• ಬಾಲಿ–ಬೆಂಗಳೂರು ನಡುವೆ ಸಾಂಸ್ಕೃತಿಕ ಸೇತು
• 16 ದಿನಗಳ ಕಾಲ ನಗರದಲ್ಲಿ ಗರಿಗೆದರಿದ ಕಲಾ ಕಲರವ
• ಸಂಸ್ಕೃತಿಯೇ ಜಾಗತಿಕ ಬೆಸುಗೆ: ಕೇಂದ್ರ ಸಚಿವರ ಶ್ಲಾಘನೆ
• ಕೆಚಕ್‌ನಿಂದ ಯಕ್ಷಗಾನದವರೆಗೆ ಅಪೂರ್ವ ಕಲಾ ಸಂಗಮ
ಬೆಂಗಳೂರು: ಬೆಂಗಳೂರು ಕೇವಲ ಜಾಗತಿಕ ಮಟ್ಟದ ಐಟಿ ನಗರವಷ್ಟೇ ಅಲ್ಲ, ವಿಭಿನ್ನ ಸಂಸ್ಕೃತಿಗಳು, ಕಲೆ ಮತ್ತು ಪರಂಪರೆಗಳು ಒಂದೆಡೆ ಮೇಳೈಸುವ ಜೀವಂತ ತಾಣ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಪರಮ್ ಫೌಂಡೇಷನ್‌ ವತಿಯಿಂದ ಆಯೋಜಿಸಲಾಗಿದ್ದ ‘ಬಾಲಿ ಇನ್‌ ಬೆಂಗಳೂರು’ ಸಾಂಸ್ಕೃತಿಕ ಮಹೋತ್ಸವವು ನಗರದಲ್ಲಿ ಅತ್ಯಂತ ಅದ್ಧೂರಿಯಾಗಿ ಸಂಪನ್ನಗೊಂಡಿದೆ.
ಈ ಮಹೋತ್ಸವಕ್ಕೆ ವಿಡಿಯೊ ಸಂದೇಶದ ಮೂಲಕ ಶುಭ ಹಾರೈಸಿ ಮಾತನಾಡಿದ ಕೇಂದ್ರ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಸಚಿವ ಗಜೇಂದ್ರ ಸಿಂಗ್ ಶೇಖಾವತ್ ಅವರು, “ಕಲೆ ಮತ್ತು ಸಂಸ್ಕೃತಿಗೆ ಭಾಷೆ ಹಾಗೂ ಭೌಗೋಳಿಕ ಗಡಿಗಳನ್ನು ಮೀರಿ ಜನರನ್ನು ಒಗ್ಗೂಡಿಸುವ ಅಪಾರ ಶಕ್ತಿಯಿದೆ. ವಿಶ್ವದಲ್ಲಿ ಉದ್ವಿಗ್ನತೆ ಹೆಚ್ಚುತ್ತಿರುವ ಇಂದಿನ ದಿನಗಳಲ್ಲಿ ಪರಸ್ಪರ ಸಾಂಸ್ಕೃತಿಕ ವಿನಿಮಯವು ಅಂತರವನ್ನು ಕಡಿಮೆ ಮಾಡಿ, ಆರೋಗ್ಯಕರ ಸಂವಾದದ ವಾತಾವರಣ ನಿರ್ಮಿಸುತ್ತದೆ. ಭಾರತ ಮತ್ತು ಇಂಡೋನೇಷ್ಯಾದ ನಡುವಿನ ಪ್ರಾಚೀನ ನಾಗರಿಕತೆಯ ಪರಂಪರೆಯನ್ನು ಈ ಉತ್ಸವವು ಮತ್ತಷ್ಟು ಹತ್ತಿರ ತಂದಿದ್ದು, ಉಭಯ ದೇಶಗಳ ಕಲಾವಿದರು ಹಾಗೂ ಕಲಾಪ್ರೇಮಿಗಳಿಗೆ ಇದೊಂದು ಅವಿಸ್ಮರಣೀಯ ಅನುಭವವಾಗಿದೆ” ಎಂದು ಶ್ಲಾಘಿಸಿದರು.
ಅಕ್ಟೋಬರ್ 3ರಿಂದ 18ರವರೆಗೆ ಒಟ್ಟು 16 ದಿನಗಳ ಕಾಲ ನಗರದ 14 ಪ್ರಮುಖ ಸ್ಥಳಗಳಲ್ಲಿ 16 ವೈವಿಧ್ಯಮಯ ಕಾರ್ಯಕ್ರಮಗಳು ಯಶಸ್ವಿಯಾಗಿ ಜರುಗಿದವು. ಕಲಾ ಪ್ರದರ್ಶನಗಳ ಜತೆಗೆ ಕಾರ್ಯಾಗಾರ, ಪ್ರಾತ್ಯಕ್ಷಿಕೆ, ಉಪನ್ಯಾಸ ಮತ್ತು ಕಲಾವಿದರೊಂದಿಗಿನ ನೇರ ಸಂವಾದಗಳು ಕಲಾಪ್ರೇಮಿಗಳನ್ನು ಮಂತ್ರಮುಗ್ಧರನ್ನಾಗಿಸಿದವು.
ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ಪ್ರಾಚೀನ ಸಾಂಸ್ಕೃತಿಕ ಸಾಮ್ಯತೆ, ರಾಮಾಯಣ ಆಧಾರಿತ ಪುರಾಣ ಕಥನಗಳು ಹಾಗೂ ಉಭಯ ದೇಶಗಳ ಕಲಾ ಸಂಬಂಧಗಳನ್ನು ಮರುಶೋಧಿಸುವ ಸೃಜನಶೀಲ ವಿನಿಮಯಕ್ಕೆ ಈ ವೇದಿಕೆ ಸಾಕ್ಷಿಯಾಯಿತು.
ಬಾಲಿಯಿಂದ ಬೆಂಗಳೂರಿಗೆ ಕಲೆಯ ಪಯಣ:
ಉತ್ಸವದ ಪ್ರಮುಖ ಆಕರ್ಷಣೆಯಾಗಿ ಬಾಲಿಯ ವಿಶ್ವವಿಖ್ಯಾತ ‘ಕೆಚಕ್’ (Kecak) ಪ್ರದರ್ಶನ ಕಲಾಪ್ರೇಮಿಗಳ ಮನಗೆದ್ದಿತು. ಪದ್ಮಶ್ರೀ ಪುರಸ್ಕೃತ ಡಾ. ಐ. ವಯಾನ್ ಡಿಬಿಯಾ ಹಾಗೂ ಅವರ ಪರಿಣಿತ ಕಲಾವಿದರ ತಂಡವು ನಗರಕ್ಕೆ ಆಗಮಿಸಿ, ಬಾಲಿಯ ಪ್ರದರ್ಶನ ಕಲೆಗಳ ಕುರಿತ ತಮ್ಮ ದಶಕಗಳ ಅನುಭವ ಮತ್ತು ಜ್ಞಾನವನ್ನು ಬೆಂಗಳೂರಿನ ಕಲಾಸಕ್ತರೊಂದಿಗೆ ಹಂಚಿಕೊಂಡರು. ಬಾಲಿ ನೃತ್ಯದ ಸೂಕ್ಷ್ಮ ಹಾವಭಾವಗಳು, ಹೆಜ್ಜೆಗಳ ಲಯ ಮತ್ತು ಕಥನ ಶೈಲಿಯ ಆಂತರ್ಯವನ್ನು ಕಾರ್ಯಾಗಾರಗಳ ಮೂಲಕ ಆಸಕ್ತರಿಗೆ ಪರಿಚಯಿಸಲಾಯಿತು.
ಕೆಚಕ್‌ನಿಂದ ಗಮೆಲಾನ್‌ವರೆಗೆ ಅದ್ಭುತ ಲೋಕ:
ಬಾಲಿಯ ಸಾಂಪ್ರದಾಯಿಕ ‘ಗಮೆಲಾನ್‌’ ಸಂಗೀತ ಕಾರ್ಯಾಗಾರ, ಮುಖವಾಡ ತಯಾರಿಕೆ ಕಮ್ಮಟ, ನೃತ್ಯ ಚಲನೆಯ ತರಬೇತಿ ಹಾಗೂ ಇಂಡೋನೇಷ್ಯಾದ ಸಾಂಪ್ರದಾಯಿಕ ‘ವಾಯಾಂಗ್’ ತೊಗಲುಗೊಂಬೆಯಾಟದ ಪ್ರಾತ್ಯಕ್ಷಿಕೆಗಳು ಉತ್ಸವದ ಮೆರುಗನ್ನು ಹೆಚ್ಚಿಸಿದವು. ವಿಶೇಷವಾಗಿ, ಇಂಡೋನೇಷ್ಯಾ ಮತ್ತು ಭಾರತದ ತೊಗಲುಗೊಂಬೆಯಾಟಗಳ ಜಂಟಿ ಪ್ರದರ್ಶನ ಹಾಗೂ ಬಾಲಿಯ ಕಲೆಯನ್ನು ಕರುನಾಡಿನ ಹೆಮ್ಮೆಯ ಯಕ್ಷಗಾನದೊಂದಿಗೆ ಬೆಸೆದ ಅಪೂರ್ವ ಸಹಯೋಗವು ನೋಡುಗರ ಕಣ್ಮನ ಸೆಳೆಯಿತು. ಒಂದೆಡೆ ಬಾಲಿಯ ಕೆಚಕ್‌ನ ಲಯ, ಮತ್ತೊಂದೆಡೆ ಯಕ್ಷಗಾನದ ಹೆಜ್ಜೆಗಳ ಸಂಗಮವು ಕಲಾತ್ಮಕ ಸಂವಾದಕ್ಕೆ ಹೊಸ ಭಾಷ್ಯ ಬರೆಯಿತು.
ಸಂವಾದ ಮತ್ತು ಕಲಿಕೆಯ ಸಂಗಮ:
‘ಬಾಲಿ ಇನ್‌ ಬೆಂಗಳೂರು’ ಉತ್ಸವವು ಕೇವಲ ವೇದಿಕೆಯ ಪ್ರದರ್ಶನಗಳಿಗೆ ಸೀಮಿತವಾಗದೆ ಕಲಿಕೆ, ಸಹಯೋಗ ಮತ್ತು ಸಂವಾದದ ಮೂಲಕ ಜನರ ನಡುವೆ ಬೆಸುಗೆಯಾಗಿ ಕಾರ್ಯನಿರ್ವಹಿಸಿತು. ಬಾಲಿಯ ಕಲಾವಿದರು, ಭಾರತೀಯ ರಂಗಕರ್ಮಿಗಳು, ವಿದ್ಯಾರ್ಥಿಗಳು ಮತ್ತು ಕಲಾ ಸಂಶೋಧಕರು ಒಂದೇ ವೇದಿಕೆಯಲ್ಲಿ ಮುಖಾಮುಖಿಯಾಗಿ ಅನುಭವ ಹಂಚಿಕೊಂಡರು. ಆಹಾರ, ಸಂಸ್ಕೃತಿ ಮತ್ತು ಕಲಾ ಸಮನ್ವಯದೊಂದಿಗೆ ಈ ಮಹೋತ್ಸವವು ಬೆಂಗಳೂರಿನ ಸಾಂಸ್ಕೃತಿಕ ಇತಿಹಾಸದಲ್ಲಿ ಒಂದು ಹೊಸ ಮೈಲಿಗಲ್ಲಾಗಿ ಯಶಸ್ವಿಯಾಗಿ ದಾಖಲಾಯಿತು.
