ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೊಮ್ಮೆ ಜಾಗತಿಕ ಮಟ್ಟದಲ್ಲಿ ದೊಡ್ಡ ವಿವಾದವೊಂದನ್ನು ಸೃಷ್ಟಿಸಿದ್ದಾರೆ. ವ್ಯಾಟಿಕನ್ ಧರ್ಮಗುರು ಪೋಪ್ ಲಿಯೋ XIV ಅವರ ಶಾಂತಿ ಸಂದೇಶದ ಬೆನ್ನಲ್ಲೇ, ಟ್ರಂಪ್ ತಾವೇ ಯೇಸು ಕ್ರಿಸ್ತನಂತೆ ಕಾಣುವ ಕೃತಕ ಬುದ್ಧಿಮತ್ತೆ ಸಿದ್ಧಪಡಿಸಿದ ಪೋಟೋವನ್ನು ಹಂಚಿಕೊಳ್ಳುವ ಮೂಲಕ ಧಾರ್ಮಿಕ ಮತ್ತು ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದ್ದಾರೆ.
ವಿವಾದದ ಹಿನ್ನೆಲೆ ಮತ್ತು ಪೋಪ್ ಹೇಳಿಕೆ
ಇತ್ತೀಚೆಗೆ ಪೋಪ್ ಲಿಯೋ XIV ಅವರು ಟ್ರಂಪ್ ಅವರ ಕಠಿಣ ವಲಸೆ ನೀತಿಗಳು ಮತ್ತು ಇರಾನ್ ಮೇಲಿನ ದಾಳಿಯ ನಿಲುವುಗಳನ್ನು ಟೀಕಿಸಿದ್ದರು. ಜೀಸಸ್ ಎಂದಿಗೂ ಯುದ್ಧವನ್ನು ಬೆಂಬಲಿಸುವುದಿಲ್ಲ ಮತ್ತು ಹಿಂಸೆಯ ಮೂಲಕ ಯಾವುದನ್ನೂ ಸಾಧಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದರು. ಯುದ್ಧ ಮಾಡುವವರ ಪ್ರಾರ್ಥನೆಯನ್ನು ದೇವರು ಆಲಿಸುವುದಿಲ್ಲ, ಯೇಸು ಯಾವಾಗಲೂ ದಮನಿತರ ಮತ್ತು ತುಳಿತಕ್ಕೊಳಗಾದವರ ಪರ ಇರುತ್ತಾರೆ ಎಂದು ಶಾಂತಿ ಮತ್ತು ಸಂಯಮದ ಕರೆ ನೀಡಿದ್ದರು. ಇದು ಟ್ರಂಪ್ ಅವರನ್ನು ಕೆರಳಿಸುವಂತೆ ಮಾಡಿದೆ.
ಟ್ರಂಪ್ ಅವರ ವಿವಾದಾತ್ಮಕ ಎಐ ಪೋಸ್ಟ್
ಪೋಪ್ ಅವರ ಹೇಳಿಕೆಗೆ ಟ್ರುತ್ ಸೋಶಿಯಲ್ ಮೀಡಿಯಾ ಮೂಲಕ ತಿರುಗೇಟು ನೀಡಿದ ಟ್ರಂಪ್, ವಿಚಿತ್ರವಾದ ಎಐ ಜನರೇಟೆಡ್ ಪೋಟೋ ಒಂದನ್ನು ಹಂಚಿಕೊಂಡಿದ್ದಾರೆ. ಈ ಚಿತ್ರದಲ್ಲಿ ಟ್ರಂಪ್ ಅವರು ಜನರ ರೋಗಗಳನ್ನು ವಾಸಿ ಮಾಡುವ ಪವಾಡ ಪುರುಷನಂತೆ ಅಥವಾ ಸ್ವತಃ ಯೇಸುವಿನಂತೆ ಬಿಂಬಿತವಾಗಿದ್ದಾರೆ. ಈ ನಡೆ ಕ್ರೈಸ್ತ ಧರ್ಮಗುರುಗಳ ಕೆಂಗಣ್ಣಿಗೆ ಗುರಿಯಾಗಿದ್ದು, ವ್ಯಾಟಿಕನ್ ಮತ್ತು ಶ್ವೇತಭವನದ ನಡುವಿನ ಸಂಬಂಧ ಮತ್ತಷ್ಟು ಹದಗೆಡಲು ಕಾರಣವಾಗಿದೆ.
ಪೋಪ್ ವಿರುದ್ಧ ಟ್ರಂಪ್ ಹರಿಹಾಯ್ದ ರೀತಿ
ಪೋಪ್ ಅವರ ಧಾರ್ಮಿಕ ಉಪದೇಶಗಳಿಗೆ ಕಿಡಿಕಾರಿದ ಟ್ರಂಪ್, ಪೋಪ್ ಅವರಿಗೆ ವಿದೇಶಾಂಗ ನೀತಿಯ ಬಗ್ಗೆ ಕನಿಷ್ಠ ಜ್ಞಾನವೂ ಇಲ್ಲ ಎಂದು ಲೇವಡಿ ಮಾಡಿದ್ದಾರೆ. ನಾನು ಶ್ವೇತಭವನದಲ್ಲಿ ಅಧಿಕಾರದಲ್ಲಿ ಇಲ್ಲದಿದ್ದರೆ ಪೋಪ್ ಅವರು ವ್ಯಾಟಿಕನ್ ನಲ್ಲಿ ಇರುತ್ತಿರಲಿಲ್ಲ. ಅವರು ಅಮೆರಿಕನ್ ಎಂಬ ಕಾರಣಕ್ಕಷ್ಟೇ ಪೋಪ್ ಆಗಿದ್ದಾರೆ ಎಂಬ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. ಪೋಪ್ ಅವರು ತಮ್ಮ ಧಾರ್ಮಿಕ ಕೆಲಸಗಳನ್ನು ಮಾಡಿಕೊಂಡಿರಲಿ, ನಮ್ಮ ರಾಜಕೀಯ ನಿರ್ಧಾರಗಳಲ್ಲಿ ಮಧ್ಯಪ್ರವೇಶ ಮಾಡುವುದು ಬೇಡ ಎಂದು ಗುಡುಗಿದ್ದಾರೆ.
ರಾಜಕೀಯ ಆಯಾಮ ಮತ್ತು ಎಡಪಂಥೀಯರ ಮೇಲೆ ಆರೋಪ
ಪೋಪ್ ಲಿಯೋ ಅವರು ಸಂಪೂರ್ಣವಾಗಿ ಎಡಪಂಥೀಯ ಸಿದ್ಧಾಂತಕ್ಕೆ ಬಲಿಯಾಗಿದ್ದಾರೆ ಎಂದು ಟ್ರಂಪ್ ದೂರಿದ್ದಾರೆ. ಇದೇ ವೇಳೆ ಪೋಪ್ ಅವರ ಸಹೋದರ ನನ್ನ ಎಂಎಜಿಎ (ಮ್ಯಾಗಾ) ಚಳುವಳಿಯನ್ನು ಬೆಂಬಲಿಸುತ್ತಾರೆ, ನನಗೆ ಅವರೇ ಇಷ್ಟ ಎಂದು ಹೇಳುವ ಮೂಲಕ ಪೋಪ್ ಅವರ ಕುಟುಂಬದ ವಿಚಾರವನ್ನೂ ಎಳೆದು ತಂದಿದ್ದಾರೆ. ಸದ್ಯ ಟ್ರಂಪ್ ಅವರ ಈ ನಡೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದೊಡ್ಡ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ.
