ತುತ್ತು ಅನ್ನಕ್ಕಾಗಿ ಪರದಾಡಿದ ಸಾರಿಕಾಗೆ ಇಂದು ಅರ್ಜುನ ಪ್ರಶಸ್ತಿ
ಔರಂಗಾಬಾದ್, ಅಗಸ್ಟ್25: ಪ್ರತಿಷ್ಠಿತ ಅರ್ಜುನ ಪ್ರಶಸ್ತಿಗೆ ಪಾತ್ರರಾಗಲಿರುವ ಮಾಜಿ ಭಾರತೀಯ ಮಹಿಳಾ ಖೋ-ಖೋ ಕ್ಯಾಪ್ಟನ್ ಸಾರಿಕಾ ಕೇಲ್ ಅವರು ಆರ್ಥಿಕ ಸಮಸ್ಯೆಗಳಿಂದಾಗಿ ಸುಮಾರು ಒಂದು ದಶಕದಿಂದ ದಿನಕ್ಕೆ ಒಂದೇ ಹೊತ್ತು ಊಟವನ್ನು ಮಾತ್ರ ಮಾಡುತ್ತಿದ್ದರು. ಆದರೆ ಕ್ರೀಡೆಯು ಅವರ ಜೀವನವನ್ನು ಬದಲಿಸಿತು. ಪ್ರಸ್ತುತ ಮಹಾರಾಷ್ಟ್ರ ಸರ್ಕಾರದಲ್ಲಿ ಕ್ರೀಡಾ ಅಧಿಕಾರಿಯಾಗಿ ಕೆಲಸ ಮಾಡುತ್ತಿರುವ ಕೇಲ್ ಅವರಿಗೆ ಆಗಸ್ಟ್ 29 ರಾಷ್ಟ್ರೀಯ ಕ್ರೀಡಾ ದಿನದಂದು ನಡೆಯುವ ವರ್ಚುವಲ್ ಸಮಾರಂಭದಲ್ಲಿ ಅರ್ಜುನ್ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ.
ಈ ವರ್ಷ ಅರ್ಜುನ ಪ್ರಶಸ್ತಿಗೆ ನನ್ನನ್ನು ಹೆಸರಿಸಲಾಗಿದ್ದರೂ, ಖೋ ಖೋ ಆಡಿದ ದಿನಗಳು ನನಗೆ ಇನ್ನೂ ನೆನಪಿದೆ. ನಾನು ಸುಮಾರು ಒಂದು ದಶಕದಿಂದ ದಿನಕ್ಕೆ ಒಂದು ಹೊತ್ತು ಊಟವನ್ನು ಮಾತ್ರ ಮಾಡುತ್ತಿದ್ದೆ ಎಂದು 2016 ರಲ್ಲಿ ನಡೆದ 12 ನೇ ದಕ್ಷಿಣ ಏಷ್ಯಾ ಕ್ರೀಡಾಕೂಟದಲ್ಲಿ (ಎಸ್ಎಜಿ) ಭಾರತೀಯ ಮಹಿಳಾ ತಂಡವನ್ನು ಚಿನ್ನದತ್ತ ಕೊಂಡೊಯ್ದ ಸಾರಿಕಾ ಕೇಲ್ ತಿಳಿಸಿದ್ದಾರೆ. ನನ್ನ ಕುಟುಂಬದ ಸ್ಥಿತಿ ನನ್ನನ್ನು ಆಟವಾಡಲು ದೂಡಿತು. ಈ ಆಟವು ನನ್ನ ಜೀವನವನ್ನು ಬದಲಿಸಿತು ಮತ್ತು ಈಗ ನಾನು ಉಸ್ಮಾನಾಬಾದ್ ಜಿಲ್ಲೆಯ ತುಲ್ಜಾಪುರದಲ್ಲಿ ಕ್ರೀಡಾ ಅಧಿಕಾರಿಯಾಗಿ ಕೆಲಸ ಮಾಡುತ್ತಿದ್ದೇನೆ ಎಂದು ಅವರು ಹೇಳಿದರು.
27 ವರ್ಷದ ತನ್ನ ಚಿಕ್ಕಪ್ಪ ಮಹಾರಾಷ್ಟ್ರದ ಉಸ್ಮಾನಾಬಾದ್ ಜಿಲ್ಲೆಯಲ್ಲಿ ಈ ಕ್ರೀಡೆಯನ್ನು ಆಡುತ್ತಿದ್ದರು ಮತ್ತು 13 ನೇ ವಯಸ್ಸಿನಲ್ಲಿ ನನ್ನನ್ನು ಕ್ರೀಡಾಂಗಣಕ್ಕೆ ಕರೆದೊಯ್ದರು ಎಂದು ನೆನಪಿಸಿಕೊಂಡ ಸಾರಿಕಾ ಅಂದಿನಿಂದ ತಾನು ಈ ಆಟವನ್ನು ಮುಂದುವರಿಸಿರುವುದಾಗಿ ತಿಳಿಸಿದರು. ನನ್ನ ತಾಯಿ ಹೊಲಿಗೆ ಕೆಲಸ ಮಾಡುತ್ತಿದ್ದರು ಮತ್ತು ಇತರ ಮನೆಕೆಲಸಗಳನ್ನು ಮಾಡುತ್ತಿದ್ದರು. ನನ್ನ ತಂದೆಗೆ ದೈಹಿಕ ಸಮಸ್ಯೆಯಿಂದಾಗಿ ಸಂಪಾದಿಸಲು ಸಾಧ್ಯವಾಗುತ್ತಿರಲಿಲ್ಲ. ನಮ್ಮ ಇಡೀ ಕುಟುಂಬವು ನನ್ನ ಅಜ್ಜ-ಅಜ್ಜಿ ಗಳಿಸುವ ಸಂಪಾದನೆ ಮೇಲೆ ಅವಲಂಬಿತವಾಗಿತ್ತು ಎಂದು ಅವರು ತಮ್ಮ ಜೀವನದ ಪ್ರಯಾಣವನ್ನು ನೆನಪಿಸಿಕೊಂಡರು. ಆ ಸಮಯದಲ್ಲಿ, ನಾನು ದಿನಕ್ಕೆ ಒಂದು ಬಾರಿ ಮಾತ್ರ ಆಹಾರವನ್ನು ಸೇವಿಸುತ್ತಿದ್ದೆ. ನಾನು ಶಿಬಿರದಲ್ಲಿದ್ದಾಗ ಅಥವಾ ಕೆಲವು ಸ್ಪರ್ಧೆಗೆ ಹೋಗುತ್ತಿದ್ದಾಗ ಮಾತ್ರ ನಾನು ವಿಶೇಷ ಆಹಾರವನ್ನು ಪಡೆಯುತ್ತಿದ್ದೆ ಎಂದು ಸಾರಿಕಾ ತಾವು ಕಳೆದ ದಿನಗಳನ್ನು ಮೆಲುಕು ಹಾಕಿದ್ದಾರೆ.
ಹಲವಾರು ಸಮಸ್ಯೆಗಳನ್ನು ಎದುರಿಸುತ್ತಿದ್ದರೂ, ಕೇಲ್ ಅವರ ಕುಟುಂಬವು ಅವರನ್ನು ಬೆಂಬಲಿಸಿತು ಮತ್ತು ಪಂದ್ಯಾವಳಿಗಳಲ್ಲಿ ಆಡುವುದನ್ನು ಯಾವತ್ತೂ ತಡೆಯಲಿಲ್ಲ ಎಂದು ಅವರು ಹೇಳಿದ್ದಾರೆ.
ಹಿಂದೊಮ್ಮೆ ಹಣಕಾಸಿನ ತೊಂದರೆಯಿಂದಾಗಿ ಕೇಲ್ ಆಟವನ್ನು ತ್ಯಜಿಸಲು ನಿರ್ಧರಿಸಿದ್ದರು ಎಂದು ಅವರ ತರಬೇತುದಾರ ಚಂದ್ರಜಿತ್ ಜಾಧವ್ ಹೇಳಿದ್ದಾರೆ. 2016 ರಲ್ಲಿ, ಸಾರಿಕಾ ಅವರ ಕುಟುಂಬದ ಆರ್ಥಿಕ ಸಮಸ್ಯೆಗಳಿಂದ ತೊಂದರೆಗೀಡಾದರು ಮತ್ತು ಆಟವನ್ನು ತ್ಯಜಿಸಲು ಸಹ ನಿರ್ಧರಿಸಿದ್ದರು. ಅವರ ಅಜ್ಜಿ ಹಾಗೆ ಮಾಡದಂತೆ ತಡೆದಿದ್ದರು ಮತ್ತು ಕೌನ್ಸೆಲಿಂಗ್ ನಂತರ ಸಾರಿಕಾ ಮತ್ತೆ ತನ್ನ ಆಟವನ್ನು ಮುಂದುವರೆಸಿದರು. ಇದು ಅವರ ಬದುಕಿನ ಮಹತ್ವದ ತಿರುವು ಎಂದು ತರಬೇತುದಾರ ಜಾಧವ್ ತಿಳಿಸಿದರು.
ಸಾರಿಕಾ 2016 ರಲ್ಲಿ ಏಷ್ಯನ್ ಖೋ ಖೋ ಚಾಂಪಿಯನ್ಶಿಪ್ ಗೆದ್ದ ತಂಡದ ಭಾಗವಾಗಿದ್ದರು. ಆ ಪಂದ್ಯಾವಳಿಯಲ್ಲಿ ಟೂರ್ನಮೆಂಟ್ ಆಟಗಾರ್ತಿ ಪ್ರಶಸ್ತಿಯನ್ನೂ ಸಹ ಗೆದ್ದಿದ್ದರು ಎಂದು ಖೋ ಖೋ ಫೆಡರೇಶನ್ ಆಫ್ ಇಂಡಿಯಾದ ಜಂಟಿ ಕಾರ್ಯದರ್ಶಿಯೂ ಆಗಿರುವ ಜಾಧವ್ ನೆನಪಿಸಿಕೊಂಡರು. ಕಳೆದ 10 ವರ್ಷಗಳಲ್ಲಿ ಸಾರಿಕಾ ಕಾಳೆ ಸೀನಿಯರ್ ರಾಷ್ಟ್ರೀಯ ಚಾಂಪಿಯನ್ಶಿಪ್ನಲ್ಲಿ ಅನೇಕ ಪದಕಗಳನ್ನು ಗೆದ್ದಿದ್ದಾರೆ.
