ಐಪಿಎಲ್ 15ನೇ ಸೀಸನ್ ನ ಮೊದಲ ಎಲ್ ಕ್ಲಾಸಿಕೊ ಪಂದ್ಯಕ್ಕೆ MI vs CSK ರೆಡಿ….
ಐಪಿಎಲ್ 15ನೇ ಸೀಸನ್ ನ ಮೊದಲ ಎಲ್ ಕ್ಲಾಸಿಕೊ ಪಂದ್ಯಕ್ಕೆ ಡಿವೈ ಪಾಟೀಲ್ ಸ್ಟೇಡಿಯಂ ಗುರುವಾರ ಸಾಕ್ಷಿಯಾಗಲಿದೆ. 5 ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಮತ್ತು 4 ಬಾರಿ ಟೋಫ್ರಿ ವಿಜೇತ ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳು ಮುಖಾಮುಖಿಯಾಗಲಿವೆ.
ಮುಂಬೈ ಆಡಿದ ಎಲ್ಲಾ 6 ಪಂದ್ಯಗಳಲ್ಲಿ ಸೋತಿದ್ದರೆ, ಚೆನ್ನೈ 6 ಪಂದ್ಯಗಳಲ್ಲಿ 5 ರಲ್ಲಿ ಸೋತಿದೆ. ಎರಡೂ ತಂಡಗಳು ಲೀಗ್ನಿಂದ ಹೊರಬೀಳುವ ಭೀತಿಯಲ್ಲಿವೆ. ಮುಂಬೈ ಇದು ಮಾಡು ಇಲ್ಲವೇ ಮಡಿ ಪಂದ್ಯ, ಪ್ಲೇ ಆಫ್ ರೇಸ್ ನಿಲ್ಲಬೇಕೆಂದರೆ ಇಂದಿನ ಪಂದ್ಯವನ್ನ ಗೆಲ್ಲಲೇ ಬೇಕು.
ಇಲ್ಲಿಯವೆರೆಗಿನ ರಡೂ ತಂಡಗಳ ಪರಸ್ಪರ ಮುಖಾಮುಖಿ ನೋಡಿದರೆ ಮುಂಬೈ ಮೇಲುಗೈ ಸಾಧಿಸಿದೆ. ಈ ಎರಡೂ ತಂಡಗಳ ನಡುವಿನ ಕಳೆದ ಐದು ಪಂದ್ಯಗಳಲ್ಲಿ ಮುಂಬೈ 3 ರಲ್ಲಿ ಗೆದ್ದಿದ್ದರೆ ಚೆನ್ನೈ ಎರಡರಲ್ಲಿ ಗೆದ್ದಿದೆ. ಕಳೆದ ಋತುವಿನಲ್ಲಿ ಉಭಯ ತಂಡಗಳು ತಲಾ ಒಂದೊಂದು ಪಂದ್ಯ ಗೆದ್ದಿದ್ದವು.
10 ತಂಡಗಳ ಟೂರ್ನಿಯಲ್ಲಿ ಕೆಳ ಕ್ರಮಾಂಕದಲ್ಲಿರುವ ಎರಡೂ ತಂಡಗಳು ಇಲ್ಲಿಯವರೆಗೆ ಸರಿಯಾದ ತಂಡವನ್ನ ಕಟ್ಟುವಲ್ಲಿ ಎಡವಿದ್ದಾವೆ. ಇದುವರೆಗೆ ಎರಡೂ ತಂಡಗಳು ಐಪಿಎಲ್ನಲ್ಲಿ 32 ಬಾರಿ ಮುಖಾಮುಖಿಯಾಗಿದ್ದು, ಇದರಲ್ಲಿ ಮುಂಬೈ 19 ಮತ್ತು ಚೆನ್ನೈ 13 ಬಾರಿ ಗೆದ್ದಿವೆ.
ಚೆನ್ನೈ ಸೂಪರ್ ಕಿಂಗ್ಸ್ನ ದೊಡ್ಡ ಸಮಸ್ಯೆ ಎಂದರೆ ಅವರ ಕಳಪೆ ಬೌಲಿಂಗ್. ದೀಪಕ್ ಚಹರ್ ಗಾಯದಿಂದಾಗಿ ಚೆನ್ನೈ ಗೆಲುವಿನ ನಿರೀಕ್ಷೆಗೆ ಧಕ್ಕೆಯಾಗುತ್ತಿದೆ. ಏಪ್ರಿಲ್ ಅಂತ್ಯದ ವೇಳೆಗೆ ಅವರು ತಂಡವನ್ನು ಸೇರಿಕೊಳ್ಳುತ್ತಾರೆ ಎಂದು ನಿರೀಕ್ಷಿಸಲಾಗಿತ್ತು ಆದರೆ ಇಡೀ ಋತುವಿನಲ್ಲಿ ಅವರನ್ನು ಹೊರಗಿಡುವುದು ರವೀಂದ್ರ ಜಡೇಜಾ ತಂಡಕ್ಕೆ ದೊಡ್ಡ ಹಿನ್ನಡೆಯಾಗಿದೆ.
ಮುಂಬೈ ಇಂಡಿಯನ್ಸ್ ತಂಡದ ಕುರಿತು ಹೇಳುವುದಾದರೆ ನಾಯಕ ರೋಹಿತ್ ಶರ್ಮಾ ಮತ್ತು ಇಶಾನ್ ಕಿಶನ್ ಆರಂಭಿಕ ಜೋಡಿಯ ವೈಫಲ್ಯ ತಂಡಕ್ಕೆ ಮೇಲೇಳಲಾರದಷ್ಟು ಪೆಟ್ಟು ಕೊಟ್ಟಿದೆ. 15.75 ಕೋಟಿ ಬೆಲೆಗೆ ಇಶಾನ್ ಖರೀದಿಸಿದ ನಿರ್ಧಾರದ ಬಗ್ಗೆ ಪ್ರಶ್ನೆಗಳು ಎದ್ದಿವೆ.
ಪಾಂಡ್ಯ ಬ್ರದರ್ಸ್, ರಾಹುಲ್ ಚಹಾರ್ ಮತ್ತು ಟ್ರೆಂಟ್ ಬೌಲ್ಟ್ ಇಲ್ಲದೆ ಮುಂಬೈ ಬೌಲಿಂಗ್ ತುಂಬಾ ಸಾಧಾರಣ ಎನಿಸುತ್ತಿದೆ. ಎದುರಾಳಿ ತಂಡಗಳ ರನ್ ರೇಟ್ಗೆ ಕಡಿವಾಣ ಹಾಕಬಲ್ಲ ಜಸ್ಪ್ರೀತ್ ಬುಮ್ರಾಗೆ ಸರಿಸಾಟಿಯಾದ ಬೌಲರ್ ಮುಂಬೈಗೆ ಬೇರೆ ಯಾರೂ ಇಲ್ಲ. ಇಂತಹ ಪರಿಸ್ಥಿತಿಯಲ್ಲಿ ಮುಂಬೈ ಚೆನ್ನೈ ವಿರುದ್ಧದ ಪಂದ್ಯದಲ್ಲಿ ಗೆದ್ದು ಖಾತೆ ತೆರೆಯಬೇಕಾದರೆ ಆರಂಭಿಕ ಜೊತೆಯಾಟದ ವೇಳೆ ವೇಗವಾಗಿ ರನ್ ಕಲೆ ಹಾಕುವುದು ತುಂಬಾ ಇಂಪಾರ್ಟೆಂಟ್… ಬಲಿಷ್ಠ ತಳಹದಿಯ ಮೇಲೆ ಮಾತ್ರ ಡೆವಾಲ್ಡ್ ಬ್ರೆವಿಸ್ ಮತ್ತು ಸೂರ್ಯಕುಮಾರ್ ಯಾದವ್ ಅವರಂತಹ ಬ್ಯಾಟ್ಸ್ಮನ್ಗಳು ದೊಡ್ಡ ರನ್ಗಳನ್ನು ಕಟ್ಟಬಲ್ಲರು.
