ಪುಣೆ: ಮಹಾರಾಷ್ಟ್ರದ ಲೋಹಗಢ ಕೋಟೆಯಲ್ಲಿ ನಡೆದ ಉದ್ಯಮಿ ಕೇತನ್ ಅಗರ್ವಾಲ್ ಕೊಲೆ ಪ್ರಕರಣದ ತನಿಖೆ ತೀವ್ರಗೊಂಡಂತೆ ಹಂತಕಿ ಹಾಗೂ ಭಾವಿ ಪತ್ನಿ ಸಿಯಾ ಗೋಯಲ್ ಕುರಿತಾದ ಅಚ್ಚರಿಯ ವಿಚಾರಗಳು ಹೊರಬರುತ್ತಿವೆ. ಪೊಲೀಸ್ ಕಸ್ಟಡಿಯಲ್ಲಿದ್ದರೂ ತನ್ನ ಹಳೇ ಚಟವನ್ನು ಬಿಡದ ಸಿಯಾ, ಲಾಕ್ ಅಪ್ ನಲ್ಲಿ ಪೊಲೀಸರ ಬಳಿ ಬಿಯರ್ ಹಾಗೂ ಮದ್ಯ ನೀಡುವಂತೆ ಬೇಡಿಕೆಯಿಟ್ಟಿದ್ದಾಳೆ ಎಂದು ವರದಿಗಳು ತಿಳಿಸಿವೆ.
ಲಾಕ್ ಅಪ್ ನಲ್ಲಿ ಬಿಯರ್ ಗಾಗಿ ಪಟ್ಟು
ಪುಣೆ ಪೊಲೀಸರ ವಶದಲ್ಲಿರುವ ಸಿಯಾ ಗೋಯಲ್ ಮದ್ಯಪಾನದ ಚಟಕ್ಕೆ ತೀವ್ರವಾಗಿ ಒಳಗಾಗಿದ್ದು, ವಿಚಾರಣೆ ವೇಳೆ ಪೊಲೀಸರ ಬಳಿ ಮದ್ಯ ಕೇಳಿ ಸತಾಯಿಸುತ್ತಿದ್ದಾಳೆ. 12ನೇ ತರಗತಿ ಫೇಲ್ ಆಗಿದ್ದ ಸಿಯಾ, ಬಹಳ ಹಿಂದಿನಿಂದಲೇ ಕುಡಿತ ಸೇರಿದಂತೆ ಹಲವು ಕೆಟ್ಟ ಅಭ್ಯಾಸಗಳನ್ನು ಹೊಂದಿದ್ದಳು. ಅಷ್ಟೇ ಅಲ್ಲದೆ ಈಕೆ ಏಕಕಾಲದಲ್ಲಿ ಹಲವು ಹುಡುಗರೊಂದಿಗೆ ಡೇಟಿಂಗ್ ಮಾಡುತ್ತಿದ್ದಳು ಎಂಬ ವಿಷಯವೂ ಈಗ ತನಿಖೆ ವೇಳೆ ಬೆಳಕಿಗೆ ಬಂದಿದೆ.
ಸೊಸೆಯ ಕುಡಿತದ ಬಗ್ಗೆ ಕೇತನ್ ತಾಯಿ ಆಕ್ರೋಶ
ಸಿಯಾ ಗೋಯಲ್ ಗೆ ಕುಡಿತದ ಚಟವಿರುವುದು ಆಕೆಯ ಹೆತ್ತವರಿಗೆ ತಿಳಿದಿತ್ತು. ಆದರೆ ಮದುವೆ ನಿಶ್ಚಯವಾಗುವಾಗ ಅವರು ಈ ವಿಚಾರವನ್ನು ನಮ್ಮಿಂದ ಮುಚ್ಚಿಟ್ಟಿದ್ದರು ಎಂದು ಮೃತ ಕೇತನ್ ತಾಯಿ ನೋವು ತೋಡಿಕೊಂಡಿದ್ದಾರೆ. ಸಿಯಾ ನಮ್ಮ ಮನೆಗೆ ಬಂದಿದ್ದಾಗ ನಮ್ಮ ಮನೆಯಲ್ಲಿ ಮದ್ಯಪಾನಕ್ಕೆ ಅವಕಾಶವಿಲ್ಲ ಹಾಗೂ ಪಾರ್ಟಿಗಳಿಗೆ ಹೋಗಲು ಬಿಡುವುದಿಲ್ಲ ಎಂದು ನಾನು ಮೊದಲೇ ಸ್ಪಷ್ಟವಾಗಿ ಹೇಳಿದ್ದೆ. ಆಕೆ ಇದನ್ನು ಪಾಲಿಸುತ್ತಿದ್ದಾಳೆ ಎಂದು ನಾವು ನಂಬಿದ್ದೆವು ಆದರೆ ಆಕೆ ನಮ್ಮ ಮಗನನ್ನೇ ಕೊಲ್ಲುತ್ತಾಳೆ ಎಂದು ಊಹಿಸಿರಲಿಲ್ಲ ಎಂದು ಅವರು ಹೇಳಿದ್ದಾರೆ.
ವಿಗ್ ಧರಿಸುತ್ತಿದ್ದ ಎಂಬ ಕಾರಣಕ್ಕೆ ಹತ್ಯೆ
ತನ್ನ ಭಾವಿ ಪತಿ ಕೇತನ್ ಅಗರ್ವಾಲ್ ತಲೆಗೆ ವಿಗ್ ಧರಿಸುತ್ತಿದ್ದ ಎಂಬ ವಿಷಯ ಸಿಯಾಗೆ ಇಷ್ಟವಿರಲಿಲ್ಲ. ಆದರೆ ಮದುವೆ ನಿಶ್ಚಯವಾದ ಮೇಲೆ ಅದನ್ನು ರದ್ದುಗೊಳಿಸಿ ಮನೆಯವರಿಗೆ ನೋವು ಕೊಡಲು ಇಷ್ಟವಿಲ್ಲದೆ, ಆತನನ್ನೇ ಮುಗಿಸಲು ನಿರ್ಧರಿಸಿದ್ದೆ ಎಂದು ಸಿಯಾ ವಿಚಾರಣೆ ವೇಳೆ ಸ್ಫೋಟಕ ಹೇಳಿಕೆ ನೀಡಿದ್ದಾಳೆ. ತನ್ನ ಪ್ರಿಯಕರ ಚೇತನ್ ಚೌಧರಿ ಜೊತೆ ಸೇರಿ ಲೋಹಗಢ ಕೋಟೆಯಲ್ಲಿ ಕೇತನ್ ನನ್ನು ಬರ್ಬರವಾಗಿ ಕೊಲೆ ಮಾಡಿದ್ದಳು. ಸದ್ಯ ಜೂನ್ 29ರವರೆಗೆ ಇಬ್ಬರೂ ಆರೋಪಿಗಳು ಪೊಲೀಸ್ ಕಸ್ಟಡಿಯಲ್ಲಿದ್ದಾರೆ.
