ಯುಎಇನಲ್ಲಿ ಬದಲಾಗುತ್ತಿದೆ ಇತಿಹಾಸ, ಸೋತವರೆಲ್ಲ ಗೆಲ್ತಿದ್ದಾರೆ, ಗೆದ್ದವರೆಲ್ಲಾ ಸೋಲ್ತಿದ್ದಾರೆ..? ಟೀಮ್ ಇಂಡಿಯಾಕ್ಕೂ ಇತಿಹಾಸ ತಿರುಗಿಸುವ ಆಸೆ..!
ಟಿ20 ವಿಶ್ವಕಪ್ ನಲ್ಲಿ ಎಲ್ಲವೂ ಅದಲು ಬದಲಾಗುತ್ತಿದೆ. ಟಿ20ಯಲ್ಲಿ ಅಜೇಯ ದಾಖಲೆ ಹೊಂದಿದ್ದವರೆಲ್ಲ ಸೋಲಿನ ಕಹಿ ಉಂಡಿದ್ದಾರೆ. ಸೋತು ಸೋತು ಕಂಗಾಲಾಗಿದ್ದವರೆಲ್ಲ ಮೊದಲ ಗೆಲುವಿನ ರುಚಿ ಕಂಡಿದ್ದಾರೆ. ದುಬೈ, ಶಾರ್ಜಾ ಮತ್ತು ಅಬುದಾಭಿಗಳಲ್ಲಿ ಎಲ್ಲವೂ ಉಲ್ಟಾ ಪಲ್ಟಾ ಆಗುತ್ತಿದೆ. ಅಜೇಯ ದಾಖಲೆಗಳು ಪತನವಾಗಿ, ಸೋಲಿನ ಕೊಂಡಿಗಳು ಕಳಚಿಕೊಳ್ಳುತ್ತಿದೆ.
ಇಂಡಿಯಾ ವಿರುದ್ಧ ಗೆದ್ದ ಪಾಕ್..!
ಟಿ20 ವಿಶ್ವಕಪ್ನಲ್ಲಿ ಟೀಮ್ ಇಂಡಿಯಾ ಪಾಕಿಸ್ತಾನದ ವಿರುದ್ಧ ಎಂದೂ ಸೋತೇ ಇರಲಿಲ್ಲ. 2007ರ ಫೈನಲ್ ಸೇರಿದಂತೆ ಒಟ್ಟು 5 ಪಂದ್ಯಗಳಲ್ಲಿ ಟೀಮ್ ಇಂಡಿಯಾ ಟಿ20 ವಿಶ್ವಕಪ್ ನಲ್ಲಿ ಪಾಕ್ ವಿರುದ್ಧ ಮೇಲುಗೈ ಸಾಧಿಸಿತ್ತು. ಏಕದಿನ ವಿಶ್ವಕಪ್ ನಲ್ಲೂ ಟೀಮ್ ಇಂಡಿಯಾ ಇಲ್ಲಿ ತನಕ ಸೋತಿಲ್ಲ. ವಿಶ್ವಕಪ್ ನಲ್ಲಿ ಪಾಕ್ ಇಂಡಿಯಾ ವಿರುದ್ಧ ಸೋಲಲೆಂದೇ ಆಡುತ್ತೆ ಅನ್ನುವ ಮಾತು ಕೂಡ ಇತ್ತು. ಆದರೆ ಕಳೆದ ಭಾನುವಾರ ಈ ಅಜೇಯ ದಾಖಲೆ ಪತನವಾಗಿದೆ. ಪಾಕಿಸ್ತಾನದ ಸೋಲಿನ ಸರಪಳಿ ತುಂಡಾಗಿದೆ.
ಇಂಗ್ಲೆಂಡ್ ವಿರುದ್ಧ ಸೋತ ವೆಸ್ಟ್ ಇಂಡೀಸ್..!
ಇಂಗ್ಲೆಂಡ್ ಮತ್ತು ವೆಸ್ಟ್ ಇಂಡೀಸ್ ತಂಡಗಳ ಟಿ20 ವಿಶ್ವಕಪ್ ಪಂದ್ಯಗಳ ದಾಖಲೆ ವೆಸ್ಟ್ ಇಂಡೀಸ್ ಪರವಾಗೇ ಇತ್ತು. ವೆಸ್ಟ್ ಇಂಡೀಸ್ ಇಂಗ್ಲೆಂಡ್ ವಿರುದ್ಧ ಟಿ20 ವಿಶ್ವಕಪ್ ನಲ್ಲಿ ಆಡಿದ್ದ ಎಲ್ಲಾ ಪಂದ್ಯಗಳನ್ನು ಗೆದ್ದುಕೊಂಡಿತ್ತು. 2016ರ ಟಿ20 ವಿಶ್ವಕಪ್ ನ ಫೈನಲ್ ಪಂದ್ಯದಲ್ಲೂ ವೆಸ್ಟ್ ಇಂಡೀಸ್ ಇಂಗ್ಲೆಂಡ್ ಅನ್ನು ಮಣಿಸಿತ್ತು. ಆದರೆ ಯುಎಇನಲ್ಲಿ ಈ ದಾಖಲೆ ಮುರಿದು ಹೋಗಿದೆ. ಶನಿವಾರ ವೆಸ್ಟ್ ಇಂಡೀಸ್ ಇಂಗ್ಲೆಂಡ್ ವಿರುದ್ಧ ಮೊತ್ತ ಮೊದಲ ಬಾರಿಗೆ ಟಿ20 ವಿಶ್ವಕಪ್ ನಲ್ಲಿ ಸೋತಿದೆ.
ಲಕ್ನೋ, ಅಹ್ಮದಾಬಾದ್ ಹೊಸ ಐಪಿಎಲ್ ತಂಡಗಳು.
ಕಿವೀಸ್ ವಿರುದ್ಧ ಗೆಲ್ಲುತ್ತಾ ಟೀಮ್ ಇಂಡಿಯಾ..?
ಇದೊಂದು ಪ್ರಶ್ನೆ ಈಗ ಎದ್ದಿದೆ. ಟೀಮ್ ಇಂಡಿಯಾ ನ್ಯೂಜಿಲೆಂಡ್ ತಂಡವನ್ನು ಅಕ್ಟೋಬರ್ 31ರಂದು ಎದುರಿಸಲಿದೆ. ನ್ಯೂಜಿಲೆಂಡ್ ಟಿ20 ವಿಶ್ವಕಪ್ ನಲ್ಲಿ ಇಲ್ಲಿ ತನಕ ಟೀಮ್ ಇಂಡಿಯಾ ವಿರುದ್ಧ ಸೋತೇ ಇಲ್ಲ. ಆದರೆ ಈಗ ಟೀಮ್ ಇಂಡಿಯಾ ಇನ್ನೊಂದು ಪಂದ್ಯವನ್ನು ಕೂಡ ಸೋಲು ಹಾಗಿಲ್ಲ. ಗೆಲುವಿನ ಒತ್ತಡ ಕೂಡ ವಿರಾಟ್ ಬಳಗದ ಮೇಲಿದೆ. ಅಷ್ಟೇ ಅಲ್ಲ ಉಳಿದ ತಂಡಗಳ ಅಜೇಯ ದಾಖಲೆ ಪತನ ಆಗುತ್ತಿರುವುದರಿಂದ ಟೀಮ್ ಇಂಡಿಯಾ ನ್ಯೂಜಿಲೆಂಡ್ ವಿರುದ್ಧ ಗೆಲ್ಲುತ್ತೆ ಅನ್ನುವ ವಿಶ್ವಾಸವಿದೆ. ಒಟ್ಟಿನಲ್ಲಿ ಯುಎಇನಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್ ಪಂದ್ಯಗಳು ಎಲ್ಲವನ್ನೂ ಉಲ್ಟಾಪಲ್ಟಾ ಮಾಡುತ್ತಿದೆ. ಬಹುಶಃ ಹೊಸ ಚಾಂಪಿಯನ್ ಹುಟ್ಟುವ ಎಲ್ಲಾ ಸಾಧ್ಯತೆಯೂ ಕಾಣುತ್ತಿದೆ.
