ತುಮಕೂರು: ರಾಜ್ಯ ರಾಜಕಾರಣದಲ್ಲಿ ತೀವ್ರ ಸಂಚಲನ ಸೃಷ್ಟಿಸಿರುವ ಬಲಿತ ದಲಿತ ಪೋಸ್ಟರ್ ವಿವಾದಕ್ಕೆ ಸಂಬಂಧಿಸಿದಂತೆ ಆಡಳಿತಾರೂಢ ಕಾಂಗ್ರೆಸ್ ನಾಯಕರು ಹಾಗೂ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರ ನಡುವಿನ ವಾಕ್ಸಮರ ಈಗ ತಾರಕಕ್ಕೇರಿದೆ. ತಮ್ಮ ವಿರುದ್ಧ ಬೀದಿ ಬೀದಿಗಳಲ್ಲಿ ಪೋಸ್ಟರ್ ಅಂಟಿಸಿ ರಾಜಕೀಯ ಸಮರ ಸಾರಿರುವ ಕಾಂಗ್ರೆಸ್ ನಾಯಕರಿಗೆ ಖಡಕ್ ತಿರುಗೇಟು ನೀಡಿರುವ ಕುಮಾರಸ್ವಾಮಿ, ಕ್ಷುಲ್ಲಕ ವೈಯಕ್ತಿಕ ಟೀಕೆಗಳನ್ನು ಮಾಡುವ ಬದಲು ಸರ್ಕಾರದ ಕಾನೂನುಬಾಹಿರ ತೀರ್ಮಾನಗಳ ಕುರಿತು ತಾವು ಕೇಳಿರುವ ಪ್ರಶ್ನೆಗಳಿಗೆ ಮೊದಲು ಉತ್ತರ ನೀಡುವಂತೆ ನೇರ ಸವಾಲು ಹಾಕಿದ್ದಾರೆ.
ತುಮಕೂರಿನಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಪೋಸ್ಟರ್ ರಾಜಕೀಯ, ದಲಿತರ ಮೀಸಲಾತಿಯ ವಾಸ್ತವ ಸ್ಥಿತಿಗತಿ ಹಾಗೂ ತಮ್ಮ ವಿರುದ್ಧ ಕೇಳಿಬಂದಿರುವ ರಿಯಲ್ ಎಸ್ಟೇಟ್ ಆರೋಪಗಳ ಕುರಿತು ಕಾಂಗ್ರೆಸ್ ನಾಯಕರನ್ನು ತೀವ್ರ ತರಾಟೆಗೆ ತೆಗೆದುಕೊಂಡರು.
ಮುಖ್ಯಮಂತ್ರಿಗಳಿಗೆ ಹಳೆಯ ಸಿನಿಮಾ ಪೋಸ್ಟರ್ ನೆನಪು ಬಂದಿರಬೇಕು!
ತಮ್ಮ ನಿವಾಸ ಹಾಗೂ ಕಚೇರಿಗಳ ಸುತ್ತಮುತ್ತ ಕಾಂಗ್ರೆಸ್ ಕಾರ್ಯಕರ್ತರು ಪೋಸ್ಟರ್ ಅಂಟಿಸಿರುವ ಕುರಿತು ತೀವ್ರ ವ್ಯಂಗ್ಯವಾಡಿದ ಹೆಚ್.ಡಿ. ಕುಮಾರಸ್ವಾಮಿ, ಈ ಹಿಂದೆ ನಾವು ಸಿನಿಮಾ ನಿರ್ಮಾಣ ಮಾಡುತ್ತಿದ್ದ ಕಾಲದಲ್ಲಿ ಎಲ್ಲೆಡೆ ಸಿನಿಮಾ ಪೋಸ್ಟರ್ಗಳನ್ನು ಅಂಟಿಸಲಾಗುತ್ತಿತ್ತು. ಒಂದು ಹೊಸ ಸಿನಿಮಾ ಬಿಡುಗಡೆಯಾಗುವ ಸಂದರ್ಭದಲ್ಲಿ ಐದಾರು ರೀತಿಯ ವಿಭಿನ್ನ ವಿನ್ಯಾಸಗಳಲ್ಲಿ ಪೋಸ್ಟರ್ಗಳನ್ನು ಸಿದ್ಧಪಡಿಸಿ ಗೋಡೆಗಳಿಗೆ ಹಾಕುತ್ತಿದ್ದರು. ಬಹುಶಃ ಈಗ ಮುಖ್ಯಮಂತ್ರಿಗಳಿಗೆ ಆ ಹಳೆಯ ಸಿನಿಮಾ ಪೋಸ್ಟರ್ಗಳ ನೆನಪು ಬಂದಿರಬೇಕು ಎಂದು ಕುಟುಕಿದರು.
ನಮ್ಮ ಮನೆಯ ಸುತ್ತಮುತ್ತ ರಾತ್ರೋರಾತ್ರಿ ಪೋಸ್ಟರ್ ಹಾಕುವ ಬದಲು, ಕಾಂಗ್ರೆಸ್ ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರ ಮನೆ ಮತ್ತು ಕಚೇರಿಗಳ ಮುಂದೆ ಆ ಪೋಸ್ಟರ್ಗಳನ್ನು ಅಂಟಿಸಿಕೊಂಡರೆ ಜನರಿಗೆ ಅದರ ಅಸಲಿ ಅರ್ಥ ಏನೆಂಬುದು ಗೊತ್ತಾಗುತ್ತದೆ. ನಮ್ಮ ಮನೆಯ ಮುಂದೆ ಪೋಸ್ಟರ್ ಹಾಕಿದರೆ ಸಾರ್ವಜನಿಕರ ಆಕ್ರೋಶ ಮತ್ತಷ್ಟು ಹೆಚ್ಚಾಗುತ್ತದೆಯೇ ಹೊರತು, ಇದರಿಂದ ಕಾಂಗ್ರೆಸ್ ನಾಯಕರಿಗೆ ಏನು ಪ್ರಯೋಜನವಾಗುತ್ತದೆ ಎಂದು ಅವರು ಪ್ರಶ್ನಿಸಿದರು.
ಚಿ.ನಾ. ರಾಮು ಅವರ ಪುಸ್ತಕ ಓದಿ: 78 ವರ್ಷಗಳಿಂದ ದಲಿತರನ್ನು ತುಳಿದವರು ಯಾರು?
ಇದೇ ವೇಳೆ ತಾವು ಬಳಸಿದ್ದ ಬಲಿತ ದಲಿತ ಎಂಬ ಪದವನ್ನು ಬಲವಾಗಿ ಸಮರ್ಥಿಸಿಕೊಂಡ ಕೇಂದ್ರ ಸಚಿವರು, ಆ ಪದ ಬಳಕೆಯಲ್ಲಿ ಅಂತಹ ತಪ್ಪೇನಿದೆ ಎಂದು ಪ್ರಶ್ನಿಸಿದರು. ಇತ್ತೀಚೆಗಷ್ಟೇ ಲೇಖಕ ಚಿ.ನಾ. ರಾಮು ಅವರು ಬಲಿತ ದಲಿತ, ತುಳಿತ ನನ್ನ ಜನ ಅನಾಥ ಎಂಬ ಶೀರ್ಷಿಕೆಯ ಪುಸ್ತಕವೊಂದನ್ನು ಬರೆದಿದ್ದಾರೆ. ನಮ್ಮ ವಿರುದ್ಧ ಪೋಸ್ಟರ್ ಹಿಡಿದು ಪ್ರತಿಭಟಿಸುತ್ತಿರುವ ಕಾಂಗ್ರೆಸ್ ನಾಯಕರು ಮೊದಲು ಆ ಪುಸ್ತಕವನ್ನು ತರಿಸಿಕೊಂಡು ಓದಬೇಕು ಎಂದು ಸಲಹೆ ನೀಡಿದರು.
ಸ್ವಾತಂತ್ರ್ಯ ಬಂದು ಕಳೆದ 78 ವರ್ಷಗಳಲ್ಲಿ ಸಮಾಜದ ಕಟ್ಟಕಡೆಯ ದುರ್ಬಲ ದಲಿತರಿಗೆ ಸಿಗಬೇಕಾಗಿದ್ದ ಮೀಸಲಾತಿ ಹಾಗೂ ಸರ್ಕಾರಿ ಸೌಲಭ್ಯಗಳನ್ನು ಯಾರು ಕಬಳಿಸಿದ್ದಾರೆ? ಬಲಿತ ದಲಿತರು ಇಂದಿಗೂ ಸಹ ಬಡ ದಲಿತರನ್ನು ಇತರರ ಮುಂದೆ ಕೈಯೊಡ್ಡುವ ದಯನೀಯ ಪರಿಸ್ಥಿತಿಯಲ್ಲೇ ಇಟ್ಟಿದ್ದಾರೆ. ಬಲಿತ ದಲಿತ ಎಂಬ ಪದವನ್ನು ನಾನೇನೂ ಹೊಸದಾಗಿ ಸೃಷ್ಟಿ ಮಾಡಿಲ್ಲ. ಕಳೆದ 78 ವರ್ಷಗಳಿಂದ ದುರ್ಬಲ ದಲಿತರನ್ನು ಯಾರು ತುಳಿದಿದ್ದಾರೆ ಎಂಬ ಕಹಿ ಸತ್ಯವನ್ನು ಚಿ.ನಾ. ರಾಮು ಅವರ ಪುಸ್ತಕದಲ್ಲಿ ಎಳೆಎಳೆಯಾಗಿ ವಿವರಿಸಲಾಗಿದೆ. ನಾನು ಧ್ವನಿ ಇಲ್ಲದ, ತುಳಿತಕ್ಕೊಳಗಾದ ದುರ್ಬಲ ದಲಿತರನ್ನು ಮೇಲೆತ್ತಬೇಕು ಎಂದು ಹೇಳಿದ್ದೇನೆಯೇ ಹೊರತು ಯಾರಿಗೂ ಅವಮಾನ ಮಾಡಿಲ್ಲ. ದಲಿತರ ಹೆಸರಿನಲ್ಲಿ ರಾಜಕೀಯ ಮಾಡುವ ನೀವು ಆ ಸಮುದಾಯಕ್ಕೆ ಏನು ಮಾಡಿದ್ದೀರಿ ಎಂದು ಕಾಂಗ್ರೆಸ್ ನಾಯಕರನ್ನು ತರಾಟೆಗೆ ತೆಗೆದುಕೊಂಡರು.
1983ರ ಜಮೀನು ಬಿಟ್ಟರೆ ನನ್ನದೇನಿದೆ ತೆಗೆಯಿರಿ; ಬಾಂಬೆ-ಹೈದರಾಬಾದ್ ಆಸ್ತಿ ಚರ್ಚೆಗೆ ಸವಾಲು!
ತಮ್ಮ ವಿರುದ್ಧ ಕಾಂಗ್ರೆಸ್ ನಾಯಕರು ಮಾಡಿರುವ ರಿಯಲ್ ಎಸ್ಟೇಟ್ ಹಾಗೂ ಭೂ ಕಬಳಿಕೆ ಆರೋಪಗಳಿಗೆ ಕೆಂಡಾಮಂಡಲರಾದ ಕುಮಾರಸ್ವಾಮಿ, ನನ್ನ ಮೇಲೆ ರಿಯಲ್ ಎಸ್ಟೇಟ್ ಆರೋಪ ಮಾಡುತ್ತಿದ್ದೀರಲ್ಲವೇ, ನಾನು ಎಲ್ಲಿ ರಿಯಲ್ ಎಸ್ಟೇಟ್ ದಂಧೆ ಮಾಡಿದ್ದೇನೆ ಎಂಬುದನ್ನು ತೋರಿಸಿ ಎಂದು ಗುಡುಗಿದರು.
ಕಳೆದ 1983ರಲ್ಲಿ ನಾನು ಸಿನಿಮಾ ರಂಗದಲ್ಲಿದ್ದ ಸಂದರ್ಭದಲ್ಲಿ ಖರೀದಿಸಿದ ಜಮೀನನ್ನು ಬಿಟ್ಟರೆ, ಇಲ್ಲಿಯವರೆಗೆ ಬೇರೆ ಯಾವ ರಿಯಲ್ ಎಸ್ಟೇಟ್ ವ್ಯವಹಾರ ಮಾಡಿದ್ದೇನೆ ಎಂಬುದನ್ನು ಜನರ ಮುಂದೆ ಇಡಿ. ಬಾಂಬೆ ಹಾಗೂ ಹೈದರಾಬಾದ್ನಲ್ಲಿ ನನ್ನ ಆಸ್ತಿ ಏನಿದೆ ಎಂಬುದನ್ನು ಬಿಚ್ಚಿಡಿ, ಇಲ್ಲವೇ ಅಲ್ಲಿ ಯಾರ ಆಸ್ತಿ ಏನಿದೆ ಎಂಬುದನ್ನು ನಾನೇ ಬಿಚ್ಚಿಡಬೇಕಾ? ನನ್ನ ಪ್ರಾಮಾಣಿಕತೆಯ ಬಗ್ಗೆ ಚರ್ಚೆ ಮಾಡುವ ನೈತಿಕತೆ ನಿಮಗಿದೆಯೇ ಎಂದು ಕಾಂಗ್ರೆಸ್ ನಾಯಕರಿಗೆ ನೇರ ಸವಾಲು ಹಾಕಿದರು.
ನಿಮ್ಮ ಸರ್ಕಾರದಿಂದ ಆಗಿರುವ ಹಲವಾರು ಕಾನೂನುಬಾಹಿರ ತೀರ್ಮಾನಗಳ ಬಗ್ಗೆ ನಾನು ದಾಖಲೆ ಸಮೇತ ಪ್ರಶ್ನೆಗಳನ್ನು ಮಾಡಿದ್ದೇನೆ. ಪಲಾಯನ ಮಾಡುವ ಬದಲು ನಾನು ಕೇಳಿರುವ ಆ ಪ್ರಶ್ನೆಗಳಿಗೆ ಮೊದಲು ಉತ್ತರ ಕೊಡಿ. ಆನಂತರ ವೈಯಕ್ತಿಕ ವಿಚಾರಗಳ ಬಗ್ಗೆ ಸುದೀರ್ಘವಾಗಿ ಚರ್ಚೆ ಮಾಡೋಣ ಎಂದು ಕುಮಾರಸ್ವಾಮಿ ಖಡಕ್ ಎಚ್ಚರಿಕೆ ನೀಡಿದರು.








