ಬೆಂಗಳೂರು: ಭಾರತದ ಪ್ರಮುಖ ಖಾಸಗಿ ಬ್ಯಾಂಕ್ಗಳಲ್ಲಿ ಒಂದಾದ ಆಕ್ಸಿಸ್ ಬ್ಯಾಂಕ್ ಹಾಗೂ ಖ್ಯಾತ ಎಐ ಮತ್ತು ತಂತ್ರಜ್ಞಾನ ಸೇವಾ ಕಂಪನಿಯಾದ ಕಾಗ್ನಿಜೆಂಟ್ ಮಹತ್ವದ ಒಪ್ಪಂದವೊಂದಕ್ಕೆ ಸಹಿ ಹಾಕಿವೆ. ಬ್ಯಾಂಕಿಂಗ್ ಸೇವೆಗಳನ್ನು ಮತ್ತಷ್ಟು ಸುಧಾರಿಸಲು ಹಾಗೂ ಆಟೊಮೇಷನ್ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಲು ‘ಎಎಂಎಸ್ 2.0’ ಎಂಬ ಹೊಸ ವ್ಯವಸ್ಥೆಯನ್ನು ಆಕ್ಸಿಸ್ ಬ್ಯಾಂಕ್ ಯಶಸ್ವಿಯಾಗಿ ಜಾರಿಗೊಳಿಸಿದೆ. ಕಾಗ್ನಿಜೆಂಟ್ ಇದನ್ನು ಅಭಿವೃದ್ಧಿಪಡಿಸಿದೆ.
ಏನಿದು ಎಎಂಎಸ್ 2.0?
ಬ್ಯಾಂಕಿಂಗ್ ವ್ಯವಸ್ಥೆಯಲ್ಲಿನ ಕಾರ್ಯಾಚರಣೆಯನ್ನು ವೇಗಗೊಳಿಸಲು, ಖರ್ಚು ಕಡಿಮೆ ಮಾಡಲು ಹಾಗೂ ತಾಂತ್ರಿಕ ವಿಶ್ವಾಸಾರ್ಹತೆಯನ್ನು ಹೆಚ್ಚಿಸಲು ರೂಪಿಸಿರುವ ಹೊಸ ಮಾದರಿಯೇ ಎಎಂಎಸ್ 2.0. ಇದು ಪ್ರಮುಖವಾಗಿ ‘ಆಟೊಮೇಷನ್’ ಆಧಾರದ ಮೇಲೆ ಕಾರ್ಯನಿರ್ವಹಿಸುತ್ತದೆ. ಇದರಿಂದ ಬ್ಯಾಂಕ್ನ ದೈನಂದಿನ ಕೆಲಸಗಳು ಸುಸೂತ್ರವಾಗಿ, ನಿಖರವಾಗಿ ನಡೆಯಲಿದ್ದು, ಭವಿಷ್ಯದ ತಂತ್ರಜ್ಞಾನ ಬದಲಾವಣೆಯತ್ತ ಆಕ್ಸಿಸ್ ಬ್ಯಾಂಕ್ ಇಟ್ಟಿರುವ ಪ್ರಮುಖ ಹೆಜ್ಜೆ ಇದಾಗಿದೆ.
5 ವರ್ಷಗಳ ಬೃಹತ್ ಒಪ್ಪಂದ
ಈ ಒಪ್ಪಂದವು ಮುಂದಿನ 5 ವರ್ಷಗಳವರೆಗೆ ಇರಲಿದೆ. ಇದರ ಅಡಿಯಲ್ಲಿ ಕಾಗ್ನಿಜೆಂಟ್ ಕಂಪನಿಯು ಆಕ್ಸಿಸ್ ಬ್ಯಾಂಕ್ನ ಐದು ಪ್ರಮುಖ ವಿಭಾಗಗಳಿಗೆ ಅಗತ್ಯವಾದ ತಾಂತ್ರಿಕ ಬೆಂಬಲವನ್ನು ಒದಗಿಸಲಿದೆ.
ಶಾಖೆ ಮತ್ತು ಕಾರ್ಯಾಚರಣೆಗಳು, ಕಾರ್ಡ್ಗಳು, ಕಾರ್ಪೊರೇಟ್ ಬ್ಯಾಂಕಿಂಗ್ ಮತ್ತು ಟ್ರೆಷರಿ, ಕೋರ್ ಪ್ಲಾಟ್ಫಾರ್ಮ್ ಮತ್ತು ಪೇಮೆಂಟ್ಸ್, ಹಣಕಾಸು ಮತ್ತು ಲೆಕ್ಕಪತ್ರ, ರಿಟೇಲ್ ಮತ್ತು ಹೋಲ್ಸೇಲ್ ಬ್ಯಾಂಕಿಂಗ್ ಹಾಗೂ ಡೇಟಾ ಪ್ಲಾಟ್ಫಾರ್ಮ್ಗಳಿಗೆ ಬೇಕಾದ ತಾಂತ್ರಿಕ ಬೆಂಬಲವನ್ನು ನೀಡಲಿದೆ.
ಈ ಸಹಭಾಗಿತ್ವದ ಬಗ್ಗೆ ವಿವರವನ್ನು ಹಂಚಿಕೊಂಡಿರುವ ಆಕ್ಸಿಸ್ ಬ್ಯಾಂಕ್ನ ಐಟಿ ಮತ್ತು ರಿಟೇಲ್ ಆಪರೇಷನ್ಸ್ ವಿಭಾಗದ ಮುಖ್ಯಸ್ಥ ಅವಿನಾಶ್ ರಾಘವೇಂದ್ರ, “ಎಎಂಎಸ್ 2.0 ಜಾರಿಯು ಆಕ್ಸಿಸ್ ಬ್ಯಾಂಕ್ನ ತಂತ್ರಜ್ಞಾನವನ್ನು ಮತ್ತಷ್ಟು ಬಲಪಡಿಸುವ ಮತ್ತು ಆಟೊಮೇಷನ್ ಆಧಾರಿತ ವ್ಯವಸ್ಥೆಯನ್ನು ಹೊಂದುವ ನಮ್ಮ ಪ್ರಯತ್ನದ ಒಂದು ಭಾಗವಾಗಿದೆ. ನಮ್ಮ ಸಂಕೀರ್ಣವಾದ ಅಪ್ಲಿಕೇಶನ್ ಪರಿಸರವನ್ನು ಸಮರ್ಥವಾಗಿ ನಿರ್ವಹಿಸಲು ಕಾಗ್ನಿಜೆಂಟ್ ನಮ್ಮೊಂದಿಗೆ ನಿಕಟವಾಗಿ ಕೆಲಸ ಮಾಡುತ್ತಿದೆ. ಬ್ಯಾಂಕ್ನ ಭವಿಷ್ಯದ ವ್ಯವಹಾರ ಮತ್ತು ತಾಂತ್ರಿಕ ಅಗತ್ಯಗಳನ್ನು ಪೂರೈಸಲು ಈ ಒಪ್ಪಂದ ಸಹಕಾರಿಯಾಗಲಿದೆ,” ಎಂದರು.
ಕಾಗ್ನಿಜೆಂಟ್ನ ಏಷ್ಯಾ-ಪೆಸಿಫಿಕ್ ಮತ್ತು ಜಪಾನ್ ವಿಭಾಗದ ಅಧ್ಯಕ್ಷ ಗಣೇಶ್ ಅಯ್ಯರ್ ಪ್ರತಿಕ್ರಿಯಿಸಿ, “ಆಕ್ಸಿಸ್ ಬ್ಯಾಂಕ್ನ ಈ ಹೊಸ ಉಪಕ್ರಮದಲ್ಲಿ ಪಾಲುದಾರರಾಗಲು ನಮಗೆ ಅತೀವ ಸಂತೋಷವಾಗಿದೆ. ಆಟೊಮೇಷನ್ನ ಜವಾಬ್ದಾರಿಯುತ ಬಳಕೆ ಮತ್ತು ಶಿಸ್ತಿನ ಸೇವಾ ವಿತರಣೆಯ ಮೂಲಕ ಬ್ಯಾಂಕ್ನ ವ್ಯವಸ್ಥೆಯನ್ನು ಮತ್ತಷ್ಟು ಸುಗಮಗೊಳಿಸುವುದು ನಮ್ಮ ತಂಡದ ಪ್ರಮುಖ ಉದ್ದೇಶವಾಗಿದೆ” ಎಂದು ತಿಳಿಸಿದ್ದಾರೆ.
ಆಕ್ಸಿಸ್ ಬ್ಯಾಂಕ್ ದೇಶಾದ್ಯಂತ 6,295 ಕ್ಕೂ ಹೆಚ್ಚು ಶಾಖೆಗಳು ಹಾಗೂ 12,500 ಕ್ಕೂ ಹೆಚ್ಚು ಎಟಿಎಂಗಳೊಂದಿಗೆ ಬೃಹತ್ ಜಾಲವನ್ನು ಹೊಂದಿದೆ. ಇನ್ನೊಂದೆಡೆ, ಕಾಗ್ನಿಜೆಂಟ್ ಜಾಗತಿಕ ಮಟ್ಟದಲ್ಲಿ ಎಐ ಮತ್ತು ಅತ್ಯಾಧುನಿಕ ತಂತ್ರಜ್ಞಾನ ಸೇವೆಗಳನ್ನು ಒದಗಿಸುವ ಮುಂಚೂಣಿ ಸಂಸ್ಥೆಯಾಗಿದೆ. ಈ ಎರಡು ಬೃಹತ್ ಸಂಸ್ಥೆಗಳ ಕೈಜೋಡಿಸುವಿಕೆ ಬ್ಯಾಂಕಿಂಗ್ ತಂತ್ರಜ್ಞಾನ ವಲಯದಲ್ಲಿ ಹೊಸ ಮೈಲಿಗಲ್ಲಾಗಲಿದೆ.
