ಚೆನ್ನೈ: ಬಾಂಗ್ಲಾದೇಶದ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್ ನಲ್ಲಿ ಭಾರತ ಅದ್ಭುತ ಪ್ರದರ್ಶನ ನೀಡುತ್ತಿದೆ. ಎರಡನೇ ಇನ್ನಿಂಗ್ಸ್ ನಲ್ಲಿ ಬಾರತೀಯ ಆಟಗಾರರು ಉತ್ತಮ ಪ್ರದರ್ಶನ ತೋರಿದ್ದಾರೆ.
ಶುಭಮನ್ ಗಿಲ್, ರಿಷಭ್ ಪಂತ್ ಶತಕ ನಂತರ ಅಶ್ವಿನ್ (Ashwin) ಬೌಲಿಂಗ್ನಿಂದ ಮೊದಲ ಟೆಸ್ಟ್ನಲ್ಲಿ ಭಾರತ (Team India) ಬಿಗಿ ಹಿಡಿತ ಹೊಂದಿದೆ. ಹೀಗಾಗಿ ಬಾಂಗ್ಲಾದೇಶಕ್ಕೆ (Bangladesh) ಗೆಲ್ಲಲು 515 ರನ್ಗಳ ಕಠಿಣ ಸವಾಲು ನೀಡಲಾಗಿದೆ. 4 ವಿಕೆಟ್ ನಷ್ಟಕ್ಕೆ 287 ರನ್ ಗಳಿಸಿದ್ದಾಗ ಭಾರತ ಎರಡನೇ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು. ಕಠಿಣ ಸವಾಲನ್ನು ಬೆನ್ನಟ್ಟಿದ ಬಾಂಗ್ಲಾದೇಶ 158 ರನ್ ಗಳಿಸಿ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡಿದೆ. ಹೀಗಾಗಿ ಭಾರತದ ಗೆಲುವಿಗೆ ಇನ್ನೂ 6 ವಿಕೆಟ್ ಗಳು ಬೇಕಾಗಿವೆ.
ಮೊದಲ ಇನ್ನಿಂಗ್ಸ್ನಲ್ಲಿ ಶತಕ ಸಿಡಿಸಿ ಮಿಂಚಿದ್ದ ಅಶ್ವಿನ್ ಎರಡನೇ ಇನ್ನಿಂಗ್ಸ್ ಮೂರು ವಿಕೆಟ್ ಪಡೆಯುವ ಮೂಲಕ ಮಿಂಚಿದ್ದಾರೆ. ಎರಡನೇ ದಿನ 33 ರನ್ ಗಳಿಸಿದ್ದ ಶುಭಮನ್ ಗಿಲ್ (Shubman Gill ) ಮತ್ತು 12 ರನ್ ಗಳಿಸಿದ್ದ ರಿಷಭ್ ಪಂತ್ (Rishabh Pant) ಇಂದು ಶತಕ ಗಳಿಸಿದ ಸಾಧನೆ ಮಾಡಿದ್ದಾರೆ. ಇಬ್ಬರೂ 4ನೇ ವಿಕೆಟ್ ಗೆ 217 ಎಸೆತಗಳಲ್ಲಿ 167 ರನ್ ಜೊತೆಯಾಟ ನೀಡಿದ್ದಾರೆ.
ರಿಷಭ್ ಪಂತ್ 128 ಎಸೆತಗಳಲ್ಲಿ 109 ರನ್ (13 ಬೌಂಡರಿ, 4 ಸಿಕ್ಸ್) ಗಳಿಸಿ ಔಟ್ ಆದರು. ಶುಭಮನ್ ಗಿಲ್ ಔಟಾಗದೇ 119 ರನ್ (176 ಎಸೆತ, 10 ಬೌಂಡರಿ, 4 ಸಿಕ್ಸರ್) ಗಳಿಸಿದರು. ಕೆಎಲ್ ರಾಹುಲ್ ಔಟಾಗದೇ 22 ರನ್ (19 ಎಸೆತ, 4 ಬೌಂಡರಿ) ಸಿಡಿಸಿದ್ದಾರೆ. ಗಿಲ್ ಹಾಗೂ ರಾಹುಲ್ ಮುರಿಯದ 5ನೇ ವಿಕೆಟ್ ಗೆ 51 ಎಸೆತಗಳಲ್ಲಿ 53 ರನ್ ಗಳಿಸಿದ್ದಾರೆ.
