ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನ ಭಾಷಾ ಅಸ್ಮಿತೆ ಮತ್ತು ಕರ್ನಾಟಕದ ಸಾರ್ವಭೌಮತ್ವದ ಮೇಲೆ ಸವಾರಿ ಮಾಡಲು ಯತ್ನಿಸಿದ ಹೊರರಾಜ್ಯದ ಮಂದಿಗೆ ಕನ್ನಡಿಗರು ರಣಚಂಡಿಯಂತೆ ಎದುರು ನಿಂತಿದ್ದಾರೆ. ಸಾಮಾಜಿಕ ಜಾಲತಾಣ ಎಕ್ಸ್ ನಲ್ಲಿ ಆಂಧ್ರ ಮೂಲದ ಕೆಲವರು ಬೆಂಗಳೂರನ್ನು ಭಾರತದ ಎರಡನೇ ರಾಜಧಾನಿಯನ್ನಾಗಿ ಮಾಡಬೇಕು ಮತ್ತು ದೆಹಲಿಯಂತೆ ಕೇಂದ್ರಾಡಳಿತ ಪ್ರದೇಶವನ್ನಾಗಿ ಘೋಷಿಸಬೇಕು ಎಂಬ ಟ್ರೆಂಡ್ ಸೃಷ್ಟಿಸಲು ಯತ್ನಿಸಿದ್ದು, ಈಗ ಕನ್ನಡಿಗರ ಆಕ್ರೋಶದ ಜ್ವಾಲೆಗೆ ತುತ್ತಾಗಿದ್ದಾರೆ.
ಘಟನೆಯ ಹಿನ್ನೆಲೆ
ಬೆಂಗಳೂರಿನಲ್ಲಿ ಇತ್ತೀಚೆಗೆ ನಡೆಯುತ್ತಿರುವ ಭಾಷಾ ಜಾಗೃತಿ ಮತ್ತು ಕನ್ನಡದ ಪರವಾದ ಹೋರಾಟಗಳನ್ನು ಭಾಷಾ ಯುದ್ಧ ಎಂದು ಬಣ್ಣಿಸಿರುವ ಕಾರ್ತಿಕ್ ಎಂಬುವವರು, ಇದಕ್ಕೆ ಕೇಂದ್ರಾಡಳಿತ ಪ್ರದೇಶವೊಂದೇ ಪರಿಹಾರ ಎಂಬ ಅರ್ಥದ ಟ್ವೀಟ್ ಮಾಡಿದ್ದರು. ಬೆಂಗಳೂರನ್ನು ಎರಡನೇ ರಾಜಧಾನಿ ಮಾಡಿದರೆ ಹಿಂದಿ ಮತ್ತು ಇಂಗ್ಲಿಷ್ ಭಾಷಿಕರಿಗೆ ಅನುಕೂಲವಾಗುತ್ತದೆ ಎಂಬ ಅವರ ವಾದವು ಕನ್ನಡಿಗರ ಸ್ವಾಭಿಮಾನವನ್ನು ಬಡಿದೆಬ್ಬಿಸಿದೆ.
ಕನ್ನಡಿಗರ ರೌದ್ರಾವತಾರ
ಈ ಟ್ವೀಟ್ ಬೆನ್ನಲ್ಲೇ ಸಿಡಿದೆದ್ದ ಕನ್ನಡಿಗರು, ತಮ್ಮ ರಾಜ್ಯಕ್ಕೆ ಒಂದು ಸುಭದ್ರ ರಾಜಧಾನಿಯನ್ನು ನಿರ್ಮಿಸಿಕೊಳ್ಳಲಾಗದವರು ನಮ್ಮ ಹೆಮ್ಮೆಯ ಬೆಂಗಳೂರಿನ ಬಗ್ಗೆ ಮಾತನಾಡಬೇಡಿ ಎಂದು ಆಂಧ್ರ ಮೂಲದವರಿಗೆ ಚಾಟಿ ಬೀಸಿದ್ದಾರೆ. ಈ ಹಿಂದೆ ತಮಿಳುನಾಡು ಮೂಲದವರು ಇಂತಹದ್ದೇ ಪ್ರಯತ್ನ ಮಾಡಿದಾಗ ಅವರಿಗೆ ಯಾವ ರೀತಿ ಬುದ್ಧಿ ಕಲಿಸಲಾಗಿತ್ತೋ, ಅದೇ ಹಾದಿ ನಿಮಗೂ ಕಾದಿದೆ ಎಂದು ಎಚ್ಚರಿಸಿದ್ದಾರೆ. ಬೆಂಗಳೂರು ಎನ್ನುವುದು ಕನ್ನಡದ ರಾಜರು ಕಟ್ಟಿದ ನಗರ, ಕನ್ನಡಿಗರ ಪೂರ್ವಜರು ರಕ್ತ ಸುರಿಸಿದ ಭೂಮಿ. ಇದು ಕೇವಲ ಒಂದು ನಗರವಲ್ಲ, ಇದು ಕರ್ನಾಟಕದ ಹೃದಯ ಎಂದು ಸಾರಿದ್ದಾರೆ.
ಟ್ವೀಟ್ ಸಮರದಲ್ಲಿ ಮುಖಭಂಗ
ಕೆಲವರು ಹೈದರಾಬಾದ್ ಅನ್ನು ಭಾರತದ ಎರಡನೇ ರಾಜಧಾನಿ ಮಾಡಿ, ಅಲ್ಲಿ ಉರ್ದು ಮತ್ತು ಹಿಂದಿ ಮಾತನಾಡುವವರು ಹೆಚ್ಚಿದ್ದಾರೆ ಎಂದು ವ್ಯಂಗ್ಯವಾಡಿದರೆ, ಇನ್ನು ಕೆಲವರು ಬೆಂಗಳೂರು ಕರ್ನಾಟಕದ ಅವಿಭಾಜ್ಯ ಅಂಗ, ಇಲ್ಲಿಯ ಭಾಷೆ ಕನ್ನಡ ಮಾತ್ರ ಎಂದು ಖಡಕ್ ಆಗಿ ಹೇಳಿದ್ದಾರೆ. ಆತಿಥ್ಯ ನೀಡುವ ಕನ್ನಡಿಗರ ಉದಾರತೆಯನ್ನು ದುರ್ಬಲತೆ ಎಂದು ಭಾವಿಸಬೇಡಿ ಎಂದು ಎಚ್ಚರಿಸಿರುವ ಕನ್ನಡಿಗರು, ಕೇಂದ್ರಾಡಳಿತ ಪ್ರದೇಶ ಮಾಡುವ ಮಾತು ಆಡಿದರೆ ಕರ್ನಾಟಕವನ್ನು ಪ್ರತ್ಯೇಕ ರಾಷ್ಟ್ರವನ್ನಾಗಿ ಮಾಡುವ ಹೋರಾಟಕ್ಕೂ ಹಿಂಜರಿಯುವುದಿಲ್ಲ ಎಂಬ ತೀಕ್ಷ್ಣ ಪ್ರತಿಕ್ರಿಯೆಗಳನ್ನು ನೀಡಿದ್ದಾರೆ. ಈ ಹೋರಾಟಕ್ಕೆ ಕೆಲ ತೆಲುಗು ಭಾಷಿಕರು ಕೂಡ ಬೆಂಬಲ ನೀಡಿದ್ದು, ಬೆಂಗಳೂರು ಕನ್ನಡಿಗರದ್ದು ಎಂಬ ಸತ್ಯವನ್ನು ಒಪ್ಪಿಕೊಂಡಿರುವುದು ವಿಶೇಷ.
