ್ಬರು ಕೂಡ ದಾಖಲೆಗಳ ಮೇಲೆ ದಾಖಲೆ ಬರೆಯುತ್ತಿದ್ದಾರೆ. ಫಿಫಾ ವಿಶ್ವಕಪ್‍ನಲ್ಲಿ ಗರಿಷ್ಠ ಗೋಲು ದಾಖಲಿಸಿದ್ದ ಹಿರಿಮೆ ಮೆಸ್ಸಿಯದ್ದು. ಅದೇ ರೀತಿ ಆಡಿರುವ ಆರು ವಿಶ್ವಕಪ್‍ನಲ್ಲೂ ಗೋಲು ಗಳಿಸಿದ್ದ ಏಕೈಕ ಆಟಗಾರ ಎಂಬ ಹೆಗ್ಗಳಿಕೆ ಕ್ರಿಸ್ಟಿಯಾನೋ ರೋನಾಲ್ಡೊನದ್ದು. ಫಿಫಾ ವಿಶ್ವಕಪ್ ಸೇರಿದಂತೆ ಮೆಸ್ಸಿ ಹಲವು ಟ್ರೋಫಿ, ಪ್ರಶಸ್ತಿಗಳನ್ನು ಗೆದ್ದುಕೊಂಡಿದ್ದಾನೆ. ಆದ್ರೆ ಕ್ರಿಸ್ಟಿಗೆ ಒಂದು ಕೊರಗು ಕಾಡುತ್ತಲೇ ಇದೆ. ಮೆಸ್ಸಿಗೆ ಸರಿಸಾಟಿಯಾಗಿ ಅನೇಕ ಪ್ರಶಸ್ತಿ, ಟ್ರೋಫಿ ಗೆದ್ದುಕೊಂಡ್ರೂ ಫಿಫಾ ವಿಶ್ವಕಪ್ ಟ್ರೋಫಿಯೊಂದು ಕ್ರಿಸ್ಟಿಯಾನೋ ಹೆಸರಿಗೆ ಅಂಟಿಕೊಂಡಿಲ್ಲ. 41ರ ಹರೆಯದಲ್ಲೂ ಫಿಟ್ ಆಂಡ್ ಫೈನ್ ಆಗಿರುವ ಕ್ರಿಸ್ಟಿಯಾನೊ ಮೊದಲ ಫಿಫಾ ವಿಶ್ವಕಪ್ ಗೆಲ್ಲುವ ತವಕದಲ್ಲಿದ್ರೆ, 39ರ ಹರೆಯದ ಮೆಸ್ಸಿ ಎರಡನೇ ಬಾರಿ ಪ್ರಶಸ್ತಿ ಗೆಲ್ಲುವ ಬಯಕೆಯಲ್ಲಿದ್ದಾನೆ.
ಅಂದ ಹಾಗೇ, ಮಹಾಭಾರತ ಯುದ್ಧದಲ್ಲಿ ಕರ್ಣ ಗೆಲ್ಲದಿರಬಹುದು. ಆದ್ರೆ ತನ್ನ ಸ್ವಂತ ಬಲ ಮತ್ತು ಸಾಮಥ್ರ್ಯದಿಂದ ತನಗೆ ಬೇಕಾದುದನ್ನು ಕರ್ಣ ಪಡೆದುಕೊಂಡಿದ್ದ. ಹಾಗೆ ಕ್ರಿಸ್ಟಿಯಾನೋ ರೋನಾಲ್ಡೊ ಕೂಡ. ಫಿಫಾ ವಿಶ್ವಕಪ್ ಗೆದ್ದಿಲ್ಲ ಬಿಟ್ರೆ (ಈ ಬಾರಿ ನೋಡೋಣ) ತಾನು ಏನು ಸಾಧಿಸಬೇಕೋ ಅದನ್ನು ಸಾಧಿಸಿದ್ದಾನೆ. ಕ್ರಿಸ್ಟಿ ಪಾಲಿಗೆ ಕಠಿಣ ಪರಿಶ್ರಮ, ಸ್ವಸಾಮಥ್ರ್ಯವೆ ಕವಚಕುಂಡಲವಾಗಿದೆ.
ಆದ್ರೆ ಮೆಸ್ಸಿ ಹಾಗಲ್ಲ. ನೈಜ ಪ್ರತಿಭೆಯಿಂದಲೇ ಎಲ್ಲವನ್ನೂ ಪಡೆದುಕೊಂಡಿದ್ದಾನೆ. ಹಕ್ಕಿಯ ಕಣ್ಣಿಗೆ ಬಾಣ ಬಿಡುವ ಅರ್ಜುನನಂತೆ ಎದುರಾಳಿ ಕೋಟೆಯ ಸಣ್ಣ ಜಾಗವನ್ನು ಗುರುತಿಸಿ ಗೋಲು ಹೊಡೆಯುವ ಕಲೆಯೇ ಮೆಸ್ಸಿಗೆ ಶ್ರೀರಕ್ಷೆಯಾಗಿದೆ.
ಒಟ್ಟಿನಲ್ಲಿ ಮೆಸ್ಸಿ ಮತ್ತು ಕ್ರಿಸ್ಟಿಯಾನೋ ಆಧುನಿಕ ಫುಟ್‍ಬಾಲ್‍ನಲ್ಲಿ ಸುವರ್ಣಯುಗ ಕಟ್ಟಿರುವ ಸರ್ವಶ್ರೇಷ್ಠ ಆಟಗಾರರು. ಹಾಗಾಗಿಯೇ ಸಿಆರ್ ಮತ್ತು ಎಲ್‍ಎಂ ಒಂದೇ ನಾಣ್ಯದ ಎರಡು ಮುಖಗಳು. ..!
ಸನತ್ ರೈ
saakshatv.com
