ನ್ಯೂಯಾರ್ಕ್: ಅಂತರಾಷ್ಟ್ರೀಯ ವೇದಿಕೆಗಳಲ್ಲಿ ಪದೇ ಪದೇ ಭಾರತದ ವಿರುದ್ಧ ಸುಳ್ಳು ಆರೋಪಗಳನ್ನು ಮಾಡುತ್ತಾ ಕುಚೇಷ್ಟೆ ಮೆರೆಯುವ ಪಾಕಿಸ್ತಾನಕ್ಕೆ ವಿಶ್ವಸಂಸ್ಥೆಯ ಅಂಗಳದಲ್ಲೇ ಭಾರತ ಮುಟ್ಟಿ ನೋಡಿಕೊಳ್ಳುವಂತೆ ತಿರುಗೇಟು ನೀಡಿದೆ. ಧಾರ್ಮಿಕ ಸ್ವಾತಂತ್ರ್ಯ ಮತ್ತು ಅಲ್ಪಸಂಖ್ಯಾತರ ಹಕ್ಕುಗಳ ಬಗ್ಗೆ ನವದೆಹಲಿಗೆ ಉಪದೇಶ ನೀಡಲು ಹೊರಟಿದ್ದ ಇಸ್ಲಾಮಾಬಾದ್ ಗೆ, ಭಾರತದ ರಾಜತಾಂತ್ರಿಕ ಅಧಿಕಾರಿ ಭವಿಕಾ ಮಂಗಲಾನಂದನ್ ಅವರು ಪಾಕಿಸ್ತಾನದ ನೈತಿಕ ಹಕ್ಕನ್ನೇ ಪ್ರಶ್ನಿಸುವ ಮೂಲಕ ತಕ್ಕ ಶಾಸ್ತಿ ಮಾಡಿದ್ದಾರೆ. ಅಲ್ಪಸಂಖ್ಯಾತರ ಮೇಲೆ ನಿರಂತರ ದೌರ್ಜನ್ಯ ಎಸಗುತ್ತಿರುವ ಪಾಕಿಸ್ತಾನಕ್ಕೆ ಭಾರತದ ಆಂತರಿಕ ವಿಷಯಗಳ ಬಗ್ಗೆ ಮಾತನಾಡುವ ಅರ್ಹತೆಯೇ ಇಲ್ಲ ಎಂದು ಅವರು ಗುಡುಗಿದ್ದಾರೆ.
ಕಾರ್ಗಿಲ್ ಸಮರದ ಇತಿಹಾಸ ನೆನಪಿಸಿ ಪಾಕ್ ಗೆ ಕಪಾಳಮೋಕ್ಷ
Related posts
ವಿಶ್ವಸಂಸ್ಥೆಯ ಸಂವಾದದಲ್ಲಿ ಪಾಕಿಸ್ತಾನದ ಬಣ್ಣ ಬಯಲು ಮಾಡಿದ ಭವಿಕಾ ಮಂಗಲಾನಂದನ್, 1999ರ ಕಾರ್ಗಿಲ್ ಯುದ್ಧದ ಘಟನೆಯನ್ನು ನೆನಪಿಸಿ ಇಡೀ ವಿಶ್ವದ ಎದುರು ಪಾಕಿಸ್ತಾನ ತಲೆತಗ್ಗಿಸುವಂತೆ ಮಾಡಿದರು. ಯುದ್ಧದಲ್ಲಿ ಮಡಿದ ತನ್ನದೇ ದೇಶದ ಸೈನಿಕರ ಮೃತದೇಹಗಳನ್ನು ಸ್ವೀಕರಿಸಲು ನಿರಾಕರಿಸಿದ ಹೇಡಿ ದೇಶ ಪಾಕಿಸ್ತಾನ. ಅಂದು ಆ ಮೃತ ಸೈನಿಕರಿಗೆ ಭಾರತೀಯ ಸೇನೆಯೇ ಪೂರ್ಣ ಸೇನಾ ಗೌರವಗಳೊಂದಿಗೆ ಅಂತ್ಯಸಂಸ್ಕಾರ ನಡೆಸಿತ್ತು. ಸ್ವಂತ ಸೈನಿಕರ ಶವವನ್ನೇ ಕಸದಂತೆ ಕಂಡವರಿಗೆ ಮಾನವ ಹಕ್ಕುಗಳ ಬಗ್ಗೆ ಮಾತನಾಡುವ ನೈತಿಕತೆ ಎಲ್ಲಿದೆ ಎಂದು ಅವರು ಪ್ರಶ್ನಿಸಿದರು. ಭಯೋತ್ಪಾದನೆಯ ಸಂತ್ರಸ್ತರ ಹಕ್ಕುಗಳಿಗಿಂತ ಉಗ್ರರ ಶವಸಂಸ್ಕಾರದ ಹಕ್ಕುಗಳು ಮುಖ್ಯವಾಗಬಾರದು ಎಂದು ವರದಿಯಲ್ಲಿನ ಲೋಪಗಳನ್ನು ಅವರು ಎತ್ತಿ ತೋರಿಸಿದರು.
ಸಿಂಧ್ ಪ್ರಾಂತ್ಯದ ಹಿಂದೂ ಬಾಲಕಿಯರ ಕಣ್ಣೀರಿಗೆ ಭಾರತದ ಧ್ವನಿ
ಪಾಕಿಸ್ತಾನದ ಸಿಂಧ್ ಪ್ರಾಂತ್ಯದಲ್ಲಿ ಅಲ್ಪಸಂಖ್ಯಾತ ಹಿಂದೂ ಮತ್ತು ಕ್ರಿಶ್ಚಿಯನ್ ಬಾಲಕಿಯರನ್ನು ಅಪಹರಿಸಿ, ಬಲವಂತವಾಗಿ ಮತಾಂತರ ಮಾಡಿ ಮದುವೆ ಮಾಡುತ್ತಿರುವ ಶೋಚನೀಯ ಸ್ಥಿತಿಯನ್ನು ಭಾರತ ಬಲವಾಗಿ ಪ್ರಸ್ತಾಪಿಸಿತು. ಪಾಕಿಸ್ತಾನದಲ್ಲಿ ಅಲ್ಪಸಂಖ್ಯಾತರ ಸಂಖ್ಯೆ ದಿನೇ ದಿನೇ ಕ್ಷೀಣಿಸುತ್ತಿರುವುದು ಜಾಗತಿಕ ಮಟ್ಟದ ಕಳವಳಕ್ಕೆ ಕಾರಣವಾಗಬೇಕು ಎಂದು ಪ್ರತಿಪಾದಿಸಿತು. ಭಾರತಕ್ಕೆ ಬುದ್ಧಿ ಹೇಳುವ ಮೊದಲು ಪಾಕಿಸ್ತಾನ ಆಕ್ರಮಿತ ಜಮ್ಮು ಮತ್ತು ಕಾಶ್ಮೀರದ ರಾವಲಾಕೋಟ್ ನಂತಹ ಪ್ರದೇಶಗಳಲ್ಲಿನ ಮಾನವ ಹಕ್ಕುಗಳ ದಮನವನ್ನು ನಿಲ್ಲಿಸಿ ಎಂದು ಭವಿಕಾ ಮಂಗಲಾನಂದನ್ ಕಿಡಿಕಾರಿದರು.
ವಿಶ್ವಸಂಸ್ಥೆಯ ವರದಿಯಲ್ಲಿದ್ದ ತಾರತಮ್ಯಕ್ಕೆ ಚಾಟಿ
ಕೋವಿಡ್ 19 ಸಾಂಕ್ರಾಮಿಕದ ಸಮಯದಲ್ಲಿನ ಧಾರ್ಮಿಕ ತಾರತಮ್ಯದ ಕುರಿತಾದ ವಿಶ್ವಸಂಸ್ಥೆಯ ವರದಿಯು ಕೇವಲ ಅಭಿವೃದ್ಧಿಶೀಲ ರಾಷ್ಟ್ರಗಳನ್ನು ಗುರಿಯಾಗಿಸಿಕೊಂಡಿದೆ ಎಂದು ಭಾರತ ಆಕ್ಷೇಪ ವ್ಯಕ್ತಪಡಿಸಿತು. ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳಲ್ಲಿನ ಇದೇ ರೀತಿಯ ಸಮಸ್ಯೆಗಳನ್ನು ವರದಿಯು ಉದ್ದೇಶಪೂರ್ವಕವಾಗಿ ನಿರ್ಲಕ್ಷಿಸಿದೆ ಎಂದು ಟೀಕಿಸಿತು. ಭಯೋತ್ಪಾದನೆಯ ತವರೂರು ಎನಿಸಿಕೊಂಡಿರುವ ಪಾಕಿಸ್ತಾನವು ಮಾನವ ಹಕ್ಕುಗಳ ರಕ್ಷಕನಂತೆ ನಟಿಸುವುದು ಅಕ್ಷರಶಃ ಹಾಸ್ಯಾಸ್ಪದ ಎಂದು ಸಾರುವ ಮೂಲಕ ಭಾರತವು ವಿಶ್ವಸಂಸ್ಥೆಯಲ್ಲಿ ತನ್ನ ಅಧಿಪತ್ಯವನ್ನು ಸ್ಥಾಪಿಸಿತು.
