ಐಪಿಎಲ್ ನಲ್ಲಿ ಸ್ಥಿರ ಪ್ರದರ್ಶನ ನೀಡಿದ್ದ ಟಾಪ್ -5 ಬ್ಯಾಟ್ಸ್ ಮೆನ್ ಗಳು ಯಾರ್ಯಾರು ?
ಐಪಿಎಲ್ ಆಗಲಿ ಟಿ-ಟ್ವೆಂಟಿ ಕ್ರಿಕೆಟ್ ಆಗಲಿ.. ಅದು ಹೊಡಿಬಡಿ ಆಟ. ಇಲ್ಲಿ ಕ್ರಿಕೆಟ್ ನ ಗ್ರಾಮರ್ ಗಳು ಲೆಕ್ಕಕ್ಕಿಲ್ಲ. ಹೇಗೆ ಆಡುತ್ತೇವೆ ಅನ್ನೋದು ಮುಖ್ಯವಲ್ಲ. ರನ್ ಗಳು ನೀರಿನಂತೆ ಹರಿದು ಬರಬೇಕು. ಹಾಗಾಗಿಯೇ ಐಪಿಎಲ್ ನಲ್ಲಿ ಚಿತ್ರ ವಿಚಿತ್ರ ಶೈಲಿಯ ಹೊಡೆತಗಳನ್ನು ನೋಡಬಹುದಾಗಿದೆ. ಕೆಲವೊಂದು ಬಾರಿ ಐಪಿಎಲ್ ಪಂದ್ಯಗಳನ್ನು ನೋಡಿದಾಗ ಗಲ್ಲಿ ಕ್ರಿಕೆಟ್ ಕೂಡ ನೆನಪಾಗಿಬಿಡುತ್ತೆ.
ಹಾಗಂತ ಐಪಿಎಲ್ ನಲ್ಲಿ ಮನಸ್ಸಿಗೆ ಬಂದ ಹಾಗೇ ಆಡುವಂತಿಲ್ಲ. ಸಂಯಮ, ತಾಳ್ಮೆ, ಜವಾಬ್ದಾರಿ, ಪ್ಲಾನ್ ಮಾಡಿಕೊಂಡು ಆಡಬೇಕಾಗುತ್ತೆ. ಹಾಗೇ ಸ್ಥಿರ ಪ್ರದರ್ಶನವನ್ನು ನೀಡಬೇಕಾಗುತ್ತೆ. ಕಳೆದ 12 ವರ್ಷಗಳಲ್ಲಿ ಐಪಿಎಲ್ ಟೂರ್ನಿಯಲ್ಲಿ 500ಕ್ಕೂ ಹೆಚ್ಚು ಬ್ಯಾಟ್ಸ್ ಮೆನ್ ಗಳು ಬ್ಯಾಟ್ ಬೀಸಿದ್ದಾರೆ. ಆದ್ರೆ ಇಲ್ಲಿ ಸ್ಥಿರ ಬ್ಯಾಟಿಂಗ್ ಪ್ರದರ್ಶನ ನೀಡಿದವರ ಸಂಖ್ಯೆ ತೀರಾ ಕಮ್ಮಿ ಇದೆ. ಆದ್ರೂ ಕೂಡ ಕಳೆದ 12 ವರ್ಷಗಳಲ್ಲಿ ಸರಾಸರಿಗೆ ತಕ್ಕಂತೆ ಸ್ಥಿರ ಬ್ಯಾಟಿಂಗ್ ನೀಡಿರುವ ಟಾಪ್ -5 ಬ್ಯಾಟ್ಸ್ ಮೆನ್ ಗಳಲ್ಲಿ ಇಬ್ಬರು ಭಾರತೀಯ ಬ್ಯಾಟ್ಸ್ ಮೆನ್ ಗಳಿದ್ದಾರೆ. ಅಚ್ಚರಿಯಂದ್ರೆ ಇಬ್ಬರು ಕೂಡ ವಿಕೆಟ್ ಕೀಪರ್ ಬ್ಯಾಟ್ಸ್ ಮೆನ್ ಗಳು. ಇನ್ನುಳಿದ ಮೂವರು ವಿದೇಶಿ ಆಟಗಾರರು.
ಶಾನ್ ಮಾರ್ಶ್, ಡೇವಿಡ್ ವಾರ್ನರ್, ರಿಷಬ್ ಪಂತ್, ಮಹೇಂದ್ರ ಸಿಂಗ್ ಧೋನಿ ಮತ್ತು ಸ್ಟೀವನ್ ಸ್ಮಿತ್ ಅವರು ಟಾಪ್ -5 ನಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಐದು ಬ್ಯಾಟ್ಸ್ ಮೆನ್ ಗಳ ಅಂಕಿ ಅಂಶಗಳ ಪ್ರಕಾರವೇ ಅವರಿಗೆ ರೇಟಿಂಗ್ ಗಳನ್ನು ನೀಡಲಾಗಿದೆ.
ಟಾಪ್ -1 ಶಾನ್ ಮಾರ್ಶ್
ಶಾನ್ ಮಾರ್ಶ್ ಅವರು 2008ರಲ್ಲಿ ಐಪಿಎಲ್ ಆಡಿದ್ದರು. ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಪರ ಆಡಿದ್ದರು. ಆಡಿರುವ ಇನಿಂಗ್ಸ್ ಗಳು – 69, ದಾಖಲಿಸಿರುವ ರನ್ ಗಳು – 2477, ಸರಾಸರಿ – 40, ಸ್ಟ್ರೈಕ್ ರೇಟ್ -132.7, ಸ್ಥಿರ ಪ್ರದರ್ಶನ – 56.5%. ಶಾನ್ ಮಾರ್ಶ್ ಅವರು 2008ರ ಆವೃತ್ತಿಯಲ್ಲಿ ಆರೆಂಜ್ ಕ್ಯಾಪ್ ಪಡೆದುಕೊಂಡಿದ್ದರು.
ಟಾಪ್ -2 ಡೇವಿಡ್ ವಾರ್ನರ್
ಸದ್ಯ ಸನ್ ರೈಸರ್ಸ್ ಹೈದ್ರಬಾದ್ ತಂಡದ ನಾಯಕ. ಐಪಿಎಲ್ ನಲ್ಲಿ ಒಟ್ಟು ಆಡಿರುವ ಪಂದ್ಯಗಳು – 126, ದಾಖಲಿಸಿರುವ ರನ್ ಗಳು – 4706, ಸರಾಸರಿ =43.2, ಸ್ಟ್ರೈಕ್ ರೇಟ್ – 142.4. ಸ್ಥಿರ ಪ್ರದರ್ಶನ – 54%
2009ರ ಐಪಿಎಲ್ ನಲ್ಲಿ ಡೇವಿಡ್ ವಾರ್ನರ್ ಅವರು ಡೆಲ್ಲಿ ಡೇರ್ ಡೇವಿಲ್ಸ್ ತಂಡದ ಪರ ಆಡಿದ್ದರು. ಬಳಿಕ 2014ರಿಂದ ಸನ್ ರೈಸರ್ಸ್ ಹೈದ್ರಬಾದ್ ತಂಡದ ಪರ ಆಡುತ್ತಿದ್ದಾರೆ. ಮೊದಲ ಆರು ಆವೃತ್ತಿಗಳಲ್ಲಿ ವಾರ್ನರ್ ಡಿಡಿ ಪರ 55 ಇನಿಂಗ್ಸ್ ಗಳನ್ನು ಆಡಿದ್ದು ದಾಖಲಿಸಿದ್ದ ರನ್ ಗಳು 1435.
ಬಳಿಕ ಹೈದ್ರಬಾದ್ ಸನ್ ರೈಸರ್ಸ್ ತಂಡದ ಪರ 71 ಇನಿಂಗ್ಸ್ ಗಳಲ್ಲಿ 3271 ರನ್ ಗಳಿಸಿದ್ದಾರೆ. ಮೂರು ಬಾರಿ ಆರೆಂಜ್ ಕ್ಯಾಪ್ ಗಿಟ್ಟಿಸಿಕೊಂಡಿದ್ದಾರೆ.
ಟಾಪ್ -3 ರಿಷಬ್ ಪಂತ್
ರಿಷಬ್ ಪಂತ್.. ಟಾಪ್ -3 ಅಂದಾಗ ಅಚ್ಚರಿಯಾಗಬಹುದು. ಟೀಮ್ ಇಂಡಿಯಾದಲ್ಲಿ ಸ್ಥಿರ ಪ್ರದರ್ಶನ ನೀಡಲು ವಿಫಲರಾಗಿದ್ದಾರೆ. ಆದ್ರೆ ಐಪಿಎಲ್ ನಲ್ಲಿ ಸ್ಥಿರ ಪ್ರದರ್ಶನ ನೀಡುತ್ತಿದ್ದಾರೆ. ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಆಟಗಾರನಾಗಿರುವ ರಿಷಬ್ ಪಂತ್, ಕಳೆದ ನಾಲ್ಕು ವರ್ಷಗಳಿಂದ ಐಪಿಎಲ್ ನಲ್ಲಿ ಆಡುತ್ತಿದ್ದಾರೆ. 2017ರ ಐಪಿಎಲ್ ಬಳಿಕ ರಿಷಬ್ ಪಂತ್ ಮುಂಚೂಣಿಗೆ ಬಂದಿದ್ದಾರೆ.
ರಿಷಬ್ ಪಂತ್ ಆಡಿರುವ ಇನಿಂಗ್ಸ್ ಗಳು 54, ದಾಖಲಿಸಿರುವ ರನ್ ಗಳು 1736, ಸರಾಸರಿ 36.2, ಸ್ಟ್ರೈಕ್ ರೇಟ್ 162.7, ಸ್ಥಿರ ಪ್ರದರ್ಶನ -52.8%
ಕಳೆದ ಮೂರು ವರ್ಷಗಳ ಐಪಿಎಲ್ ಟೂರ್ನಿಗಳಲ್ಲಿ ರಿಷಬ್ ಪಂತ್ ಗರಿಷ್ಠ ರನ್ ದಾಖಲಿಸಿದ್ದ ಆಟಗಾರನಾಗಿದ್ದಾರೆ. ಒಟ್ಟು 1534 ರನ್ ಗಳಿಸಿದ್ದಾರೆ. 2018ರ ಐಪಿಎಲ್ ನಲ್ಲಿ ಪಂತ್ ರನ್ ಗಳ ಸುರಿಮಳೆಗೈದಿದ್ದಾರೆ. ಸನ್ ರೈಸರ್ಸ್ ಹೈದ್ರಬಾದ್ ತಂಡದ ವಿರುದ್ಧ ಅಜೇಯ 128 ರನ್ ಸಿಡಿಸಿದ್ದಾರೆ.
https://youtu.be/BH8knlOnbKs?t=2
ಟಾಪ್ -4 ಮಹೇಂದ್ರ ಸಿಂಗ್ ಧೋನಿ
ಮಹೇಂದ್ರ ಸಿಂಗ್ ಧೋನಿ.. ಕೂಲ್ ಕ್ಯಾಪ್ಟನ್.. ಬೆಸ್ಟ್ ಫಿನೀಶರ್. ಐಪಿಎಲ್ ಟೂರ್ನಿಯಲ್ಲಿ ಸಿಎಸ್ಕೆ ತಂಡದ ನಾಯಕ (ಎರಡು ಬಾರಿ ಆರ್ಪಿಎಸ್) ಹೊರತುಪಡಿಸಿ), ಮೂರು ಬಾರಿ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿರುವ ಸಾಧನೆ ಧೋನಿ ಮೇಲಿದೆ.
ಧೋನಿ ಒಟ್ಟು ಆಡಿರುವ ಇನಿಂಗ್ಸ್ ಗಳು -170, ದಾಖಲಿಸಿರುವ ರನ್ ಗಳು – 4432, ಸರಾಸರಿ 42.2, ಸ್ಟ್ರೈಕ್ ರೇಟ್ – 137.9, ಸ್ಥಿರ ಪ್ರದರ್ಶನ -51.6%. 65 ಬಾರಿ ನಾಟೌಟ್ ಆಗಿ ಉಳಿದಿದ್ದಾರೆ. ಇನ್ನು ಗರಿಷ್ಠ ಸಿಕ್ಸರ್ ಸಿಡಿಸಿದ್ದ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ.
ಟಾಪ್-5- ಸ್ಟೀವನ್ ಸ್ಮಿತ್
ವಿಶ್ವ ಕ್ರಿಕೆಟ್ ನ ಅಪ್ರತಿಮ ಕ್ರಿಕೆಟಿಗ ಸ್ಟೀವನ್ ಸ್ಮಿತ್. ಬಾಲ್ ಟೆಂಪರಿಂಗ್ ವಿಚಾರದಲ್ಲಿ ಒಂದು ವರ್ಷ ನಿಷೇಧ ಅನುಭವಿಸಿದ್ದರು. 2012ರಿಂದ ಸ್ಟೀವನ್ ಸ್ಮಿತ್ ಐಪಿಎಲ್ ಆಡುತ್ತಿದ್ದಾರೆ. ಕೊಲ್ಕತ್ತಾ ನೈಟ್ ರೈಡರ್ಸ್, ಆರ್ಪಿಎಸ್ ಪರ ಆಡಿದ್ದು, ಸದ್ಯ ರಾಜಸ್ತಾನ ರಾಯಲ್ಸ್ ತಂಡದ ನಾಯಕ. ಸ್ಟೀವನ್ ಸ್ಮಿತ್ ಆಡಿರುವ ಇನಿಂಗ್ಸ್ ಗಳು -72, ದಾಖಲಿಸಿರುವ ರನ್ ಗಳು – 2022, ಸರಾಸರಿ – 37.4, ಸ್ಟ್ರೈಕ್ ರೇಟ್ – 128.9, ಸ್ಥಿರ ಪ್ರದರ್ಶನ – 50.7%.
ಇನ್ನು ಟೀಮ್ ಇಂಡಿಯಾ ನಾಯಕ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಸ್ಥಿರ ಪ್ರದರ್ಶನಲ್ಲಿ 50.3% ಹೊಂದಿದ್ದು ಟಾಪ್ ಸಿಕ್ಸ್ ನಲ್ಲಿದ್ದಾರೆ. ಅದೇ ರೀತಿ ಸ್ಥಿರ ಪ್ರದರ್ಶನದಲ್ಲಿ 50% ಹೊಂದಿರುವ ಜೆಪಿ ಡುಮಿನಿ ಏಳನೇ ಸ್ಥಾನದಲ್ಲಿದ್ದಾರೆ.