ಬೆಂಗಳೂರು: ನೈಸ್ ಯೋಜನೆ ಮತ್ತು ಭೂ ಅಕ್ರಮದ ವಿಚಾರವಾಗಿ ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಮತ್ತು ಕೇಂದ್ರ ಸಚಿವ ಹೆಚ್ ಡಿ ಕುಮಾರಸ್ವಾಮಿ ನಡುವಿನ ಸಮರ ಈಗ ಹೊಸ ತಿರುವು ಪಡೆದುಕೊಂಡಿದೆ. ಬೆಂಗಳೂರಿನ ಹೊಸಕೆರೆಹಳ್ಳಿಯಲ್ಲಿರುವ ಶೋಭಾ ಅಪಾರ್ಟ್ಮೆಂಟ್ ವಿಚಾರವನ್ನು ಮುನ್ನೆಲೆಗೆ ತಂದಿರುವ ಕುಮಾರಸ್ವಾಮಿ, ಈ ಯೋಜನೆಯ ಹಿಂದೆ ಡಿ ಕೆ ಶಿವಕುಮಾರ್ ಕುಟುಂಬದ ಹಿತಾಸಕ್ತಿ ಅಡಗಿದೆ ಎಂದು ಆಘಾತಕಾರಿ ಬಾಂಬ್ ಸಿಡಿಸಿದ್ದಾರೆ. ಈ ಮೂಲಕ ಸಿಎಂ ಮತ್ತು ಅವರ ಸಹೋದರ ಡಿ ಕೆ ಸುರೇಶ್ ಅವರನ್ನು ನೇರ ಹೊಣೆಗಾರರನ್ನಾಗಿ ಮಾಡಲು ಹೆಚ್ ಡಿಕೆ ಸಜ್ಜಾಗಿದ್ದಾರೆ.
ಸರಣಿ ಪ್ರಶ್ನೆಗಳ ಮೂಲಕ ಡಿಕೆಶಿ ಬ್ರದರ್ಸ್ ಗೆ ಇಕ್ಕಟ್ಟು
ತಮ್ಮ ಸಾಮಾಜಿಕ ಜಾಲತಾಣ ಎಕ್ಸ್ ಖಾತೆಯಲ್ಲಿ ಸರಣಿ ಪ್ರಶ್ನೆಗಳನ್ನು ಎಸೆದಿರುವ ಕುಮಾರಸ್ವಾಮಿ, ಹೊಸಕೆರೆಹಳ್ಳಿ ಟೋಲ್ ಬಳಿ ಇರುವ ಶೋಭಾ ಅಪಾರ್ಟ್ಮೆಂಟ್ ಗೂ ಡಿ ಕೆ ಶಿವಕುಮಾರ್ ಪರಿವಾರಕ್ಕೂ ಇರುವ ಸಂಬಂಧವೇನು ಎಂದು ಕೇಳಿದ್ದಾರೆ. ಈ ವ್ಯವಹಾರದಲ್ಲಿ ಕೇಳಿಬರುತ್ತಿರುವ ಅಮಾಸೆಗೌಡ, ಭಾಗ್ಯಲಕ್ಷ್ಮಿ ಮತ್ತು ಕೆಂಪೇಗೌಡ ಎನ್ನುವವರು ಯಾರು? ಇವರ ಮೂಲಕ ಮುಖ್ಯಮಂತ್ರಿಗಳು ತಮ್ಮ ಮತ್ತು ತಮ್ಮ ತಾಯಿಯ ಹೆಸರಿಗೆ ಈ ಭೂಮಿಯನ್ನು ಖರೀದಿಸಿದ್ದು ಹೇಗೆ? ಒಮ್ಮೆ ಸರ್ಕಾರಿ ಯೋಜನೆಗೆ ನೋಟಿಫೈ ಆಗಿದ್ದ ಜಮೀನನ್ನು ಇವರು ವೈಯಕ್ತಿಕವಾಗಿ ಖರೀದಿಸಲು ಹೇಗೆ ಸಾಧ್ಯವಾಯಿತು ಎಂದು ಅವರು ಕೆದಕಿದ್ದಾರೆ.
ಸಿದ್ದಗಂಗಾ ಮಠಕ್ಕೆ ಸಿಗದ ಎನ್ ಒ ಸಿ ಇವರಿಗೆ ಸಿಕ್ಕಿದ್ದು ಹೇಗೆ?
ಕುಮಾರಸ್ವಾಮಿ ಅವರ ಟೀಕೆಯಲ್ಲಿ ಅತಿ ಮುಖ್ಯ ಅಂಶವೆಂದರೆ ತಾರತಮ್ಯದ ಆರೋಪ. ನೈಸ್ ಯೋಜನೆಗಾಗಿ ಸ್ವಾಧೀನಪಡಿಸಿಕೊಂಡ ಭೂಮಿಯ ಅಕ್ಕಪಕ್ಕದಲ್ಲಿರುವ ಜಮೀನುಗಳಿಗೆ ಸಾರ್ವಜನಿಕರಿಗೆ ಅಥವಾ ಬಡವರಿಗೆ ನೈಸ್ ಕಂಪನಿಯು ನಿರಾಕ್ಷೇಪಣಾ ಪತ್ರ ಅಥವಾ ಎನ್ ಒ ಸಿ ನೀಡಿಲ್ಲ. ಅಷ್ಟೇ ಏಕೆ, ಪವಿತ್ರ ಸಿದ್ದಗಂಗಾ ಮಠದಂತಹ ಸಂಸ್ಥೆಗಳಿಗೂ ಎನ್ ಒ ಸಿ ನಿರಾಕರಿಸಲಾಗಿದೆ. ಇಂತಹ ಸಂದರ್ಭದಲ್ಲಿ ಡಿ ಕೆ ಶಿವಕುಮಾರ್ ಕುಟುಂಬಕ್ಕೆ ಮಾತ್ರ ಸುಲಭವಾಗಿ ಎನ್ ಒ ಸಿ ಸಿಕ್ಕಿದ್ದು ಹೇಗೆ? ಈ ಅಪಾರ್ಟ್ಮೆಂಟ್ ಮೂಲಕ ಸುಮಾರು 2,000 ಕೋಟಿ ರೂಪಾಯಿ ಮೌಲ್ಯದ ಆಸ್ತಿಯನ್ನು ಮಾಡಲಾಗಿದೆ ಎಂದು ಕುಮಾರಸ್ವಾಮಿ ಆರೋಪ ಮಾಡಿದ್ದಾರೆ.
ಬೆದರಿಸಿ ಭೂಮಿ ಕಸಿದುಕೊಂಡ ಗಂಭೀರ ಆರೋಪ
ನೈಸ್ ರಸ್ತೆಯ ಸುತ್ತಮುತ್ತಲಿನ ಸುಮಾರು 200 ರಿಂದ 300 ಎಕರೆ ಭೂಮಿಯನ್ನು ಮುಖ್ಯಮಂತ್ರಿಗಳು ಮತ್ತು ಅವರ ಪರಿವಾರದವರು ಅನ್ಯಾಯದ ಮಾರ್ಗದಲ್ಲಿ ಕಸಿದುಕೊಂಡಿದ್ದಾರೆ ಎಂದು ಕುಮಾರಸ್ವಾಮಿ ದೂರಿದ್ದಾರೆ. ರೈತರನ್ನು ಮತ್ತು ಮೂಲ ಮಾಲೀಕರನ್ನು ಹೆದರಿಸಿ, ಬೆದರಿಸಿ ಅವರ ಭೂಮಿಯನ್ನು ಕಿತ್ತುಕೊಳ್ಳಲಾಗಿದೆ. ಅಧಿಕಾರದ ಬಲ ಬಳಸಿ ಬಡವರ ಹೊಟ್ಟೆ ಮೇಲೆ ಹೊಡೆದು ಬೃಹತ್ ಆಸ್ತಿ ಸಾಮ್ರಾಜ್ಯ ಕಟ್ಟಲಾಗಿದೆ ಎಂದು ಅವರು ಕಿಡಿಕಾರಿದ್ದಾರೆ. ಕುಮಾರಸ್ವಾಮಿ ಅವರ ಈ ಆರೋಪಗಳು ಈಗ ರಾಜ್ಯ ರಾಜಕಾರಣದಲ್ಲಿ ಬಿರುಗಾಳಿ ಎಬ್ಬಿಸಿದ್ದು, ಡಿ ಕೆ ಶಿವಕುಮಾರ್ ಈ ಬಗ್ಗೆ ಯಾವ ರೀತಿ ಪ್ರತಿಕ್ರಿಯಿಸುತ್ತಾರೆ ನೋಡಬೇಕು.
