Commonwealth Games 2022- ಚಿನ್ನದ ನಗೆ ಬೀರಿದ ಪಿ.ವಿ. ಸಿಂಧು
ಭಾರತದ ಪಿ.ವಿ. ಸಿಂಧು ಅವರು ಬರ್ಮಿಂಗ್ ಹ್ಯಾಮ್ ಕಾಮನ್ ವೆಲ್ತ್ ಗೇಮ್ಸ್ ನಲ್ಲಿ ಚಿನ್ನದ ನಗೆ ಬೀರಿದ್ದಾರೆ.
ಮಹಿಳೆಯರ ಸಿಂಗಲ್ಸ್ ನಲ್ಲಿ ಪಿ.ವಿ.ಸಿಂಧು ಅವರು ತನ್ನ ಮೂರನೇ ಪ್ರಯತ್ನದಲ್ಲೇ ಚಿನ್ನದ ನಗೆ ಬೀರಲು ಸಫಲರಾಗಿದ್ದಾರೆ.
ಕ್ರೀಡಾ ಕೂಟದ ಅಂತಿಮ ದಿನವಾದ ಇಂದು ಮಹಿಳೆಯರ ಸಿಂಗಲ್ಸ್ ನಲ್ಲಿ ಪಿ.ವಿ. ಸಿಂಧು ಅವರು 21-15, 21-13ರಿಂದ ಕೆನಡಾದ ಮಿಚೆಲ್ ಲೀ ಅವರನ್ನು ಪರಾಭವಗೊಳಿಸಿದ್ರು.
ಇದರೊಂದಿಗೆ ಪಿ.ವಿ. ಸಿಂಧು ಅವರು 2014ರ ಸೋಲಿಗೆ ಮಿಚೆಲ್ ಲೀ ವಿರುದ್ಧ ಸೇಡು ತೀರಿಸಿಕೊಂಡ್ರು.
2014ರ ಗ್ಲಾಸ್ಗೋವ್ ಕಾಮನ್ ವೆಲ್ತ್ ಗೇಮ್ಸ್ ನ ಸೆಮಿಫೈನಲ್ ನಲ್ಲಿ ಪಿ.ವಿ. ಸಿಂಧು ಅವರನ್ನು ಮಿಚೆಲ್ ಲೀ ಅವರು ಸೋಲಿಸಿದ್ದರು.
ಅಲ್ಲದೆ ಪಿ.ವಿ. ಸಿಂಧು ಅವರು ಕಂಚಿಗೆ ಸಮಧಾನಪಟ್ಟುಕೊಂಡಿದ್ದರು. ಹಾಗೇ 2018ರ ಕಾಮನ್ ವೆಲ್ತ್ ಗೇಮ್ಸ್ ನಲ್ಲಿ ಸಿಂಧು ಅವರು ಬೆಳ್ಳಿ ಪದಕ ಗೆದ್ದಿದ್ದರು.
ಒಟ್ಟಿನಲ್ಲಿ ಎರಡು ಬಾರಿ ಒಲಿಪಿಕ್ ಪದಕ ವಿಜೇತೆ ಪಿ.ವಿ. ಸಿಂಧು ಅವರು ಕಾಮನ್ ವೆಲ್ತ್ ಗೇಮ್ಸ್ ನಲ್ಲಿ ಕಂಚು, ಬೆಳ್ಳಿ ಹಾಗೂ ಚಿನ್ನದ ಪದಕಗಳನ್ನು ತನ್ನ ಗರಿಗೆ ಸೇರಿಸಿಕೊಂಡಿದ್ದಾರೆ.
ಈ ಚಿನ್ನದ ಪದಕಕ್ಕಾಗಿ ನಾನು ಬಹಳ ದಿನಗಳಿಂದ ಕಾಯುತ್ತಿದ್ದೆ. ಕೊನೆಗೂ ನನಗೆ ಬಂಗಾರದ ಪದಕ ಸಿಕ್ಕಿದೆ. ನನಗೆ ಆಗುತ್ತಿರುವ ಖುಷಿಯನ್ನು ಹೇಳಿಕೊಳ್ಳಲು ಸಾಧ್ಯವಾಗುತ್ತಿಲ್ಲ.
ನನ್ನನ್ನು ಬೆಂಬಲಿಸಿದ್ದ ಎಲ್ಲಾ ಪ್ರೇಕ್ಷಕರಿಗೂ ಧನ್ಯವಾದಗಳು. ನನ್ನ ಗೆಲುವಿಗೆ ಅವರೇ ಕಾರಣೀಕರ್ತರು ಎಂದು ಪಿ.ವಿ. ಸಿಂಧು ಅವರು ಹೇಳಿದ್ದಾರೆ.
27ರ ಹರೆಯದ ಪಿ.ವಿ.ಸಿಂಧು ಅವರು ಈ ಬಾರಿಯ ಕಾಮನ್ ವೆಲ್ತ್ ಗೇಮ್ಸ್ ನಲ್ಲಿ ನಿರೀಕ್ಷೆಗಳನ್ನು ಹುಸಿಗೊಳಿಸಲಿಲ್ಲ.
ಬ್ಯಾಡ್ಮಿಂಟನ್ ಟೀಮ್ ವಿಭಾಗದಲ್ಲಿ ಪಿ.ವಿ. ಸಿಂಧು ಅವರು ಬೆಳ್ಳಿ ಪದಕ ಗೆದ್ದುಕೊಂಡಿದ್ದರು.
