ವಿಶ್ವಸಂಸ್ಥೆ – 2ನೇ ಅವಧಿಗೆ ಗುಟೆರೆಸ್ ಆಯ್ಕೆಗೆ UNSC ಶಿಫಾರಸು
ವಿಶ್ವಸಂಸ್ಥೆ: ಪ್ರಸ್ತುತ ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿಯಾಗಿರುವ ಆಂಟೋನಿಯೊ ಗುಟೆರೆಸ್ ಅವರನ್ನು ಎರಡನೇ ಅವಧಿಗೆ ಮತ್ತೆ ಆಯ್ಕೆ ಮಾಡಬೇಕು ಎಂದು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ (UNSC) ಶಿಫಾರಸು ಮಾಡಿದೆ.
2022ರ ಜನವರಿ 1ರಿಂದ 5 ವರ್ಷಗಳ ಅವಧಿಗೆ ಆಂಟೋನಿಯೊ ಅವರನ್ನು ಪ್ರಧಾನ ಕಾರ್ಯದರ್ಶಿಯಾಗಿ 2ನೇ ಬಾರಿಗೆ ಆಯ್ಕೆ ಮಾಡಲು ನಿರ್ಧರಿಸಲಾಗಿದೆ. ಭದ್ರತಾ ಮಂಡಳಿಯ 15 ರಾಷ್ಟ್ರಗಳ ಸಭೆಯ ಬಳಿಕ 193 ಸದಸ್ಯ ರಾಷ್ಟ್ರಗಳ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಎರಡನೇ ಬಾರಿಗೆ ಗುಟೆರೆಸ್ ಅವರ ಹೆಸರನ್ನು ಪ್ರಧಾನ ಕಾರ್ಯದರ್ಶಿ ಹುದ್ದೆಗೆ ಶಿಫಾರಸು ಮಾಡುವ ನಿರ್ಣಯವನ್ನು ಸರ್ವಾನುಮತದಿಂದ ಅಂಗೀಕರಿಸಲಾಗಿದೆ.
ಇನ್ನೂ ಕಳೆದ ತಿಂಗಳಷ್ಟೇ ಗುಟೆರೆಸ್ ಅಧಿಕಾರವಧಿಯಲ್ಲಿ ಮುಂದುವರಿಯಲು ಮತ್ತವರ ಉಮೇದುವಾರಿಕೆಗೆ ಭಾರತ ಬೆಂಬಲವನ್ನು ಸೂಚಿಸಿತ್ತು. ಈ ಸಂಬಂಧ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು ವಿಶ್ವಸಂಸ್ಥೆಯ ಪ್ರಧಾನ ಕಚೇರಿಯಲ್ಲಿ ಗುಟೆರೆಸ್ ಅವರನ್ನು ಭೇಟಿಯಾಗಿ ಚರ್ಚೆ ನಡೆಸಿದ್ದರು.
ಈ ಬಿಕ್ಕಟ್ಟಿನ ಸಮಯದಲ್ಲಿ ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಮುಂದಾಳತ್ವವನ್ನು ಭಾರತ ಗೌರವಿಸುತ್ತದೆ. ಎರಡನೇ ಬಾರಿಗೆ ಗುಟೆರೆಸ್ ಉಮೇದುವಾರಿಕೆಗೆ ಭಾರತದ ಬೆಂಬಲವನ್ನು ಸೂಚಿಸಿದ್ದೇವೆ ಎಂದು ಜೈಶಂಕರ್ ಟ್ವೀಟ್ ಮಾಡಿದ್ದರು.
