ಮೆಕ್ಯಾನಿಕ್ ಮಗಳ ಅದ್ಭುತ ಸಾಧನೆ..! ಜೂಡೋದಲ್ಲಿ ಚಿನ್ನ ಗೆದ್ದ ಅಸ್ಮಿತಾ ಡೇ ಯಾರು..?
ಈಕೆ ತ್ರಿಪುರಾದ ಹುಡುಗಿ. ಕಾಮನ್ವೆಲ್ತ್ ಗೇಮ್ಸ್ನ ಜೂಡೋ ವಿಭಾಗದಲ್ಲಿ ಚಿನ್ನದ ಗೆದ್ದ ಹುಡುಗಿ. ಹೆಸರು ಅಸ್ಮಿತಾ ಡೇ. ತ್ರಿಪುರದ ಬೆಲೋನಿಯಾ ಈಕೆಯ ಹುಟ್ಟೂರು. ತಂದೆ ಅರ್ಜುನ್ ಕುಮಾರ್ ಡೇ. ವೃತ್ತಿಯಲ್ಲಿ ಮೆಕ್ಯಾನಿಕ್. ತಾಯಿ ಮುನ್ನಾ ಪತಾರಿ. ಗೃಹಿನಿ. ಸಾಮಾನ್ಯ ಕುಟುಂಬದಲ್ಲಿ ಜನಿಸಿದ್ದ ಅಸ್ಮಿತಾಗೆ, ಆರ್ಥಿಕ ಸಮಸ್ಯೆ ಪ್ರತಿಭೆಗೆ ಅಡ್ಡಿಯನ್ನುಂಟು ಮಾಡಿರಲಿಲ್ಲ. ಮಗಳ ಕನಸುಗಳಿಗೆ ಹೆತ್ತವರು ಬೆನ್ನುಲಬಾಗಿ ನಿಂತಿದ್ದರು.
ಎಳವೆಯಲ್ಲಿ ಅಥ್ಲೆಟಿಕ್ಸ್ನಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿದ್ದ ಅಸ್ಮಿತಾ, 800 ಮೀಟರ್ ಓಡುತ್ತಿದ್ದಳು. ಬಳಿಕ ಕೋಚ್ ಸಲಹೆಯಂತೆ ಜೋಡೋ ಅಭ್ಯಾಸ ನಡೆಸಿದ್ದಳು. ಆರಂಭಿಕ ಹಂತದಲ್ಲಿ ಹಲವು ಸವಾಲುಗಳಿದ್ದವು. ಆದ್ರೆ ಕಠಿಣ ಪರಿಶ್ರಮ ಮತ್ತು ಬದ್ದತೆಯಿಂದ ಹಂತ ಹಂತವಾಗಿ ಮುನ್ನಡೆದಿದ್ದಳು.
2015ರಲ್ಲಿ ತ್ರಿಪುರಾ ಕ್ರೀಡಾ ಶಾಲೆಗೆ ಸೇರಿದ್ದ ಅಸ್ಮಿತಾ, ರಾಷ್ಟ್ರೀಯ ಶಾಲಾ ಕ್ರೀಡಾ ಕೂಟ ಮತ್ತು ಖೇಲೋ ಇಂಡಿಯಾ ಸ್ಪರ್ಧೆಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದಳು. ಪರಿಣಾಮ 2018ರಿಂದ ಭೋಪಾಲ್ನ ಭಾರತೀಯ ಕ್ರೀಡಾ ಪ್ರಾಧಿಕಾರದಲ್ಲಿ ತರಬೇತಿ ಪಡೆಯುತ್ತಿದ್ದಾಳೆ.
ಈಗಾಗಲೇ ಹಲವು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಸ್ಪರ್ಧೆಗಳಲ್ಲಿ ಪದಕ ಗೆದ್ದಿರುವ ಅಸ್ಮಿತಾ, 2026ರ ಕಾಮನ್ವೆಲ್ತ್ ಗೇಮ್ಸ್ನ ಜೂಡೋ ಸ್ಪರ್ಧೆಯಲ್ಲಿ ಮಹಿಳೆಯರ 48 ಕೆಜಿ ವಿಭಾಗದಲ್ಲಿ ಚಿನ್ನದ ನಗೆ ಬೀರಿದ್ದಾಳೆ.
ಜಿದ್ದಾಜಿದ್ದಿನ ಫೈನಲ್ ಸ್ಪರ್ಧೆಯಲ್ಲಿ ಅಸ್ಮಿತಾ 2-1 ಅಂತರದಿಂದ ಕೆನಡಾದ ಹೈಡಿ ಕ್ಯಾಚ್ ವಿರುದ್ದ ಗೆಲುವು ಸಾಧಿಸಿದ್ದಾಳೆ. ಈ ಮೂಲಕ ಜೂಡೋ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆದ್ದ ಮೊದಲ ಭಾರತೀಯ ಸ್ಪರ್ಧಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದಾಳೆ.
