ಜರ್ಮನ್ ಮೂಲದ ಕ್ಯೂ 8 ಇ-ಟ್ರಾನ್ ಅನ್ನು ಭಾರತದ ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡಿದೆ. ಇದರ ಎಕ್ಸ್‌ಶೋರೂಮ್ ಬೆಲೆ 1.14 ಕೋಟಿ ರೂ. ನಿಂದ ಆರಂಭವಾಗಲಿದೆ.
ಆಡಿ ಕ್ಯೂ8 ಇ-ಟ್ರಾನ್‌ಗಾಗಿ ಈಗಾಗಲೇ ಬುಕ್ಕಿಂಗ್ ಆರಂಭವಾಗಿದ್ದು, 5 ಲಕ್ಷ ರೂ. ಮುಂಗಡ ಮೊತ್ತ ಪಾವತಿಸಿ ಕಾರನ್ನು ಬುಕ್ ಮಾಡಬಹುದು. ಕ್ಯೂ8 ಇ-ಟ್ರಾನ್‌ಗೆ ಆಡಿ 7-ವರ್ಷಗಳ ವಿಸ್ತೃತ ವಾರಂಟಿ, 10-ವರ್ಷದ ರೋಡ್‌ ಸೈಡ್ ಅಸಿಸ್ಟೆನ್ಸ್ ಮತ್ತು 8-ವರ್ಷ/160,000 ಕಿಲೋ ಮೀಟರ್ ಬ್ಯಾಟರಿ ವಾರಂಟಿ ನೀಡಲಾಗುತ್ತದೆ. ಒಂಭತ್ತು ಬಣ್ಣಗಳಲ್ಲಿ ಆಡಿ ಕ್ಯೂ8 ಇ-ಟ್ರಾನ್ ಸಿಗುತ್ತಿದೆ.
ರೈಜ್‌ ಮೋಡ್‌ನಲ್ಲಿ ಈ ಎಲೆಕ್ಟ್ರಿಕ್ ಎಸ್‌ಯುವಿ 226 ಎಂಎಂ ಗರಿಷ್ಟ ಗ್ರೌಂಡ್ ಕ್ಲಿಯರೆನ್ಸ್‌ ಅನ್ನು ಹೊಂದುತ್ತದೆ. ಆಟೋ, ಡೈನಾಮಿಕ್ ಮತ್ತು ಆಫ್‌ರೋಡ್ ಎಂಬ ಮೂರು ಮೋಡ್‌ಗಳನ್ನು ಒಳಗೊಂಡಿರುತ್ತದೆ. ಆಡಿ ಕ್ಯೂ 8 ಇ-ಟ್ರಾನ್ 50 ಡ್ಯುಯೆಲ್ ಮೋಟರ್ ಸೆಟಪ್ ಹೊಂದಿದ್ದು, 95 kWh ಬ್ಯಾಟರಿಯನ್ನು ಬಳಸುತ್ತದೆ. ಇದು 6 ಸೆಕೆಂಡುಗಳಲ್ಲಿ 100 ಕಿಮೀ ವೇಗವನ್ನು ಪಡೆದುಕೊಳ್ಳುತ್ತದೆ. ಆಡಿ ಕ್ಯೂ 8 ಇ-ಟ್ರಾನ್ 55 ಡ್ಯುಯಲ್-ಮೋಟರ್ ಸೆಟಪ್ ಹಾಗೂ 114 kWh ಬ್ಯಾಟರಿಯಿಂದ ಶಕ್ತಿ ಪಡೆಯುತ್ತದೆ. ಆಡಿ ಕ್ಯೂ8 ಇ-ಟ್ರಾನ್ 55 ಮತ್ತು ಆಡಿ ಕ್ಯೂ 8 ಸ್ಪೋರ್ಟ್‌ಬ್ಯಾಕ್‌ ಇ-ಟ್ರಾನ್ 55 ಒಂದೇ ಚಾರ್ಜ್‌ನಲ್ಲಿ ಕ್ರಮವಾಗಿ 582 ಕಿಮೀ ಮತ್ತು 600 ಕಿಮೀ ದೂರ ಕ್ರಮಿಸುತ್ತವೆ. ಬ್ಯಾಟರಿಯನ್ನು ಕೇವಲ 31 ನಿಮಿಷಗಳಲ್ಲಿ 10-80% ವರೆಗೆ ಚಾರ್ಜ್ ಮಾಡಬಹುದು. ಹೊಸ ಆಡಿ ಕ್ಯೂ8 ಇ-ಟ್ರಾನ್ ಎಂಟು ಏರ್‌ಬ್ಯಾಗ್‌ಗಳನ್ನು, ಲೇನ್ ಡಿಪಾರ್ಚರ್‌ ವಾರ್ನಿಂಗ್, ಟೈರ್ ಪ್ರಶರ್ ಮಾನಿಟರಿಂಗ್ ಸಿಸ್ಟಮ್ ಸೇರಿದಂತೆ ಹಲವು ವೈಶಿಷ್ಟ್ಯ ಹೊಂದಿದೆ.
