ಲಕ್ನೋ: ಇತ್ತೀಚೆಗೆ ಪ್ರತಿಯೊಬ್ಬರೂ ಆನ್ ಲೈನ್ ನಲ್ಲಿಯೇ ವ್ಯವಹಾರ ಮಾಡುವುದನ್ನು ಇಷ್ಟ ಪಡುತ್ತಿದ್ದಾರೆ. ಸುರಕ್ಷತೆಯ ದೃಷ್ಟಿಯಿಂದ ಅಲ್ಲಿ ಸಾಕಷ್ಟು ಮೋಸವಾದರೂ ಹೆಚ್ಚಿನ ವ್ಯಕ್ತಿಗಳು ಆನ್ ಲೈನ್ ನಲ್ಲಿಯೇ ಆರ್ಡರ್ ಮಾಡುತ್ತಿದ್ದಾರೆ. ಹೀಗೊಬ್ಬ ರೈತ ಆರ್ಡರ್ ಮಾಡಲು ಹೋಗಿ ಹಣ ಕಳೆದುಕೊಂಡಿದ್ದಾರೆ.
ರೈತರೊಬ್ಬರು ಆನ್ ಲೈನ್ ನಲ್ಲಿ ಎಮ್ಮೆ ಖರೀದಿಸಲು ಹೋಗಿ ಹಣ ಕಳೆದುಕೊಂಡಿದ್ದಾರೆ. ಈ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ. ಎಮ್ಮೆ (Buffalo) ಖರೀದಿ ಮಾಡಲು ಆನ್ ಲೈನ್ನಲ್ಲಿ ಆರ್ಡರ್ ಮಾಡಿದ ಹಾಲಿನ ವ್ಯಾಪಾರಿಯೇ ಹಣ ಕಳೆದುಕೊಂಡವರು. ರಾಯ್ ಬರೇಲಿಯ (Rae Bareli) ಸುನಿಲ್ ಕುಮಾರ್ ಯೂಟ್ಯೂಬ್ ನಲ್ಲಿ ಎಮ್ಮೆಯ ವಿಡಿಯೊ ನೋಡಿ ಆರ್ಡರ್ ಮಾಡಿದ್ದಾರೆ.
ವಿಡಿಯೊದಲ್ಲಿ ತೋರಿಸಿದ ನಂಬರ್ ನೊಂದಿಗೆ ಮಾತನಾಡಿದ್ದಾರೆ. ಅವರು ಎಮ್ಮೆ ಉತ್ತಮ ತಳಿಯದ್ದು, ಪ್ರತಿದಿನ 18 ಲೀಟರ್ ಹಾಲು ಕೊಡುತ್ತದೆ ಎಂದು ಭರವಸೆ ನೀಡಿದ್ದಾರೆ. ಆನಂತರ ಅದರ ಬೆಲೆ 55 ಸಾವಿರ ರೂ. ಎಂದು ಹೇಳಿದ್ದಾರೆ. ಅಲ್ಲದೇ, ಖರೀದಿಗೂ ಮುನ್ನ 10 ಸಾವಿರ ರೂ. ಪಾವತಿಸಬೇಕು ಎಂದು ಹೇಳಿದ್ದಾರೆ. ಹೀಗಾಗಿ ರೈತ ಮುಂಗಡ ಹಣ ಕಳುಹಿಸಿದ್ದಾರೆ. ಕೂಡಲೇ ರೈತ ಹಣ ವರ್ಗಾಯಿಸಿದ್ದಾರೆ. ಆದರೆ, ಎಮ್ಮೆಯನ್ನು ಮಾತ್ರ ಕಳುಹಿಸಿಲ್ಲ. ಹೀಗಾಗಿ ಕರೆ ಮಾಡಿದಾಗ ಮತ್ತೆ 25 ಸಾವಿರ ರೂ. ನೀಡುವಂತೆ ಹೇಳಿದ್ದಾರೆ. ಆಗ ರೈತ ಮೋಸ ಹೋಗಿದ್ದು ತಿಳಿದು ಹಣ ಕಳುಹಿಸಿಲ್ಲ. ಈ ಕುರಿತು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.